༢༠༡༧ ཟླ་ ༤ ཚེས་ ༡༣ རེས་གཟའ་ཕུར་བུ།

༄༅། །ཕྱི་ལོ་ ༢༠༡༧ ཟླ་ ༤ ཚེས་ ༧ དང་ ༨ བཅས་ཉིན་གྲངས་གཉིས་རིང་རྒྱ་གར་གྲོས་ཚོགས་འཐུས་མི་སྐུ་ཞབས་ཨ་ནུ་རཱག་ཐ་ཀུར་Anurag Thakur ལགས་ཀྱི་གོ་སྒྲིག་དང་ཨ་རི་རོགས་ཚོགས་ USAID ཀྱིས་དཔལ་འབྱོར་མཐུན་འགྱུར་ཐོག རྡ་རམ་ས་ལར་གློ་ནད་ཀྲི་བི་ནད་གཞི་རྩ་འགོག་གཏོང་ཐབས་དང་འབྲེལ་བའི་ལྷན་ཚོགས་ཐེངས་དང་པོ་ཚོགས་ཡོད།

ལྷན་ཚོགས་འདིའི་དམིགས་ཡུལ་གཙོ་བོ་ནི་མང་ཚོགས་ཁྲོད་ཀྲི་བི་ནད་གཞིའི་སྐོར་གོ་རྟོགས་སྤེལ་བ་བརྒྱུད་ནད་གཞི་འདི་འགོག་ཐབས་ཆེད་གདོང་ལེན་ཤུགས་ཆེ་བྱེད་རྒྱུ་དང་། མཉམ་འབྲེལ་རྒྱལ་ཚོགས་ཀྱི་རྒྱུན་གནས་ཐུབ་པའི་ཡར་རྒྱས་ཀྱི་ལས་གཞི་ Sustainable Development Goals ཞེས་པས་ཕྱི་ལོ་ ༢༠༣༠ བར་ཀྲི་བི་ནད་གཞི་རྩ་འགོག་གཏོང་རྒྱུའི་དམིགས་ཚད་མ་སྒྲུབ་པའི་ལོ་ལྔ་གོང་རྒྱ་གར་ནང་ཀྲི་བི་རྩ་འགོག་གཏོང་ཆེད་ལས་གཞི་ལག་བསྟར་བྱེད་དགོས་པའི་འབོད་སྐུལ་ཞུ་རྒྱུའི་ཆེད་བཅས་ཡིན་འདུག

ལྷན་ཚོགས་ཐོག་བོད་མིའི་སྒྲིག་འཛུགས་ཀྱི་འཕྲོད་བསྟེན་བཀའ་བློན་ཆོས་སྐྱོང་དབང་ཕྱུག་མཆོག་དང་། དྲུང་ཆེ་ཚེ་རྒྱལ་ལགས། འཕྲོད་བསྟེན་དང་བདེ་ལེགས་སྨན་ཁང་གི་ལས་བྱེད་བཅས་མཉམ་ཞུགས་གནང་ཡོད།

དེ་བཞིན་ལྷན་ཚོགས་སྐབས་རྒྱ་གར་དབུས་གཞུང་གི་འཕྲོད་བསྟེན་དང་ཁྱིམ་ཚང་བདེ་དོན་བློན་ཆེན་གཞོན་པ་ཇེ་པི་ན་ཌ་J P Nadda མཆོག་དང་། ཧི་མ་ཅལ་མངའ་སྡེའི་འཕྲོད་བསྟེན་བློན་ཆེན་ཀོལ་སིངྒ་ཐ་ཀུར་ Shri Kaul Singh Thakur མཆོག རྒྱ་གར་དབུས་གཞུང་གི་སྒྱུ་རྩལ་ཡར་རྒྱས་དང་ཡར་ཐོན་ཚོང་ལས་ཀྱི་བློན་ཆེན་གཞོན་པ་སྐུ་ཞབས་ Rajiv Pratap Rudy མཆོག པན་ཇབ་མངའ་སྡེའི་གཙོ་འཛིན་ Governor སྐུ་ཞབས་ V P Singh Badnore མཆོག དེ་བཞིན་སྨན་པ་དང་མཁས་དབང་། རྒྱ་གར་གྱི་གློག་བརྙན་འཁྲབ་སྟོན་པ་སོགས་མཉམ་ཞུགས་ཀྱིས་ཀྲི་བི་ནད་གཞི་རྩ་འགོག་གཏང་རྒྱུའི་ལས་གཞི་ལག་བསྟར་བྱེད་ཕྱོགས་ཀྱི་ཐབས་བྱུས་སྐོར་གོ་བསྡུར་གནང་ཡོད།
ལྷན་ཚོགས་མཇུག་བསྡོམས་སྐབས་རྟེན་འབྲེལ་མཚོན་ཆེད་ཚོགས་བཅར་བ་ནང་ཁུལ།  དབར་དབྱུག་རྩེད་སྤོ་ལོའི་འགྲན་བསྡུར་གནང་རྒྱུ་དང་།

རྩེད་འགྲན་རྒྱ་གར་གཞུང་འབྲེལ་གཟུགས་མཐོང་བརྙན་འཕྲིན་བརྒྱུད་མི་འདྲ་བ་གསུམ་སྟེ།   Doordarshan, Lok Sabha, Rajya Sabha བཅས་ནང་ཐད་གཏོང་ཞུས།  ཐེངས་འདིའི་རྩེད་འགྲན་གྱི་དམིགས་ཡུལ་ཀྲི་བི་རྩ་མེད་བཟོ་རྒྱུ་ཡིན་སྟབས། རྩེད་འགྲན་གྱི་མིང་བྱང་དུ།  Time to Bowl Out TB ཞེས་པབཏགས་ཡོད་པ་བཅས།།