༢༠༡༧ ཟླ་ ༤ ཚེས་ ༡ རེས་གཟའ་སྤེན་པ།
༄༅། །ཕྱི་ལོ་ ༢༠༡༧ ཟླ་ ༣ ཚེས་ ༣༡ ཉིན་རྒྱ་གར་བྱང་ཕྱོགས་རཱཇ་པུར་དུ་རྟེན་གཞི་བྱས་པའི་སྒྲོལ་མ་ཕོ་བྲང་དུ་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་བཀའ་ཤག་གི་ཚབ་ཞུས་ཏེ་འཁོན་རིགས་བསྟན་པའི་མངའ་བདག་སྐྱབས་མགོན་ས་སྐྱ་གོང་མ་ཁྲི་ཆེན་རྡོ་རྗེ་འཆང་རིན་པོ་ཆེ་མཆོག་ལ་བརྟན་བཞུགས་བསྟར་འབུལ་ཞུས་འདུག སྐབས་དེར་འཕྲོད་བསྟེན་བཀའ་བློན་ཆོས་སྐྱོང་དབང་ཕྱུག་མཆོག་ལྷན་བཅར་ཞུས་ཡོད།
དེ་ཡང་ཐེངས་འདིར་དཔལ་ལྡན་བཀའ་ཤག་ནས་ས་སྐྱ་གོང་མ་རིན་པོ་ཆེ་མཆོག་ལ་བརྟན་བཞུགས་བསྟར་འབུལ་ཞུ་དགོས་དོན་གཙོ་བོ་ནི། གོང་མ་རིན་པོ་ཆེ་མཆོག་ནས་བསྟན་འགྲོའི་ཕན་བདེའི་སླད་ངལ་བ་ཁྱད་བསད་ཐོག་ད་བར་བསྟན་པ་སྤྱི་དང་ཡང་སྒོས་དཔལ་ས་སྐྱ་པའི་བསྟན་པ་འཛིན་སྐྱོང་སྤེལ་གསུམ་གྱི་མཛད་འཕྲིན་ལ་ཆེས་བསྟོད་དང་བཀའ་དྲིན་རྗེས་དྲན་ཞུ་སླད་ཡིན་འདུག
ལྷག་པར་ཉེ་ལམ་ས་སྐྱ་གོང་མ་རིན་པོ་ཆེ་མཆོག་གིས་དཔལ་ས་སྐྱའི་ཁྲི་འཛིན་གྱི་ཐུགས་འགན་དེ་ཉིད་ས་སྐྱའི་ཁྲི་འཛིན་ ༤༢ པ་སྐྱབས་མགོན་གོང་མ་རཏྣ་བཛྲ་རིན་པོ་ཆེ་ངག་དབང་ཀུན་དགའ་བློ་གྲོས་དབང་ཕྱུག་རིན་ཆེན་འཇིགས་མེད་འཕྲིན་ལས་མཆོག་ལ་རྩིས་སྤྲོད་གནང་ཡོད།
དེ་བཞིན་སྲིད་སྐྱོང་མཆོག་གིས། སྤྱིར་ས་སྐྱ་གོང་མ་རིན་པོ་ཆེ་མཆོག་ད་ལྟའི་ཆར་གོང་མ་བདག་ཁྲིའི་ཐུགས་འགན་བཞེས་ཀྱི་མེད་ཀྱང་། དད་ལྡན་འདུལ་བྱ་མང་ཚོགས་རྣམས་ལ་མུ་མཐུད་གཟབ་གསལ་གསུང་གི་བདུད་བརྩི་སྩལ་རྒྱུའི་གསོལ་འདེབས་ཞུས་པ་དང་སྦྲགས། གོང་མ་མཆོག་གང་ཉིད་ཀྱི་སྐུའི་འཕྲོད་བཞེས་དྭང་གསལ་ཡོང་བའི་བཀའ་ཤག་ནས་གདུང་ཤུགས་དྲག་པོས་སྨོན་ལམ་གསོལ་འདེབས་ཞུ་རྒྱུ་ཡིན་སྐོར་སྙན་སེང་ཞུས།
སྐབས་དེར་ས་སྐྱ་གོང་མ་རིན་པོ་ཆེ་མཆོག་ནས་ཀྱང་ད་ལྟའི་ཆར་སྐུའི་འཕྲོད་བཞེས་ཐོག་ཐུགས་ཁྲལ་གནང་མི་དགོས་པར་སྐུ་ཁམས་གསལ་ཐང་ཡིན་པ་དང་། དད་ལྡན་འདུལ་བྱ་རྣམས་དཀར་ཕྱོགས་ཀྱི་ལམ་ལ་མུ་མཐུད་དཀྲི་གནང་རྒྱུའི་ཞལ་བཞེས་གནང་། དེ་བཞིན་རིན་པོ་མཆོག་གིས་བོད་མིའི་སྒྲིག་འཛུགས་བཀའ་ཤག་གིས་གནས་མཆོག་རྡོ་རྗེ་གདན་དུ་དཔལ་དུས་ཀྱི་འཁོར་ལོའི་དབང་ཆེན་ཐེངས་ ༣༤ པ་གོ་སྒྲིག་ཧ་ཅང་ལེགས་པོ་དང་ཚགས་ཚུད་ངང་གྲུབ་པར་བསྔགས་བརྗོད་གནང་ཡོད་པ་མ་ཟད།
དུས་འཁོར་དབང་ཆེན་ཐེངས་ ༣༤ དེ་ཉིད་ཉེ་ལམ་དུས་འཁོར་དབང་ཆེན་གཞན་དང་བསྡུར་བ་ཡིན་ན་གོ་སྒྲིག་ཚགས་ཚུད་ཤོས་གྲས་ཤིག་ཆགས་ཡོད་སྐོར་གསུངས་པ་དང་འབྲེལ་བཀའ་ཤག་དང་བོད་མིའི་སྒྲིག་འཛུགས་ལ་འཚམས་འདྲི་གནང་ཡོད།
སྐབས་དེར་སྲིད་སྐྱོང་མཆོག་གིས་ཐེངས་འདིའི་དུས་དབང་ཚགས་ཚུད་བྱུང་དགོས་དོན་ནི་བོད་མིའི་སྒྲིག་འཛུགས་ཀྱི་སྲི་ཞུ་བ་རྣམ་པས་ཕྱར་གྲུ་མཉམ་འདེགས་ཀྱི་འབད་བརྩོན་གནང་བར་བརྟེན་ནས་ཡིན་པ་འགྲེལ་བརྗོད་གནང་ཡོད།
དེ་རྗེས་སྲིད་སྐྱོང་མཆོག་ས་སྐྱ་དགོན་པར་སྐྱབས་མགོན་གོང་མ་རཏྣ་བཛྲ་རིན་པོ་ཆེ་མཆོག་གི་བཀའ་ཆོས་ཞུ་བར་བཅར་ཡོད། སྐབས་དེར་སྲིད་སྐྱོང་མཆོག་གིས་སྐྱབས་མགོན་གོང་མ་རཏྣ་བཛྲ་རིན་པོ་ཆེ་མཆོག་ལ་འཚམས་འདྲིའི་མཇལ་དར་ཕུལ་ཡོད་པ་མ་ཟད། བོད་མིའི་འཐབ་རྩོད་དང་བདེ་དོན་ཆེད་ཐུགས་སྨོན་སྐྱབས་འཇུག་ཀྱང་ཞུས་ཡོད།།
