༢༠༡༧ ཟླ་ ༤ ཚེས་ ༦ རེས་གཟའ་ཕུར་བུ།
༄༅། །འདི་གའི་ཆེད་གཉེར་གསར་འགོད་པ་ངག་དབང་ཐོགས་མེད་ལགས་ཀྱིས་ས་གནས་ནས་བཏང་འབྱོར་ནང་འཁོད་དོན། ཕྱི་ལོ་ ༢༠༡༧ ཟླ་ ༤ ཚེས་ ༦ ཉིན་གྱི་སྔ་དྲོ་ཆུ་ཚོད་ ༩།༣༠ ཐོག་༸གོང་ས་༸སྐྱབས་མགོན་ཆེན་པོ་མཆོག་དང་ཨ་རུ་ནཱ་ཅལ་མངའ་སྡེའི་སྲིད་སྐྱོང་སྐུ་ཞབས་པདྨ་ན་བྷ་ཨ་ཅཱརྱ་མཆོག སྤྱི་ཁྱབ་བློན་ཆེན་སྐུ་ཞབས་པདྨ་མཁའ་འགྲོ་མཆོག མངའ་སྡེའི་གྲོས་ཚོགས་ཀྱི་ཚོགས་གཙོ་སྐུ་ཞབས་ཊི་ཨེན་ཐོང་ཏོག་ T.N Thongdok མཆོག སྡི་རང་ས་གནས་གྲོས་ཚོགས་འཐུས་མི་སྐུ་ཞབས་ཕུར་པ་ཚེ་རིང་མཆོག འབུམ་ལ་ས་གནས་གྲོས་ཚོགས་འཐུས་མི་ཇབ་པུ་དེ་རུ་མཆོག Jabpu Deru མཆོག ཨ་རུ་ནཱ་ཅལ་མངའ་སྡེའི་ཆོས་རིག་འགན་འཛིན་སྐུ་ཞབས་འཇམ་དཔལ་མཆོག ནུབ་ཀེ་མེང་ West Kemeng Distt རྫོང་དཔོན་ལྕམ་སྐུ་སོ་ནལ་སྭ་རུབ་ Sonal Swaroop མཆོག རྒྱ་གར་རྒྱལ་ཡོངས་བོད་དོན་རྒྱབ་སྐྱོར་ཚོགས་པའི་ཚོགས་གཙོ་རིན་ཆེན་མཁའ་འགྲོ་ཁིར་མེ་མཆོག གཞན་ཡང་རྟ་དབང་དགོན་པའི་མཁན་ལས་ཟུར་རྣམ་པ་དང་། རྣམ་གྲྭ་མཁན་པོ་ཁྲོམ་ཐོག་རིན་པོ་ཆེ་མཆོག་སོགས་ཀྱིས་གཙོས་བླ་སྤྲུལ་དགེ་བཤེས་རྣམ་པ་དང་། སྡི་རང་ས་གནས་གཙོ་བོར་གྱུར་བའི་ཉེ་འཁོར་གྲོང་གསེབ་ཆེ་ཆུང་ཁག་ནས་དད་ལྡན་ཆོས་ཞུ་བ་ཉིས་ཁྲི་ལྷག་འདུ་འཛོམས་ཐོག་༸གོང་ས་མཆོག་གིས་སྡི་རང་ས་གནས་སུ་རྟེན་གཞི་བྱས་པའི་ཐུབ་གསུང་དར་རྒྱས་གཙུག་ལག་ཁང་གསར་བཞེངས་ལེགས་པར་གྲུབ་པའི་རྟེན་དང་བརྟེན་པ་བཅས་པར་རབ་གནས་བཀའ་དྲིན་སྩལ་རྗེས། གཙུག་ལག་ཁང་གི་གཙོ་འཛིན་སྤྲུལ་སྐུ་ཐུབ་བསྟན་རིན་པོ་ཆེ་མཆོག་གིས་མགོན་པོ་གང་ཉིད་མཆོག་ལ་མཎྜལ་རྟེན་གསུམ་འདེགས་འབུལ་ཞུས།
དེ་ནས་མོན་ཡུལ་གྱི་མི་སྐྱ་ཕོ་མོ་ཁག་གཅིག་གིས་རྟགས་གསལ་སྤྱན་བསྟར་ཞུས་པར་༸གོང་ས་མཆོག་ཐུགས་ཧ་ཅང་དགྱེས་ཚོར་མཛད་པ་མ་ཟད། རྟགས་གསལ་གཏོང་མཁན་རྣམས་སྡིངས་ཆའི་སྟེང་བཀའ་འགུག་མཛད་ནས་རེ་རེ་བཞིན་མཇལ་ཁ་དང་ཁྱེད་རང་ཚོས་རྟགས་གསལ་ཉིན་ག་ཚོད་བསླབས་པ་ཡིན། ཞེས་བཀའ་རྩད་མཛད་པར་ཟླ་བ་གཉིས་གོང་ནས་རྟགས་གསལ་བསླབས་ཡོད་སྐོར་སྙན་སྒྲོན་ཞུས་པར། ༸གོང་ས་མཆོག་གིས། ཕལ་ཆེར་མོན་པའི་ཡུལ་པ་ཚོས་རྟགས་གསལ་བཏང་བ་ཐོག་མ་ཆགས་ཡོད། ཧ་ཅང་ཡག་པོ་རེད། ཅེས་ཐུགས་དགྱེས་ཚོར་ཆེན་པོ་མཛད་རྗེས་ཁོང་རྣམས་དང་ལྷན་སྐུ་པར་ལྷན་སྒྲོན་མཛད་རྗེས་སྤྲུལ་སྐུ་ཐུབ་བསྟན་རིན་པོ་ཆེ་མཆོག་གིས་ཕེབས་བསུའི་གསུང་བཤད་དང་ལས་བསྡོམས་སྙན་སྒྲོན་ཞུས། དེ་ནས་མངའ་སྡེའི་གྲོས་ཚོགས་ཀྱི་ཚོགས་གཙོ་མཆོག་གིས་གསུང་བཤད་གནང་བསྟུན། མངའ་སྡེའི་སྲིད་སྐྱོང་མཆོག་གིས་གསུང་བཤད་གནང་།
དེ་རྗེས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་སློབ་སྩལ་རྗེས་དབུས་གྲོས་ཚོགས་ཀྱི་འཕྲོད་བསྟེན་དྲུང་ཆེ་ཕུར་པ་ཚེ་རིང་མཆོག་གིས་ཐུགས་རྗེ་ཆེ་ཞུའི་གསུང་བཤད་གནང་བསྟུན་མཛད་སྒོ་ལེགས་པར་གྲུབ་ཡོད།
སྤྱིར་དེ་ཉིན་སྔ་དྲོ་ཆུ་ཚོད་ ༩ ཙམ་ལ་རྒྱ་གར་དབུས་གཞུང་གི་ནང་སྲིད་བློན་ཆེན་གཞོན་པ་སྐུ་ཞབས་ཀི་རེན་རི་ཇི་ཇུ་ Kiren Rijiju མཆོག་ཐུབ་གསུང་དར་རྒྱས་གླིང་དུ་ཕེབས་ནས་༸གོང་ས་མཆོག་དང་ལྷན་མཇལ་འཕྲད་མཛད་རྗེས་མཛད་སྒོ་འཚོགས་ཡུལ་གཙུག་ལག་ཁང་དུ་འཁྱུག་ཙམ་ཕེབས་གཟིགས་གནང་བ་མ་གཏོགས་མཛད་སྒོར་དངོས་སུ་ལྷན་ཞུགས་གནང་མེད་པ་བཅས།།
མཆན། པར་ལེན་པ་ཕྱི་དྲིལ་རྒྱ་ཡིག་ཚན་པའི་ལས་བྱེད་འཇམ་དབྱངས་ཚེ་རིང་ལགས།
