༢༠༡༧ ཟླ་ ༤ ཚེས་ ༢༤ རེས་གཟའ་ཟླ་བ།
༄༅། །འཇམ་མགོན་རྒྱལ་བའི་རྒྱལ་ཚབ་དགའ་ལྡན་ཁྲི་ཐོག་ ༡༠༣ ཁྲི་ཆེན་རྡོ་རྗེ་འཆང་རྗེ་བཙུན་བློ་བཟང་བསྟན་འཛིན་དཔལ་བཟང་པོ་མཆོག་ཕྱི་ཟླ་ ༤ ཚེས་ ༢༡ རེས་གཟའ་པ་སངས་མཚན་མོའི་ཆུ་ཚོད་ ༡༡།༤༥ ཐོག་རྒྱལ་ས་ལྡི་ལིར་རྟེན་གཞི་བྱས་པའི་མེག་སི་Max Hospital སྨན་ཁང་གདུལ་བྱ་རྟག་འཛིན་ཅན་རྣམས་ཆོས་ལ་བསྐུལ་ཕྱིར་རེ་ཞིག་དགོངས་པ་ཆོས་དབྱིངས་སུ་ཐིམ་ཚུལ་བསྟན་པའི་ཡིད་སྐྱོའི་གནས་ཚུལ་ཐོན་མ་ཐག བཀའ་ཤག་ལྷན་རྒྱས་ཐུགས་ཕམ་དང་བཅས་བོད་མིའི་སྒྲིག་འཛུགས་ཀྱི་ཆོས་རིག་ལས་ཁུངས་བརྒྱུད་སྐུ་བཅར་ཞབས་འབྲིང་རྣམས་ལ་ཐུགས་གསོ་དང་འབྲེལ་ལྡི་ལི་སྐུ་ཚབ་དོན་ཁང་ནས་ཕྱག་རོགས་མཐུན་འགྱུར་ཇི་དགོས་ཞུས་ཤིང་། སྐུ་ཞི་བར་གཤེགས་པ་སྐྱབས་རྗེ་ཁྲི་ཆེན་རྡོ་རྗེ་འཆང་མཆོག་གང་གི་ཐུགས་ཀྱི་བཞེད་དགོངས་མཐའ་དག་ཡོངས་སུ་རྫོགས་པ་དང་སླར་ཡང་ཞིང་འདིའི་བསྟན་འགྲོའི་དཔལ་མགོན་དུ་མཚན་དཔེའི་དཀྱིལ་འཁོར་མྱུར་དུ་བཞད་ཕྱིར་བོད་མིའི་སྒྲིག་འཛུགས་ཀྱི་འགོ་ལས་ཡོངས་ནས་ཕྱི་ལོ་ ༢༠༡༧ ཟླ་ ༤ ཚེས་ ༢༤ ཉིན་གུང་ཆུ་ཚོད་ ༡༢ ཐོག་ལས་བྱེད་གསོལ་ཚང་གི་གཉའ་ཁྲི་ཚོགས་ཁང་དུ་བོད་མིའི་སྒྲིག་འཛུགས་ཀྱི་མང་གཙོ་ཀ་བ་གསུམ་གྱི་མཛད་གཙོ་རྣམ་པས་དབུས་བོད་མི་མང་སྤྱི་འཐུས་རྒྱུན་ལས་རྣམ་པ་དང་། ལྷན་ཁང་ཁག་གི་དྲུང་ཆེ་ཆུང་རྣམ་པ།
དེ་བཞིན་སྲི་ཞུའི་ལས་བྱེད་བཅས་ཚང་འཛོམས་ཐོག་བཀའ་དྲུང་སྟོབས་རྒྱལ་ཚེ་རིང་ལགས་ཀྱིས་འཇམ་མགོན་རྒྱལ་བའི་རྒྱལ་ཚབ་དགའ་ལྡན་ཁྲི་ཐོག་ ༡༠༣ ཁྲི་ཆེན་རྡོ་རྗེ་འཆང་རྗེ་བཙུན་བློ་བཟང་བསྟན་འཛིན་དཔལ་བཟང་པོ་མཆོག་གི་མཛད་རྣམ་སྙིང་བསྡུས་ཤིག་སྒྲོགས་སྦྱང་ཞུས་རྗེས་སྨོན་ལམ་གསུང་འདོན་གནང་མུར་དཔལ་ལྡན་སྲིད་སྐྱོང་མཆོག་གིས་གསུང་བཤད་གནང་དོན། དེ་རིང་འདིར་ང་ཚོ་འཛོམས་དགོས་དོ
ང་རང་སྒེར་ངོས་ནས་འཇམ་མགོན་རྒྱལ
འཇམ་མགོན་རྒྱལ་བའིི་རྒྱལ་ཚབ་དགའ་ལྡན་ཁྲི་ཆེན་ ༡༠༣ རྗེ་བཙུན་བློ་བཟང་བསྟན་འཛིན་རིན་པོ་ཆེ་མཆོག་གི་མཛད་རྣམ་སྙིང་བསྡུས།
འཇམ་མགོན་རྒྱལ་བའིི་རྒྱལ་ཚབ་དགའ་ལྡན་ཁྲི་ཆེན་ ༡༠༣ རྗེ་བཙུན་བློ་བཟང་བསྟན་འཛིན་རིན་པོ་ཆེ་མཆོག་ཕྱི་ལོ་ ༡༩༣༧ ཟླ་ ༥ ཚེས་ ༧ ལ་བོད་ཁམས་ཕྱོགས་ཡ་ར་ཞེས་པར། ཡབ་རྟ་མགྲིན་ཕུན་ཚོགས་དང་། ཡུམ་བྱམས་པ་ཕུན་ཚོགས་གཉིས་ལ་སྐུ་འཁྲུངས། ཁྱིམ་པའི་མཚན་ལ་རྡོ་རྗེ་ཟེར། དགུང་ལོ་ ༦ ནས་གཅེན་མོ་ལྷན་དུ་ར་ལུག་འཚོལ་བར་ཕེབས་ཀྱི་ཡོད་འདུག
དགུང་ལ་ ༩ ཐོག་རབ་ཏུ་བྱུང་། གཞིས་དགོན་ཚེམ་དགོན་བྱ་བར་སྒྲིག་ཞུགས་གནང་། མཚན་ལ་བློ་བཟང་བསྟན་འཛིིན་གསོལ། དགུང་ལོ་ ༡༦ ཐོག་ལྷ་སར་ཕེབས་ནས་གདན་ས་ཆེན་པོ་འབྲས་སྤུངས་བློ་གསལ་གླིང་དུ་ཞུགས།
ཕྱི་ལོ་ ༡༩༥༩ ནང་༸གོང་ས་མཆོག་གི་རྗེས་སུ་བསྙེགས་ནས་འབྲུག་ཡུལ་བརྒྱུད་རྒྱ་གར་འཕགས་པའི་ཡུལ་དུ་ཕེབས། ལམ་ཁར་ཟླ་བ་གཅིག་ཙམ་འགོར། རིན་པོ་ཆེ་དང་ཕྱག་རོགས་རྣམས་སྦག་སར་ལོ་གྲངས་ ༡༡ རིང་བཞུགས། དེ་ནས་ཕྱི་ལོ་ ༡༩༧༠ ལོར་མོན་གྷོ་གཞིས་ཆགས་སུ་གནས་སྤོས་མཛད། གསན་བསམ་མཛད་ཞོར། དགོན་པའི་ཕྱག་མཛོད་དང་། ཞིང་ལས་ལྟ་རྟོག་འགན་འཛིན་གྱི་མཛད་ཁུར་ཡང་བཞེས།
ཕྱི་ལོ་ ༡༩༨༢ ལོར་ཆོ་འཕྲུལ་སྨོན་ལམ་ཆེན་མོར་དམ་བཅའ་བཞག་པར་གནང་། དགེ་བཤེས་ལྷ་རམས་པའི་མཚན་རྟགས་བཞེས། དེ་ནས་བསྟན་འཛིན་སྒང་རྒྱུད་སྟོད་གྲྭ་ཚང་དུ་ཕེབས། སྔགས་ཀྱི་དམ་བཅའ་བཞག་སྟེ་སྔགས་རམས་པའི་མཚན་རྟགས་བཞེས། ཕྱི་ལོ་ ༡༩༨༣ ལོར་མོན་གྷོར་ཕྱིར་ཕེབས་ཀྱིས་འབྲས་སྤུངས་བློ་གསལ་གླིང་དུ་དཔེ་ཁྲིད་གནང་རྒྱུས་མཚོན་ཐུགས་འགན་ཆེ་བཞེས་མཛད། ༡༩༨༦ ནས་ ༡༩༨༧ བར་བློ་གསལ་གླིིང་གི་དགེ་བསྐོས་ཀྱང་མཛད།
ཕྱི་ལོ་ ༡༩༩༠ ལོར་༸གོང་ས་༸སྐྱབས་མགོན་ཆེན་པོ་མཆོག་གིས་རྒྱུད་སྟོད་བླ་མ་དབུ་མཛད་དུ་བསྐོ་གཞག་བསྩལ། སྐབས་དེར་སུད་སི་དང་ཕྷརཱན་སིར་ཕེབས་ནས་ཆོས་འབྲེལ་བསྐྱངས། ཕྱི་ལོ་ ༡༩༩༣ ལོར་དཔལ་ལྡན་རྒྱུད་སྟོད་གྲྭ་ཚང་གི་མཁན་པོའིི་ཁྲི་ལ་ཕེབས། ཕྱི་ལོ་ ༡༩༩༦ བར་དུ་མཛད་འགན་བཞེས། འོན་ཀྱང་ཕྱི་ལོ་ ༡༩༩༨ ལོ་ཊི་སྦིའི་སྙུན་གཞི་དྲག་པོ་བྱུང་། མེ་སཽར་དང་ཨུ་ཊིའི་སྨན་ཁང་དུ་ཟླ་བ་དྲུག་ཙམ་བཞུགས་དགོས་བྱུང་། དཀའ་ཚེགས་ཆེན་པོ་བྱུང་ཡང་། བླ་མའི་བཀའ་དང་གདུལ་བྱའི་བསོད་ནམས་དབང་གིས་དྲག་བསྐྱེད་དུ་ཕེབས་རྗེས། མོན་གྷོར་ཕྱིར་ཕེབས།
ཕྱི་ལོ་ ༢༠༠༣ ཟླ་ ༡ ཚེས་ ༢༠ ལ་ཤར་པ་ཆོས་རྗེའི་ཁྲིར་ཕེབས། ཕྱི་ལོ་ ༢༠༠༣ ནས་རྒྱ་གར་དང་། ཐེ་ཝན། ཨ་རི། སུད་སི། ཨོ་སི་ཀྲེ་ལི་ཡ། མ་ལེེ་ཤི་ཡ། ཀེམ་བྷོ་ཌི་ཡ་བཅས་སུ་ཆོས་ཕྱོགས་ཀྱི་མཛད་འཕྲིན་རྒྱ་ཆེར་བསྐྱངས། ཕྱི་ལོ་ ༢༠༡༦ ཟླ་ ༡༡ ནང་ཞྭ་སེར་བསྟན་པའི་མངའ་བདག་གི་ཁྲིར་ཕེབས། དགའ་ལྡན་ཁྲི་ཆེན་ ༡༠༣ པའི་མཚན་གནས་བཞེས།
དེ་ལྟར་ཞིང་གཤེགས་དམ་པ་ཁྲི་ཆེན་ ༡༠༣ རྗེ་བཙུན་བློ་བཟང་བསྟན་འཛིན་རིན་པོ་ཆེ་ནི། ༸གོང་ས་༸སྐྱབས་མགོན་ཆེན་པོ་མཆོོག་དང་། བོད་མིའི་སྒྲིག་འཛུགས་སྤྱི་བོའི་མཛད་རྒྱན་དུ་བཞེས་མཁན་ཞིག་ཡིན་པར་མ་ཟད། གཉན་འཕྲང་གི་དུས་སྐབས་འདིར། བསྟན་པ་སྤྱི་དང་། ཡང་སྒོས་འཇམ་མགོན་རྒྱལ་བའི་བསྟན་པ་རིན་པོ་ཆེ་འཛིན་སྐྱོང་སྤེལ་གསུམ་ལ་ཕྱག་རྗེས་ཆེ་ཞིང་། སྐྱེས་སྤྲུལ་གྱི་མཚན་གནས་རང་ཆས་སུ་མེད་ཀྱང་། སྐྱེས་བུ་དམ་པའི་རང་མདངས་མངོན་པར་མཛད་དེ། བསྟན་པ་དང་འགྲོ་བ་འབའ་ཞིག་ལས་མ་དགོངས་ཤིང་། གདན་ས་ཆེན་པོ་འབྲས་སྤུངས་བློ་གསལ་གླིང་གི་དགེ་བསྐོས། དཔལ་ལྡན་རྒྱུས་སྟོད་གྲྭ་ཚང་གི་བླ་མ་དབུ་མཛད་དང་། མཁན་པོ། མཁན་ཟུར། ཞྭ་སེར་བསྟན་པའི་ཤར་པ་ཆོས་རྗེ་དང་། དགའ་ལྡན་ཁྲིི་པ་བཅས་ཀྱི་ཁྲི་ལ་ཕེབས་པའི་སྐྱེས་བུ་དམ་པ་ཞིག་ཡིན།།
