༢༠༡༧ ཟླ་ ༤ ཚེས་ ༢༤ རེས་གཟའ་ཟླ་བ།
༄༅། །བོད་མི་མང་སྤྱི་འཐུས་ལྷན་ཚོགས་ཀྱི་སྐུ་ཚབ་ཚོགས་ཆུང་གི་ཚོགས་མི་ཉི་ཧོང་ལ་གཞུང་འབྲེལ་ཕྱོགས་ཕེབས་གནང་ཡོད་པ་ལྟར། ཕྱི་ལོ་ ༢༠༡༧ ཟླ་ ༤ ཚེས་ ༢༣ ཉིན་ཉི་ཧོང་སྐུ་ཚབ་དོན་ཁང་གིས་གོ་སྒྲིག་འོག སྤྱི་འཐུས་རྣམ་པས་ཉི་ཧོང་ཡུལ་མི་དང་ས་གནས་བོད་མི་ཁག་གཅིག་ལ་བོད་ནང་གི་ཛ་དྲག་གནད་སྟངས་སྐོར་གསུང་བཤད་གནང་ཡོད།
སྐབས་དེར་བོད་མི་མང་སྤྱི་འཐུས་ཟླ་བ་ཚེ་རིང་ལགས་ཀྱིས་ད་ལྟའི་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་དང་བོད་མིའི་སྒྲིག་འཛུགས་ཀྱི་ངོས་ནས་རྒྱ་ནག་དང་ལྷན་འཚེ་མེད་ཞི་བ་གྲོས་མོལ་གྱི་ལམ་ནས་བོད་ཀྱི་གནད་དོན་གསལ་ཐབས་གནང་བཞིན་ཡོད་སྐོར་གསུང་དོན། བོད་མི་རྣམས་ཀྱིས་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས་ཀྱི་དགོངས་དོན་མིང་དོན་མཚུངས་པའི་རང་སྲིད་རང་སྐྱོང་ཐོབ་ཐབས་བྱེད་བཞིན་ཡོད། དབུ་མའི་ལམ་གྱི་སྲིད་བྱུས་འོག་རྒྱ་ནག་གཞུང་ནས་༸གོང་ས་མཆོག་གི་སྐུ་ཚབ་དང་ལྷན་གྲོས་མོལ་གནང་ཐུབ་པ་བྱུང་ཡོད། སྲིད་བྱུས་འདི་ནི་རྒྱ་ནག་གཞུང་དང་མཉམ་འཚེ་མེད་ཞི་བ་གྲོས་མོལ་གྱི་ལམ་ནས་བོད་ཀྱི་གནད་དོན་གསལ་ཐབས་ཀྱི་སྲིད་བྱུས་ཤིག་ཆགས་ཡོད་པ་དང་། བོད་རྒྱའི་དཀའ་རྙོག་སེལ་ཐབས་སུ་བོད་རྒྱ་གཉིས་སྨན་དབུ་མའི་ལམ་གྱི་སྲིད་བྱུས་ནི་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དགོངས་བཞེད་ལྟར་བོད་མི་མང་སྤྱི་འཐུས་ལྷན་ཚོགས་ཀྱིས་གྲོས་ཚོགས་ནང་གཏན་འབེབས་གནང་བ་ཞིག་ཆགས་ཡོད། ང་ཚོས་རྒྱལ་སྤྱིའི་སྤྱི་ཚོགས་ཁྲོད་དབུ་མའི་ལམ་གྱི་སྲིད་བྱུས་ཀྱི་ལངས་ཕྱོགས་ཐད་གོ་རྟོགས་ཀྱི་ལས་འགུལ་སྤེལ་ཤུགས་ཆེ་རུ་གཏང་དགོས་སྐོར་གསུངས།
སྐབས་དེར་སྤྱི་འཐུས་ཀརྨ་དགེ་ལེགས་ལགས་ཀྱིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དབུ་ཁྲིད་ལམ་སྟོན་འོག་བཙན་བྱོལ་ནང་བོད་མིའི་མང་གཙོའི་འཕེལ་རིམ་སྐོར་གསུང་བཤད་གནང་བ་དང་ཆབས་ཅིག བོད་ནང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དགུང་ལོ་ཆུང་དུས་ནས་བོད་པའི་སྤྱི་ཚོགས་འདི་མང་གཙོར་སྒྱུར་རྒྱུའི་དགོངས་བཞེད་མཛད་ཡོད་ཀྱང་། རྒྱ་ནག་དམར་ཤོག་གིས་བོད་ནང་བཙན་འཛུལ་བྱས་པར་བརྟེན་དེ་ལྟར་བྱུང་ཐུབ་མེད།
དེ་བཞིན་སྤྱི་འཐུས་བསྟན་འཛིན་འཇམ་དབྱངས་ལགས་ཀྱིས་བོད་ནང་ཁོར་ཡུག་གི་ཛ་དྲག་གནས་སྟངས་དང་། ཨེ་ཤི་ཡ་གླིང་ཆེན་གྱི་མི་མང་ཐེར་འབུམ་མང་པོའི་འཐུང་ཆུ་སོགས་འཚོ་རྟེན་དུ་གྱུར་བའི་བོད་ཀྱི་གཙང་པོ་དེ་དག་སྲུང་སྐྱོབ་དགོས་གལ་སྐོར་སོགས་གསུངས།
དེ་བཞིན་ཁོང་གིས་བོད་ནང་རྒྱ་ནག་གཞུང་གིས་ཆུ་རགས་རྒྱག་རྒྱུའི་ལས་གཞི་ཤུགས་ཆེ་རུང་གཏོང་བཞིན་ཡོད་པ་མ་ཟད། བོད་ནང་གང་བྱུང་གཏེར་ཁ་སྔོག་འདོན་བྱེད་བཞིན་ཡོད་པ་སོགས་ལ་བརྟེན་ཚ་དྲོད་རྒྱས་ནས་བོད་ཀྱི་འཁྱགས་རོམ་བཞུར་ཚད་མྱུར་པོ་ཆགས་པ་དེས་མི་འབོར་ཐེར་འབུམ་མང་པོའི་འཚོ་གནས་ལ་དཀའ་ངལ་འཕྲད་རྒྱུ་ཡིན་སྐོར་གསུངས་ཡོད་པ་མ་ཟད།
ཁོང་གིས་རྒྱ་ནག་གཞུང་གིས་བོད་མི་འབྲོག་པ་རྣམས་བཙན་དབང་འོག་གཏན་འཇགས་གྲོང་ཚོར་གནས་སྤོ་བྱེད་བཅུག་པའི་སྐོར་གསུང་དོན། བོད་མི་འབྲོག་པ་རྣམས་རྩ་ཐང་ནས་བཙན་དབང་འོག་ཁ་བྲལ་དགོས་ཐུག་པ་དེས་བོད་མི་འབྲོག་པ་དེ་དག་གི་འཚོ་རྟེན་ལ་ཉེན་ཁ་ཆེན་པོ་ཆགས་ཡོད་པ་མ་ཟད། རྒྱ་ནག་གཞུང་གིས་འབྲོག་པ་རྣམས་ལ་གུན་གསབ་ཉུང་ཉུང་ཞིག་སྤྲད་དེཁོང་ཚོའི་ཕུགས་ཀྱི་འཚོ་རྟེན་ལའང་དོ་ཕོག ཆེན་པོ་བཟོ་བཞིན་ཡོད་སྐོར་གསུངས།
སྐབས་དེར་མང་ཚོགས་ཀྱིས་༸གོང་ས་མཆོག་སྐུ་འཚོ་བཞུགས་ཐོག་བོད་ཀྱི་གནད་དོན་བསལ་ཐུབ་མིན་ཐད་ཀྱི་དྲི་བར་སྤྱི་འཐུས་ཟླ་བ་ཚེ་རིང་ལགས་ཀྱིས་ལན་འདེབས་གནང་དོན། རྒྱ་ནག་གཞུང་གིས་༸གོང་ས་མཆོག་སྐུ་འཚོ་བཞུགས་རིང་གྲོས་མོལ་གྱི་ལམ་ནས་བོད་ཀྱི་གནད་དོན་མ་གསལ་ཐབས་མེད་ཅིག་ཆགས་ཡོད་པ་ང་ཚོས་ཡིད་ཆེས་བྱེད་བཞིན་ཡོད། ཅེས་སོགས་ལན་འདེབས་གནང་ཡོད། ཅེས་གསུངས།
བོད་མི་མང་སྤྱི་འཐུས་རྣམ་པས་ཉི་ཧོང་དུ་གནས་སྡོད་བོད་མི་རྣམས་དང་ཟུར་དུ་ཐུག་འཕྲད་ཀྱིས་བོད་མི་རྣམས་ལ་ཉེ་ཆར་གྲོས་ཚོགས་ཚོགས་དུས་ལེགས་པར་གྲུབ་ཡོད་པ་དང་། བོད་མི་མི་རེ་ངོ་རེ་ནས་བོད་དོན་ཐོག་འགན་ཁུར་ལེན་ནས་ཞབས་ཞུ་བསྒྲུབ་དགོས་པ་དང་། བོད་མི་རྣམས་ཀྱིས་བོད་ཀྱི་སྐུ་ཚབ་དོན་ཁང་ལ་རྒྱབ་སྐྱོར་གནང་བ་དེས་༸གོང་ས་༸སྐྱབས་མགོན་ཆེན་པོ་མཆོག་ལ་དད་གུས་དང་སོ་སོའི་རྒྱལ་ཁབ་ལ་རྒྱལ་ཞེན་གྱི་ཚོར་བ་གསལ་སྟོན་བྱེད་བཞིན་ཡོད་སྐོར་གསུངས། སྐབས་དེར་བོད་མི་རྣམས་ཀྱིས་བོད་མི་མང་སྤྱི་འཐུས་རྣམ་པར་དབུ་མའི་ལམ་གྱི་སྲིད་བྱུས་ཐོག་གོ་རྟོགས་རྒྱ་ཆེ་ཙམ་སྤེལ་དགོས་པ་དང་། ལྷག་པར་རྒྱ་རིགས་ཁྲོད་དབུ་མའི་ལམ་གྱི་སྲིད་བྱུས་སྐོར་གོ་རྟོགས་ཤུགས་ཆེ་སྤེལ་དགོས་པའི་འབོད་སྐུལ་ཡང་ཞུས་འདུག
གཞན་ཡང་བོད་རིགས་མི་འབོར་གྱི་གྲངས་ཚད་ཉུང་ངུ་ལས་མེད་པའི་གནས་སྟངས་ལ་སེམས་འཚབ་དང་འབྲེལ་བའི་དྲི་བར་ལན་འདེབས་གནང་སྐབས་བོད་མི་མི་རེ་ངོ་རེ་ནས་བོད་མིའི་མི་འབོར་དང་སྤུས་ཚད་གོང་མཐོར་གཏོང་རྒྱུའི་ལས་འགན་ཡོད་པ་མ་ཟད། བོད་མིའི་སྒྲིག་འཛུགས་ཀྱིས་བོད་མི་མི་འབོར་འཕེལ་ཐབས་སུ་བུ་ཕྲུག་གསུམ་ལས་མང་བ་ཡོད་པ་རྣམས་ལ་སློབ་ཡོན་གནང་རྒྱུའི་འཆར་གཞི་གསར་པ་བཟོས་ཡོད་སྐོར་སོགས་འགྲེལ་བརྗོད་གནང་ཡོད།།
