༢༠༡༧ ཟླ་ ༣ ཚེས་ ༡༠ རེས་གཟའ་པ་སངས།
༄༅། །ཕྱི་ལོ་ ༢༠༡༧ ཟླ་ ༣ ཚེས་ ༡༠ ཉིན་བཞུགས་སྒར་རྡ་ས་ཐེག་ཆེན་ཆོས་གླིང་གཙུག་ལག་ཁང་གི་གསུང་ཆོས་རྭ་བར་གངས་ཅན་བོད་ཀྱི་རྒྱལ་ས་ལྷ་སར་ཆོལ་གསུམ་བོད་མི་སེར་སྐྱ་ཡོངས་ནས་མ་གྲོས་བསམ་པ་གཅིག་མཐུན་གྱིས་རྒྱ་དམར་བཙན་འཛུལ་བར་ཞི་རྒོལ་ཆེད་རང་དབང་སྒེར་ལངས་བྱས་པའི་དུས་དྲན་ཐེངས་ ༥༨ དང་། རྒྱལ་གཅེས་དཔའ་བོ་དཔའ་མོའི་ཉིན་མོ་སྲུང་བརྩིའི་མཛད་སྒོར་སྐུ་མགྲོན་གཙོ་བོ་ཨི་ཊ་ལིའི་ལྷོ་ཊི་རོལ་གྱི་རང་སྐྱོང་མངའ་ཁུལ་གྱི་སྲིད་འཛིན་སྐུ་ཞབས་ཨར་ནོ་ཀོམ་པེ་སི་ཆར་ Dr. Arno Kompatscher མཆོག་གིས་གསུང་བཤད་གནང་དོན། ཐོག་མར་སྲིད་སྐྱོང་མཆོག་གིས་ང་རང་དེ་རིང་གི་མཛད་སྒོར་མགྲོན་འབོད་གནང་བར་བཀའ་དྲིན་ཆེ། ཞེས་ཞུ་རྒྱུ་ཡིན། ངས་སྲིད་སྐྱོང་མཆོག་ཐོག་མར་ཕྱི་ལོ་ ༢༠༡༤ ལོར་ངའི་ཕ་ཡུལ་ཨི་ཊ་ལིའི་ལྷོ་ཊི་རོལ་གྱི་རང་སྐྱོང་མངའ་ཁུལ་དུ་མཇལ་བ་ཡིན། དེ་རྗེས་ང་རང་ལྷོ་ཊི་རོལ་གྱི་རང་སྐྱོང་མངའ་ཁུལ་གྱི་སྲིད་འཛིན་དུ་འདེམས་ཐོན་བྱུང་འཕྲལ་སྲིད་སྐྱོང་མཆོག་གིས་ང་རང་རྡ་སར་མགྲོན་འབོད་གནང་བྱུང་།
དེར་བརྟེན་དེ་རིང་ང་རང་འདིར་བཅར་རྒྱུ་བྱུང་བར་དགའ་སྤོབས་ཧ་ཅང་བྱུང་། ང་རང་ལ་མཚོན་ན་དེ་རིང་བཙན་བྱོལ་བོད་མིའི་བསྟི་གནས་བཞུགས་སྒར་རྡ་རམ་ས་ལར་བོད་མིའི་གསུམ་བཅུའི་དུས་དྲན་ཐེངས་ ༥༨ སྲུང་བརྩི་ཞུ་རྒྱུའི་མཛད་སྒོའི་ཐོག་མཉམ་ཞུགས་བྱས་ནས་སྐད་ཆ་ཤོད་རྒྱུའི་གོ་སྐབས་ཐོབ་པ་འདི་ནི་ཆེ་མཐོང་ཧ་ཅང་ཐོབ་པའི་ཚོར་སྣང་ཞིག་བྱུང་། ༸གོང་ས་ཏཱ་ལའི་བླ་མ་མཆོག་ངའི་ཕ་ཡུལ་ལྷོ་ཊི་རོལ་དུ་ཆིབས་སྒྱུར་ཐོག་མར་བསྐྱངས་གནང་མཛད་ནས་ད་བར་ལོ་ངོ་ ༢༠ སོང་ཡོད། དུས་དེ་ནས་བཟུང་༸གོང་ས་མཆོག་དང་ངའི་མི་མང་དབར་མཛའ་བརྩེའི་འབྲེལ་ལམ་ཉིན་རེ་བཞིན་ཇེ་ཟབ་ཏུ་འགྲོ་བཞིན་ཡོད། དེ་ནི་གཙོ་བོ་ངའི་གོང་དུ་ལྷོ་ཊི་རོལ་རང་སྐྱོང་མངའ་ཁུལ་གྱི་སྲིད་འཛིན་སྐུ་ཞབས་ལུ་ཝི་སི་ཌན་ཝལ་ཌར་ Luis Durnwalder མཆོག་རྣམ་གཉིས་ཐུགས་ཧ་ཅང་འདྲིས་པོ་ཡོད་པ་ཙམ་དུ་མ་ཟད། བོད་མི་དང་ལྷོ་ཊི་རོལ་རང་སྐྱོང་མངའ་ཁུལ་གྱི་མི་མང་རྣམས་ཀྱི་མངོན་འདོད་གཅིག་ཡིན། ས་བབ་ཀྱི་ཆ་ནས་བོད་དང་ལྷོ་ཊི་རོལ་གཉིས་ཀ་རིས་ཁེངས་ཤིང་། རང་གི་ཐུན་མིན་རིག་གཞུང་གཏིང་ཚུགས་པའི་སྲོལ་རྒྱུན་ལ་གཞི་བཅོལ་ནས་མི་ཚེ་སྐྱེལ་སྟངས་ཧ་ཅང་འདྲ་བ་དང་། མི་རིགས་གཉིས་ཀ་རང་དབང་ལ་གཅེས་འཛིན་ཧ་ཅང་ཆེ་བ་མ་ཟད། མི་རིགས་གཉིས་ཀས་རང་གི་ཐུན་མིན་རིག་གཞུང་དང་སྐད་ཡིག ངོ་བོ། ཐོབ་ཐང་བཅས་སྲུང་སྐྱོབ་བྱེད་དགོས་པའི་དུས་ཚོད་འཆར་ཚེ་གཉིས་ཀ་ཧ་ཅང་ཆོད་སེམས་བརྟན་པོ་ཡོད་མཁན་གྱི་མི་རིགས་ཤིག་ཡིན།
ལོ་རྒྱུས་ཐོག་ནས་ཀྱང་ཡུལ་གཉིས་པོའི་གནས་སྟངས་ལ་འདྲ་ཆོས་མང་པོ་ཞིག་ཡོད། འཛམ་གླིང་དམག་ཆེན་གཉིས་པའི་གོང་ངའི་ཕ་ཡུལ་ལྷོ་ཊི་རོལ་ལ་མཚོན་ན་ཨོ་སི་ཊི་རི་ཡའི་མངའ་དབང་འོག་ཡོད། འོན་ཀྱང་ཨི་ཊ་ལིས་བཙང་འཛུལ་བྱས་པ་རེད། སྐབས་དེར་གློ་བུར་དུ་ང་ཚོ་འཇར་མན་ཡུལ་སྐད་རྒྱག་མཁན་གྱི་མི་རིགས་ཤིག་ཨི་ཊ་ལིའི་གྲངས་མང་མི་རིགས་ཀྱི་ཡུལ་འཁོར་ཆེན་པོ་དེའི་ནང་ཧ་ཅང་ཆུང་ཆུང་ཞིག་རེད་འདུག་བསམ་པའི་ཚོར་སྣང་ཞིག་ཤར་བ་མ་ཟད། ཁོང་ཚོས་ང་ཚོའི་སྐད་ཡིག་དང་རིག་གཞུང་ལ་བརྩི་བཀུར་མ་བྱས་པའི་ཁར་སྐབས་དེའི་ཨི་ཊ་ལིའི་གཅིག་བསྡུས་དབང་འཛིན་པ་མུ་སུ་ལི་ནི་ཁོ་པས་ང་ཚོའི་ཐུན་མིན་རིག་གཞུང་དང་སྐད་ཡིག་རྩ་མེད་བཟོས་ནས་ཨི་ཊ་ལིའི་གྲངས་མང་མི་རིགས་ནང་རིམ་བཞིན་འཇའ་ཡལ་བ་ལྟར་བཟོ་རྒྱུའི་ངན་ཇུས་བཤམས་ཏེ་ཐབས་ཤེས་ཡོད་རྒུ་རྩལ་སྤྲུག་བྱས་པ་རེད། འོན་ཀྱང་ང་ཚོས་ཨི་ཊ་ལིའི་དྲག་པོའི་གནོན་ཤུགས་ལ་གདོང་ལེན་བྱས་ནས་རང་གི་ཐུན་མིན་སྐད་ཡིག་དང་རིག་གཞུང་སྲུང་སྐྱོབ་ཆེད་འབད་བརྩོན་ཆེན་པོ་བྱས་པ་རེད། སྤྱི་ཡོངས་ཀྱི་ཐོག་ནས་བརྗོད་ན་ལོ་ངོ་བཅུ་ཕྲག་མང་པོའི་འཐབ་རྩོད་ཀྱི་བརྒྱུད་རིམ་ཁྲོད་ང་ཚོས་འཚེ་མེད་ཞི་བའི་ལས་འགུལ་གཙོ་བཟུང་བྱས་ཀྱང་། སྐབས་རེ་འཚེ་བའི་ལས་འགུལ་སྤེལ་བའི་གནས་ཚུལ་ཕྲན་བུ་བྱུང་ཡོད། འོན་ཀྱང་མཐར་ང་ཚོར་རང་སྐྱོང་ཐོབ་ནས་རང་གི་ཐུན་མིན་སྐད་དང་རིག་གཞུང་། མི་རིགས་ཀྱི་ངོ་བོ། ཁོར་ཡུག་སོགས་སྲུང་སྐྱོབ་བྱ་རྒྱུའི་ཐོབ་ཐང་ཆ་ཚང་ཐོབ་ཡོད།
མི་འབོར་གྲངས་ཚད་ནས་བརྗོད་ན་ལྷོ་ཊི་རོལ་ལ་མི་གྲངས་ ༣༥༠ ༠༠༠ ལས་མེད། ཨི་ཊ་ལིར་མཚོན་ན་མི་འབོར་གྲངས་ ༦༠ ༠༠༠ ༠༠༠ ཡོད། སུད་སི་དང་ཨོ་སི་ཊི་རི་ཡ་གཉིས་ང་ཚོའི་ཁྱིམ་མཚེས་རྒྱལ་ཁབ་ཡིན་སྟབས་ལྷོ་བྱང་གཉིས་ལ་ཚོང་འབྲེལ་བྱེད་ཐུབ་བཞིན་ཡོད་པ་དང་། ཨི་ཊ་ལིའི་གྲོས་ཚོགས་ནང་དུ་ང་ཚོའི་སྐུ་ཚབ་འཐུས་མི་ཡོད་པ་ཙམ་དུ་མ་ཟད། ཡུ་རོབ་སྤྱི་མཐུན་ཚོགས་པའི་ལས་ཁུངས་ཀྱི་བསྟི་གནས་ཁང་སྦེལ་འཇམ་གྱི་རྒྱལ་ས་སྦར་སེལ་ནང་དུའང་ང་ཚོའི་སྐུ་ཚབ་འཐུས་མི་ཡོད། འཛམ་གླིང་ནང་གྲངས་ཉུང་མི་རིགས་འདྲ་མིན་ཡོད་པ་ཁོང་རྣམས་ཀྱི་སྐུ་ཚབ་ཚོགས་ཆུང་དང་། ཆབ་སྲིད་མི་སྣ་སོགས་ང་ཚོའི་མངའ་ཁུལ་དུ་ཕེབས་ནས་ང་ཚོའི་རང་སྐྱོང་གི་སྒྲོམ་གཞི་དེ་ལག་བསྟར་ཇི་ལྟར་བྱེད་བཞིན་པ་མིག་དཔེ་བལྟ་བ་ཙམ་དུ་མ་ཟད། སྐད་རིགས་འདྲ་མིན་འཆམ་མཐུན་ངང་འཚོ་སྡོད་ཇི་ལྟར་བྱེད་བཞིན་པ་མིག་ལྟོས་བྱེད་བཞིན་ཡོད།
༸གོང་ས་ཏཱ་ལའི་བླ་མ་མཆོག་ཙམ་མ་ཟད། འདི་ནས་གྲོས་ཚོགས་འཐུས་མི་དང་བཀའ་བློན་རྣམས་ཀྱང་ལྷོ་ཊི་རོལ་དུ་ཆིབས་སྒྱུར་བསྐྱངས་ནས་རང་སྐྱོང་གི་ལམ་ལུགས་ལག་བསྟར་ཇི་ལྟར་བྱེད་བཞིན་པ་རྣམས་ཐུགས་ཞིབ་མཛད་ཡོད། ང་ཚོས་དངས་བླངས་ཐོག་ནས་ཨི་ཊ་ལིའི་མངའ་ཁོངས་སུ་འཛུལ་རྒྱུའི་འདམ་ཁ་མ་བྱས་པར་དངོས་ཡོད་གནས་སྟངས་དམིགས་བསལ་བ་ཞིག་གི་འོག་ནས་འདམ་ཁ་བཟང་ཤོས་དེ་བདམས་པར་བརྟེན་ད་ཆ་ང་ཚོར་ལམ་ལྷོང་བྱུང་བ་ཞིག་ལ་ངོས་འཛིན་བྱེད་བཞིན་ཡོད། ང་ཚོ་ལྷོ་ཊི་རོལ་ད་ལྟའི་རང་སྐྱོང་གི་གནས་བབ་འདིའི་བར་བསླེབ་ཆེད་ལོ་ངོ་བཅུ་ཕྲག་འགོར་ཡོད་པ་དང་། དུས་སྐབས་དེའི་རིང་ང་ཚོས་རང་གི་མི་རིགས་ཀྱི་ཐུན་མིན་ངོ་བོ་དང་སྐད་ཡིག གོམས་སྲོལ་སོགས་གཅེས་ཉར་ཡོང་སླད་བཟོད་སྲན་དང་ཆོད་སེམས་རྒྱུན་སྐྱོང་བྱས་ཡོད། སྟབས་ལེགས་པ་ཞིག་ལ་ཨི་ཊ་ལི་སྲིད་གཞུང་ནས་ཀྱང་ང་ཚོའི་དཀའ་ངལ་སེལ་ཐབས་སླད་ཐབས་ལམ་འོས་འཚམས་ཤིག་འཚོལ་རྒྱུའི་འདོད་བབ་གནང་བའི་ཐོག་ཨོ་སི་ཊི་རི་ཡ་སྲིད་གཞུང་ནས་ཀྱང་ཕྱི་ནས་གནོན་ཤུགས་ཕྲན་བུ་སྤྲད་པ། དཔེར་ན་ལྷོ་ཊི་རོལ་གྱི་གནད་དོན་དེ་འཛམ་གླིང་མཉམ་འབྲེལ་རྒྱལ་ཚོགས་ལྟ་བུ་རྒྱལ་སྤྱིའི་སྡིངས་ཆའི་ཐོག་བསྐྱལ་བ་སོགས་གནང་ཡོད།
བོད་མི་ཚོས་རང་གི་ཐུན་མིན་རིག་གཞུང་དང་མི་རིགས་ཀྱི་ངོ་བོ་སྲུང་སྐྱོབ་སླད་འཐབ་རྩོད་དེ་ལྟར་རྒྱུན་སྐྱོང་གནང་བཞིན་ཡོད་པ་ངས་ཡིད་ཆེས་ཞུ་བཞིན་ཡོད། ཁྱེད་ཚོའི་དཔའ་ངར་ལྡན་པའི་ཐབས་རྩོད་ཀྱི་བརྒྱུད་རིམ་ཁྲོད་མི་མང་པོའི་ཚེ་སྲོག་ཤོར་ཡོད་པ་མ་ཟད། ད་དུང་བོད་ནང་ནང་བོད་མི་ཕོ་མོ་ཚོས་སྙིང་སྟོབས་ཆེན་པོའི་ཐོག་ནས་རྒྱ་ནག་གཞུང་གི་བཟོད་པར་དཀའ་བའི་གདུག་རྩུབ་དང་གཉའ་གནོན་ལ་མུ་མཐུད་གདོང་ལེན་གནང་བཞིན་ཡོད།
སྤྱིར་ད་ལྟའི་གནས་སྐབས་སུ་གྲུབ་འབྲས་ལམ་སེང་སྨིན་རྒྱུའི་གནས་སྟངས་ཤིག་མེད་པ་ལྟ་བུ་སྣང་ཡང་ཁྱེད་ཚོའི་འཐབ་རྩོད་བདེན་པའི་འཐབ་རྩོད་ཅིག་ཡིན་སྟབས་མུ་མཐུད་སྙིང་སྟོབས་མ་ཞུམ་པར་རྒྱུན་སྐྱོང་གནང་དགོས་པ་ཧ་ཅང་གལ་ཆེ། ཁྱེད་ཚོར་རང་གི་ཕ་མེས་ནས་རྒྱུད་པའི་ཐུན་མིན་ཆོས་དང་རིག་གཞུང་། ལེགས་བཤད། སྐད་ཡིག་སོགས་རྒྱུན་འཛིན་བྱ་རྒྱུའི་ཐོབ་ཐང་ཆ་ཚང་ཡོད། མཐར་ཁྱེད་ཚོར་རྒྱལ་ཁ་ཐོབ་རྒྱུ་ཡིན་པ་ང་ལ་ཡིད་ཆེས་གཙང་མ་ཡོད། དེའི་བར་ལ་ཁྱེད་ཚོར་མཐུན་འགྱུར་རོགས་རམ་གྱི་ཚུལ་དུ། སྤྱིར་སྟངས་ང་ཚོའི་མངའ་ཁུལ་ཆུང་ཆུང་ཡིན་ཡང་། རྒྱ་གར་དུ་ཡོད་པའི་བཙན་བྱོལ་བོད་མི་རྣམས་ལ་ཤེས་ཡོན་དང་འཕྲོད་བསྟེན། དེ་བཞིན་གཞི་རིམ་མང་གཙོའི་སྒྲོམ་གཞི་འཛུགས་སྐྲུན་ཐོག་གང་ཐུབ་མཐུན་འགྱུར་རོགས་རམ་ཞུས་དང་ཞུ་མུས་ཡིན། ལས་གཞི་དེ་དག་མང་ཆེ་བ་ངའི་གོང་གི་སྲིད་འཛིན་སྐུ་ཞབས་ལུ་ཝི་སི་ཌན་ཝལ་ཌར་མཆོག་སྐབས་ལག་བསྟར་གནང་བ་རེད། ངས་ཀྱང་ལས་གཞི་དེར་མུ་མཐུད་རྒྱབ་སྐྱོར་ཞུ་བཞིན་ཡོད། གང་ཡིན་བརྗོད་ན་དེ་ནི་འགྲིག་པ་ཞིག་ཡིན་པ་ང་ལ་ངེས་པ་རྙེད་སོང་།
ལོ་ངོ་ ༥༨ ཟེར་བ་དུས་ཡུན་རིང་པོ་རེད། མི་རབས་རྙིང་པ་རྫོགས་ནས་མི་རབས་གསར་པ་ཚོས་འཐབ་རྩོད་རྒྱུན་མཐུད་དགོས་པ་ཆོས་ཉིད་ཡིན། ཁྱེད་ཚོ་མི་རབས་གསར་པ་ཚོས་ཀྱང་རང་གི་ཕ་མེས་ཀྱི་སྙིང་སྟོབས་དང་ཆོད་སེམས་མུ་མཐུད་ནས་རྒྱུན་སྐྱོང་དགོས། ཁྱེད་ཚོའི་རྒྱབ་ཏུ་ང་ཚོ་ལངས་ཡོད་པ་མཁྱེན་གསལ་རེད། ཅེས་གསུང་བཤད་གནང་།།
