༢༠༡༧ ཟླ་ ༣ ཚེས་ ༢༥ རེས་གཟའ་སྤེན་པ།

༄༅། །ཡུ་རོབ་སྤྱི་འཐུས་ཐུབ་བསྟན་དབང་ཆེན་ལགས་ཀྱིས་བོད་ནས་ཕེབས་པའི་བོད་མི་ཁག་གཅིག་ལ་སྦེལ་ཀོབ་གཞིས་ཆགས་སུ་སྡོད་ཁང་གསར་རྒྱག་ཆེད་ཧིན་སྒོར་འབུམ་ ༢༠༠ ལྷག་ཞལ་འདེབས་བསྡུ་རུབ་གནང་ཐུབ་པར་བརྟེན། ཕྱི་ལོ་ ༢༠༡༧ ཟླ་ ༣ ཚེས་ ༢༤ རེས་གཟའ་པ་སངས་ཉིན་གྱི་ཕྱེད་ཡོལ་ཆུ་ཚོད་ ༤ ཡོལ་ཙམ་ལ་བོད་མིའི་སྒྲིག་འཛུགས་ཀྱི་བཀའ་ཤག་ཚོགས་ཁང་དུ་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་དང་། ནང་སྲིད་བཀའ་བློན་འཁོར་ལྷ་ཚང་བསོད་ནམས་སྟོབས་རྒྱལ་མཆོག དྲུང་ཚབ་འཆི་མེད་རིག་འཛིན་ལགས་བཅས་ལྷན་འཛོམས་ཐོག  སྤྱི་འཐུས་ཐུབ་བསྟན་དབང་ཆེན་ལགས་ལ་ལེགས་གསོལ་བསྔགས་བརྗོད་ཀྱི་གཟེངས་རྟགས་གནང་འདུག

དེ་ཡང་སྲིད་སྐྱོང་མཆོག་གིས་གཟེངས་ཐོན་ལས་གཞི་དེའི་སྐོར་གསུང་དོན།  ད་རེས་སི་པེན་བོད་ཁང་གི་འགན་འཛིན་སྤྱི་འཐུས་ཐུབ་བསྟན་དབང་ཆེན་ལགས་ཀྱིས་ཐུགས་འཁུར་བཞེས་པའི་ཐོག་ནས་སི་པེན་དང་དམིགས་བསལ་སྦར་སི་ལོ་ན་གྲོང་ཁྱེར་ནས་ཡུ་རོ་འབུམ་གསུམ་རོགས་དངུལ་ཐོབ་ཐུབ་པ་འདི་ཆེད་མངགས་བོད་ནས་གསར་དུ་ཕེབས་མཁན་ཚོའི་བཞུགས་གནས་སླད་གནང་བ་འདི་དངུལ་ཕོན་ཆེན་པོ་ཡིན་པ་ཙམ་དུ་མ་ཟད། ཧ་ཅང་རླབས་ཆེན་ཞིག་རེད་དྲན་གྱི་འདུག 

གཅིག་ནི། བོད་པ་ཞིག་ཡིན་པའི་ཆ་ནས་བོད་མི་གཞན་ལ་ཁ་ཡོད་ལག་ཡོད་ཕན་ཐོགས་རྒྱུའི་རོགས་རམ་གནང་བ་རེད། གཉིས་པ་ནི། དངུལ་ཐོག་ནས་ཡིན་ནའང་ཕལ་ཆེར་བོད་པ་སྒེར་ཞིག་གིས་འབད་བརྩོན་གནང་སྟེ་དངུལ་གནང་བ་ཕོན་ཆེ་ཤོས་གྲངས་རེད།  དེ་སྔ་ཨ་རི་ནེའུ་ཡོག་ཏུ་གནས་སྡོད་བོད་རིགས་ཁྱིམ་ཚང་སྨར་ཁམས་དུང་དཀར་ཚང་ནས་ཤེས་ཡོན་ཆེད་ཨ་སྒོར་འབུམ་གཅིག་གནང་བ་བྱུང་ཡོད།  དེ་བཞིན་ཤེས་ཡོན་དང་འབྲེལ་བའི་རོགས་དངུལ་མང་དག་ཅིག་ཡོང་བཞིན་ཡོད། དེར་བརྟེན་ད་རེས་སྤྱི་འཐུས་དགེ་བཤེས་ཐུབ་བསྟན་དབང་ཆེན་ལགས་ཀྱིས་ཐུགས་འཁུར་དེ་འདྲ་བཞེས་ཏེ་རོགས་དངུལ་གནང་བར་སྙིང་ཐག་པ་ནས་ཐུགས་རྗེ་ཆེ་ཞུ་རྒྱུ་ཡིན། ཞེས་གསུངས།

ཕྱོགས་མཚུངས་ནང་སྲིད་བཀའ་བློན་འཁོར་ལྷ་ཚང་བསོད་ནམས་སྟོབས་རྒྱལ་ལགས་ཀྱིས་གསུང་དོན།  སྐབས་ ༡༤ བཀའ་ངོས་ནས་བོད་ནས་གསར་དུ་ཕེབས་པའི་བོད་མི་མང་པོ་ཞིག་འགྲོ་ས་སྡོད་ས་གང་ཡང་མེད་པར་གྲོང་གསེབ་ཁག་ཏུ་ཁང་པ་གླ་དགོས་པ་སོགས་དཀའ་ངལ་ཧ་ལས་པའི་ཆེན་པོ་རེད། དཀའ་ངལ་དེ་དག་ལ་གཟིགས་ནས་སྡོད་ཁང་གསར་བསྐྲུན་བྱེད་རྒྱུའི་དགོངས་པ་བཞེས་གནང་བ་རེད། བར་ལམ་ནས་བཟུང་སྟེ་སྐབས་ ༡༤ བཀའ་ཤག་དང་སྐབས་ ༡༥ བཀའ་ཤག་ནས་དམིགས་བསལ་ཛ་དྲག་པོ་དང་གལ་ཆེན་པོ་ཞིག་ལ་བརྩིས་ནས་དེ་སྔ་སྦིར་ཁུལ་དུ་ཁྱིམ་ཚང་ ༧༥།༧༦ གསར་སྐྲུན་བྱས་ནས་གློག་འཐེན་རྒྱུ་ཙམ་མ་གཏོགས་ལས་གཞི་ཡོངས་རྫོགས་ཕལ་ཆེར་མཇུལ་སྒྲིལ་ཏེ་ཁང་པའང་བགོ་འགྲེམས་ཟིན་པ་རེད། 

ལས་གཞི་གཉིས་པ་ནི། བོད་ནས་གསར་དུ་འབྱོར་བ་ཁག་གཅིག་རྒྱ་གར་ལྷོ་ཕྱོགས་ཁུལ་དུ་མག་པ་དང་མནའ་མར་སླེབ་པ་གང་ཞིག་ལ་སྡོད་གནས་མེད་པའི་དཀའ་ངལ་འཕྲད་བཞིན་པ་མང་པོ་ཞིག་གཞིས་ཆགས་ནང་ཁང་གླ་ཆུང་བ་ཡོད་སྟབས་གཞིས་ཆགས་ཁག་ནང་བསྡད་ནས་སོ་སོའི་འཚོ་གོས་ཆེད་ལས་ཀ་བྱེད་མཁན་ཧ་ཅང་མང་པོ་རེད་འདུག 

ཁོང་ཚོར་ཆ་བཞག་པ་ཡིན་ནའང་ཧ་ཅང་དཀའ་ངལ་འདུག གཞིས་ཆགས་ཁོངས་སུ་སྡོད་ཁང་གསར་བསྐྲུན་བྱེད་ཐུབ་པ་ཡིན་ན། ཧ་ཅང་ཕན་ཐོགས་ཡོང་ས་རེད།  ཅེས་དཔལ་ལྡན་བཀའ་ཤག་དང་ནང་སྲིད་ལས་ཁུངས་སུ་སྔ་རྗེས་ཞུ་གཏུག་མང་པོ་བྱུང་བ་གཞིར་བཟུང་ཐབས་ཤེས་བཏང་སྟེ་སྦེལ་ཀོབ་ཆ་བཞག་ན་རྩ་བའི་བོད་ནས་འབྱོར་བ་མང་པོ་ཡོད་ཀྱང་སྡོད་ཁང་ཐོབ་པར་ཆ་རྐྱེན་མང་པོ་ཚང་དགོས།    སྒྲིག་འཛུགས་ཁག་དང་།  གདན་ས་ཁག་གི་ནང་སློབ་གཉེར་བྱེད་བཞིན་པ་མ་ཡིན་མཁན།  དེ་བཞིན་གཞན་གྱི་སྒྲིག་འཛུགས་ནང་ལས་ཀ་བྱེད་བཞིན་པ་མ་ཡིན་མཁན། དེ་བཞིན་སོ་སོ་རང་བདག་ཁང་པ་ཡོད་པ་མ་ཡིན་མཁན།  ཞེས་དེ་འདྲའི་ཆ་རྐྱེན་མང་པོ་ཞིག་ཚང་དགོས། 

ཆ་རྐྱེན་དེ་རིགས་ཆ་ཚང་ཚང་མཁན་མི་ཚང་ང་ཚོས་ངོ་འཛིན་བྱས་པ་སྦེལ་ཀོབ་ཏུ་ཁྱིམ་ཚང་བརྒྱད་ཅུ་ཙམ་ཡོད།  དེ་དག་གི་ཆེད་དུ་བར་ལམ་ང་ཚོས་ས་ཆ་ཞིག་མཐུན་འགྱུར་ཞུས་པ་ཙམ་མིན་པར་དེ་དག་གི་ཆེད་དུ་ན་ནིང་ལོ་ནས་སྔོན་རྩིས་ཐོག་འགོ་འཛུགས་ཏེ་འགྲོ་བཞིན་ཡོད།  དེའི་ཐོག་དངུལ་འབོར་ཕལ་ཆེར་འབུལ་སྟོང་ཕྲག་བརྒྱད་དགུ་ཡས་མས་འགྲོ་སོང་འགྲོ་རྒྱུ་ཆགས་ཡོད། དེའི་ནང་ནས་ད་རེས་སི་པེན་བོད་ཁང་གི་འགན་འཛིན་ཡུ་རོབ་སྤྱི་འཐུས་ཐུབ་བསྟན་དབང་ཆེན་ལགས་ཀྱིས་དེའི་ཐོག་དམིགས་བསལ་ཐུགས་འཁུར་ཆེན་པོ་གནང་སྟེ་སྤྱི་དང་སྒེར་ལ་འབྲེལ་བ་སྔ་རྗེས་གནང་བའི་བཀའ་དྲིན་ལ་བརྟེན་ནས་ལོ་གཉིས་ནང་ཁུལ་ལ་ལོ་རེར་ཡུ་རོ་འབུམ་གཅིག་དང་ཕྱེ་ཀ་བྱས་ནས་ལོ་གཉིས་ནང་ཡུ་རོ་འབུམ་གསུམ་ཙམ་གནང་རྒྱུའི་ཞལ་བཞེས་ཐོབ་པ་འདི་ཧ་ཅང་བཀའ་དྲིན་ཆེན་པོ་བྱུང་། 

འདིའི་ཐོག་ཆ་བཞག་པ་ཡིན་ན། ད་ལྟ་འགྲོ་བཞིན་པ་ནི་ཁྱིམ་ཚང་ཉི་ཤུ་རྩ་ལྔ་ཙམ་འགྲོ་བཞིན་ཡོད། ཡུ་རོ་འབུམ་གསུམ་གྱི་ཁྱིམ་ཚང་སུམ་ཅུ་སོ་དྲུག་ཙམ་གྱི་སྡོད་ཁང་བརྒྱག་ཐུབ་ཀྱི་ཡོད།   ཁྱོན་བསྡོམས་ཁྱིམ་ཚང་དྲུག་ཅུ་རེ་གྲངས་ཀྱི་སྡོད་ཁང་བརྒྱག་ཐུབ་ཀྱི་ཡོད། དེ་འཕྲོས་ནང་སྲིད་ལས་ཁུངས་ནས་རོགས་ཚོགས་གཞན་ནས་ཐབས་ཤེས་བྱས་ཏེ་ལས་གཞི་ཞིག་འགྲོ་བཞིན་ཡོད། གང་ལྟར་ཕྱི་ལོ་ ༢༠༡༧ ལོའི་ནང་ལས་གཞི་ཆ་ཚང་མཇུག་སྒྲིལ་རྒྱུའི་རེ་བ་བྱེད་བཞིན་ཡོད། 

ལས་གཞི་འདི་ཆ་ཚང་བསྒྲུབ་པ་ཡིན་ནའང་མོན་གྷོ་ས་གནས་སུ་སྡོད་ཁང་མེད་པའི་དཀའ་ངལ་གནས་སྟངས་གཅིག་པ་ཡིན་པའི་ཁྱིམ་ཚང་ཕལ་ཆེར་དྲུག་ཅུ་ཙམ་ཡོད་རེད། དེའི་ཆེད་དུ་ས་ཆ་ཨེ་ཀར་བཞི་ཙམ་ལྕགས་རི་བསྐོར་ནས་གཏན་འཁེལ་ཡོད། དེའི་ནང་ཁྱིམ་ཚང་དྲུག་ཅུ་ཙམ་གྱི་ཆེད་ལས་གཞི་འགོ་འཛུགས་རྒྱུ་ཡིན། 

དེ་ནས་རིམ་པས་གང་ལྟར་ལྡི་ལི་དང་རྡ་ས་ཁུལ་ནས་ཁང་པ་དགོས་ཡོད་ཟེར་མཁན་ཡོད་རེད། དེ་དག་གི་ཁོངས་ནས་དཀའ་ངལ་ཆེ་ཤོས་གང་ཡོད་ཅེ་ན། ཧི་མཱ་ཅལ་དང་དེ་ཚོའི་ནང་ས་ཆ་ཐོབ་རྒྱུ་ཁྲིམས་ཀྱི་ཐོག་ནས་ཧ་ཅང་དཀའ་ངལ་ཆེན་པོ་འཕྲད་བཞིན་འདུག་པར་བརྟེན། རྩ་བའི་བར་ལམ་ང་ཚོས་མངའ་སྡེའི་སྤྱི་ཁྱབ་བློན་ཆེན་གྱི་སྤྱི་ཁྱབ་དྲུང་ཆེ་དགུན་ཁའི་གྲོས་ཚོགས་སུ་ཕེབས་པའི་སྐབས་ཟུར་དུ་མཇལ་ནས་དེའི་ཐོག་བཀའ་མོལ་ཆུ་ཚོད་ཁ་ཤས་ཞུ་རྒྱུ་བྱུང་། དེ་ཚོའི་ཐོག་ཤུགས་སྐྱོན་བཞིན་ཡོད། རྒྱ་གར་གཞུང་གི་སྔོན་མ་ཡིན་ན་ Indira Gandhi Awas Yojna ཟེར་རྒྱུ་ཞིག་ཡོད།

ཕྱིས་སུ་ད་ལྟའི་གཞུང་འཛིན་གྱིས་འཆར་གཞི་འདིའི་མིང་བསྒྱུར་ཏེ་ Pradhan Mantri Awas Yojna ཞེས་ཆགས་ཡོད། དེ་ཚོའི་ནང་ཆ་བཞག་པ་ཡིན་ན། དཔེར་ན། སིམ་ལ་ཁུལ་དུ་བོད་ནས་ཚུར་ལྔ་བཅུ་ལྔ་གྲངས་ཙམ་ནས་འབྱོར་ཏེ་གཞིས་ཆགས་མ་ཐོབ་པར་སྡོད་བཞིན་པའི་ཁྱིམ་ཚང་གང་ཙམ་ཡོད་རེད། དེ་དག་ལས་གཞི་འདིའི་ནང་ཞུགས་རྒྱུའི་རིམ་པ་ཞིག་འགྲོ་བཞིན་ཡོད།

གཞན་ཡང་ལྡེ་ར་ལྡུན་དང་དེའི་ཁུལ་དུ་ཁྱིམ་ཚང་བརྒྱ་དང་བཅོ་ལྔ་ཙམ་བརྒྱད་ཅུ་རྒྱ་གྲངས་ནས་ཕལ་ཆེར་འཆར་གཞི་འགོ་བཙུགས་ཀྱང་བར་ཆད་མང་པོ་བྱུང་སྟེ་ད་ལྟའི་ཆར་གྲོང་སྡེ་ཡར་རྒྱས་ཚོགས་པས་ཁྲལ་ཆེན་པོ་བརྒྱབ་པ་དེ་ཆག་ཡང་ཡོང་རྒྱུའི་ཐོག་ང་ཚོས་དབུས་ས་གཉིས་ལ་འབོད་སྐུལ་ཞུ་བཞིན་ཡོད། 

ད་རེས་ཨུཏྟར་ཁཎྜ་མངའ་སྡེའི་སྤྱི་ཁྱབ་བློན་ཆེན་གསར་པ་ཕེབས་ཡོད། དཔལ་ལྡན་སྲིད་སྐྱོང་མཆོག་ཕྱི་ཚེས་ ༢།༣ ལ་ས་གནས་དེར་ཕེབས་ཀྱི་ཡོད་སྟབས། སྤྱི་ཁྱབ་བློན་ཆེན་མཆོག་དང་མཇལ་འཕྲད་གནང་སྟེ་བཀའ་བསྡུར་ཞུ་རྒྱུ་ལས་རིམ་ཞིག་ཡོད། བཀའ་འཁྲོལ་ཐོབ་པ་ཡིན་ན། དངུལ་གང་ཙམ་ང་ཚོས་གྲ་སྒྲིག་བྱེད་བཞིན་ཡོད། དེ་བཞིན་དབུས་བོད་མིའི་ངལ་སེལ་ཚོགས་པས་ཉོས་པའི་ས་ཆ་ཕྲན་བུ་ཡོད། གཞིས་ཆགས་ནང་མ་ཚུད་པ་དང་བོད་ནས་གསར་དུ་འབྱོར་བ་ས་གནས་སུ་སྡོད་བཞིན་པ་དེ་དག་གི་ཆེད་དུ་ཁང་པ་བརྒྱག་ཐུབ་པའི་ཆ་རྐྱེན་ཚང་ན་ཁང་པ་བརྒྱག་རྒྱུ་རེད། གལ་སྲིད་དངུལ་གྲ་སྒྲིག་མ་སྒྲིག་འདྲ་བྱུང་ན། ས་ཆ་བགོ་འགྲེམས་བྱེད་ནས་ཁང་པ་བརྒྱག་རྒྱུའི་ས་ཆ་ཞིག་ལས་མེད་ནའང་སྤྲད་ཐུབ་རྒྱུའི་ལས་རིམ་ཞིག་འགྲོ་བཞིན་ཡོད་ཞུ་རྒྱུ་ཡིན།།