༢༠༡༧ ཟླ་ ༣ ཚེས་ ༤ རེས་གཟའ་སྤེན་པ།

༄༅། །བོད་ཀྱི་ཟློས་གར་ཚོགས་པ་ནས་གཞིས་བྱེས་བོད་མི་དང། བོད་དོན་རྒྱབ་སྐྱོར་གནང་མཁན་ཡོངས་ལ་མེ་བྱའི་གནམ་ལོ་གསར་བཞད་རྟེན་འབྱུང་ལ་འཚམས་འདྲིའི་བཀྲ་ཤིས་བདེ་ལེགས་ཀྱི་སྔོན་བསུས་ཏེ། བོད་རྒྱལ་ལོ་ ༢༡༤༤ ཕྱི་ལོ་ ༢༠༡༧ ཟླ་ ༤ ཚེས་ ༡༩  ནས་ཚེས་ ༢༣ བར་བོད་ཀྱི་ཞོ་སྟོན་རྒྱས་པ་ཐེངས་ ༢༢ ལྡེ་ར་ལྡུན་ས་ཁུལ་ཁག་ཏུ་སྲུང་བརྩི་ཞུ་གཏན་འཁེལ་བའི་གསར་འགོད་གསལ་བསྒྲགས་ཞུ་རྒྱུ།

ཞོ་སྟོན་བྱུང་རབས།
བོད་དུ་རིག་གཞུང་རྒྱ་ཆེ་གཏིང་ཟབ་ཡོད་ཁོངས་ལྷ་མོའི་སྒྱུ་རྩལ་ཐོག་མར་དུས་རབས་བཅུ་བཞི་པའི་ནང་གྲུབ་པའི་དབང་ཕྱུག་ཐང་སྟོང་རྒྱལ་པོས་གསར་གཏོད་མཛད་པའི་ཐུན་མོང་མ་ཡིན་པའི་ཕུལ་བྱུང་གི་སྒྱུ་རྩལ་ཞིག་ཡིན། དུས་རབས་ ༡༥ ནང་༸རྒྱལ་མཆོག་སྐུ་ཕྲེང་ལྔ་པ་ཆེན་པོ་མཆོག་གསེར་ཁྲི་མངའ་གསོལ་གྱི་མཛད་སྒོ་འབྲས་སྤུངས་ཞོ་སྟོན་དང་བསྟུན་གཞུང་འབྲེལ་འཁྲབ་སྟོན་ཐོག་མ་ཞུས་པ་ནས་བོད་ཀྱི་ཞོ་སྟོན་དུས་ཆེན་ཞེས་བོད་ས་མ་ཤོར་བར་ནོར་གླིང་སྡིངས་ཆའི་སྟེང་རྒྱལ་མཁར་བ། སྐྱོར་མོ་ལུང་པ། གཅུང་པ། ཤངས་པ་སོགས་ནས་སྒྱུ་རྩལ་འཁྲབ་སྟོན་ལོ་རྒྱུས་རང་བཞིན་ལྡན་པའི་རིག་གཞུང་གི་དུས་ཆེན་གལ་ཆེ་ཞིག་ཡིན།

བྱེས་སུ་ཞོ་སྟོན་དར་ཚུལ།
ཕྱི་ལོ་ ༡༩༥༩ ལོར་བོད་ས་ཡོངས་རྫོགས་རྒྱ་ནག་དམར་པོའི་གཞུང་ནས་བཙན་བཟུང་བྱས་རྗེས། བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༧སྐྱབས་མགོན་ཆེན་པོ་མཆོག་གིས་དབུས་པའི་བོད་མི་འབུམ་ལ་ཉེ་བ་བཙན་བྱོལ་དུ་ཕེབས་དགོས་གྱུར། བྱེས་སུ་འཁོད་མ་ཐག་མགོན་པོ་གང་ཉིད་ཀྱི་ཐུགས་རྗེ་བཀའ་དྲིན་ལ་བརྟེན་ནས་ཕྱི་ལོ་ ༡༩༥༩ ཟླ་ ༨ ཚེས་ ༡༡ ཉིན་བོད་ཀྱི་རིག་གཞུང་གི་བསྟི་གནས་བོད་ཀྱི་ཟློས་གར་ཚོགས་པ་གསར་འཛུགས་བཀའ་དྲིན་ཆེ་བསྟུན་བོད་ཀྱི་ཞོ་སྟོན་དུས་ཆེན་སླར་གསོ་ཞུ་ཐུབ་པ་བྱུང་། ཕྱི་ལོ་ ༡༩༩༣ ལོར་མགོན་པོ་གང་ཉིད་མཆོག་གི་བཀའ་འབྲེལ་བྱེས་སུ་དབུས་དང། ས་གནས་ལྷ་མོའི་ཚོགས་པ་མཉམ་འདུས་བོད་ཀྱི་ཞོ་སྟོན་རྒྱས་པ་སླར་གསོ་ཐོག་མ་ཞུས།

བོད་ཀྱི་ཞོ་སྟོན་ཐེངས་ ༢༢ པ།
འདི་ལོ་བོད་ཀྱི་ཞོ་སྟོན་རྒྱས་པ་ཐེངས་ ༢༢ རྒྱ་གར་བྱང་ཕྱོགས་ལྡེ་ར་ལྡུན་བདེ་སྐྱིད་གླིང་དང། མ་སུ་རི། རཇ་པུར། ཀ་ལ་མན་ཌོན། སྤོན་ཌ་བཅས་སུ་ཕྱི་ལོ་ ༢༠༡༧ ཟླ་ ༤ ཚེས་ ༡༩ ནས་དབུ་འཛུགས་གནང་གཏན་འཁེལ་བ་དང། སྐབས་དེར་བོད་ཀྱི་ཟློས་གར་ཚོགས་པ་གཙོས་པས་ས་གནས་ལྷ་མོ་ཚོགས་པ་ཁག་བཅུ་ལྷན་འཛོམས་ཀྱིས་བོད་ཀྱི་ལྷ་མོའི་སྒྱུ་རྩལ་འཁྲབ་སྟོན་ཞུ་རྒྱུའི་དུས་ཚེས། ས་གནས། ལྷ་གཞུང་བཅས་གཤམ་གསལ།

བཅས་ནས་བོད་ཀྱི་ལྷ་མོའི་སྒྱུ་རྩལ་གཟིགས་འབུལ་ཞུ་རྒྱུ་ལགས་ན། གནའ་བོའི་བོད་ཀྱི་རིག་གཞུང་གི་ཁྱད་ནོར་བཟང་པོའི་ཡོན་ཏན་རྣམས་འགྲོ་བ་ཀུན་ལ་རྒྱུན་འཇགས་བྱུང་སྟེ། འཛམ་གླིང་ཀུན་དུ་ཞི་བདེ་འཕེལ་བའི་རེ་སྨོན་དང་བཅས་བོད་ཀྱི་རིག་གཞུང་ལ་བརྩེ་ཞེན་ལྡན་པས་གཟིགས་མོ་བ་རྒྱ་ཆེའི་མང་ཚོགས་གང་མང་མཉམ་ཞུགས་ངེས་གནང་ཡོང་བའི་གསར་འགོད་གསལ་བསྒྲགས་སུ། བོད་ཀྱི་ཟློས་གར་ཚོགས་པ་ནས་ཕྱི་ལོ་ ༢༠༡༧ ཟླ་  ༣ ཚེས་ ༤ ལ།། །།