༢༠༡༧ ཟླ་ ༣ ཚེས་ ༡༠ རེས་གཟའ་པ་སངས།

པར་ལེན་པ་དགའ་ལྡན་ཕོ་བྲང་ཡིག་ཚང་གི་པར་པ་བསྟན་འཛིན་ཆོས་འབྱོར་ལགས།

༄༅། །ཕྱི་ལོ་ ༢༠༡༧ ཟླ་ ༣ ཚེས་ ༩ ཉིན་ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་དབུ་བརྙེས་ནས་ལོ་ངོ་ཉི་ཤུ་རྩ་གཅིག་འཁོར་བ་དང་། ནོར་གླིང་ནས་བཞེངས་བསྐྲུན་ཞུས་པའི་༸རྒྱལ་བའི་འཁྲུངས་རབས་ཞལ་ཐང་རྣམས་༸གོང་ས་༸སྐྱབས་མགོན་ཆེན་པོར་ལེགས་འབུལ་ཞུ་རྒྱུ། གངས་ཅན་ཤེས་རིག་བང་མཛོད་དཔར་བསྐྲུན་ཐོག་མ་ཞུས་པའི་དབུ་འབྱེད་མཛད་སྒོར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་སློབ་སྩལ་དོན།

དེ་རིང་ནོར་བུ་གླིང་གའི་རིག་གཞུང་ཉམས་པ་སོར་ཆུད་མི་ཉམས་གོང་སྤེལ་གྱི་ལས་འགུལ་མང་པོ་ཅིག་སྒྲུབ་སྡོད་མཁན་གྱི་ཚོགས་པ་འདི་ལོ་ངོ་ཉི་ཤུ་རྩ་གཅིག་འཁོར་བའི་དུས་དྲན་གནང་བ་རེད།   ལོ་ཡུན་འདིའི་རིང་ལ་སྐལ་བཟང་ཡེ་ཤེས་ལགས་ཁྱེད་བཟའ་འཚོ་གཉིས་ནས་ཧུར་ཐག་འབད་ཐག་གནང་སོང་།   ད་ཆ་ལོ་ན་རྒས་པ་དང་ལུས་པོའང་གཅོང་པོ་ཆགས་ཡོང་གི་ཡོད།

འོན་ཀྱང་ཧུར་ཐག་གནང་ཡོད། དེ་སྔ་གངས་ཅན་སྐྱིད་གཤོང་གི་སྒྲིག་འཛུགས་ནང་ལའང་ལས་ཀ་ལོ་མང་བྱས་པ་རེད། ཧུར་ཐག་འབད་ཐག་བྱས་སོང་། དེ་ནས་གཤམ་འོག་གི་ལས་རིགས་སྡེ་ཚན་སོ་སོའི་ནང་ལ་ཁྱེད་རང་ཚོ་འགན་འཁྱེར་མཁན་རྣམས་ནས་ཧུར་ཐག་འབད་ཐག་བྱས་པ་རེད། དེ་བཞིན་འདིར་སློབ་སྦྱོང་བྱེད་མཁན་ཚང་མས་སེམས་ཤུགས་སྐྱེས་ནས་ཧུར་བརྩོན་བྱས་པ་ཡིན་དུས་ཁྱེད་རང་ཚོ་འགོ་ལས་དང་འབྲེལ་ཡོད་ཚང་མར་ཐུགས་རྗེ་ཆེ་ཟེར་གྱི་ཡིན།

ང་ཚོ་བོད་མི་བཙན་བྱོལ་བ་ཆགས་ནས་བཙན་བྱོལ་བ་འདྲ་འདྲའི་ནང་ནས་ཕལ་ཆེར་མི་འདྲ་བ་གཅིག་དང་།  སོ་སོའི་མི་རིགས་ཀྱི་རིག་གཞུང་དང་གོམས་གཤིས་དེ་དག་རྒྱུན་འཛིན་བྱས་པ་ཙམ་དུ་མ་ཟད་འཛམ་གླིང་སྤྱི་ལ་ཡིན་ནའང་གང་ཙམ་ཕན་ཐོགས་བྱེད་རྒྱུའི་ལེགས་སྐྱེས་ཕུལ་ཡོད། དེ་འདྲ་ཡིན་དུས་དེའི་ནང་ལ་སྒྲིག་འཛུགས་འདིས་བྱས་རྗེས་ངེས་ཅན་བཞག་ཡོད་པར་བརྟེན་རྗེས་སུ་ཡི་རང་ཞུ་རྒྱུ་དང་། དེ་ལྟ་བུའི་བྱས་རྗེས་འཇོག་མཁན་མང་པོ་ཞིག་མིང་ཙམ་ལྷག་པ་མ་གཏོགས་འདས་གྲོངས་ཟིན་པ་རེད།

ངོས་ཀྱིས་རྟག་ཏུ་འདི་དྲན་བཞིན་ཡོད།  སྤེན་རྡོར་ལགས་ལྟ་བུ། དེ་བཞིན་ལྷ་བྲིས་པའི་འགོ་ཁྲིད་མང་པོ་ཅིག་མིང་ཙམ་མ་གཏོགས་འདས་གྲོངས་ཟིན་པ་རེད། དེ་དག་གིས་ལོ་མང་དཀའ་ལས་བརྒྱབ་ནས་བྱས་རྗེས་བཞག་པ་དེ་དག་དྲན་གསོ་བྱེད་དགོས་རྒྱུ་དང་སྨོན་ལམ་བརྒྱབ་རྒྱུ་རེད། དེ་རིང་འདིར་ང་ཚོས་མཛད་སྒོ་བྱས་ནས་བཀྲ་ཤིས་པའི་དུས་འཁེལ་ཡོད།

བོད་ཀྱི་རིག་གཞུང་གཅེས་སྐྱོང་བྱེད་རྒྱུའི་རིག་གཞུང་ནི། བོད་མི་རིགས་ཀྱི་རིག་གཞུང་རེད།   བོད་མི་རིགས་ཀྱི་རིག་གཞུང་ནི། ལོ་ཉིས་སྟོང་ལྷག་རིང་ཐོག་མར་ནང་ཆོས་མ་དར་གོང་ང་རང་ཚོའི་རིག་གནས་ཤིག་ཡོད་པ་རེད། ཞང་ཞུང་དང་འབྲེལ་བ་ཡོད་པ་རེད།   ཞང་ཞུང་བོན་གྱི་རིག་གཞུང་ཡོད།   སྐབས་དེ་དུས་ན་གསོ་བ་རིག་པ་ཕལ་ཆེར་ཡོད་ས་རེད།    དེའི་མཚོན་པའི་གང་ལྟར་ང་རང་ཚོ་བོད་མི་རིགས་ཀྱི་རིག་གཞུང་ནི་ལོ་སྟོང་ཕྲག་མང་པོ་ཕྱིན་པའི་རིག་གཞུང་ཞིག་ཏན་ཏན་ཆགས་ཡོད།

མི་རབས་མང་པོ་ཞིག་གིས་རིག་གནས་གསར་པ་ཁག་ཡར་རྒྱས་བཏང་། ལྷག་པར་རྒྱ་གར་ནས་ཐད་ཀར་མཁན་ཆེན་ཞི་བ་འཚོ་གདན་ཞུ་གནང་། སངས་རྒྱས་པའི་ཆོས་ནི་སྨོན་ལམ་བརྒྱབ་རྒྱུ་ཁོ་ནའི་སྐད་ཆ་མིན། སངས་རྒྱས་པའི་ཆོས་ནི་ལྟ་གྲུབ་དང་འབྲེལ་བ་ཞིག་ཆགས་འདུག  དེར་བརྟེན་མཁན་ཆེན་ཞི་བ་འཚོར་ཆ་བཞག་ན། དབུ་མའི་གྲུབ་མཐའ་སྨྲ་བ་ཡིན། ཁོང་གང་འདྲ་ཞིག་ཡིན་མིན་དབུ་མ་རྒྱན་དང་ཚད་ཆེན་བལྟ་ན་ཤེས་ཀྱི་རེད། ཁོང་གིས་ཆེད་མངགས་ཞལ་ཆེམས་གནང་སྟེ་མ་འོངས་པར་ཆོས་རྒྱལ་ལ་དཀའ་ངལ་འཕྲད་ན་ངོས་ཀྱི་སློབ་ཕྲུག་དྲགས་པ་ཀ་མ་ལ་ཤཱི་ལ་ཡོད། ཅེས་གསུངས་ནས་ཀ་མ་ལ་ཤཱི་ལ་བོད་དུ་ཕེབས་པ་རེད། ཁོང་གི་དབུ་མ་སྣང་བ་ཡོད། ད་ལྟ་ཡིན་ནའང་བལྟ་རྒྱུའི་གཞུང་གལ་ཆེན་པོ་ཞིག་ཆགས་ཡོད། ཚད་ཆེན་གྱི་འགྲེལ་བ་བསྟན་འགྱུར་ནང་པོ་ཏི་གཉིས་འདུག  བོད་རང་གི་ས་གནས་ས་ཐོག་ཏུ་ཕེབས་ཏེ་སྒོམ་རིམ་མཛད་ཡོད།

དེ་དག་འདུལ་བ་འཛིན་པའི་མཁས་གྲུབ་གཉིས་ལྡན་གྱི་སྐྱེས་བུ་དམ་པ་ཞིག་ཡིན་པ་ནི་གཞུང་དེ་དག་ལས་རྟོགས་ཐུབ།   དེ་དག་གི་སྲོལ་བཟང་གཏོད་པ་དེ་དག་ལོ་ངོ་སྟོང་ཕྲག་རིང་གཅེས་འཛིན་བྱས་ཡོད།   ཆབ་སྲིད་ཐོག་ལ་ང་ཚོ་ཁུངས་ལུང་དེ་ཙམ་མེད།  ཇབ་བསྐྱལ་ནས་ཕྱིན་པ་རེད།  གནད་དོན་ཆེ་སར་བལྟ་མ་ཐུབ་པར་ངོ་གདོང་གི་གནས་ཚུལ་ཆུང་ས་ལ་ཧ་ཅང་མགོ་འཁོར་ནས།  ལུང་ཆུང་རེ་ལ་དཔོན་ཆུང་རེ་དང་། ལུང་ཆུང་རེ་ལ་བླ་མ་རེ།    ཟེར་ནས་སོ་སོའི་སྡེ་རང་ལ་མགོ་འཁོར་བ་མ་གཏོགས་བོད་སྤྱི་ཡོངས་ཀྱི་སྔར་ཆོས་རྒྱལ་མེས་དབོན་རྣམ་གསུམ།  ཞེས་ཡོད་པའི་སྐབས་སུ་བོད་སྤྱི་རུ་ག་འདྲ་ཡོད་མེད་ཀྱི་བསམ་བློ་དེ་ཙམ་མེད་པ་དེ་ལྟར་ཕྱིན་པ་རེད། འོན་ཀྱང་བོད་ཀྱི་ཆོས་དང་རིག་གཞུང་དེ་མཁན་ཆེན་ཞི་འཚོ་ཡབ་སྲས་ཀྱིས་བོད་ལ་ངོ་སྤྲོད་དང་ལག་སྤྲོད་གནང་བ་འདི་བོད་ཀྱི་མེས་པོ་དེ་དག་གིས་ལོ་ངོ་སྟོང་ཕྲག་ལྷག་རིང་ཧུར་ཐག་འབད་ཐག་འཛིན་སྐྱོང་བྱས་འདུག  མཁན་ཆེན་ཞི་བ་འཚོ་ནི་དཔལ་ནཱ་ལེནྡྲའི་མཁས་པ་རེད། ཁོང་ནི་ཀླུ་སྒྲུབ་ཡབ་སྲས་སོགས་ཀྱི་རྗེས་འབྲང་ཆགས་ཡོད།

ངོས་ཀྱིས་ནམ་རྒྱུན་རྟག་པར་ཤོད་བཞིན་པའི་དཔལ་ནཱ་ལེནྡྲའི་མཁས་པའི་དབང་པོ་དེ་སྔ་ཡིན་ན་རྒྱན་དྲུག་མཆོག་གཉིས་བཤད་ཀྱི་ཡོད། བར་སྐབས་ངོས་ཀྱིས་པཎ་གྲུབ་བཅུ་བདུན་ཞེས་ཤོད་ཀྱི་ཡོད།

པཎ་གྲུབ་བཅུ་བདུན་གྱིས་བརྩམས་པའི་ལེགས་བཤད་དེ་དག་ང་ཚོས་སློབ་སྦྱོང་བྱེད་ཀྱི་ཡོད། སློབ་སྦྱོང་བྱེད་རྒྱུ་དེ་ཆོ་ག་འདོན་རྒྱུ་ལྟ་བུ་དང་། རྔ་གང་འདྲ་རྡུང་དགོས་མིན། སྦུབ་གང་འདྲ་བཀྲོལ་དགོས་མིན་གྱི་སྐད་ཆ་མ་རེད། དངོས་གནས་དྲང་གནས་སེམས་ཁམས་རིག་པ་གཙོ་བོར་གྱུར་པའི་སེམས་ཇི་ལྟར་འདུལ་ཐབས་བྱེད་དགོས་མིན་དེ་དག་སྨོན་ལམ་བརྒྱབ་ནས་འདུལ་དགོས་རེད་གསུང་གི་མི་འདུག

མིའི་རྣམ་དཔྱོད་ཀྱི་ཀླད་པ་བེད་སྤྱོད་བྱས་ནས་རང་གཞན་སུ་ཡིན་ནའང་སྡུག་བསྔལ་མི་འདོད་པ་དང་བདེ་བ་འདོད་པ་རེད། བདེ་བ་དང་སྡུག་བསྔལ་གྱི་རྒྱུ་ཕྱི་ལོགས་རྐྱང་རྐྱང་ལ་ཡོད་དམ།   དེ་མ་རེད་གཙོ་བོ་ནང་སེམས་རྒྱུད་ལ་བརྟེན་ནས་བདེ་བ་དང་སྡུག་བསྔལ་ཡོང་རྒྱུ་དེ་ཆགས་ཀྱི་ཡོད། དེ་དག་ཞིབ་འཇུག་བྱས་ནས་སེམས་མ་སྐྱིད་པ་བཟོ་མཁན་སེམས་མ་དུལ་བའི་ཆ་དེ་དག་གཞི་རྟེན་གང་འདུག་དེར་བརྟག་དཔྱད་བྱས་ནས་སེམས་མ་དུལ་བའི་རྒྱུ་རྐྱེན་ལ་བཟོ་ལྟ་སྤྲོད་ནས་འགྱུར་བ་འགྲོ་རྒྱུ། སེམས་འདུལ་བའི་ཆ་དེ་རྒྱུ་རྐྱེན་ག་འདྲ་ཡོང་གི་འདུག དེ་དག་ཤུགས་ཆེ་རུ་གཏོང་རྒྱུ་དེ་དག་རིག་པའི་རྒྱུ་མཚན་ཐོག་ནས་ཡོང་གི་ཡོད།

དེ་འདྲ་ཡིན་དུས་ད་ལྟ་ངོས་ཀྱིས་བརྗོད་རྒྱུ་འདི་གང་ལྟར་ང་རང་ཚོའི་ཉམས་པ་གསོར་ཆུད་མི་ཉམས་གོང་སྤེལ་གྱི་ལས་ལས་ཀ་བྱེད་རྒྱུའི་ཆོས་དང་རིག་གཞུང་ཟེར་དུས་ལོ་བརྒྱ་ཕྲག་དང་སྟོང་ཕྲག་རིང་བར་ལ་བསམ་བློ་གཏང་རྒྱུ་ཞིག་རེད། ང་ཚོའི་མི་རབས་རྫོགས་འགྲོ་གི་རེད། འོན་ཀྱང་ང་ཚོའི་ལས་འགན་འདི་མུ་མཐུད་ སྔོན་མ་དཀའ་ལས་བརྒྱབ་མཁན་ཁོ་ཚོའི་གྲས་ཀྱི་བྱས་རྗེས་འདི་ད་ལྟ་ལྷག་ནས་བསྡད་ཡོད་རེད།

དེའི་རྗེས་སུ་ཡོང་མཁན་གྱིས་མུ་མཐུད་ནས་བྱེད་བསྡད་ཀྱི་ཡོད་རེད། རིམ་པས་ཁྱེད་རང་ཚོ་སྤོ་ལགས་རྨོ་ལགས་དང་ད་ལྟ་ཕོ་གསར་མོ་གསར་ཚོ་རྗེས་ལ་སྤོ་ལགས་ཆགས་ཀྱི་རེད། རྨོ་ལགས་ཆགས་ཀྱི་རེད། དེ་ནས་འཆི་རྒྱུ་རེད། འོན་ཀྱང་ད་ལྟ་ཁྱེད་རང་ཚོས་དཀའ་ལས་བརྒྱབ་བཞག་པ་དེ་དག་མུ་མཐུད་ནས་མི་རབས་རྗེས་མས་མཇུག་བསྐྱལ་གྱི་རེད། བསྐྱལ་དགོས་རྒྱུ་རེད། དེ་འདྲ་ཡིན་དུས་ང་ཚོས་སྒྲིག་འཛུགས་ཁག་དེ་དག་སྒྲིག་འཛུགས་ཀྱི་ལས་ཀ་ལོ་བཅུ་ཕྲག་ཁ་ཤས་ཀྱི་སྐད་ཆ་མ་རེད། ལོ་བརྒྱ་ཕྲག་མང་པོ་བསམ་བློ་གཏང་དགོས་རྒྱུ་ཞིག་རེད།

ད་ལྟ་བར་དུ་ཧུར་དག་བྱས་པ་རེད། ད་དུང་ཡིན་ནའང་ཧུར་ཐག་བྱེད་རོགས་ཞེས་ཟེར་གྱི་ཡིན།  ཞེས་སོགས་ཀྱི་བཀའ་སློབ་སྩལ།།