ཕྱི་ལོ་ ༢༠༡༧ ཟླ་ ༣ ཚེས་ ༡༠
༄༅། །ད་རིང་ལོ་རྒྱུས་རང་བཞིན་ལྡན་པའི་༸དཔལ་ས་སྐྱའི་ཁྲི་རབས་ཞེ་གཉིས་པའི་ཁྲི་སྟོན་མཛད་སྒོ་འདིའི་གཙོ་མགོན་དུ་༸ཞབས་སོར་འཁོད་པ། བརྩེ་ཆེན་རྒྱལ་བའི་རིང་ལུགས་མཚན་མཆོག་གསུམ་ལྡན་ལྷ་རིགས་འཁོན་གདུང་ས་སྐྱ་པ་ཞེས་སྙན་པའི་གྲགས་པ་ས་གསུམ་དུ་ཁྱབ་པའི་༸སྐྱབས་མགོན་༸གོང་མ་ཁྲི་ཆེན་རྡོ་རྗེ་འཆང་ཆེན་པོ་མཆོག་དང་། ༸སྐྱབས་མགོན་༸གོང་མ་ཁྲི་འཛིན་ཞེ་གཉིས་པ་ཆེན་པོ་མཆོག རྒྱ་གར་དབུས་གཞུང་ནང་སྲིད་ལས་ཁུངས་ཀྱི་སྐུ་ཚབ་སྐུ་ཞབས་ཨ་མི་ཏབྷ་མ་ཐུར་མཆོག སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་ཚབ་རྣམ་གྲྭ་མཁན་རིན་པོ་ཆེ། ས་སྐྱའི་ཕོ་བྲང་རྣམ་པ་གཉིས་ཀྱི་གདུང་སྲས་དང་རྗེ་བཙུན་མ་བགྲེས་གཞོན་རྣམ་པ། བདག་མོ་སྐུ་ཞབས་རྣམ་པ། སྐྱབས་རྗེ་ཀུན་བདེ་གླིང་རིན་པོ་ཆེ་དང་། སྐྱབས་རྗེ་རྫོང་གསར་མཁྱེན་བརྩེ་མཁྱེན་རིན་པོ་ཆེ། སྐྱབས་རྗེ་འཇིགས་མེད་མཁྱེན་བརྩེ་རིན་པོ་ཆེ་བཅས་ཀྱིས་དབུས་པའི་རིས་མེད་བླ་སྤྲུལ་མཁན་སློབ། བོད་མིའི་སྒྲིག་འཛུགས་ཀྱི་དཔལ་ལྡན་སྤྱི་འཐུས་ཚོགས་གཙོ་མཆོག་གིས་དབུས་པའི་མཛད་གཙོ་རྣམ་པ། རྒྱ་གར་དབུས་དང་མངའ་སྡེའི་སྐུ་ཚབ་དཔོན་རིགས་རྣམ་པ། དཔལ་ས་སྐྱའི་མ་དགོན་ཐུབ་བསྟན་རྣམ་རྒྱལ་གླིང་གི་མཁན་སློབ་འདུས་མང་། ཆེད་ཕེབས་ཕྱི་ནང་གི་སྐུ་མགྲོན་རྣམ་པ། ས་གནས་སེར་སྐྱ་མང་ཚོགས་བཅས་ལ། ཐོག་མར་གུས་ནས་བོད་མིའི་སྒྲིག་འཛུགས་བཀའ་ཤག་དང་ཆོས་རིག་ལས་ཁུངས་གཉིས་ཀྱི་ཚབ་ཞུས་ཏེ་དགའ་སྤྲོ་ཆེན་པོའི་ངང་ནས་ཚང་མར་གུས་བཏུད་དང་འཚམས་འདྲི་བཀྲ་ཤིས་བདེ་ལེགས་ཞུ་རྒྱུ་ཡིན།
ཁ་སང་གཟའ་ཚེས་འཕྲོད་སྦྱོར་དགེ་བའི་ཉིན་རང་ལུགས་སྲོལ་རྒྱུན་གཞི་བཟུང་དཔལ་ས་སྐྱ་སྒྲོལ་མ་ཕོ་བྲང་གི་༸སྐྱབས་མགོན་༸གོང་མ་བདག་ཁྲི་རྡོ་རྗེ་འཆང་ཆེན་པོའི་གདུང་སྲས་སྐུ་བགྲེས་མཁྱེན་དང་བརྩེ་བའི་ཡོན་ཏན་མཚུངས་ཟླ་མ་མཆིས་པ་རཏྣ་བཛྲ་རིན་པོ་ཆེ་ངག་དབང་ཀུན་དགའ་བློ་གྲོས་དབང་ཕྱུག་རིན་ཆེན་འཇིགས་མེད་འཕྲིན་ལས་མཆོག་དཔལ་ས་སྐྱའི་༸སྐྱབས་མགོན་༸གོང་མ་ཁྲི་རབས་ཞེ་གཉིས་པར་མངའ་གསོལ་གྱི་མཛད་སྒོ་གཟབ་རྒྱས་ལེགས་གྲུབ་ཟིན་ཡོད་པར། གུས་ནས་བོད་མིའི་སྒྲིག་འཛུགས་བཀའ་ཤག་དང་དེ་འོག་འབྲེལ་ཡོད་ཆོས་རིག་ལས་ཁུངས་གཉིས་ཀྱི་ཚབ་ཞུས་ཏེ། དཔལ་ས་སྐྱའི་ཁྲི་རབས་ཞེ་གཉིས་པ་༸སྐྱབས་མགོན་༸གོང་མ་རཏྣ་བཛྲ་རིན་པོ་ཆེ་མཆོག་ལ་གུས་ཕྱག་དང་བཅས་ཏེ་འཚམས་འདྲི་བཀྲ་ཤིས་བདེ་ལེགས་གྲངས་མེད་ཞུ་རྒྱུ་དང་། ཁྲི་འཛིན་གྱི་ཐུགས་འགན་བཞེས་རིང་ཕྱི་ནང་གསང་གསུམ་གྱི་མཛད་དོན་མཐའ་དག་༸སྐྱབས་མགོན་གང་ཉིད་ཀྱི་རྨད་བྱུང་ཐུགས་བསྐྱེད་ཇི་བཞིན་དང་། ཡབ་རྗེ་གོང་མ་རྣམས་ཀྱི་ཐུགས་དགོངས་ཇི་བཞིན་གེགས་མེད་ལམ་ལྷོངས་ཡོང་བ་དང་། དེ་ལ་བརྟེན་ནས་དུས་རབས་དང་མཐུན་པའི་བསྟན་པའི་ཞབས་འདེགས་ཀུན་གྱི་མིག་དཔེར་འོས་པ་ཞིག་བསྒྲུབ་ཐུབ་པའི་སྨོན་འདུན་དང་རེ་འདུན་ཆབས་ཅིག་ཞུ་རྒྱུ་ཡིན།
ད་ལྟ་བདག་ཅག་གི་བསོད་ནམས་ཀྱི་དཔལ་དུ་འཚོ་ཞིང་གཞེས་པ་དཔལ་ས་སྐྱའི་ཁྲི་རབས་ཞེ་གཅིག་པ་༸སྐྱབས་མགོན་༸གོང་མ་བདག་ཁྲི་རྡོ་རྗེ་འཆང་ཆེན་པོ་དགོས་པ་དང་དོན་གྱི་སླད་དུ་མཚན་ནས་སྨོས་ན་རྗེ་བཙུན་ངག་དབང་ཀུན་དགའ་ཐེག་ཆེན་དཔལ་འབར་འཕྲིན་ལས་བསམ་འཕེལ་དབང་གི་རྒྱལ་པོ་མཆོག་ནི། བོད་ཀྱི་ལོ་རྒྱུས་ནང་བྱུང་མ་མྱོང་བའི་ཤིན་ཏུ་གཉན་འཕྲང་ཆེ་བའི་དུས་སྐབས་ཤིག་ཏུ་བོད་ཀྱི་བསྟན་འགྲོའི་གོད་ཆག་ཐུགས་ཀྱིིིས་མ་བཟོད་པར་བསམ་བཞིན་དུ་སྐུའི་མཚན་དཔེ་བཞད་ཅིང་། སྐུ་ན་ཤིན་ཏུ་ཕྲ་བའི་སྐབས་ཉིད་ནས་ཡབ་ཡུམ་དང་ཞལ་བྲལ་གྱུར་པ་དང་། བོད་དབུས་གཙང་ཁུལ་དུས་འགྱུར་གྱི་ཟང་ཟིང་འགོ་ཚུགས་པ་སོགས་འགལ་རྐྱེན་དུ་མ་རིམ་དང་ཅིག་ཅར་འཕྲད་ཀྱང་། དམ་པའི་རང་རྟགས་འགོག་མེད་ཐུགས་སྟོབས་གོ་ཆ་བཙན་པོས་འགལ་རྐྱེན་དང་སྐུ་ངལ་ཇི་འཕྲད་ལྷུར་བཞེས་ཀྱིས་སྐབས་བབས་གསན་བསམ་སློབ་གཉེར་དང་ཐུགས་དམ་ཉམས་བཞེས་གནང་སྒོ་ཁག་ལ་ཐུགས་གཞོལ་བར་མཛད། དགུང་ལོ་བཅུ་བཞི་སྟེང་བོད་ཁམས་ཡོངས་ལ་དུས་འགྱུར་གྱི་རླུང་དམར་ཆེས་ཆེར་ལྡང་བཞིན་པའི་དུས་སྐབས་ཤིག་ལ་དཔལ་ས་སྐྱའི་༸སྐྱབས་མགོན་༸གོང་མ་ཁྲི་རབས་ཞེ་གཅིག་པའི་གསེར་གྱི་ཁྲི་འཕང་མངོན་པར་མཐོ་བར་མངའ་གསོལ་བདག་བཞེས་མཛད་པ་ནས་ད་བར་མི་ལོ་ ༥༨ དང་། ས་སྐྱའི་ཁྲི་འཛིན་དུ་གཏན་འཁེལ་བྱུང་བ་ནས་ད་བར་མི་ལོ་ ༦༥ ཧྲིལ་པོ་སོང་ཡོད་པ་ནི། ས་སྐྱའི་ཁྲི་འཛིན་དང་པོ་འཁོན་དཀོན་མཆོག་རྒྱལ་པོ་ནས་ད་བར་ཕེབས་པའི་ས་སྐྱའི་ཁྲི་འཛིན་ཐམས་ཅད་ཀྱི་ནང་ནས་ཁྲི་འཛིན་གནང་ཡུན་རིང་ཤོས་དེ་ཆགས་ཡོད་པ་མ་ཟད། བོད་སྤྱི་དང་ཁྱད་པར་དཔལ་ས་སྐྱ་པའི་བྱུང་རབས་ལོ་རྒྱུས་ནང་གཉན་འཕྲང་ཆེ་ཤོས་ཀྱི་དུས་སྐབས་ཤིག་ཏུ་ལོ་ཡུན་དེ་ཙམ་རིང་སྐུ་ངལ་བརྒྱ་ཕྲག་ལྷུར་བཞེས་ཀྱིས་བོད་ཀྱི་ནང་བསྟན་སྤྱི་དང་བྱེ་བྲག་དཔལ་ས་སྐྱ་པའི་བཤད་སྒྲུབ་ཀྱི་བསྟན་པ་རིན་པོ་ཆེ་ཉམས་པ་སླར་གསོ་དང་མ་ཉམས་རྒྱུན་འཛིན་ཐོག་མཛད་རྗེས་གྲུབ་འབྲས་རླབས་པོ་ཆེ་འཇོག་གནང་མཛད་ཡོད་པ་དང་། ལྷག་པར་བཙན་བྱོལ་དུ་བོད་ཀྱི་བསྟན་སྲིད་རྩ་དོན་གང་ཅིའི་ཐོག་བོད་མིའི་བླ་ན་མེད་པའི་དབུ་འཁྲིད་སྤྱི་ནོར་༸གོང་ས་༸སྐྱབས་མགོན་༸རྒྱལ་དབང་སྐུ་ཕྲེང་བཅུ་བཞི་པ་ཆེན་པོ་མཆོག་གི་བཀའ་དགོངས་ལ་རྒྱབ་གཉེར་དཔུང་གྲོགས་དང་ཕྱྭར་བ་གྲུ་འདེགས་འགྱུར་མེད་རྒྱུན་ཆགས་སུ་གནང་ཡོད་པར། ད་ལམ་དུས་སྐབས་ཁྱད་པར་ཅན་འདིའི་ཐོག་བོད་མིའི་སྒྲིག་འཛུགས་བཀའ་ཤག་དང་ཆོས་རིག་ལས་ཁུངས་གཉིས་ཀྱི་ངོས་ནས་སྙིང་ཐག་པ་ནས་བཀའ་དྲིན་བླ་ལྷག་ཏུ་ཆེ་ཆེ་ཞེས་བཀའ་དྲིན་རྗེས་དྲན་དང་རྗེས་སུ་ཡི་རང་ཞུ་བ་དང་ཆབས་གཅིག ༸སྐྱབས་མགོན་༸གོང་མ་རྡོ་རྗེ་འཆང་ཆེན་པོ་གང་ཉིད་ཀྱི་མཛད་བཟང་དེ་དག་ལ་བླ་ན་མེད་པའི་གུས་བཀུར་དང་ཆེ་བསྟོད་ཞུ་རྒྱུ་ཡིན།
ཕྱི་ལོ་ ༢༠༡༤ ཟླ་ ༥ ཚེས་ ༨ ཉིན་དཔལ་ས་སྐྱའི་ཕོ་བྲང་རྣམ་གཉིས་ཀྱི་དབུ་འཛིན་༸སྐྱབས་མགོན་རྣམ་གཉིས་ནས་བོད་ཀྱི་ཆོས་བརྒྱུད་ཆེན་པོ་བཞིའི་ཡ་གྱལ་དཔལ་ལྡན་ས་སྐྱ་པ་ཡོངས་ཀྱི་མ་འོངས་བསྟན་བདག་ཁྲི་པའི་མཚན་གནས་བཞེས་ཕྱོགས་ལམ་སྟོན་གསར་པའི་སྐོར་ཞེས་པའི་དགོངས་མཐུན་གྲོས་ཆོད་ཡིག་ཆ་གལ་ཆེན་ཞིག་བཞག་གནང་མཛད་ཡོད་པ་དེ་ནི། དཔལ་ལྡན་ས་སྐྱ་པའི་བསྟན་པའི་འཕྲལ་ཕུགས་རྒྱང་གསུམ་གྱི་གནས་སྟངས་ལ་དགོངས་པ་ཟབ་བཞེས་གནང་བའི་སྒོ་ནས་ཐག་གཅོད་གཏན་འཁེལ་མཛད་པ་ཞིག་ཡིན་པ་སྨོས་མེད་ཁར། ལོ་རྒྱུས་དང་རིན་ཐང་གཉིས་ལྡན་གྱི་སྲོལ་རྒྱུན་ལམ་ལུགས་སྤྱི་དང་ཁྱད་པར་འཛིན་སྐྱོང་དང་འགོ་འཁྲིད་ལམ་སྲོལ་ཁག་ལ་དུས་ཀྱི་འགྱུར་འགྲོས་དང་མཐུན་པའི་གསར་བརྗེ་ལེགས་བཅོས་ངེས་པར་བྱེད་འོས་པའི་ལམ་སྟོན་ཆེན་པོ་ཞིག་ཀྱང་ཡིན། ལྷག་པར་བསྟན་བདག་ཁྲི་འཛིན་གནང་རྒྱུར་མཁྱེན་ཡོན་དང་མཛད་ཡུན་གྱི་ཆ་རྐྱེན་བཞག་གནང་མཛད་པ་གཙོ་བོ་དེང་རབས་ཀྱི་ལམ་སྲོལ་སྤྱི་དང་མཐུན་ཤས་ཆེ་ཞིང་། མཁྱེན་ཡོན་གྱི་ཆ་རྐྱེན་ལྡན་མཉམ་ནང་ཁུལ་ཕེབས་ཁུངས་ཁྱད་མེད་ཀྱིས་བགྲེས་རིམ་བཞིན་ཕེབས་རྒྱུ་གནང་བ་གཙོ་བོ་ཆོས་ལུགས་དང་འབྲེལ་བའི་སྲོལ་རྒྱུན་གྱི་ལམ་སྲོལ་དང་མཐུན་ཤས་ཆེ་བས། དེང་རབས་དང་སྲོལ་རྒྱུན་གྱི་ལམ་སྲོལ་གཉིས་ཀའི་ཁྱད་ཆོས་དང་ལྡན་པའི་དུས་བསྟུན་མཛད་ཕྱོགས་ཁྱད་དུ་འཕགས་པ་ཞིག་ཏུ་མཐོང་། གཞན་ཡང་མཛད་ཕྱོགས་དེ་བོད་མིའི་སྒྲིག་འཛུགས་ཀྱི་སྐབས་བཅུ་བཞི་པ་དང་བཅོ་ལྔ་པའི་བཀའ་ཤག་གིས་ཡོངས་ཁྱབ་གསལ་བསྒྲགས་གནང་བའི་སྲིད་བྱུས། ཆིག་སྒྲིལ། གསར་གཏོད། རང་ཁ་རང་གསོ་བཅས་ཀྱི་དགོངས་ཕྱོགས་དང་ཧ་ཅང་མཐུན་ཤས་ཆེན་པོ་བྱུང་འདུག མདོར་ན། གོང་ཞུས་དཔལ་ས་སྐྱའི་བསྟན་བདག་ཁྲི་འཛིན་ཕེབས་ཕྱོགས་གསར་པ་དེ་བཞིན་རྒྱུ་མཚན་འགྲེལ་བརྗོད་མང་པོ་མི་དགོས་པར་གང་ས་ཅི་ཐད་ནས་བསྔགས་བརྗོད་ཀྱི་གནས་སུ་མཐོང་བས་བཀའ་ཤག་དང་ཆོས་རིག་ལས་ཁུངས་གཉིས་ཀྱི་ངོས་ནས་མཛད་ཕྱོགས་དེར་ངོས་འཛིན་རྒྱབ་གཉེར་བརྟན་པོ་ཞུ་རྒྱུ་ཡིན།
མཐའ་དོན། རྒྱལ་བསྟན་ཡོངས་རྫོགས་ཀྱི་མངའ་བདག་སྤྱི་ནོར་༸གོང་ས་༸སྐྱབས་མགོན་༸རྒྱལ་དབང་ཐམས་ཅད་མཁྱེན་ཅིང་གཟིགས་པ་ཆེན་པོ་མཆོག་དང་། དཔལ་ལྡན་ས་སྐྱ་པའི་༸སྐྱབས་མགོན་༸གོང་མ་ཁྲི་ཆེན་རྡོ་རྗེ་འཆང་ཆེན་པོ་དང་༸སྐྱབས་མགོན་༸གོང་མ་ཁྲི་འཛིན་རྣམ་གཉིས་ཀྱིས་དབུས་བོད་ཀྱི་རིས་མེད་དབུ་འཁྲིད་བླ་ཆེན་རྣམས་སྐུ་ཚེ་ཞབས་པད་རྡོ་རྗེའི་རང་ཁམས་སུ་བརྟན་པ་དང་། མཉམ་མེད་ཐུབ་པའི་དབང་པོའི་བསྟན་པ་སྤྱི་དང་བྱེ་བྲག་བརྩེ་ཆེན་རྒྱལ་བའི་རིང་ལུགས་དཔལ་ལྡན་ས་སྐྱ་པའི་བཤད་སྒྲུབ་དང་མདོ་སྔགས་ཟུང་འབྲེལ་གྱི་བསྟན་པ་རིན་པོ་ཆེ་འདི་ཉིད་ཕྱོགས་དུས་གནས་སྐབས་ཐམས་ཅད་དུ་དར་ཞིང་རྒྱལ་ལ་ཡུན་རིང་དུ་གནས་པའི་སྨོན་འདུན་ཤུགས་དྲག་ཞུ་རྒྱུ་བཅས་ཡིན། བཀའ་ཤག་གིས་ཕྱི་ལོ་ ༢༠༡༧ ཟླ་ ༣ ཚེས་ ༡༠ ལ།། ཐུགས་རྗེ་ཆེ།།
