༢༠༡༧ ཟླ་ ༣ ཚེས་ ༢༨ རེས་གཟའ་མིག་དམར།
༄༅། །ཕྱི་ལོ་ ༢༠༡༧ ཟླ་ ༣ ཚེས་ ༢༦ ཉིན་ཨིན་ཡུལ་སྐུ་ཚབ་དོན་གཅོད་ཆོས་འཕེལ་ཚེ་རིང་ལགས་ཀྱིས་ཨིན་ཡུལ་གྱི་གྲོང་སྡེ་མིལ་ཌོན་ཀི་ནེས་ Milton Keynes ནང་ཡོད་པའི་ནིཔ་པོན་སན་མཡོ་ཧི་ཇི། ཞེས་པའི་ནང་པའི་དགོན་པ་ཞིག་གི་མདུན་དུ་བོད་ཀྱི་རྒྱལ་དར་སྒྲེང་འཛུགས་ཀྱི་ལས་འགུལ་སྤེལ་གནང་འདུག སྐབས་དེར་གྲོང་སྡེའི་སྤྱི་ཁྱབ་པ་མཆོག་དང་ཁོང་གི་ལྕམ་སྐུས་གཙོས་པའི་མི་གྲངས་བརྒྱད་ཅུ་ཙམ་ལྷན་འཛོམས་བྱུང་འདུག
དེ་ཡང་བོད་ཀྱི་རྒྱལ་དེར་སྒྲེང་འཛུགས་ཀྱི་མཛད་སྒོའི་ཐོག་ཨིན་ཡུལ་སྐུ་ཚབ་དོན་གཅོད་ཆོས་འཕེལ་ཚེ་རིང་ལགས་ཀྱིས་གྲོང་སྡེ་སྤྱི་ཁྱབ་པ་མཆོག་དང་ལྕམ་སྐུ་རྣམ་གཉིས་ཀྱིས་གཙོས་བོད་དོན་རྒྱབ་སྐྱོར་བ་ཀེ་ཐི་ར་ཡིན་ Ms Catherine Mostyn Scott ལགས་དང་མཛད་སྒོར་ལྷན་ཞུགས་གནང་མཁན་ཡོངས་ལ་ཐུགས་རྗེ་ཞུ་ཞུས་གནང་བ་མ་ཟད། མུ་མཐུད་རྒྱབ་སྐྱོར་ཡོང་བའི་འབོད་སྐུལ་ཡང་ཞུས་འདུག
སྐབས་དེར་གྲོང་སྡེ་སྤྱི་ཁྱབ་པ་དང་ཀེ་ཐི་ར་ཡིན་ལགས་བཅས་ནས་གསུང་བཤད་གནང་ཡོད་པ་མ་ཟད། ཇེ་མེས་བི་ལིངྒ་ཧམ་ James Billingham ལགས་ཀྱིས་ Under the Flag of Love ཞེས་རྩོམ་བྲིས་གནང་བའི་རྒྱལ་ཞེན་གྱི་གླུ་གཞས་དེ་ཉིད་བཏང་ཡོད། སྤྱིར་བོད་ཀྱི་རྒྱལ་དེར་སྒྲེང་འཛུགས་ཀྱི་ལས་འགུལ་འདི་ཉིད་བོད་དོན་རྒྱབ་སྐྱོར་བ་ཀེ་ཐི་ར་ཡིན་ Catherine Mostyn Scott ལགས་ཀྱིས་དབུ་འཛུགས་གནང་ཞིང་། ལས་འགུལ་སྤེལ་ནས་ལོ་བཞི་འགྲོ་བཞིན་འདུག་པ་བཅས།།
