༢༠༡༧ ཟླ་ ༣ ཚེས་ ༡༦ རེས་གཟའ་ཕུར་བུ།
༄༅། །ཉི་ཧོང་བྱིས་པའི་ཤེས་ཡོན་རོགས་རམ་ཚོགས་པ་རེན་བྷོ་ཅིལ་ཌེན་ Rainbow Children ཞེས་པའི་ཚོགས་གཙོ་སྐུ་ཞབས་ཏ་སུ་ཝ་ཨི་ཤི་ཀ་ཝ་ Mr Tatsuo Ishikawa ལགས་དང་། ཚོགས་གཞོན་ལྕམ་སྐུ་ཡུ་ཀོ་མི་མུ་ར་ Miss Yuko Mimura ལགས་རྣམ་གཉིས་ཀྱིས་གཙོས་ཚོགས་མི་བདུན་རྡ་ས་བཞུགས་སྒར་དུ་ཕེབས་ནས་ཕྱི་ཟླ་ ༣ ཚེས་ ༡༣ ཉིན་ཤེས་རིག་བཀའ་བློན་དངོས་གྲུབ་ཚེ་རིང་མཆོག་དང་མཇལ་འཕྲད་གནང་ནས་སློབ་ཡོན་ལས་གཞིའི་ཐོག་གོ་བསྡུར་གནང་བ་མ་ཟད། སློབ་ཡོན་ཐོབ་མཁན་སློབ་མ་རྣམས་དང་ཐུག་འཕྲད་གནང་ནས་བོད་རིགས་སློབ་མ་ཚོས་བསླབ་པ་མཐར་སོན་རྗེས་མ་འོངས་པར་བོད་མིའི་སྤྱི་ཚོགས་ཁྲོད་འགོ་ཁྲིད་ཡག་པོ་ཞིག་ཡོང་ཐབས་ལ་འབད་དགོས་པའི་ལམ་སྟོན་སོགས་གནང་འདུག
ཕྱོགས་མཚུངས་རོགས་ཚོགས་ཀྱིས་ཕྱི་ལོ་ ༢༠༡༧ ནས་མཐོ་སློབ་ཀྱི་སློབ་ཡོན་སྤྲོད་རྒྱུའི་སློབ་མའི་གྲངས་ཚད་ ༣༥ སྤར་འདུག དེ་ཡང་ད་བར་རོགས་ཚོགས་དེས་སློབ་མ་གྲངས་ ༦༥ ལ་སློབ་ཡོན་གནང་བཞིན་ཡོད་ཀྱང་འདི་ལོ་ནས་བཟུང་སློབ་མ་གྲངས་ ༡༠༠ ལ་སློབ་ཡོན་གནང་གཏན་འཁེལ་འདུག
ཕྱོགས་མཚུངས་དབུས་བོད་ཀྱི་སྨན་རྩིས་ཁང་གི་འབྲེལ་ཡོད་ལས་བྱེད་དང་མཇལ་འཕྲད་གནང་ནས་གསོ་བ་རིག་པ་དང་ཕྱི་ལུགས་སྨན་དབར་སྔོ་སྨན་གྱི་ཐོན་སྐྱེད་བཟོ་སྐྲུན་གྱི་ལས་གཞིའི་ཐོག་མཉམ་འབྲེལ་གྱི་ལས་གཞི་སྤེལ་ཐུབ་མིན་སྐོར་གོ་བསྡུར་གནང་འདུག
ཕྱི་ཟླ་ ༣ ཚེས་ ༡༤ ཉིན་ཉི་ཧོང་བ་རྣམས་ཐེག་ཆེན་ཆོས་གླིང་གཙུག་ལག་ཁང་དུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཐུགས་རྗེ་ཆེན་པོའི་བཀའ་དབང་སྩལ་གྲུབ་མཚམས་མཇལ་བཅར་ཞུ་ཐོག་སྐུ་པར་ལྷན་སྒྲོན་ཞུས།
དེ་ཉིན་ཁོང་རྣམས་སྐབས་ ༡༦ བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་གསུམ་པའི་ལས་ཉིན་དང་པོའི་ཉིན་ཟུར་ཉན་དུ་བཅར་བ་མ་ཟད། ས་རྭ་བོད་ཀྱི་མཐོ་རིམ་སློབ་གཉེར་ཁང་དང་ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་སོགས་ལ་གཟིགས་སྐོར་ཕེབས་རྗེས། ཕྱི་ཚེས་ ༡༥ ཉིན་མེས་དབོན་གཙུག་ལག་དཔེ་སྟོན་སློབ་གྲྭར་ཕེབས་འདུག
དེ་བཞིན་དཔལ་ལྡན་སྲིད་སྐྱོང་དང་མཇལ་འཕྲད་ཀྱིས་ཉི་ཧོང་རིག་གཞུང་དང་བཙན་བྱོལ་བོད་མིའི་ཤེས་ཡོན་གནས་སྟངས་སྐོར་སོགས་གོ་བསྡུར་གནང་ཡོད་པ་བཅས།།
