ཕྱི་ལོ་ ༢༠༡༧ ཟླ་ ༣ ཚེས་ ༡༣ རེས་གཟའ་ཟླ་བ།

༄༅། །འདི་གར་སྦེང་ལོར་ལྷོ་སྤྱི་ལས་ཁུངས་ནས་བཏང་འབྱོར་ནང་འཁོད་དོན། སྦེང་ལོར་ལྷོ་ཕྱོགས་གཞིས་སྤྱི་ལས་ཁུངས་ཀྱི་གོ་སྒྲིག་འོག ཕྱི་ལོ་ ༢༠༡༧ ཟླ་ ༣ ཚེས་ ༡༠ ཉིན་བོད་མིའི་རང་དབང་སྒེར་ལངས་གསུམ་བཅུའི་དུས་དྲན་ཐེངས་ ༥༨ སྲུང་བརྩི་གཟབ་རྒྱས་ཞུས་འདུག
དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༩ ཐོག་ Banamantapa park དུ་སྦེང་ལོར་ཁུལ་གནས་སྡོད་མི་མང་དང་སློབ་ཕྲུག དེ་བཞིན་ལྷོ་ཕྱོགས་གཞིས་ཆགས་ཁག་བཞིའི་བོད་ཀྱི་གཞོན་ནུ་དང་བུད་མེད་ཚོགས་པ་ཁག་གི་ཚོགས་མི་བཅས་ཁྱོན་མི་གྲངས་ ༥༠༠ ལྷག་འདུ་འཛོམས་ཐོག་མཛད་སྒོ་དངོས་གཞི་དབུ་འཛུགས་ཀྱི་ཐོག་མར་བོད་རྒྱལ་ཁབ་ཆེན་པོའི་རྒྱལ་གླུ་དང་རྒྱ་གར་གྱི་རྒྱལ་གླུ་བཏང༌།

དེ་རྗེས་བདེན་ཚིག་སྨོན་ལམ་གསུང་འདོན་གྲུབ་མཚམས་བོད་བསྟན་སྲིད་མི་རིགས་ཀྱི་དོན་དུ་རང་སྲོག་བློས་གཏོང་གནང་མཁན་རྒྱལ་གཅེས་པ་འདས་སོན་ཡོངས་ཀྱི་ཆེད་མྱ་ངན་གུས་འདུད་དང་གདུང་སེམས་མཉམ་སྐྱེ་ཞུ་ཆེད་སྐར་མ་གཅིག་རིང་ངག་བཅད་ཞུས། དེ་ནས་ལྷོ་སྤྱི་ཆོས་འཕེལ་ཐུབ་བསྟན་ལགས་ཀྱིས་དཔལ་ལྡན་སྲིད་སྐྱོང་མཆོག་གི་གསུམ་དུས་ཡོངས་ཁྱབ་གསུང་བཤད་དང་དྲུང་ལས་ཀརྨ་དགེ་ལེགས་ལགས་ཀྱིས་བོད་མི་མང་སྤྱི་འཐུས་ལྷན་ཁང་གི་གསུང་བཤད་སྒྲོགས་སྦྱང་ཞུས།

མཛད་སྒོའི་སྐུ་མགྲོན་གཙོ་བོ་སྐུ་ཞབས་དི་ནེཤ་གུན་དུ་རའོ་ Dinesh Gundu Rao, Hon’ble President of་Karnataka Pradesh Congress Committee ལགས་དང་། སྐུ་མགྲོན་གཞན་ཀར་ན་ཊ་ཀ་མངའ་སྡེའི་བློན་ཆེན་ཟུར་པ་སྐུ་ཞབས་ར་མ་ ཅནྡྲ་གོ་ཝ་ཌ་Ramachandra Gowda མཆོག་དང་། ཀར་ན་ཊ་ཀ་མངའ་སྡེའི་བྷི་ཇེ་པི་ཆབ་སྲིད་ཚོགས་པའི་དྲུང་ཆེ་ཇག་དིཤ་  Mr. Jagdish ལགས། རྒྱལ་ཡོངས་འགྲོ་བ་མིའི་ཐོབ་ཐང་སྲུང་སྐྱོབ་ཚན་པའི་ལྷོ་ཕྱོགས་ཁུལ་གྱི་དམིགས་བསལ་རྟོག་ཞིབ་པ་སྐུ་ཞབས་པི་ཇི་ཀར་མཏ་ Lt. Gen PG Karmath (Retd) ལགས་སོགས་ཀྱིས་གཙོ་བོ་བོད་དོན་ཐོག་རྒྱ་གར་གཞུང་མང་གཉིས་ནས་མུ་མཐུད་རྒྱབ་སྐྱོར་ཡོད་བཞིན་པའི་ཐོག་སྔར་ལྷག་བཟང་དུ་གཏོང་རྒྱུ་བཅས་ཞལ་བཞེས་གནང་ཡོད་པ་མ་ཟད། དེ་བཞིན་བོད་མི་རྣམས་ནས་མི་འབོར་འཕེལ་རྒྱས་གཏོང་དགོས་གལ་དང་མུ་མཐུད་ནས་ཆོས་དང་རིག་གཞུང་སྐད་ཡིག་གོམས་གཤིས་བཅས་མི་ཉམས་རྒྱུན་འཛིན་བྱ་རྒྱུ་གལ་གནད་དང༌། ལྷག་པར་བོད་རིགས་གཞོན་སྐྱེས་ཚོས་ཤེས་ཡོན་ཐོག་དོ་སྣང་དང་སྦྱང་བརྩོན་འཐུས་ཤོར་མེད་པ་གོང་འཕེལ་གཏོང་རྒྱུ་ཧ་ཅང་གི་གལ་འགངས་ཆེན་པོ་ཡིན་སྐོར་སོགས་ཀྱི་གསུང་བཤད་གནང་ཡོད་པ་བཅས།།