༢༠༡༧ ཟླ་ ༣ ཚེས་ ༡༣ རེས་གཟའ་ཟླ་བ།

༄༅། །འདི་གར་ལྡེ་ར་སྡུན་ས་གནས་འགོ་འཛིན་ལས་ཁུངས་ནས་བཏང་གནས་ནང་འཁོད་དོན། སྤྱི་ཟུར་མདའ་དཔོན་རྣམ་རྒྱལ་དབང་འདུས་ལགས་ཕྱི་ལོ་ ༢༠༡༧ ཟླ་ ༣ ཚེས་ ༡༡  ཉིན་གྱི་སྔ་དྲོ་ཆུ་ཚོད་  ༤།༠༥ ཐོག་འདས་གྲོངས་སུ་གྱུར་བའི་ཡིད་སྐྱོའི་གནས་ཚུལ་ཐོན་འདུག

སྤྱི་ཟུར་མདའ་དཔོན་རྣམ་རྒྱལ་དབང་འདུས་ལགས་ནི་ ༡༩༣༥ སྐྱེས་ཡུལ་རྒྱང་རྩེ་ཡིན་ཞིང་། དམ་པ་ཁོང་རང་ལོ་ ༦ ཙམ་ནས་རྒྱལ་རྩེ་ཁུལ་བོད་ཡིག་སློབ་གྲྭ་ཁག་གསུམ་དང་། ལྕང་ལོར་ཨིན་ཡིག་སློབ་གྲྭ་བཅས་པར་རིམ་བཞིན་སློབ་སྦྱོང་བྱས།

 ཕྱི་ལོ་ ༡༩༤༩ ལོར་རང་ལོ་ ༡༦ ཐོག་ཕ་མེས་ཀྱི་རྗེས་སུ་འབྲངས་ཏེ་དམག་ཞབས་ཞུས་ནས་རིམ་བཞིན་དམག་སྦྱོང་ཚར་ཉིད་ལོ་དེ་རང་ལ་རྒྱ་དམག་བོད་སར་བཙན་འཛུལ་གྱིས་ཆབ་མདོ་བཙན་བཟུང་བྱས་མ་ཐག་ཤོ་སྟར་ལྷོ་གསུམ་བརྒྱུད་དབུས་ཕྱོགས་ཡོང་ལམ་བ་རི་ནང་དུ་རྒྱ་དམག་ལྷགས་འབྱོར་ལ་རྒྱལ་རྩེ་དམག་སྒར་ནས་འགོག་རྒོལ་དམག་འཐབ་ཤུགས་ཆེ་བྱས་རྐྱེན་རྒྱ་དམག་བསད་རྨས་ཚབ་ཆེ་བྱུང་སྟེ།   རྒྱ་དམག་རྣམས་རེ་ཞིག་ཆབ་མདོར་ཕྱིར་ལོག་སྐབས་དམ་པ་ཁོང་ཡང་ཕ་རྒྱ་དཔོན་མཁར་བསམ་དེ་ཉིད་མཉམ་དམག་འཐབ་གཟེངས་ཐོན་ཞུས་པའི་ལེགས་བརྗོད་ཐོབ་མྱོང་ཡོད། 

ཕྱི་ལོ་ ༡༩༥༦ ལོར་བོད་ལྗོངས་དམག་སྤྱི་ཁང་ནས་དམ་པ་ཁོང་ལ་དམིགས་བསལ་ལྡིངས་དཔོན་གནས་སྤར་བསྐོ་གཞག་ལྟར་ལས་ཁུར་ཞུས།   ཕྱི་ལོ་ ༡༩༥༨ ལོར་དམ་པ་ཁོང་རོགས་མདག་ལྡིང་ཤོག་གཅིག་ལ་གཞུང་སྩལ་གོ་ལག་རྫས་མདེའུ་ཆབས་སྦྲགས་ལས་ཚན་བློ་བཟང་ཡེ་ཤེས་ལགས་དེ་ཉིད་མཉམ་དུ་གུང་རྒོལ་འཇབ་དམག་ཐོན་སླད་ལྷ་ས་ནས་ལྷོ་ཁུལ་ལ་གསང་བསྐྱོད་ཀྱིས་གུང་དཀར་ཁུལ་དུ་གནས་ཏེ་དེ་ཁུལ་གྱི་དམག་ལ་དམག་སྦྱོང་དང་། ས་བསྐོར་ཉམས་ཞིབ་སོགས་ལས་འགུལ་སྣ་ཚོགས་ཞུས།

ཕྱི་ལོ་ ༡༩༥༩ ལོར་༸གོང་ས་མཆོག་ནོར་གླིང་ནས་ལྷོ་ཕྱོགས་སུ་ཆིབས་སྒྱུར་སྐབས་སྔོན་རྗེས་བར་གསུམ་ལ་ར་མ་གྲུ་ཁར་རོགས་དམག་མཉམ་འཁྲིད་ཕེབས་ལམ་འཁེལ་ཡུལ་སོ་སོར་སྐུའི་ཉེན་སྲུང་བཀོད་སྒྲིག་ཐུས་གཙང་ཞུས་ཏེ། ཆིབས་སྒྱུར་གྲུབ་ཕྲལ་ནོར་གླིང་དུ་ལས་དོན་ཆེད་བཅར་དགོས་བྱུང་བ་དང་དམག་ཟིངས་ལངས་པ་དུས་མཚམས་རྩེ་ཕོ་བྲང་གི་གཡས་གཡོན་སྲུང་བྱའི་ཁོངས་སུ་དམག་འཐབ་བློ་རྩལ་ཆེ་ཐོན་ཞུས།

ཕྱི་ལོ་ ༡༩༦༠ ལོ་འགོར་བོད་ནང་དགྲ་བོར་བསྐྱར་རྒོལ་ཐུབ་རེས་ཨ་རིར་འཇབ་དམག་སློབ་སྦྱོང་དུ་བསྐྱོད་དེ་བོད་ནང་གནང་མཆོངས་བྱ་ཉེའི་མཚམས་བོད་ས་ལྷོ་བྱང་ཕྱོགས་སུ་ཡོད་པའི་རང་ཕྱོགས་དྭང་དམག་གི་རྟེན་གཞི་ཁག་དགྲ་བོས་དབང་འཛིན་བྱས་རྐྱེན་གནང་

མཆོངས་བྱ་ས་མ་བརྙེད་པར་ཨ་རིར་ལོ་གཉིས་རིང་སྒུག་སྡོད་སྐབས་འཇབ་དམག་གི་སློབ་སྦྱོང་སྨོས་ཅི། ཆབ་སྲིད་སྐོར་དང་། དམངས་གཙོའི་ལམ་སྲོལ། འཛམ་གླིང་རྒྱས་བཤད་སོགས་སློབ་སྦྱོང་བྱས། 

ཕྱི་ལོ་ ༡༩༦༢ ལོར་ཨ་རི་ནས་བཞུགས་སྒར་དུ་བཅར་ཏེ་ཐོག་མར་དྲིལ་བསྒྲགས་ལས་ཁུངས་ཀྱི་ཡིག་འབྲི་ལས་བྱ་དང་། དེ་ནས་ཀུ་ལུ་ལམ་སྤྱི། ཕྱི་ལོ་ ༡༩༦༣ ལོར་གཞུང་གསར་པའི་བཀོད་སྒྲིག་སྐབས་ཕྱི་སྲིད་ལས་ཁུངས་ཀྱི་དྲུང་ཆེ་ལས་རོགས་བཅས་འཆར་འབུལ་ཕྱག་རྟགས་དགོངས་དོན་བསྐོ་གཞག་རིམ་བཞིན་སྩལ་བ་ལྟར་ལས་ཁུར་ཞུས།

 ཕྱི་ལོ་ ༡༩༦༤ ལོར་ལྡེ་ར་ལྡུན་དང་སློབ་ན་གཞོན་སྡེ་ཚན་གྱི་དགེ་རྒན་དུ་བསྐོ་གཏོང་དང་། དེ་ནས་དང་སློབ་འགོ་འཛིན།  མདའ་དཔོན་བཅས་རིམ་བཞིན་བསྐོ་གཞག་སྩལ་ཐོག  འཕགས་བོད་ས་མཚམས་ཁག་ཏུ་བཅའ་སྡོད་དང་། སྐོར་བསྐྱོད་ཉམས་ཞིབ་སོགས་ལས་ཁུར་ལོ་ ༡༤ ཙམ་ཞུ་ཡུན་རིང་འཆར་འཕར་ཞུ་སྒོ་ཅི་མཆིས་ལེགས་གྲུབ་ཐུབ་པར་གོང་རིམ་ནས་བསྔགས་བརྗོད་ཡང་ཡང་ཐོབ། ཕྱི་ལོ་ ༡༩༧༦ ལོར་ས་མཚམས་སུ་སྡོད་སྐབས་བོད་རྒྱལ་ཁབ་ཆེན་མོའི་སྲིད་ལུགས་དང་འབྲེལ་བའི་དྲག་པོའི་དམག་གི་ལོ་རྒྱུས།  ཞེས་པའི་ཡིག་གཞི་རྩོམ་བྲིས་གནང་བ་རྗེས་སུ་རང་གཞུང་ནས་དཔར་བསྐྲུན་གནང་བའི་དེབ་གཅིག་འདོན་སྤེལ་ཞུས།

 ཕྱི་ལོ་ ༡༩༧༨ ལོར་དང་སློབ་དྲག་ཞབས་ནས་འཕོས་ཏེ་ལྡེ་ར་ལྟུན་བདེ་དོན་དང་། ར་སྤུར་བཟོ་འགོ བདེ་སྐྱིད་གླིང་འཛུགས་བསྐྲུན་གྱི་གཞིས་འགོ་བཅས་གཅིག་ལྕོགས་བསྐོ་གཞག་སྩལ་དོན་ཁུལ་དེར་ལས་ཁུར་ལོ་ ༧ ལྷག་ཙམ་ཞུ་ཡུན་རིང་མང་ཚོགས་ཀྱི་དཀའ་སེལ་བདེ་ཐབས་སྤྱི་དང་། ལྷག་དོན་ནང་སྲིད་ལས་ཁུངས་ནས་རོགས་གྲོན་ཐབས་ཤེས་དང་འབྲེལ་བདེ་སྐྱིད་གླིང་གཞིས་ཆགས་ཐོག་མར་གསར་འཛུགས་སླད་ས་ཆ་སྤུས་ཉོས་ནས་བཟུང་ས་ཁུལ་ཁག་གསུམ་གྱི་མི་མང་དང་། འབྲུག་བྱོལ་ཐོན་ཚོ་གཉིས་པའི་མི་མང་གཞིས་སར་བདེ་བར་མ་འཁོད་བར་འཛུགས་བསྐྲུན་གྱི་རིམ་པ་མཐའ་དག་དང་། ཞུ་སྒོ་གང་ཅི་འཐུས་ལེགས་བྱུང་བར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་།  རང་གཞུང་ནས་ལེགས་བརྗོད་སྔ་རྗེས་ཐོབ། 

ཕྱི་ལོ་ ༡༩༨༥ ལོར་དམ་པ་ཁོང་ལྡེ་ར་ལྡུན་ནས་མེ་སོར་བདེ་སྐྱིད་སླར་གསོའི་གཞིས་འགོར་འཕོས་ཏེ་ཁུལ་དེར་ལས་རྒྱུན་ལོ་ ༦ ཙམ་སྡོད་རིང་མང་ཚོགས་ཀྱི་བདེ་ཐབས་སྤྱི་དང་།  སྒོས་སུ་འཆར་འཕར་བཀའ་དོན་ཞུ་བྱ་ཅི་མཆིས་ལྷག་བསམ་ཡོད་རྒུ་སྩལ་དོན་ཐོག   གོང་གསལ་གནས་ཡུལ་སོ་སོར་བོད་མིའི་སྤྱི་ཚོགས་ནང་གོ་མིན་ཏང་བོད་སོག་ལས་ཁུངས་ཀྱི་གཡོ་འཕྲུལ་ཕུང་དཀྲུག་རིམ་བྱུང་ལ་འཛེམས་སོན་མེད་པའི་གདོང་ལེན་འགོག་རྒོལ་གང་ཐུབ་གནང་བ་སོགས་ཀྱི་ལས་ཁུར་གྲུབ་འབྲས་ལེགས་ཐོན་བྱུང་བར་གཞུང་མང་གཉིས་ཕྱོགས་ནས་ལེགས་བརྗོད་ཐོབ། 

 ཕྱི་ལོ་ ༡༩༩༡ ལོར་བོད་མི་མང་སྤྱི་འཐུས་སྐབས་ ༡༡ དང་། དེ་རྗེས་ ༡༢ དང་ ༡༣ སོ་སོར་དབུས་གཙང་མང་ཚོགས་ནས་ཐུགས་རེ་ཡིད་ཆེས་ཀྱིས་འདམས་ཐོན་བྱུང་བ་བཞིན་ལས་ཁུར་ལོ་ ༡༥ ཙམ་ཞུ་ཡུན་རིང་མགོན་པོ་གང་གི་བཞེད་དགོངས་སྤྱི་དང་། ལྷག་དོན་མང་ཚོགས་ཀྱི་མངོན་འདོད་གཞིར་བཟུང་ཆབ་སྲིད་ཀྱི་ལྟ་གྲུབ་དང་། དམིགས་ཡུལ་ལངས་ཕྱོགས་སོགས་གཡོ་ལྷད་མེད་པའི་རང་ཚུགས་བརྟན་པོར་བཟུང་སྟེ་ཞུ་བྱ་ཅི་མཆིས་ཕྱོགས་ལྷུང་འཇིགས་ཟོན་མེད་པར་དྲང་བདེན་ལྷག་བསམ་རྣམ་དག་ཐོག   སྤྱི་འཐུས་རྒྱུན་ལས་ལོ་ ༥ དང་། གྲོས་ཚོགས་ཚོགས་དུས་སོ་སོར་ཆད་མེད་རྟག་བཅར་གྱིས་གྲོས་ཆོད་གྲོས་འཆར་དང་། འདྲི་བ། དོགས་འདྲི། བསམ་ཚུལ། བགྲོ་གླེང་སོགས་ལས་རིམ་དང་འབྲེལ་བའི་སྐབས་དོན་སོ་སོར་ཆ་ཤས་འཚེམས་ལུས་མེད་པ་བླངས།

དེ་བཞིན་གཞུང་དོན་ཕྱོགས་བསྐྱོད་སྔ་རྗེས་ཐེངས་མང་དང་ཞིབ་འཇུག་ཚོགས་ཆུང་སྣ་མང་གི་ལས་ཁུར། དེ་བཞིན་ཞི་བའི་གོམ་བགྲོད་དང་པོ་བོད་ནང་འགྲོ་འཆར་གྱི་གྲོས་འགོ་བཏོན་ཏེ་མཉམ་བསྐྱོད་སོགས་ཞུས། 

དེ་སྔོན་༸གོང་ས་མཆོག་ནོར་གླིང་ནས་ལྷོ་ཕྱོགས་སུ་ཕེབས་སྐབས་སྐུའི་ཉེན་སྲུང་དང་ཆིབས་ཞབས་སུ་བཅར་མཁན་དང་། དམག་ས་ཁག་ནས་བཙན་བྱོལ་དུ་འབྱོར་བའི་བོད་གཞུང་དམག་རྙིང་རྣམས་ནས་༸གོང་ས་མཆོག་ལ་སྔོན་དུ་བརྟན་བཞུགས་བསྟར་འབུལ་སྐབས་བཀའ་སློབ་སྤྱི་བོར་ནོད་པ་ལྟར་དོན་འཁྱོལ་ཞུ་སླད་དམག་རྙིང་ཚོས་དམ་པ་ཁོང་ལ་རེ་སྐུལ་གནང་བའི་བོད་རྒྱལ་ཁབ་ཀྱི་ཆབ་སྲིད་དང་འབྲེལ་བའི་དྲག་པོའི་དམག་གི་ལོ་རྒྱུས་རྒྱས་པ་དེབ་ཐེར་སྟོད་སྨད་གཉིས་རྩོམ་བྲིས་ཞུས་པ་རང་གཞང་ནས་རོགས་གྲོན་སྩལ་ཏེ་དཔར་བསྐྲུན་གནང་བ་སོགས་གང་ལྟར་བོད་ནང་དམག་ཞབས་ལོ་ ༡༠ དང་བཙན་བྱོལ་རིང་ཞི་དྲག་ཞབས་ལོ་ ༢༩ སྤྱི་འཐུས་སྐབས་གསུམ་ལ་ལོ་ ༡༥ བཅས་ཁྱོན་མི་ལོ་ ༤༥ རིང་ཞབས་འདེགས་ཞུས།།