༢༠༡༧ ཟླ་ ༣ ཚེས་ ༢༩ རེས་གཟའ་ལྷག་པ།
༄༅། །བོད་མིའི་སྒྲིག་འཛུགས་ཀྱི་ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་མཆོག་དེང་སྐབས་བོད་མིའི་གཞིས་ཆགས་ཁག་གཅིག་གི་ནང་གཞུང་དོན་ཕྱོགས་ཕེབས་གནང་བཞིན་ཡོད་པ་ལྟར། ཕྱི་ལོ་ ༢༠༡༧ ཟླ་ ༣ ཚེས་ ༢༦ ཉིན་བཀའ་བློན་མཆོག་ཨོ་ཌི་ཤ་ཕུན་ཚོགས་གླིང་བོད་མིའི་གཞིས་ཆགས་སུ་ཡོད་པའི་རི་དགོན་ཐུབ་བསྟན་སྨིན་གྲོལ་གླིང་དགོན་པའི་བསླབ་པ་མཐར་སོན་གྱི་མཛད་སྒོར་ཕེབས་གནང་རྗེས། ཕྱི་ཚེས་ ༢༧ ཉིན་གཞིས་ཆགས་ཀྱི་གྲོང་སྡེ་ཁག་དང་། སཾ་བྷོ་ཊའི་ཡན་ལག་སློབ་གྲྭ་ཁག དེ་བཞིན་རྒས་གསོ་ཁང་བཅས་སུ་གཟིགས་སྐོར་ཕེབས་ཡོད། དེ་བཞིན་ས་གནས་འགོ་འཛིན་ལས་ཁུངས་ཀྱིས་གོ་སྒྲིག་འོག་ས་གནས་འཐུས་ཚོགས་ཀྱི་ཚོགས་གཙོ་དངཚོགས་གཞོན། ས་གནས་རང་བདེན་ཚོགས་ཆུང་གི་ཚོགས་གཙོ། མཉམ་འབྲེལ་ལས་བྱེད། དེ་བཞིན་བརྒྱ་དཔོན་དང་གཞུང་འབྲེལ་མ་ཡིན་པའི་ཚོགས་སྡེ་ཁག་གི་སྐུ་ཚབ་དང་མི་མང་བཅས་མཉམ་འཛོམས་ཀྱི་ཚོགས་འདུར་དབུ་བཞུགས་གནང་འདུག
སྐབས་དེར་བཀའ་བློན་མཆོག་གིས་ད་རེས་འཚམས་གཟིགས་ལས་རིམ་སྐོར་དང་། བཀའ་ཤག་གི་ལངས་ཕྱོགས། དེ་བཞིན་བོད་མི་མང་ཚོགས་ཀྱི་ལས་འགན་སོགས་ཀྱི་སྐོར་གསུང་བཤད་གནང་བ་དང་འབྲེལ་མང་ཚོགས་ཀྱི་དྲི་བར་ལན་འདེབས་གསལ་བཤད་གནང་འདུག བཀའ་བློན་མཆོག་ཕྱི ཚེས་ ༢༩ ཉིན་བྷན་དྷ་ར་ནོར་རྒྱས་གླིང་བོད་མིའི་གཞིས་ཆགས་དང་དེ་ནས་མན་སྤར་ཕན་བདེ་གླིང་། ལྡི་ལི་བོད་ཁང་བཅས་སུ་རིམ་བཞིན་འཚམས་གཟིགས་སུ་ཕེབས་རྒྱུ་ཡིན་པ་བཅས།།
