༢༠༡༧ ཟླ་ ༣ ཚེས་ ༢ རེས་གཟའ་ཕུར་བུ།
༄༅། །འདི་གར་ཐེ་ཝན་བོད་ཀྱི་སྐུ་ཚབ་དོན་གཅོད་ཁང་ནས་ ༢༠༡༧ ཟླ་ ༣ ཚེས་ ༡ ཉིན་བཏང་གནས་ནང་འཁོོད་དོན།
ཕྱི་ཟླ་ ༢ ཚེས་ ༢༨ ཉིན་ཕྱི་དྲོ་ཆུ་ཚོད་ ༢།༣༠ ནས་དགོང་དྲོ་ཆུ་ཚོད་ ༡༠།༠༠ བར་གངས་ལྗོངས་དཔེ་སྐྲུན་ཁང་ནས་གཞུང་འབྲེལ་མིན་པའི་ཚོགས་ཁག་བཞི་བཅུ་ལྷག་མཉམ་ཐེ་ཝན་སྲིད་འཛིན་ཕོ་བྲང་མདུན་ཐང་གི་ལམ་ཆེན་ཐོག་ཐེ་ཝན་གྱི་ ༢༢༨ དོན་རྐྱེན་བྱུང་ནས་ལོ་ ༧༠ འཁོར་བའི་དུས་དྲན་ཆེད། མཉམ་འཚོ་རོལ་དབྱངས་མཚན་ཚོགས། ཞེས་པའི་འདུ་འཛོམས་ཆེན་མོའི་ནང་མཉམ་ཞུགས་ཀྱིས་བོད་དོན་ངོ་སྤྲོད་ཀྱི་ལས་འགུལ་ཞིག་སྤེལ་ཡོད།
དེ་ཡང་སྐབས་དེར་གངས་ལྗོངས་དཔེ་སྐྲུན་ཁང་ནས་བོད་དོན་དང་འབྲེལ་བའི་རྒྱ་ཡིག་དཔེ་དེབ་འགྲེེམས་ཚོང་དང་། ཕྱི་རྒྱལ་མི་རིགས་ཀྱིས་བོད་དོན་དྭངས་བླངས་ཞལ་འདེབས་ཀྱི་ཡིག་ཆ་འགྲེམས་སྤེལ། གསུམ་བཅུའི་དུས་དྲན་སྲུང་བརྩི་ཞུ་བའི་རྔམ་སྟོན་ཁྲོམ་སྐོར་གྱི་དུས་ཚེས་ཁྱབ་བསྒྲགས་སོགས་བྱས་པ་མ་ཟད། སྐབས་དེར་ཐེ་ཝན་སློབ་ཕྲུག་བོད་དོན་རྒྱབ་སྐྱོར་ཚོགས་པ་ནས་ཀྱང་མཉམ་ཞུགས་ཀྱིས་བཙན་བྱོལ་བོད་མིའི་ལག་ཤེས་ཐོན་ཁུངས་རྩག་རྩིག་ཚོང་འགྲེམས་དང། ཐེ་ཝན་གཞོན་སྐྱེས་ཚོས་དགའ་མོས་བྱེད་པའི་དྲྭ་རྒྱའི་ཐོག་གི་ཁྱབ་བསྒྲགས་ཀྱི་རིགས་གཅིག་སྟེ། ༸གོང་ས་མཆོག་གི་སྐུ་པར་ཐོག ཐེ་ཝན་དུ་ཆིབས་སྒྱུར་བསྐྱང་རྒྱུར་དགའ་བསུ་ཞུ། ཞེས་འཁོད་པའི་པར་སྒྲོམ་བཟོས་ཏེ། དེར་དགའ་མོས་དང་རྒྱབ་སྐྱོར་ཡོད་མཁན་ཚོས་པར་སྒྲོམ་ནང་མཉམ་དུ་དཔར་ལེན་ནས་སྒེར་གྱི་ངོ་དེབ་དྲྭ་ལམ་སོགས་ཐོག་བཞག་པ་བྱུང་འདུག
དེ་བཞིན་རོལ་དབྱངས་ལྡིང་ཆའི་ཐོག་གཞོན་སྐྱེས་གཞས་པ་ཚོས་རོལ་དབྱངས་དཀྲོལ་གཏོང་བྱེད་པའི་སྐབས་གངས་ལྗོངས་དཔེ་སྐྲུན་ཁང་གི་ལས་རྟགས་དང་བོད་ཀྱི་རྒྱལ་དར། སློབ་ཕྲུག་བོད་དོན་རྒྱབ་སྐྱོར་ཚོགས་པའི་དར་ཆ་སོགས་ལྡིང་ཆའི་ཐོག་མཐོན་པོར་འཕྱར་ནས་བོད་དོན་རྒྱབ་སྐྱོར་མཚོན་པ་བྱས་ཡོད། རོལ་དབྱངས་མཚན་ཚོགས་ཀྱི་ལེ་ཚན་མཐའ་མར་གཞས་པ་སྐད་གྲགས་ཅན་ཏཱ་ཀྲེ་ཡིས་རང་རྩོམ་གཞས་ཚིག་ནང་། ཏཱ་ལའི་བླ་མ་དང་བོད་ཀྱི་མིང་ཚིག་འཁོད་པའི་རྒྱ་ནག་ལ་ཟུར་ཟའི་གླུ་དབྱངས་ལེན་ཏེ་ཐེངས་འདིའི་རོལ་དབྱངས་མཚན་ཚོགས་མཇུག་སྒྲིལ།
ཐེ་ཝན་གྱི་ ༢༨༨ དོན་རྐྱེན་ཞེས་པ་ནི་ ༡༩༤༧ ཕྱི་ཟླ་ ༢ ཚེས་ ༢༨ ཉིན་རྒྱ་ནག་གོ་མིན་ཏང་དམག་མིས་ཐེ་ཝན་མི་མང་གི་ཞི་བའི་ངོ་རྒོལ་ལ་དྲག་གནོན་དམར་གསོད་བཏང་བའི་དོན་རྐྱེན་ཞིག་ལ་གོ་དགོས། རིམ་པས་ཐེ་ཝན་མང་གཙོ་ཅན་དུ་གྱུར་རྗེས་ཕྱི་ཟླ་ ༢ ཚེས་ ༢༨ ཉིན་ཐེ་ཝན་མི་མང་གིས་དོན་རྐྱེན་དེ་བཞིན་རྒྱ་ནག་གིས་ཐེ་ཝན་ལ་སྡུག་རྩུབ་ཀྱི་དྲག་གནོན་དང་དབང་སྒྱུར་མཚོན་པའི་དོན་རྐྱེན་ཞིག་ལ་ངོས་འཛིན་གྱིས་ལོ་ལྟར་དུས་དྲན་སྲུང་བརྩི་རྒྱ་ཆེ་ཞུ་བཞིན་ཡོད་པ་བཅས།།
