༢༠༡༧ ཟླ་ ༣ ཚེས་ ༡༤ རེས་གཟའ་མིག་དམར།
༄༅། །ཕྱི་ལོ་ ༢༠༡༧ ཟླ་ ༣ ཚེས་ ༡༤ རེས་གཟའ་མིག་དམར་ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་གི་རྟེན་མཆོག་སྤྱན་སྔར་དད་ལྡན་སེར་སྐྱ་མང་ཚོགས་སྟོང་ཕྲག་བརྒལ་བར་སྤྱན་རས་གཟིགས་ཕྱག་སྟོང་སྤྱན་སྟོང་གི་བཀའ་དབང་སྩལ། དེ་ཡང་ཐོག་མར་མགོན་པོ་གང་ཉིད་མཆོག་གིས་སྒྲུབ་བཞག་མཛད། དེའི་བར་ཆོས་ཞུ་བ་རྣམས་ཀྱིས་སྤྱན་རས་གཟིགས་ཀྱི་གཟུངས་སྔགས་མ་ཎི་ཡིག་དྲུག་བཟླས། དེ་ནས་༸གོང་ས་མཆོག་གིས་བསྒྲུབ་བཞག་ཡོངས་སུ་ལེགས་གྲུབ་རྗེས་བཀའ་སློབ་སྩལ་དོན། དེ་རིང་ངོས་ཀྱིས་སྤྱན་རས་གཟིགས་ཕྱག་སྟོང་སྤྱན་སྟོང་གི་དབང་བྱ་རྒྱུ་ཡིན། རྒྱལ་ཀུན་སྙིང་རྗེའི་རང་གཟུགས་འཕགས་པ་སྤྱན་རས་གཟིགས་ནི་སངས་རྒྱས་ཀུན་གྱིས་བསྟོད་པའི་ཡུལ་ཡིན། ཞེས་སོགས་ཀྱི་བཀའ་སློབ་སྩལ་བ་མ་ཟད། དཔལ་ལྡན་ཟླ་བ་གྲགས་པའི་དབུ་མ་འཇུག་པ་ལུང་འདྲེན་མཛད་ནས་ཐམས་ཅད་མཁྱེན་པའི་གོ་འཕང་ཐོབ་པར་བྱང་ཆུབ་སེམས་ནི་ཐོག་མཐའ་བར་གསུམ་དུ་གལ་ཆེ་ཚུལ་དང་། ང་ཚོས་བོད་འདི་འཕགས་པ་སྤྱན་རས་གཟིགས་ཀྱི་འདུལ་ཞིང་དང་རྒྱ་ནག་འཇམ་དཔལ་དབྱངས་ཀྱི་འདུལ་ཞིང་ཡིན་པར་ཡིད་ཆེས་བྱེད་བཞིན་ཡོད། འོན་ཀྱང་ད་བར་ང་ཚོས་རང་གཅེས་འཛིན་གྱི་གཞན་དབང་འོག་ཚུད་ནས་ཁོར་བར་མྱོང་བཞིན་ཡོད། རང་གཅེས་འཛིན་གྱི་བློ་དེ་དོར་ནས་གཞན་གཅེས་འཛིན་གྱི་བློ་རང་རྒྱུད་ལ་སྐྱེ་ཐུབ་ཚེ་རང་གཞན་ཐམས་ཅད་སྡུག་བསྔལ་ལས་གྲོལ་ཐུབ་རྒྱུ་ཡིན་སྐོར་དང་། ངོས་རང་ཕྲུ་གུའི་སྐབས་ཐུགས་རྗེ་ཆེན་པོའི་དབང་ལུང་འདི་ཡོངས་འཛིན་སྟག་བྲག་རིན་པོ་ཆེའི་སྐུ་མདུན་ནས་ཐོབ་པ་རེད། དུས་ཕྱིས་སུ་གྲོ་མོར་འབྱོར་སྐབས་སླར་ཡང་༸སྐྱབས་རྗེ་ཡོངས་འཛིན་གླིང་རིན་པོ་ཆེའི་སྐུ་མདུན་ནས་དབང་ལུང་ཐོབ་བྱུང་། ཞེས་སོགས་ཀྱི་བཀའ་སློབ་སྩལ་རྗེས་དགེ་བསྙེན་སྡོམ་པ་འབོག་ཆོག་མཛད།།
