ཕྱི་ལོ་ ༢༠༡༧ ཟླ་ ༣ ཚེས་ ༣༡ རེས་གཟའ་པ་སངས།
༄༅། །ཕྱི་ལོ་ ༢༠༡༧ ཟླ་ ༣ ཚེས་ ༢༩ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རྡ་རམ་ས་ལའི་གྲོང་སྡེ་ལས་ཁུངས་ཀྱི་ཚོགས་མི་ ༡༧ ཙམ་ལ་མཇལ་ཁ་དང་བཀའ་སློབ་སྩལ་འདུག
སྐབས་དེར་མགོན་པོ་གང་ཉིད་མཆོག་གིས་རྡ་རམ་ས་ལའི་གྲོང་ཁྱེར་ནང་འཛུགས་སྐྲུན་ཡར་རྒྱས་དང་མང་ཚོགས་ཀྱི་འཕྲོད་བསྟེན་སྐོར། དེ་བཞིན་རང་འབྱུང་གི་གོད་ཆག་སོགས་འགོག་ཐབས་ཆེད་འབད་བརྩོན་གནང་དགོས་སྐོར་བཀའ་སློབ་ཕེབས་ཡོད་པ་མ་ཟད། རྡ་ས་གྲོང་ཁྱེར་འདི་བཞིན་ས་གཡོམ་རྒྱག་རྒྱུའི་ཉེན་ཁ་ཡོད་པའི་ས་ཚིགས་ཁོངས་སུ་ཚུད་ཀྱི་ཡོད་སྟབས། ཉི་ཧོང་གི་ས་གཡོམ་མྱུར་སྐྱོབ་ཀྱི་ཐབས་ལམ་དེ་དག་ནས་མིག་དཔེ་བླངས་ཏེ། རང་བྱུང་གོད་ཆག་རིགས་འགོག་ཐབས་གནང་དགོས་པ་དང་། དེ་བཞིན་རྡ་ས་ཁུལ་གྱི་ཁོར་ཡུག་གཙང་སྦྲའི་ཐོག་སྟངས་འཛིན་དང་། འཐུང་ཆུའི་དཀའ་ངལ་རིགས་སེལ་ཐབས་གནང་དགོས་པའི་ལམ་སྟོན་ཡང་ཕེབས་འདུག
དེ་ཉིན་༸གོང་ས་མཆོག་མཇལ་བཅར་ཞུ་མཁན་ཁོངས་གྲོང་སྡེ་ལས་ཁུངས་ཀྱི་སྤྱི་ཁྱབ་ལྕམ་སྐུ་ Rajni Vyas ལགས་ཀྱིས་ཚོར་ཤུགས་ཆེན་པོའི་ཐོག་ནས་དེ་རིང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་མཇལ་ཁ་དང་བཀའ་སློབ་ཉན་རྒྱུ་བྱུང་བ་ནི་ཁོང་མོའི་མི་ཚེའི་ནང་རིན་ཐང་བྲལ་བའི་བསྐལ་བཟང་གི་གོ་སྐབས་ཤིག་ལ་ངོས་འཛིན་ཞུ་བཞིན་ཡོད་སྐོར་གསུངས་འདུག །
