༢༠༡༧ ཟླ་ ༢ ཚེས་ ༢༣ རེས་གཟའ་ཕུར་བུ།

༄༅། །བོད་མིའི་སྒྲིག་འཛུགས་ནང་སྲིད་ལས་ཁུངས་ཀྱི་གོ་སྒྲིག་འོག་ཟླ་འདིའི་ཕྱི་ཚེས་ ༢༡ ནས་ ༢༣ བར་ཉིན་གྲངས་གསུམ་རིང་རྡ་ས་གངས་སྐྱིད་བོད་ཀྱི་སྨན་རྩིས་ཁང་གི་ཚོགས་ཁང་དུ་ཚོགས་བཞིན་པའི་བུད་མེད་ནུས་སྟོབས་གོང་སྤེལ་གྱི་ཚོགས་ཆེན་ཐེངས་དང་པོ་དེ་བཞིན་ལེགས་པར་མཇུག་སྒྲིལ་ཡོད།

དེ་ཡང་མཇུག་སྡོམ་མཛད་སྒོའི་སྐུ་མགྲོན་གཙོ་བོ་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་དང་ནང་སྲིད་བཀའ་བློན་འཁོར་ལྷ་ཚང་བསོད་ནམས་སྟོབས་རྒྱལ་མཆོག  དཔལ་འབྱོར་བཀའ་བློན་ཀརྨ་ཡེ་ཤེས་མཆོག་བཅས་དབུ་བཞུགས་ཐོག   ཐོག་མར་དཔལ་འབྱོར་བཀའ་བློན་མཆོག་གིས་ཐེངས་འདིར་ཉིན་གསུམ་རིང་གི་ཚོགས་ཆེན་སྐབས་ཚོགས་ཆུང་བདུན་དུ་ཆ་བགོས་ཀྱིས་ཉིན་མཐའ་མར་བསམ་ཚུལ་དོན་ཚན་གྲངས་ ༣༠༠ བྱུང་བ་རྣམས་ཕྱོགས་བསྡོམས་བརྒྱབ་ནས་དོན་ཚན་ ༥༧ ནང་གཏན་འབེབས་བྱུང་བ་དེ་དག་དགོངས་འཆར་ཡིན་སྟབས་བཀའ་ཤག་ནས་ངེས་པར་དུ་ལག་ལེན་བསྟར་དགོས་པའི་ཁྱབ་པ་མེད།  དོན་ཚན་དེ་དག་གྲོས་ཚོགས་ནང་གཏན་འབེབས་བྱུང་བ་ཡིན་ན་གཞི་ནས་ཁྲིམས་ཆགས་ཀྱི་ཡོད་སྟབས་ངེས་པར་དུ་བཀའ་ཤག་གི་ལག་ལེན་བསྟར་དགོས་པ་ཆགས་རྒྱུ་རེད། ཅེས་སོགས་ཀྱི་སུང་བཤད་གནང་། དེ་རྗེས་དཔལ་ལྡན་སྲིད་སྐྱོང་མཆོག་གིས་གསུང་བཤད་གནང་དོན།  

ཕྱི་ཟླ་ ༣ ཚེས་ ༡༢ ཉིན་བོད་ཀྱི་བུད་མེད་ཉིན་མོ་སྲུང་བརྩི་ཞུ་རྒྱུར་བཀའ་ཤག་ནས་ལམ་སྟོན་གནང་ཟིན་པ་རེད།   རྡ་སར་བོད་ཀྱི་བུད་མེད་ཉིན་མོ་སྲུང་བརྩི་ཞུ་སྐབས་༸གོང་ས་༸སྐྱབས་མགོན་ཆེན་པོ་མཆོག་ཆིབས་སྒྱུར་ཡོང་བའི་གསོལ་འདེབས་ཞུས་ཡོད་པ་དང་། དེ་ཉིན་མགོན་པོ་གང་ཉིད་མཆོག་མཛད་སྒོར་ཆིབས་སྒྱུར་བསྐྱང་གནང་མཛད་རྒྱུའི་རེ་བ་ཞུ་བཞིན་ཡོད། 

བོད་མིའི་བླ་ན་མེད་པའི་དབུ་ཁྲིད་༸གོང་ས་མཆོག་གིས་བུད་མེད་ཀྱི་ནུས་སྟོབས་སྤེལ་དགོས་འདུག  ཅེས་བཀའ་སློབ་རིམ་པ་ཕེབས་ཡོད་པ་མ་ཟད། དེ་རིང་སྔ་དྲོར་༸གོང་ས་མཆོག་གིས་དུས་རབས་ ༢༠ ནང་དམག་འཁྲུག་མང་པོ་བྱུང་བའི་རྐྱེན་གཅིག་ནི་སྐྱེས་པ་ཚོས་འགོ་ཁྲིད་བྱས་པའི་རྐྱེན་གྱིས་རེད།   དུས་རབས་ ༢༡ ནང་རྒྱལ་ཁབ་ཁག་གི་འགོ་ཁྲིད་བུད་མེད་ཀྱིས་གནང་བ་ཡིན་ན། ཞི་བདེ་ཡོང་བའི་རེ་བ་ཡོད་སྐོར་བཀའ་སློབ་སྩལ་བ་དེ་གནད་འགག་ཆེན་པོ་རེད་དྲན་གྱི་འདུག

ཚོགས་ཆུང་འཛུགས་དགོས་པའི་དགོངས་ཚུལ་བྱུང་ཡོད། བཀའ་ཤག་ནས་བཀོད་ཁྱབ་བཏང་སྟེ་བུད་མེད་ལས་བྱེད་རྒན་པ་དྲུང་ཆེ་དང་དྲུང་འཕར་ཡིན་པ་ལས་གྲུབ་པའི་སློབ་སྟོན་ཚོགས་ཆུང་ཞིག་བཙུགས་ཟིན་པར་བརྟེན་བོད་མིའི་སྒྲིག་འཛུགས་ནས་གནང་དགོས་པ་གང་འདུག ལྷན་ཁང་ཁག་ནས་གནང་རྒྱུ་གང་འདུག  དེའི་ཆེད་ཚོགས་ཆུང་བཙུགས་ཟིན་པ་རེད། བཀའ་ཤག་ངོས་ནས་སྲིད་བྱུས་གཏན་འབེབས་མ་གནང་གོང་བསམ་བློ་མང་པོ་བཏང་སྟེ་བང་མང་པོ་སྒྲིག་ནས་ད་རེས་ཚོགས་ཆེན་འདི་གཏན་འབེབས་གནང་བ་ཞིག་རེད།

འོན་ཀྱང་འགའ་ཤས་ཀྱིས་དགོངས་ཚུལ་ལ་སྲིད་བྱུས་ཤིག་འདུག  ཡིག་ཆ་འགའ་ཤས་འདུག  དེ་ཙམ་གྱིས་ཧ་ལས་དགོས་རྒྱུ་ཅི་ཡོད་བསམ་པ་དྲན་སྲིད།   ཧ་ལས་རྒྱུ་ཡོད།  ཅེས་ཞུ་རྒྱུ་ཡིན།  གང་ཡིན་བརྗོད་ན།  སྲིད་བྱུས་ཡོད་པ་དང་མེད་པ་གཉིས་ལ་ཁྱད་པར་ཧ་ཅང་ཆེན་པོ་ཡོད།   སྲིད་བྱུས་ཡོད་པ་ཡིན་ན། གཞི་འཛིན་སའི་ཁྲིམས་ཤིག་ཡོད་སྟབས། དེ་གཞིར་བཟུང་ལག་བསྟར་བྱེད་རྒྱུ་དང་ལས་འཆར་སོགས་ཆ་ཚང་ཡིག་ཆ་དེའི་ཐོག་ནས་ཐོན་ཡོང་གི་རེད།   གཞི་འཛིན་སའི་སྲིད་བྱུས་གང་ཡང་མེད་ན་ལས་གཞི་བང་སྒྲིག་ཐབས་མེད།

འགྲོ་གྲོན་གཏང་བ་ཡིན་ནའང་གཞི་འཛིན་སའི་སྲིད་བྱུས་གཏན་འབེབས་ཤིག་ངེས་པར་དི་དགོས་གལ་ཆེ།  ཐེངས་འདིར་གཞི་འཛིན་སའི་སྲིད་བྱུས་འདི་ཡང་ལས་སླ་པོ་བྱས་ནས་ཡོང་བ་ཞིག་མ་རེད།   ངས་ཁ་སྔོན་ཞུས་པ་བཞིན་ཕྱི་ལོ་ ༢༠༡༤ ལོར་སྲི་ཞུའི་ལས་བྱེད་སྡེ་འགན་མན་དང་། སྡེ་འགན་ཡན་གྱི་ལས་བྱེད་རྣམས་འཛོམས་ཏེ་བསམ་ཚུལ་བསྡུ་རུབ་བྱས་པ་དང་། དེ་བཞིན་བོད་མི་མང་སྤྱི་འཐུས་རྣམ་པ་དང་། སྐབས་དེ་དུས་ཀྱི་བུད་མེད་བཀའ་བློན་རྣམ་པ་གཉིས་བཅས་ཚང་འཛོམས་ཐོག་དགོངས་ཚུལ་ཡོངས་རྫོགས་ཕྱོགས་བསྒྲིགས་བྱས་པའི་ཐོག་ཆེད་མངགས་བུད་མེད་ནུས་སྟོབས་སྤེལ་བའི་སྲིད་བྱུས་འདིའི་སླད་ཚོགས་ཆུང་བསྐོ་གཞག་གནང་ཡོད།  བཅས་སོགས་ཀྱི་གསུང་བཤད་གནང་མཐར་ནང་སྲིད་དྲུང་འཕར་ཚེ་དབང་སྒྲོལ་མ་ལགས་ཀྱིས་ཐུགས་རྗེ་ཆེ་ཞུའི་གསུང་བཤད་གནང་བསྟུན་ཐེངས་འདིར་བུད་མེད་ནུས་སྟོབས་སྤེལ་བའི་ཚོགས་ཆེན་ཐེངས་དང་པོ་རྒྱལ་ཁའི་ངང་ནས་མཇུག་སྒྲིལ་འདུག

སྤྱིར་དེ་ཉིན་སྔ་དྲོ་ཆུ་ཚོད་ ༩།༣༠ ཐོག་ཚོགས་བཅར་བ་ཡོངས་ལ་༸རྒྱལ་བའི་གཟིམ་ཆུང་ཕོ་བྲང་དུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་མཇལ་ཁ་དང་བཀའ་སློབ་སྩལ་གནང་མཛད་འདུག