༢༠༡༧ ཟླ་ ༢ ཚེས་ ༢༣ རེས་གཟའ་ཕུར་བུ།
༄༅། །ཉེ་ཆར་རྡོ་རྫོང་རིན་པོ་ཆེ་ཐེ་ཝན་དུ་སྨན་བཅོས་གནང་བཞིན་ཡོད་མུར་དགོངས་པ་རྫོགས་ཡོད་པར་ཆོས་རིག་ལས་ཁུངས་ནས་རྒྱ་གར་ཧི་མཱ་ཅལ་ཀངྒ་ར་རྫོང་ཁོངས་གོ་པཱལ་པུར་རྡོ་རྫོང་དགོན་ཐུབ་བསྟན་མདོ་སྔགས་རབ་རྒྱས་ཆོས་གླིང་གི་མཁན་སློབ་འདུས་མང་ལ་ཐུགས་གསོའི་འཕྲིན་ཡིག་གནང་འདུག་པའི་ནང་འཁོད་དོན།
དོན་བརྒྱུད་བསྟན་པའི་གསལ་བྱེད་སྐྱབས་རྗེ་གྲུབ་དབང་རྡོ་རྫོང་སྐུ་ཕྲེང་བརྒྱད་པ་ངག་དབང་ཡོན་ཏན་ཆོས་ཀྱི་ཉི་མ་མཆོག་ཐེ་ཝན་དུ་སྨན་བཅོས་འཕྲོད་བཞེས་གནང་བཞིན་ཡོད་མུར་ཕྱི་ལོ་ ༢༠༡༧ ཟླ་ ༢ ཚེས་ ༡༦ ཉིན་གློ་བུར་དགོངས་པ་གཞན་དོན་དུ་གཤེགས་ཡོད་འདུག་པར། འདི་ག་བོད་མིའི་སྒྲིག་འཛུགས་ཆོས་རིག་ལས་ཁུངས་འགོ་ལས་ཡོངས་ནས་མྱ་ངན་གུས་འདུད་དང་སྦྲགས། དེ་གའི་མཁན་སློབ་འདུས་མང་ཡོངས་དང་། མཚུངས་མེད་ཁམས་སྤྲུལ་རིན་པོ་ཆེ་དང་གྲུ་གུ་ཆོས་རྒྱལ་རིན་པོ་ཆེ་རྣམ་གཉིས་ཀྱིས་དབུས་གཞིས་བྱེས་ཞལ་སློབ་དང་སྐུ་ཉེ་འབྲེལ་ལྟོས་ཡོངས་ལ་ཐུགས་གསོ་གཏིང་ཟབ་ཞུ་རྒྱུ་ཡིན།
བདེ་བར་གཤེགས་པ་སྐྱབས་རྗེ་གྲུབ་དབང་རྡོ་རྫོང་སྐུ་ཕྲེང་བརྒྱད་པ་མཆོག་ནི། བསྟན་པ་སྤྱི་དང་ལྷག་པར་དོན་བརྒྱུད་དཔལ་ལྡན་འབྲུག་པའི་བསྟན་པ་སླར་གསོ་དང་བརྒྱུད་འཛིན་ཐོག་ཕྱག་རྗེས་ཆེ་ཞིང་། སྤྱི་ནོར་༸གོང་ས་༸སྐྱབས་མགོན་སྐུ་ཕྲེང་བཅུ་བཞི་པ་ཆེན་པོ་མཆོག་གིས་དབུས་པའི་བོད་མིའི་ཆོས་སྲིད་དབུ་ཁྲིད་རིམ་པ་དང་མཐུན་ཕྱོགས་ཀྱི་འབྲེལ་རྒྱ་ཤིན་ཏུ་བརྟན་པའི་བླ་མ་ཞིག་ཡིན་པས། མཛད་བཟང་དེ་དག་ལ་རྗེས་སུ་ཡི་རང་ཞུ་བ་དང་ཆབས་ཅིག་རིན་པོ་ཆེ་དམ་པའི་ཐུགས་དགོངས་ཟབ་མོ་ཡོངས་སུ་རྫོགས་པ་དང་། སླར་ཡང་བོད་ཀྱི་བསྟན་འགྲོའི་དོན་དུ་ཡང་སྲིད་འཁྲུལ་བྲལ་རིན་པོ་ཆེ་མྱུར་དུ་བྱོན་པའི་སྨོན་འདུན་ཞུ་རྒྱུ་ཡིན། ཞེས་འཁོད་འདུག །
