ཕྱི་ལོ་ ༢༠༡༧ ཟླ་ ༢ ཚེས་ ༡༦ རེས་གཟའ་ཕུར་བུ།
༄༅། །བོད་མིའི་སྒྲིག་འཛུགས་ཀྱི་དྲུང་ཆེ་ཟུར་པ་སྣར་སྐྱིད་ངག་དབང་དོན་གྲུབ་ལགས་ཉེ་ལམ་ནད་མནར་གྱིས་ལྡི་ལི་ཧོ་ལི་ཕེ་མི་ལི་ Holy family Hospital སྨན་ཁང་དུ་སྨན་བཅོས་ཞུས་ཀྱང་དྭང་བསྐྱེད་མ་བྱུང་བར། ཕྱི་ལོ་ ༢༠༡༧ ཟླ་ ༢ ཚེས་ ༡༣ ཉིན་གྱི་དགོང་མོ་ཆུ་ཚོད་ ༩།༠༥ ཐོག་དགོངས་པ་རྫོགས་པའི་ཡིད་སྐྱོའི་གནས་ཚུལ་བྱུང་འདུག་པར་དཔལ་ལྡན་བཀའ་ཤག་ནས་ཐུགས་ཕམ་དང་སྦྲགས་དམ་པ་དེ་ཉིད་སྐུ་ཚེ་ཧྲིལ་པོར་བོད་སྤྱི་པའི་རྩ་དོན་ཐོག་ཞབས་འདེགས་བསྒྲུབ་པའི་རྗེས་དྲན་ཞུ་སླད། དེ་རིང་ཕྱི་ལོ་ ༢༠༡༧ ཟླ་ ༢ ཚེས་ ༡༦ ཉིན་གྱི་ཉིན་རྒྱབ་ཆུ་ཚོད་ ༢ ཐོག་གངས་སྐྱིད་ལས་བྱེད་གསོལ་ཚང་ཡང་སྟེང་གཉའ་ཁྲི་ཚོགས་ཁང་དུ་བོད་མིའི་སྒྲིག་འཛུགས་ཀྱི་མང་གཙོ་ཀ་བ་གསུམ་གྱི་མཛད་གཙོ་རྣམ་པས་དབུས་བོད་མི་མང་སྤྱི་འཐུས་རྒྱུན་ལས་རྣམ་པ་དང་། ལྷན་ཁང་ཁག་གི་དྲུང་ཆེ་ཆུང་རྣམ་པ། དེ་བཞིན་སྲི་ཞུའི་ལས་བྱེད་བཅས་ཚང་འཛོམས་ཐོག་བཀའ་དྲུང་སྟོབས་རྒྱལ་ཚེ་རིང་ལགས་ཀྱིས་དམ་པ་ཁོང་གི་ལོ་རྒྱུས་སྒྲོགས་སྦྱང་གནང་རྗེས་བསྔོ་སྨོན་གསུང་འདོན་དང་། དམ་པ་ཁོང་ལ་མྱ་ངན་གུས་
འདུད་དང་གདུང་སེམས་མཉམ་སྐྱེ་མཚོན་སླད་ཉིན་རྒྱབ་ཆུ་ཚོད་ ༣ ནས་གཞུང་འབྲེལ་མྱ་ངན་གུས་འདུད་མཚོན་ཕྱིར་དབུས་ཀྱི་ལས་ཁུངས་ཁག་ལས་མཚམས་བཞག་ཡོད།
དམ་པ་ཁོང་ནི། ཕྱི་ལོ་ ༡༩༣༡ ཟླ་ ༩ ཚེས་ ༦ ཉིན་བོད་དབུས་དྭགས་པོར་འཁྲུངས། ཆུང་དུས་བོད་ཡིག་དང་བོད་ཀྱི་རིག་གནས་སློབ་སྦྱོང་གནང་ཞིང་། ཕྱི་ལོ་ ༡༩༤༢ ལོར་རྩེ་སློབ་གྲྭར་འཛུལ་ཞུགས་གནང་ཐོག་ཕྱི་ལོ་ ༡༩༤༨ ལོར་རྩེ་དྲུང་སློབ་སྦྱོང་ཐོན། ཕྱི་ལོ་ ༡༩༤༧ ལོར་གཞུང་ཞབས་བསྐོ་བསྩལ་གྱིས་ཐོག་མར་རྩེ་ཡིག་ཚང་ལས་ཁུངས་ཀྱི་ལས་བྱ་དང་། ཕྱི་ལོ་ ༡༩༥༧ ལོར་ལེགས་བཅོས་ཚོགས་ཆུང་གི་ཚོགས་མི་གནང་། ཕྱི་ལོ་ ༡༩༥༨ ལོར་ལྷ་སའི་གྲོང་ཁྱེར་སྤྱི་ཁྱབ་གནང་། ཕྱི་ལོ་ ༡༩༥༩ ལོར་རྒྱ་གར་ལ་བཙན་བྱོལ་དུ་ཕེབས་ཏེ་བཙན་བྱོལ་བོད་གཞུང་གི་ཕྱག་ལས་མུ་མཐུད་གནང་། ཕྱི་ལོ་ ༡༩༦༠ ནས་ ༡༩༦༨ བར་ཕྱི་དྲིལ་དྲུང་ཆེའི་ལས་འགན་ཐོག་ཕྱི་ལོ་ ༡༩༦༠ ཟླ་ ༩ ཚེས་ ༢ ནས་ཕྱི་ལོ་ ༡༩༦༢ བར་རྒྱུན་ལས་ཚོགས་དྲུང་གཅིག་ལྕོགས་གནང་། ཕྱི་ལོ་ ༡༩༦༣ ནས་ ༡༩༦༥ བར་རྡ་ས་བོད་ཀྱི་ཤེས་རིག་ཟློས་གར་ཚོགས་པའི་འགན་འཛིན་ལས་རོགས་ཡང་གནང་། ཕྱི་ལོ་ ༡༩༧༡ ནས་ ༡༩༧༨ བར་རྡ་ས་བོད་ཀྱི་དཔེ་མཛོད་ཁང་དུ་ཕྱག་ལས་གནང་། ཕྱི་ལོ་ ༡༩༨༣ ལོ་ནས་སྐུ་སྒེར་ཡིག་ཚང་ནང་ཕྱག་ལས་གནང་བ་དང་། དེ་བཞིན་མཛད་རྣམ་རྩོམ་སྒྲིག་ཚོགས་ཆུང་གི་ཚོགས་མི་ཡང་གནང་ཡོད། ཁོང་ཕྱི་ལོ་ ༢༠༡༧ ཟླ་ ༢ ཚེས་ ༡༣ ཉིན་གྱི་དགོང་མོའི་ཆུ་ཚོད་ ༩།༠༥ ཐོག་རྒྱ་གར་གྱི་རྒྱལ་ས་ལྡི་ལིར་སྐུ་ཚེ་མ་ཟིན་པའི་ཡིད་སྐྱོའི་གནས་ཚུལ་བྱུང་འདུག་པ་བཅས། །
