༢༠༡༧ ཟླ་ ༢ ཚེས་ ༢༡ རེས་གཟའ་མིག་དམར།
༄༅། །ཕྱི་ལོ་ ༢༠༡༧ ཟླ་ ༢ ཚེས་ ༢༡ ཉིན་བོད་མིའི་སྒྲིག་འཛུགས་བཀའ་ཤག་གི་ལམ་སྟོན་ལྟར། ནང་སྲིད་ལས་ཁུངས་ཀྱི་གོ་སྒྲིག་འོག་དབུས་བོད་ཀྱི་སྨན་རྩིས་ཁང་གི་ཚོགས་ཁང་དུ། བོད་ཀྱི་བུད་མེད་ནུས་སྟོབས་གོང་སྤེལ་གྱི་ཚོགས་ཆེན་ཐེངས་དང་པོ་དབུ་འཛུགས་གནང་ཡོད།
དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༩ ཐོག་སྐུ་མགྲོན་གཙོ་བོ་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་དང་། བོད་མིའི་སྒྲིག་འཛུགས་ཀྱི་མང་གཙོའི་ཀ་བ་གསུམ་གྱི་མཛད་གཙོ་རྣམ་པ། སྤྱི་འཐུས་རྒྱུན་ལས་ཁག་གཅིག བཀའ་ཟུར་རིན་ཆེན་མཁའ་འགྲོ་མཆོག དེ་བཞིན་རྒྱ་བལ་འབྲུག་གསུམ་གྱི་བོད་མིའི་ས་གནས་འགོ་འཛིན་རྣམ་པ་དང་། ས་གནས་ཁག་ ༥༣ ནས་སློབ་གྲྭ་དང་དགོན་སྡེ། བཙུན་དགོན། གཞུང་དང་གཞུང་འབྲེལ་མིན་པའི་ཚོགས་པ་ཁག་བཅས་ནས་ཁྱོན་མི་གྲངས་ ༡༦༦ དང་། དེ་བཞིན་མཐོ་སློབ་ཁག་ ༢༣ ནས་ཚོགས་མི་གྲངས་ ༩༩ སོགས་ཁྱོན་ཚོགས་བཅར་བ་མི་གྲངས་ ༣༤༨ ཙམ་ལྷན་འཛོམས་ཐོག་མཛད་སྒོ་དབུ་འབྱེད་གནང་།
སྐབས་དེར་ཐོག་མར་སྐུ་མགྲོན་གཙོ་བོ་དཔལ་ལྡན་སྲིད་སྐྱོང་མཆོག་གིས་སྣང་གསལ་ཞལ་ཕྱེ་གནང་གྲུབ་མཚམས་ཚོགས་བཅར་བ་ཡོངས་སྐུ་བཞེངས་ཐོག་བོད་རྒྱལ་ཁབ་ཆེན་པོའི་རྒྱལ་གླུ་དབྱངས་སུ་གྱེར། དེ་ནས་བོད་བསྟན་སྲིད་མི་རིགས་ཀྱི་ཆེད་སྐུ་སྲོག་བློས་གཏོང་གནང་མཁན་རྒྱལ་གཅེས་པ་རྣམས་ལ་རྗེས་དྲན་མྱ་ངན་གུས་འདུད་མཚོན་སླད་སྐར་མ་གཅིག་རིང་ངག་བཅད་གནང་བསྟུན་བཙུན་དགོན་སྒྲོལ་མ་གླིང་གི་བཙུན་མ་རྣམས་ནས་ཤིས་བརྗོད་གསུང་འདོན་གནང་།
དེ་རྗེས་རྟེན་འབྲེལ་གསོལ་ཇ་འབྲས་སིལ་འདེགས་འབུལ་ཞུས། སྐབས་དེར་ནང་སྲིད་བཀའ་བློན་འཁོར་ལྷ་ཚང་བསོད་ནམས་སྟོབས་རྒྱལ་མཆོག་གིས་འཚམས་འདྲི་དང་སྦྲགས་ཐེངས་འདིའི་ཚོགས་ཆེན་ངོ་སྤྲོད་དང་འབྲེལ་གསུང་བཤད་གནང་དོན།
བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དགོངས་གཞི་ལྟར། ཕྱི་ལོ་ ༢༠༠༨ ལོར་བཀའ་ཤག་སྐབས་བཅུ་གསུམ་པས་བུད་མེད་ནུས་སྟོབས་གོང་སྤེལ་འདི་ཉིད་གལ་ཆེན་པོ་ཞིག་ལ་དགོངས་པ་བཞེས་ཏེ་སྲིད་བྱུས་དོན་ཚན་བརྒྱད་གཏན་འབེབས་གནང་སྟེ་ཕལ་ཆེར་ལོ་དགུ་ཙམ་ཕྱིན་པ་རེད། ལོ་ངོ་དེ་དག་གི་རིང་སྲིད་བྱུས་གཏན་འབེབས་གནང་རྒྱུ་དེ་ཡང་ཕྱི་ནང་གཉིས་ནས་གནོན་ཤུགས་ཡོད་མེད་ལ་མ་ལྟོས་པར་ང་ཚོའི་སྤྱི་ཚོགས་ཀྱི་དགོས་མཁོ་རང་ལ་གཟིགས་ནས་སྲིད་བྱུས་གཏན་འབེབས་གནང་བའི་གནས་སྟངས་ཤིག་ཆགས་ཀྱི་ཡོད།
བཀའ་ཤག་སྐབས་བཅོ་ལྔ་པའི་ལས་ཡུན་རིང་དེ་སྔ་གཏན་འབེབས་གནང་བའི་སྲིད་བྱུས་གཞིར་བཟུང་སྤྱི་ཚོགས་ཀྱི་གནས་སྟངས་དང་། དེ་བཞིན་དུས་ཀྱི་འགྱུར་ལྡོག་དང་བསྟུན་ཏེ་འདིའི་ཐོག་སྣོན་འཕྲི་གང་ཙམ་གནང་བ་རེད། སྣོན་འཕྲི་གནང་སླད་བོད་མིའི་སྒྲིག་འཛུགས་ནང་ཡོད་པའི་བུད་མེད་འགན་འཁུར་གནང་མཁན་ཟུང་དྲུང་དང་དྲུང་འཕར་གནས་རིམ་ཡན་གྱི་བུད་མེད་ལྷན་ཚོགས་ཤིག་ཟུར་དུ་བསྐོང་ཚོགས་གནང་སྟེ་བཀའ་ཤག་སྐབས་བཅུ་གསུམ་པས་སྲིད་བྱུས་གཏན་འབེབས་གནང་བ་དེའི་ཐོག་སྣོན་འཕྲི་གང་གནང་དགོས་པ་དེ་དག་ཚང་མ་གནང་བའི་ཐོག་འཆར་གཞི་ཁག་བཀའ་ཤག་ལ་འབྱོར་ཡོད།
བཀའ་ཤག་ཏུ་དཔལ་ལྡན་སྲིད་སྐྱོང་མཆོག་དབུ་བཞུགས་ཐོག་དུས་ཀྱི་འགྱུར་འགྲོས་དང་བསྟུན་ལེགས་བཅོས་གནང་དགོས་ཁག་ཆ་ཚང་གནང་སྟེ་ཉེ་ཆར་ཕྱི་ཟླ་ ༢ ཚེས་ ༢ ཉིན་ཕྱི་དྲིལ་ལྷག་པ་ཚེ་རིང་དྲན་རྟེན་ཚོགས་ཁང་ནང་སྲིད་བྱུས་གཏན་འབེབས་བྱུང་བ་ཁག་ཡོངས་ཁྱབ་གསལ་བསྒྲགས་སྤེལ་ཟིན།
སྲིད་བྱུས་གང་གཏན་འབེབས་གནང་བ་དེ་དག་ལག་ལེན་བསྟར་ཕྱོགས་ཐད་ད་རེས་ཚོགས་ཆེན་ཞིག་བསྐོང་ཚོགས་གནང་ཐུབ་ན། ཞེས་དགོས་པ་རྒྱུ་མཚན་གཙོ་བོ་འདི་ལྟར་ཆགས་ཡོད། རྩ་བའི་བུད་མེད་ཀྱི་ནུས་སྟོབས་སྤེལ་བའི་སྲིད་བྱུས་ཀྱི་ཕྱག་དེབ་རྣམ་པ་ཚང་མའི་ཕྱག་ལ་འབྱོར་ཡོད། སྲིད་བྱུས་འདིའི་ནང་མ་འོངས་པར་ཚིག་གི་གོ་དོན་ཁ་གསལ་མེད་པ་སོགས་ཀྱི་ཀླན་ཀ་བྱུང་བ་ཡིན་ན། བོད་ཡིག་ནང་བཟོས་པའི་ཚིག་དོན་གང་ཡོད་པ་དེ་ལ་ཚང་མས་ངོ་འཛིན་གནང་རོགས། ཞེས་གསལ་ཁ་སྟོན་དགོས་པའི་གནང་སྟངས་ཤིག་ཆགས་སོང་།
སྤྱིར་བོད་སྲིད་པ་ཆགས་པ་ནང་བཟུང་བོད་པའི་སྤྱི་ཚོགས་ནང་ཕོ་མོ་གཉིས་གཟུགས་པོའི་གྲུབ་ཆ་ཐོག་ནས་ཁྱད་པར་གང་ཡོད་པ་དེ་རེད་མ་གཏོགས་གཞན་ཕོ་མོའི་དབྱེ་འབྱེད་ཟེར་རྒྱུའི་རིགས་འདི་བོད་པའི་སྤྱི་ཚོགས་ནང་ཧ་ལམ་མེད་པ་ཞིག་ཕལ་ཆེར་གསལ་པོ་ཡིན་པ་ནི་ཚང་མས་ཧ་ཅང་གསལ་པོ་མཁྱེན་གྱི་ཡོད། བོད་ནང་ཆ་བཞག་པ་ཡིན་ན། ས་ཁུག་ལུང་ཁུག་རེ་བཟུང་ནང་ཁྱོ་གས་བཟའ་ཟླར་ཉེས་རྡུང་ཚད་མེད་གཏོང་བ་ལྟ་བུ་དང་། ནང་གི་དབང་ཆ་མ་སྤྲད་པའི་གནས་ཚུལ་རེ་བཟུང་ས་ཁུག་ལུང་ཁུག་ཁག་གི་ནང་ཕྲན་བུ་ཡོང་བཞིན་ཡོད་པའི་གནས་སྟངས་ཤིག་རེད། གང་བྱུང་བ་དེ་དག་སྤྱི་ཚོགས་ཀྱི་གནས་སྟངས་མ་ཤེས་པ་ཟེར་ན་འདྲ། ཡུལ་ལུང་སོ་སོའི་གོམས་གཤིས་ངན་པ་འཇག་པའི་རྒྱུ་མཚན་ལ་བརྟེན་ནས་བྱུང་བ་མ་གཏོགས་ང་རང་ཚོ་བོད་མིའི་སྤྱི་ཚོགས་ནང་ཆོས་དང་འཇིག་རྟེན། ལམ་ལུགས་གང་གི་ཐོག་ནས་ཆ་བཞག་པ་ཡིན་ནའང་ཁྲིམས་དང་སྒྲིག་གཞི། ལམ་ལུགས་དེ་འདྲའི་ཐོག་ནས་ཕོ་མོ་དབྱེ་འབྱེད་ཀྱི་ལམ་སྲོལ་གཏན་འབེབས་བཟོས་པ་ཞིག་རྩ་བ་ཉིད་ནས་མེད། ཅེས་ཞུ་འདོད་བྱུང་།
ཕྱི་ལོ་ ༡༩༩༤ ཟླ་ ༤ ཚེས་ ༡ ཉིན་བུད་མེད་ལྷན་ཚོགས་ཀྱི་ཚོགས་ཐེངས་བཞི་པའི་ཐོག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས། བྱམས་བརྩེ་ཞེས་པའི་བཟང་པོའི་ཡོན་ཏན་ནི། ཐོག་མར་མ་ནས་བྱུང་བ་དང་། ཆོས་སྟོན་མཁན་གྱི་བླ་མ་ནི་དེའི་རྗེས་སུ་བྱུང་བ་རེད། དེར་བརྟེན་ཆོས་སྟོན་མཁན་གྱི་བླ་མ་དེ་ལ་བྱམས་བརྩེ་ངོ་སྤྲོད་གནང་མཁན་གྱི་བླ་མ་ལྟ་བུ་ནི་ཨ་མ་ཆགས་ཡོད་སྟབས། ཨ་མའི་བྱམས་བརྩེའི་བསླབ་བྱ་དེ་མ་འོངས་པར་ཕྲུ་གུའི་སེམས་ནང་ཇི་ཙམ་གནས་ལ་འཁེལ་བ་བཟོ་ཐུབ་མིན་ཨ་མར་རགས་ལུས་ཡོད། ཅེས་ཧ་ལས་པའི་བཀའ་སློབ་ནན་པོ་ཕེབས་ཡོད།
དེ་བཞིན་སྤྱི་ཚོགས་ནང་ཨ་མ་ཟེར་དུས་བཀའ་དྲིན་ཆེན་པོ་ཡིན་པ་མཐའ་ན་འབུ་སྲིན་ཡན་ཆད་ཀྱི་ཤེས་བཞིན་ཡོད། ཨ་མའི་བཀའ་དྲིན་དུས་ནམ་ཡང་བརྗེད་དུ་མེད། དེའི་ཐོག་དེང་སྐབས་ང་རང་ཚོའི་སྤྱི་ཚོགས་ཙམ་མིན་པར་འཛམ་གླིང་ནང་བུད་མེད་ཟེར་དུས་བུད་མེད་ཀྱི་རྒྱུད་ལ་བྱམས་བརྩེ་དང་སྙིང་རྗེ་རང་བཞིན་གྱི་ཆེ་བ་ཡོད་པ་ང་ཚོས་ཁ་ནས་བཤད་པ་ཙམ་མིན་པར་ཚན་རིག་ཐོག་ནས་ར་སྤྲོད་ཐུབ་པའི་གནས་སྟངས་ཆགས་ཡོད་པ་མ་ཟད། དེང་སྐབས་འཛམ་གླིང་ནང་བུད་མེད་འགོ་ཁྲིད་གང་མང་སླེབ་ཐུབ་པ་བྱ་རྒྱུའི་དུས་ཚོད་ཀྱང་ཆགས་ཡོད།
བུད་མེད་ཚོར་ཤེས་ཡོན་དང་། ཆབ་སྲིད། དཔལ་འབྱོར། སྤྱི་ཚོགས་ཡར་རྒྱས་གཏོང་རྒྱུ་བཅས་ཀྱི་ནུས་པ་ཡོད། ནུས་པ་ཆེ་ཆུང་ཟེར་རྒྱུ་ཙམ་མ་གཏོགས་ནུས་པ་རང་ཆས་སུ་ཡོད་པར་བརྟེན། སོ་སོར་ནུས་པ་གང་ཡོད་པ་དེ་དག་གདེང་ཚོད་ཀྱི་ཐོག་ནས་སྤྱི་ཚོགས་ནང་སྟོན་ཐུབ་དང་མ་ཐུབ་པའི་གནས་སྟངས་མང་པོ་ཞིག་ཆགས་ཀྱི་ཡོད། དེར་བརྟེན་ནུས་པ་སྟོན་མ་ནུས་པ་ཡིན་ན་འདྲ། སྟོན་ཐུབ་ཀྱི་མེད་པ་ཡིན་ནའང་འདྲ། རྒྱུ་དང་རྐྱེན་མང་པོ་ཡོད་སྟབས། རྒྱུ་དང་རྐྱེན་ག་བར་ཐུག་འདུག དེ་དག་གི་ཐོག་ལ་ཉིན་མ་གཉིས་དང་ཕྱེད་ཀའི་རིང་སོ་སོར་དགོངས་ཚུལ་གང་ཡོད་པ་དེ་དག་ད་རེས་སྤུང་ཐུབ་པ་ཞིག་དང་། རྗེས་མ་བཀའ་ཤག་གི་དགོངས་གཞིར་ཡོད་པ་གཞི་བཟུང་བོད་པའི་བུད་མེད་ཚོ་སྤྱི་ཚོགས་ཀྱི་ལས་རིགས་ནང་ལས་འགན་འདྲ་མིན་འཁྱེར་ཐུབ་པ། རྒྱལ་སྤྱིའི་ནང་བུད་མེད་གཞན་དང་ལྷན་དཔུང་པ་མཉམ་གཤིབས་བྱས་ནས་ཕེབས་ཐུབ་པ་ཞིག་ད་རེས་ཚོགས་ཆེན་འདི་བརྒྱུད་ནས་ཡོང་ཐུབ་པའི་རེ་བ་དང་ཡིད་ཆེས་ཞུ་བཞིན་ཡོད། ཅེས་གསུང་བཤད་གནང་རྗེས་དཔལ་ལྡན་སྲིད་སྐྱོང་མཆོག་གིས་ཚོགས་འདུ་དབུ་འབྱེད་ཀྱི་གསུང་བཤད་གནང་ཡོད།།
