༢༠༡༧ ཟླ་ ༢ ཚེས་ ༣ རེས་གཟའ་པ་སངས།
༄༅། །ཕ་རན་སིའི་གྲོས་ཚོགས་གོང་མའི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་མེ་ཤལ་རེ་སོན་ Michel Raison མཆོག་གིས། ཕ་རན་སིའི་གྲོས་ཚོགས་གོང་མ་དང་། ལྷག་པར་ཕ་རན་སིའི་གཞུང་གིས་བོད་ནང་གི་ཛ་དྲག་གནས་སྟངས་ཐད་དོ་སྣང་གནང་ཆེད་གྲོས་ཚོགས་གོང་མའི་ནང་བོད་དོན་སྐོར་གླེང་སློང་ཤུགས་ཆེ་གནང་བ་མ་ཟད། ཐབས་ལམ་འདྲ་མིན་ཐོག་ནས་བོད་དོན་ཞུ་གཏུག་གི་ལས་འགུལ་འདྲ་མིན་སྤེལ་ཡོད་སྐོར་བོད་མིའི་སྐུ་ཚབ་རྣམས་ལ་གསལ་བཤད་གནང་བ་དང་སྦྲགས།
ཁོང་གིས་ཕ་རན་སི་ཕྱི་སྲིད་བློན་ཆེན་མཆོག་ལ་རྒྱ་ནག་གཞུང་གིས་བོད་མིའི་འགྲོ་བ་མིའི་ཐོབ་ཐང་ལ་བརྩི་མེད་རྡོག་རོལ་གཏོང་བཞིན་པའི་གནད་དོན་ཐོག་བཏོན་པའི་དྲི་བ་ཨང་ ༢༤༧༧༡ ཅན། འགོ་བརྗོད་དུ། བོད་མིའི་ཐོབ་ཐང་ལ་བརྩི་མེད་རྡོག་རོལ་བཏང་བ། ཞེས་པ་དེ་གྲོས་ཚོགས་གོང་མའི་ Senate གཞུང་འབྲེལ་དྲ་རྒྱའི་སྟེང་ཕྱི་ལོ་ ༢༠༡༧ ཟླ་ ༡ ཚེས་ ༢༦ ཉིན་བཏོན་ཡོད་སྐོར་གསལ་བཤད་གནང་འདུག
དེ་ཡང་བོད་དོན་ཐོག་གི་དྲི་བ་ཨང་ ༢༤༧༧༡ ཅན་དེའི་ནང་སྐུ་ཞབས་མེ་ཤལ་རེ་སོན་མཆོག་གིས། ༼རྒྱ་ནག་གཞུང་གི་འཇིགས་སྐུལ་རིང་ལུགས་ལ་གདོང་ལེན་བྱེད་ཕྱོགས་ཀྱི་ཁྲིམས་གསར་པ་དེས་བོད་མི་དང་ཡུ་གུར་མི་རིགས་ལ་ཉེན་ཚབས་དང་རྗེས་འབྲས་ཇི་བྱུང་། ༽ ཞེས་རྒྱལ་སྤྱིའི་བོད་དོན་ལས་འགུལ་ཁང་དང་། རྒྱལ་སྤྱིའི་འགྲོ་བ་མིའི་ཐོབ་ཐང་སྲུང་སྐྱོབ་ཚོགས་པ་ International Federation of Human Rights བཅས་ཀྱིས་ཐུན་མོང་ཐོག་བཏོན་པའི་སྙན་ཐོ་དེར་གཞི་བཅོལ་ནས་དྲི་བ་རྣམས་བཏོན་པ་འདུག
ལྷག་པར་ཁོང་གིས་སྙན་ཐོའི་ནང་གསལ་ལྟར་བོད་ནང་གི་བོད་མིའི་སྨྲ་བརྗོད་དང་འདུ་འཛོམས་རང་དབང་། དེ་བཞིན་ཞི་བའི་ལམ་ནས་ཚོགས་འདུ་བསྡུ་བསྐོང་བྱ་རྒྱུའི་ཐོབ་ཐང་བརྡལ་བཤིག་གཏོང་བཞིན་པའི་གནས་སྟངས་ཁག་གསལ་བཏོན་གནང་བ་མ་ཟད། རྒྱ་ནག་གཞུང་གིས་རྒྱལ་ནང་གི་བདེ་འཇགས་དང་འཇིགས་སྐུལ་རིང་ལུགས་ལ་གདོང་ལེན་བྱ་རྒྱུའི་ཁྲིམས་གསར་པ་དེར་སྙད་ནས་བོད་མིའི་ཐོག་ལའང་སྤྱི་མཚུངས་སུ་ཁྲིམས་དེ་དག་དབྱུག་པ་ལེབ་རྡུང་བྱེད་བཞིན་ཡོད་པ་དང་།
དེ་བཞིན་ཁྲིམས་དེར་སྙད་ནས་གྲངས་ཉུང་མི་རིགས་དང་ཆོས་དད་རང་དབང་ཐོག་འཛིན་བཞིན་པའི་གཞུང་གི་སྲིད་བྱུས་ལ་སྐྱོན་བརྗོད་བྱེད་མཁན་ཙམ་མ་ཟད། འཚེ་མེད་ཞི་བའི་ལམ་ནས་ཞི་རྒོལ་རྔམ་སྟོན་བྱེད་མཁན་ཚོ་ཡང་འཛིན་བཟུང་བཀག་ཉར་བྱེད་བཞིན་ཡོད་པ་སོགས་ཁྲིམས་འགལ་གྱི་སྲིད་བྱུས་ལག་བསྟར་བྱེད་བཞིན་པ་རྣམས་ཞིབ་ཕྲ་བཀོད་ཡོད།
གཞན་ཡང་སྐུ་ཞབས་མེ་ཤལ་རེ་སོན་ Michel Raison མཆོག་གིས་ཕ་རན་སིའི་ཕྱི་སྲིད་བློན་ཆེན་མཆོག་ལ། རྒྱལ་སྤྱིའི་སྤྱི་ཚོགས་དང་མཉམ་རུབ་ཐོག་རྒྱ་ནག་གཞུང་ལ་གནོན་ཤུགས་སྤྲད་པ་བརྒྱུད་རྒྱལ་སྤྱིའི་འགྲོ་བ་མིའི་ཐོབ་ཐང་གི་ཁྲིམས་ཡིག་དང་ཡོངས་སུ་འགལ་བའི་སྲིད་བྱུས་དེ་དག་མགྱོགས་མྱུར་བསྐྱར་བཅོས་ཡོང་ཐབས་གནང་དགོས་པ་སོགས་ཞུས་འདུག
དེ་ཡང་ཕྱི་ལོ་ ༢༠༡༦ ཟླ་ ༡༢ ཟླ་འགོ་ཙམ་ནང་བོད་མིའི་སྐུ་ཚབ་འཐུས་མི་རྣམས་ཀྱིས་རེ་འདུན་བཏོན་པ་དང་དངོས་ཡོད་ཛ་དྲག་གི་གནས་སྟངས་ལ་གཞི་བཅོལ་ནས་སྐུ་ཞབས་མེ་ཤལ་རེ་སོན་ Michel Raison མཆོག་གིས་ཕ་རན་སིའི་ཕྱི་སྲིད་ལྷན་ཁང་དུ་བོད་ནང་གི་གསེར་རྟ་བླ་རུང་སྒར་གཏོར་བཤིག་གཏོང་བཞིན་པ་དེ་དག་འཕྲལ་མར་མཚམས་འཇོག་ཡོང་ཐབས་སླད་ཞུ་གཏུག་གནང་ཡོད།
སྐབས་དེར་ཁོང་ནས་ཞུ་སྙན་ནང་དེང་སྐབས་རྒྱ་ནག་གཞུང་གིས་བོད་ནང་དུ་དམ་བསྒྲགས་ཧ་ཅང་བྱེད་བཞིན་པའི་གནས་སྟངས་ནི་དེ་སྔ་༸གོང་ས་༸སྐྱབས་མགོན་ཆེན་པོ་མཆོག་གིས་རིག་གནས་གསར་བརྗེ་བསྐྱར་ལོག་བརྒྱབ་པ་ལྟ་བུ་འདུག ཅེས་བཀའ་སློབ་སྩལ་བ་དེ་ལུང་འདྲེན་གནང་འདུག
