༢༠༡༧ ཟླ་ ༢ ཚེས་ ༢༤ རེས་གཟའ་པ་སངས།

༄༅། །བོད་མིའི་སྒྲིག་འཛུགས་ནང་སྲིད་ལས་ཁུངས་ཀྱི་བུད་མེད་ནུས་ཤུགས་གོང་སྤེལ་ཚན་པའི་གོ་སྒྲིག་འོག  ཕྱི་ལོ་ ༢༠༡༧ ཟླ་ ༢ ཚེས་ ༢༡ ནས་ ༢༣ བར་རྡ་ས་གངས་སྐྱིད་དབུས་བོད་ཀྱི་སྨན་རྩིས་ཁང་གི་ཚོགས་ཁང་དུ།  བུད་མེད་ནུས་སྟོབས་གོང་སྤེལ་ཚོགས་ཆེན་ཐེངས་དང་པོ་ཚོགས་ཡོད།

དེ་ཡང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཇི་ལྟར་སྔོན་ནས་གསོལ་འདེབས་ཞུས་དོན་ལྟར་བཀའ་བཞེས་བཟང་པོ་སྨིན་སྩལ་ཐོབ་སྟེ།  ཕྱི་ཚེས་ ༢༣ ཉིན་གྱི་སྔ་དྲོ་ཆུ་ཚོད་ ༩།༣༠ ཐོག་ཚོགས་བཅར་བ་ཡོངས་ལ་༸རྒྱལ་བའི་གཟིམ་ཆུང་ཕོ་བྲང་དུ་མཇལ་ཁ་དང་བཀའ་སློབ་སྩལ་དོན།

ཁྱེད་རང་ཚོ་ཉིན་ཤས་ཚོགས་འདུ་ཚོགས་ཏེ་བློ་ཁེངས་པ་དང་བློ་ཚིམ་པོ་བྱུང་སོང་ངམ། གང་འདྲ་བྱུང་སོང་། ང་ཚོ་རང་དབང་ལུང་པར་ཡོད། ང་རང་ཚོས་འཐབ་རྩོད་བྱེད་རྒྱུ་དེ་རང་བཙན་རང་སྐྱོང་གང་ཡིན་ནའང་།  གང་ལྟར་རང་སྐྱོང་གི་སྐད་ཆ་འཆད་དུས་ང་ཚོས་རང་དབང་གི་འཐབ་རྩོད་བྱེད་བཞིན་ཡོད།   དེར་བརྟེན་ང་ཚོར་དམིགས་ཡུལ་ངེས་ཅན་ཞིག་ཡོད་པ་དང་། དམིགས་ཡུལ་དེ་བསྒྲུབ་རྒྱུའི་ཐབས་ཤེས། འགན་ཁུར་གང་དགའ་ཇི་ལེགས་ཞེས་དེ་འདྲའི་ཐོག་ཚོགས་ཏེ་གོ་བསྡུར་བྱེད་ཀྱི་ཡོད་རེད།

དེ་མིན་མཛད་སྒོ་འདྲ་ཚོགས།  སྐད་ཆ་འདྲ་ཆགས་པོ་འདྲ་བཤད། ཡིག་ཆའི་ནང་གཅིག་ཚོགས་པ་ཡིན་ཟེར་རྒྱུ་ལྟ་བུ་བཞག་པ་ཡིན་ན་དགོས་པ་མེད། དམིགས་ཡུལ་ཞིག་ཡོད་པ་དང་། དེ་བསྒྲུབ་རྒྱུར་གང་དགའ་ཇི་ལེགས་བྱེད་ཀྱི་ཡོད་སྟབས།

ད་རེས་ཚོགས་འདུ་ཚོགས་ཏེ་གོ་བསྡུར་བྱེད་རྒྱུ་དེ་དག་རྒྱུན་དུ་ང་ཚོའི་སེམས་ནང་སེམས་ཁུར་འཁྱེར་ཏེ་བོད་མི་ཚང་མ་ཡོང་ཐུབ་ཐབས་མེད། དེར་བརྟེན་ས་གནས་ས་ཁུལ་སོ་སོ་ནས་འཐུས་མི་ཡར་ཡོང་ནས་ཚོགས་པ་རེད།    མདོ་དོན་སྙིང་པོ་ནི། ང་ཚ་ཚང་མ་འཛམ་གླིང་འདིའི་སྟེང་གི་མི་དུང་ཕྱུར་བདུན་ཅུ་ཙམ་ཡོད་པའི་ནང་ནས་ཆ་ཤས་ཤིག་ཆགས་ཡོད།

འདིའི་ནང་ནས་ང་ཚོ་བོད་པ་ཆགས་ཀྱི་འདུག འཛམ་གླིང་གི་གནས་ཚུལ་མང་པོ་ཞིག་མཐོང་། མཐོས། དཔེར་ན། ཉིན་རེ་བཞིན་གསར་འགྱུར་སྦི་སྦི་སི་ཉན་གྱི་ཡོད། གསར་འགྱུར་བརྙན་འཕྲིན་དུས་དུས་སུ་ལྟ་ཡི་ཡོད། གློག་བརྙན་འཁྲབ་སྟོན་རིགས་ལྟད་མོ་གང་ཡང་མི་འདུག་ལ་མིག་གཟན་རོགས་མ་གཏོགས་དགོས་པ་ཁྱོན་ནས་མི་འདུག   ཁ་ཆག་སོང་སྣ་རལ་སོང་ཟེར་རྒྱུ་ཧ་ཅང་མང་པོ་རེད་འདུག འདི་སྒྲོ་བཏགས་པ་གཅིག་པུ་མ་རེད། འཛམ་གླིང་གང་སར་མི་གསོད་ཁྲག་སྦྱོར་དང་གཡོ་སྒྱུ་མགོ་སྐོར།  ཐུབ་ཚོད། འཛམ་གླིང་འདིའི་སྟེང་མི་ས་ཡ་མང་པོ་མུ་གེ་འཆི་རྒྱུའི་ཉེན་ཁ་ཡོད་པ་ཆགས་ཡོད།

ལུང་པ་ཁ་ཤས་ལ་ཆ་བཞག་ན་མཐུན་རྐྱེན་འཛོམས་དྲགས་ནས་ལྟོ་ཆས་དེ་ཚོའི་གྲས་མང་པོ་ཞིག་འཕྲོ་ལྷག་འགྲོ་བཞིན་པའི་བཟོ་འདྲ་བོ་དེ་འདྲ། གང་ལྟར་འཛམ་གླིང་འདིར་བྱམས་བརྩེའི་མ་འདང་པའི་ཐོག་ནས་དཀའ་ངལ་འཕྲད་བཞིན་འདུག འགོ་ཁྲིད་ནས་བཟུང་གཤམ་ཚོང་པ་ཡིན་ན་རེད། སྲིད་བྱུས་གཏན་འབེབས་བྱེད་མཁན་ཚོ་ཡིན་ནའང་རེད། ཁྱིམ་ཚང་ཞིག་གི་ནང་དུ་ཡིན་ནའང་གང་ལྟར་བཀྲ་མ་ཤིས་པ་ཡོང་བཞིན་པ་དེ་དག་ཚང་མ་ཐུག་ས་བྱམས་བརྩེ་དང་འབྲེལ་བའི་ལྷག་བསམ་གྱི་མ་འདང་བ་ཡིན་པ་ཧ་ཅང་གསལ་པོ་རེད། 

ད་ང་ཚོས་བྱམས་བརྩེ་སྤེལ་དགོས་ཀྱི་འདུག མིའི་རང་གཤིས་འདི་བྱམས་བརྩེའི་རང་བཞིན་ཅན་རེད་འདུག ཅེས་ཚན་རིག་པས་ཤོད་བཞིན་འདུག་ ང་ཚོ་ཚང་མས་ཤེས་གསལ་རེད། ད་གིན་ BBC ནང་ཤོད་བཞིན་འདུག་ Romania ནས་ཕྲུ་གུ་ཞིག་ལ་དཀའ་ངལ་འཕྲད་ནས་ཚུར་བདག་པོ་རྒྱག་པའི་ཐོག་མཐུན་རྐྱེན་ཚང་མ་ཡོད་པ། བྱམས་བརྩའི་ལྟ་རྟོག་ཡོད་པ། འོན་ཀྱང་ཆུང་ཆུང་སྐབས་སུ་བྱམས་བརྩེས་མ་འདང་པའི་རྐྱེན་གྱིས་དེ་ཚོ་ལོ་ཡར་སླེབས་པའི་སྐབས་སུ་སེམས་གཏིང་ལ་དངངས་སྐྲག་དང་། མ་སྐྱིད་པ་ཞིག་ཡོང་བཞིན་འདུག  ཅེས་ད་གིན་ངོས་ཀྱིས་ BBC ནང་གོ་སོང་།

མིའི་ལྷན་སྐྱེས་རང་བཞིན་བྱམས་བརྩེ་ལྡན་པ་ཡིན་དུས་ཇི་ཙམ་གྱིས་བྱམས་བརྩེའི་ཚོར་བ་ཡོད་པ་ཡིན་ན་ཕྲུ་གུ་དེ་མིའི་རང་བཞིན་ལྟ་བུ་ཆ་ཚང་ལྡན་པ་ཞིག་ཡོང་ཐུབ་པ་དང། གཞི་རྩ་བྱམས་བརྩེའི་རང་བཞིན་ཅན་ཡིན་ནའང་ཁོ་ཡར་ཚར་ལོངས་བྱེད་རྒྱུར་བྱམས་བརྩེ་འདི་ཆུང་ཆུང་སྐབས་སུ་དགོས་ཀྱི་ཡོད་པ་མ་གཏོགས་དེ་ནས་ཡར་ལོངས་ཡོང་སྐབས་བྱམས་བརྩེ་ལས་ཤེས་ཡོན་གལ་ཆེ་བ་ཞིག་དང་། འཇོན་པོ་བྱུང་ན་འགྲིག་པ་ལྟ་བུར་བརྩི་བ་ཡིན་ན།   འཇོན་པོ་ཡོང་བར་ཆགས་སྡང་ཤུགས་ཆེན་པོ་དགོས།  ཆགས་སྡང་ཤུགས་ཆེན་པོ་ཡོད་ན་འཇོན་པོ་བྱེད་ཐུབ་ཀྱི་འདུག

རང་ཕྱོགས་དང་གཞན་ཕྱོགས་ཅེས་ལབ་ནས་རང་རྒྱལ་བ་བྱེད་ཀྱི་ཡིན། ཁོ་ཕམ་པ་བྱེད་ཀྱི་ཡིན་ཞེས་དེ་ལྟར་བྱས་ནས་ཕྱིན་པ་ཡིན་ན་ནུས་པ་ཆེ་བ་ཡོད་པའི་བཟོ་འདྲ་ཡོད།   དེར་བརྟེན་ཆགས་སྡང་ཡོད་ན་མི་འཇོན་པོར་བརྩི་བ་དང་།  བྱམས་བརྩེ་ཡོད་མཁན་མི་དེ་བྱབ་ཆུང་ཞིག་ལ་བརྩི་ནས་གང་ལྟར་འཛམ་བུ་གླིང་གི་དཀའ་ངལ་མང་པོ་ཞིག་མིས་བཟོས་པའི་དཀའ་ངལ་རེད། མིས་བཟོས་པའི་དཀའ་ངལ་ཐབས་སྡུག་འདི་བསམ་བློའི་ནང་ལ་བྱམས་བརྩེས་མ་འདང་བ་བྱས་ནས་ང་དང་ཁྱོད། ང་ཚོ་དང་ཁོ་པ་ཚོ། ཞེས་པའི་སྐད་ཆའི་ཐོག་ནས་མིས་བཟོས་པའི་དཀའ་ངལ་མང་པོ་གཅིག་ད་ལྟ་སེལ་མ་ཐུབ་པར་ལུས་འདུག

དེ་འདྲའི་ཐོག་ནས་བསམ་བློ་གཏོང་སྐབས་ང་ཚོ་བོད་པ་དངོས་གནས་འཕགས་པ་སྤྱན་རས་གཟིགས་ཀྱི་ཞིང་ཁམས། ཞེས་ཟེར་གྱི་ཡོད་རེད། གང་ལྟར་དཔལ་ན་ལནྡྲེའི་ཆོས་བརྒྱུད་ཀྱི་ལྟ་གྲུབ་ཟབ་མོ་ཞིག་དང་འབྲེལ་བའི་བྱམས་བརྩེའི་སློབ་སྟོན་ཡོད་པའི་སངས་རྒྱས་ཀྱི་ཆོས་འདི་ང་ཚོ་བོད་ཕྱི་འཚུད་ནང་འཚུད་ལྟ་བུ་བྱས་ནས།  ནང་ཆོས་ཀྱི་ལྟ་གྲུབ་མ་ཤེས་ཀྱང་སེམས་པ་བཟང་པོ་བྱེད་དགོས་རེད། ཅེས་ང་ཚོ་ཆུང་ཆུང་སྐབས་སུ་ནས་གོམས་གཤིས་ཡོད་པ་ཞིག་རེད། འབུ་མ་གསོད། སེམས་ཅན་མ་གསོད་ཅེས་སྲོག་ཆགས་ཙག་ཙིག་རིགས་སྲོག་གཅད་ན་ཡག་པོ་ཡོད་མ་རེད། ཅེས་ཤོད་བཞིན་ཡོད།

དེ་སྔ་བོད་ལ་གནམ་གཤིས་གྲང་མོ་ཡོད་པ་དང་། ཚལ་དང་ཤིང་ཏོག་རིགས་མེད་པའི་ས་ཆ། ལྷག་པར་དངོས་གནས་རྩམ་པ་ཡང་དཀོན་པོ་དང་། བྱང་འབྲོག་ས་ཁུལ་དུ་སེམས་ཅན་གྱི་མར་དང་ཕྱུར་བ། ཤ་བཅས་ལ་བརྟེན་དགོས་པ་དངོས་གནས་རེད། ང་ཚོ་རྒྱ་གར་ལ་སླེབས་ནས་ཤིང་ཏོག་དང་སྔོ་ཚལ་རིགས་ཧ་ཅང་མང་པོ་ཡོད་རེད། རྒྱ་གར་ནང་སྔོ་ཚལ་ཧ་ཅང་གིས་སྤུས་དག་པོ་འདུག   རྒྱ་མའི་སྔོ་ཚལ་ལས་རྒྱ་གར་གྱི་སྔོ་ཚལ་བྲོ་བ་ཆེ་བ་འདུག་ རྒྱ་མིའི་སྔོ་ཚལ་གྱིས་ཤ་རྫུན་མ་དེ་འདྲ་བཟོས་ནས་ཞིམ་པོ་གང་ཡང་མི་འདུག དེ་འདྲ་ཡིན་དུས་ཤིང་ཏོག་དང་སྔོ་ཚལ་རིགས་མཐུན་རྐྱེན་འཛོམས་པོ་ཡོད་ནའང་ད་དུང་ང་ཚོ་ཤ་གཙོ་བོ་བྱས་ནས་བྱང་འབྲོག་ས་ལ་ཡོད་པའི་བཟོ་འདྲ་བྱེད་ཀྱི་འདུག

གང་ལྟར་འཛམ་གླིང་འདིའི་སྒང་ལ་དཀའ་ངལ་མང་པོ་ཞིག་མཐོང་སྐབས་བྱམས་བརྩེ།  ཞེས་ཆུང་དུས་ནས་གཞན་ལ་ཕན་པ་བྱེད་དགོས་རེད། གནོད་པ་བྱེད་རྒྱུ་མེད། ཅེས་བསླབས་པ་དེ་དངོས་གནས་དྲང་གནས་འཛམ་གླིང་འདིའི་སྒང་ལ་དགོས་མཁོ་ཡོད་པ་ཞིག་རེད་འདུག  བོད་པའི་རིག་གཞུང་དང་གོམས་གཤིས་སྐད་ཆ་མ་རེད། འཛམ་གླིང་འདིའི་སྒང་ལ་དགོས་མཁོ་ཡོད་པ་གཅིག་ལ་ངོས་ཀྱིས་མཐོང་བཞིན་འདུག  དེ་འདྲ་ཡིན་དུས་ངོས་ལ་ཆ་བཞག་ན། བཙན་བྱོལ་ལ་སླེབས་ནས་ཕལ་ཆེར་ལོ་ ༥༨ འགྲོ་བཞིན་ཡོད། འཛམ་གླིང་ས་ཕྱོགས་མང་པོར་སླེབས་ཀྱི་ཡོད་རེད། མི་འདྲ་མིན་ཐུག་ཀྱི་ཡོད།   དེ་བཞིན་ཚན་རིག་པ་ཚོ་དང་ཐུག་ཡོང་སྐབས་ངོས་རང་ཚན་རིག་གི་འཛིན་གྲྭར་འགྲོ་མ་མྱོང་། དེང་དུས་ཤེས་ཡོན་སྦྱང་མ་མྱོང་། ཨིན་སྐད་ཆག་ཀྱོག་ཞིག་ཆུང་དུས་ནས་དོ་སྣང་བྱས་ཤེས་ཀྱི་ཡོད། དེ་ཡང་ཐེབས་ཆག་ཅིག་མ་གཏོགས་གང་ཡང་མི་ཤེས། མི་སྙན་གྲགས་ཅན་དེ་འདྲ་ཐུག་ནས་ཁོང་ཚོ་དང་ལྷན་སྐད་ཆ་བཤད་སྐབས་ངོས་རང་སྐྱོ་བོ་རང་མི་འདུག

ཚན་རིག་པས་ཞིབ་འཇུག་བྱས་པ་བརྒྱུད་བུད་མེད་རིགས་ལ་བྱམས་བརྩེ་ཤུགས་ཆེ་བ་དང་། གཞན་གྱི་སྡུག་བསྔལ་ལ་མི་བཟོད་པའི་བློ་སྐྱེ་རྒྱུ་ཤུགས་ཆེ་བ་འདུག ཅེས་ཚན་རིག་པས་བཤད་ཀྱི་འདུག དེར་བརྟེན་ལོ་བཅོ་ལྔ་ཙམ་ནས་ངོས་ཀྱིས་འཛམ་གླིང་འདིའི་སྟེང་སྤྱི་ཡོངས་ཐོག་བཤད་པ་ཡིན་ན། ཤེས་ཡོན་གྱི་ཕུངས་མེད། བྱམས་བརྩེའི་ཕུང་ཡོད། བྱམས་བརྩེ་གོང་འཕེལ་གཏོང་བར་བུད་མེད་ཀྱི་རང་བཞིན་ལུས་ཀྱི་གྲུབ་ཆའི་སྟེང་ནས་བྱམས་བརྩེ་གོང་འཕེལ་གཏོང་རྒྱུའི་ནུས་པ་བུད་མེད་ལ་ཤུགས་ཆེ་བ་ཡོད། དེར་བརྟེན་བུད་མེད་ཚོ་ཤུགས་རྒྱག་ནས་བྱེད་དགོས་འདུག ཅེས་ངོས་ཀྱིས་བཤད་ཀྱི་ཡོད། འཛམ་གླིང་འདིའི་སྟེང་རྒྱལ་ཁབ་ཉི་བརྒྱ་ཙམ་ཡོད་རེད། རྒྱལ་ཁབ་དེ་དག་གི་འགོ་ཁྲིད་མང་ཆེ་བ་བུད་མེད་ཀྱིས་བྱས་པ་ཡིན་ན། གཅིག་བྱས་ན་དམག་འཁྲུག་རིགས་དེ་དག་ཕལ་ཆེར་ཉུང་དུ་འགྲོ་བའི་རེ་བ་ཡོད་རེད། མཁྱེན་སོང་ངམ། སྐྱེས་པས་རང་བཞིན་གྱི་ང་ལ་བློ་ཁོག་ཡོད་ཟེར་རྒྱུ་ལྟ་བུ། ང་ཕོ་ཁྱོ་ག་ཡིན། ཟེར་རྒྱུ་ལྟ་བུ་དེ་འདྲ་ཞིག་ཡོང་བཞིན་འདུག རྩ་བའི་དཔའ་མོ་དེ་འདྲ་ཡོང་གི་ཡོད་རེད། སྤྱི་ཡོངས་ཐོག་ནས་བཤད་པ་ཡིན་ན། བུད་མེད་རིགས་ནི་སེམས་པ་བཟང་བ་དང་། བྱམས་བརྩེ་ཤུགས་ཆེ་བ་ཡོད་པ་རང་བཞིན་གྱི་ཆགས་འདུག འདི་ཆོས་ཀྱི་སྐད་ཆ་གང་ཡང་མ་རེད། སྤྱི་ཡོངས་ཐོག་འགྲོ་བ་མིའི་རིམ་པ་ཐོག་ནས་བཤད་པ་ཡིན་ནའང་། བུད་མེད་ཚོ་ཧ་ཅང་གལ་ཆེན་པོ་ཆགས་ཀྱི་འདུག  ཅེས་སོགས་ཀྱི་བཀའ་སློབ་སྩལ།   ཐེངས་འདིར་གཟིམ་ཆུང་མཇལ་ཁའི་སྐབས་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་མཆོག་དང་ནང་སྲིད་བཀའ་བློན་མཆོག་ཀྱང་བཅར་འདུག་པ་བཅས།།