༢༠༡༧ ཟླ་ ༡ ཚེས་ ༢༣ རེས་གཟའ་ཟླ་བ།

༄༅། །ཕྱི་ལོ་ ༢༠༡༧ ཟླ་ ༡ ཚེས་ ༡༧ ཉིན་ཐེ་ལྦན་སྐུ་ཚབ་དོན་གཅོད་ཟླ་བ་ཚེ་རིང་ལགས་ལ་ཐེ་ཝན་གྱི་རྒྱལ་ས་ཐེ་པེ་ནང་རྟེན་གཞི་བྱས་པའི་རོ་ཊ་རི་ཚོགས་པ་ Rotary Club  ཞེས་པའི་ཚོགས་པས་མགྲོན་འབོད་ལྟར་ཚོགས་པའི་ཚོགས་ཁང་ཞིག་ཏུ་ཚོགས་མི་རྣམས་ལ་བོད་ཀྱི་ལོ་རྒྱུས་དང་རིག་གཞུང་སྐོར་ངོ་སྤྲོད་གནང་འདུག

དེ་ཡང་ཚོགས་པ་དེས་ཨིམ་པི་རལ་གསོལ་མགྲོན་ཁང་ Imperial Hotel དུ་གུང་ཚིགས་གོ་སྒྲིག་དང་བསྟུན་སྐུ་ཚབ་དོན་གཅོད་ཟླ་བ་ཚེ་རིང་ལགས་ཀྱིས་བོད་རྒྱ་གཉིས་དབར་ལོ་རྒྱུས་ཐོག་འབྲེལ་བ་ཇི་བྱུང་དང་།  ད་ལྟ་བཙན་བྱོལ་བོད་མི་རྣམས་ཀྱིས་བོད་དོན་བདེན་མཐའ་གསལ་ཆེད་འབད་བརྩོན་ཇི་ལྟར་གནང་བཞིན་པའི་སྐོར་ཆུ་ཚོད་ཕྱེད་ཀའི་རིང་གསུང་བཤད་གནང་ཡོད་འདུག

སྐབས་དེར་སྐུ་ཚབ་དོན་གཅོད་ཀྱིས་རང་ཉིད་སྒེར་གྱི་ཉམས་མྱོང་དང་འབྲེལ་ནས་གཞིས་བྱེས་གཉིས་སུ་གནས་པའི་བོད་མི་རྣམས་ལ་དཀའ་ངལ་གང་འདྲ་འཕྲད་བཞིན་ཡོད་སྐོར་དང་།  དེ་རྗེས་ཆུ་ཚོད་གཅིག་དང་ཕྱེད་ཀའི་རིང་གི་དྲི་བ་དྲིས་ལན་གནང་སྐབས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་བོད་བརྒྱུད་ནང་བསྟན་གྱི་གནས་སྟངས་སྐོར་གྱི་དྲི་བ་རྣམས་ལ་ལན་འདེབས་ཁ་གསལ་གནང་འདུག    དེ་རྗེས་ཚོགས་པའི་འགན་འཛིན་ལྕམ་པི་ཆི་ལིའུ་ P. Clio ལགས་ཀྱིས་སྐུ་ཚབ་དོན་གཅོད་ལ་ཐུགས་རྗེ་ཆེ་ཞུས་ཡོད།     སྐབས་དེར་ལས་རིམ་གཞན་ཁག་གཅིག་ནི་ཚོགས་པས་སྤྱི་ཚོགས་ཞབས་ཞུའི་ལས་དོན་སྤེལ་ཕྱོགས་སྐོར་ངོ་སྤྲོད་གནང་འདུག་པ་བཅས།།