༢༠༡༧ ཟླ་ ༡ ཚེས་ ༡༦ རེས་གཟའ་ཟླ་བ།
༄༅། །འདི་གའི་ཆེད་གཉེར་གསར་འགོད་པ་བསོད་ནམས་མཚོ་མོ་ལགས་ཀྱིས་ས་གནས་ནས་བཏང་གནས་ནང་འཁོད་དོན། ཕྱི་ལོ་ ༢༠༡༧ ཟླ་ ༡ ཚེས་ ༡༤ ཉིན་བཅོམ་ལྡན་འདས་དཔལ་དུས་ཀྱི་འཁོར་ལོའི་དབང་ཆེན་ཐེངས་སོ་བཞི་པ་ལེགས་པར་གྲུབ་པའི་བཀའ་དྲིན་གཏང་རག་གི་དགའ་སྟོན་མཚོན་ཆེད། བོད་མིའི་སྒྲིག་འཛུགས་དང་། རྒྱལ་སྤྱིའི་བོད་རིགས་ཚོང་པའི་ལྷན་ཚོགས། བལ་ཡུལ་ཧི་མཱ་ལཱ་ཡའི་རི་རྒྱུད་ཚོགས་སྐྱིད་བཅས་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་སྒྲོལ་དཀར་ཡིད་བཞིན་འཁོར་ལོའི་སྒོ་ནས་བརྟན་བཞུགས་བསྟར་འབུལ་ཞུས་ཡོད། བརྟན་བཞུགས་བསྟར་འབུལ་དབུ་འཛུགས་ཀྱི་ཐོག་མར་མགོན་པོ་གང་ཉིད་མཆོག་ནས་དགུང་གྲངས་བརྒྱ་ལྷག་སྐུ་འཚོ་བཞུགས་མཛད་རྒྱུའི་བཀའ་བཞེས་བཟང་པོ་སྩལ་བ་དང་སྦྲགས་བཀའ་སློབ་འདི་ལྟར་ཕེབས་དོན།
ནམ་རྒྱུན་བརྟན་བཞུགས་ཀྱི་གསོལ་འདེབས་གནང་ནས་གསོལ་འདེབས་གྲུབ་མཚམས་སུ་བླ་མས་ཞལ་བཞེས་ཁས་ལེན་གནང་བའི་ལུགས་སྲོལ་ཞིག་ཡོད། དེ་རིང་འདིར་སྐད་ཆ་བཤད་པའི་ཞོར་ཡིན་སྟབས། ངོས་ཀྱིས་ནམ་རྒྱུན་འདི་ལྟར་བརྗོད་བཞིན་ཡོད་ལ། དངོས་གནས་ངོས་རང་འདི་ལྟར་དྲན་གྱི་འདུག
ཇི་སྲིད་ནམ་མཁའ་གནས་པ་དང༌། ། འགྲོ་བ་དེ་སྲིད་གནས་གྱུར་པ། ། དེ་སྲིད་བདག་ནི་གནས་གྱུར་ནས། ། འགྲོ་བའི་སྡུག་བསྔལ་སེལ་བར་ཤོག ། ཅེས་ངོས་ཀྱིས་ནམ་རྒྱུན་སྨོན་ལམ་རྒྱག་བཞིན་ཡོད། དེ་ལྟར་སྨོན་ལམ་རྒྱག་བཞིན་པར་བརྟེན། ད་ལྟ་ཚེ་འདིར་རྐྱེན་སྣ་ཚོགས་ཀྱིས་ཐོག་ནས་ངོས་ཀྱིས་བརྗོད་ཆོག་ན། ཨ་མདོའི་ས་ཆ་ལུང་ཁུག་ཅིག་ནས་ཨ་མདོའི་ཕྲུ་གུ་ལྷ་མོ་དོན་གྲུབ། ངོས་ཀྱིས་ལྷ་མོ་དོན་གྲུབ་འཚུབ་འཐེར་ཞེས་བརྗོད་ཀྱི་ཡོད། དེ་ལྟ་བུའི་ཨ་མདོའི་ཕྲུ་གུ་འཚུབ་འཐེར་བ་དེ་ཉིད་ད་ཆ་ལོ་ན་ ༨༡ ནས་ ༨༢ ཀྱི་ཐོག་ཏུ་འགྲོ་བཞིན་ཡོད། གང་ལྟར་མཐོང་ཆོས་སུ་མི་ལ་ཕྲན་བུ་ཕན་ཐོགས་ཡོད་པ་ལྟ་བུ་འདུག
བོད་གངས་ཅན་གྱི་ལྗོངས་ལ་ཁྱེད་རང་ཚོ་དད་པ་དང་དམ་ཚིག་གཡོ་བ་མེད་པར་བསྡད་ཡོད། ངོས་ཀྱི་ངོས་ནས་ཚེ་རབས་ནས་ལས་དང་སྨོན་ལམ་གྱིས་འབྲེལ་བ་ཡོད་སྟབས་སྨོན་ལམ་བརྒྱབ་ཀྱི་ཡིན། དེ་ལྟར་ཁ་ཡོད་ལག་ཡོད་ཀྱི་ཐོག་ནས་ཕན་ཐོགས་ཡོད་པར་བརྟེན། ཕན་ཐོགས་ཡོད་ས་དེར་ཚེ་ཇི་ཙམ་རིང་བ་གནས་པ་དེ་ཙམ་གྱིས་ཕན་ཐོགས་ཡོང་གི་རེད། ཐམས་ཅད་མཁྱེན་པ་དགེ་འདུན་གྲུབ་པ་དགུང་ལོ་བརྒྱད་ཅུ་གྱ་གྲངས་ལྟ་བུ་དགུང་ལོ་བགྲེས་པོར་ཕེབས་སྐབས། ཁོང་ཉིད་མཁས་པ་ཧ་ཅང་ཆེན་པོ་ཡིན་པ་མ་ཟད། ཁོང་གི་སློབ་མ་ཡང་མཁས་པ་ཆེན་པོ་དེ་འདྲ་ཡོད། དེ་ལྟར་སློབ་མ་མཁས་པ་རྣམས་འཚོགས་ནས་ཡོད་སྐབས་ཤག་ལ་༸རྒྱལ་བ་དགེ་འདུན་གྲུབ་པས་ད་ནི་ལོ་རྒས་པ་སོགས་ཐུགས་འབྱོང་བའི་བཀའ་སློབ་གནང་སྐབས། སྲས་ཀྱི་ཐུ་བོ་མཁས་གྲུབ་གཉིས་ལྡན་གྱི་བླ་མ་སྐྱེས་བུ་དམ་པ་དེ་དག་གིས་རིན་པོ་ཆེ་སྔོན་གྱི་ཕྱི་ནང་གི་རྟགས་དང་མཚན་མ་སོགས་ཀྱི་ཐོག་ནས་དག་པའི་ཞིང་དུ་ཕེབས་རྒྱུར་ཐེ་ཚོམ་མེད་པ་རེད་ཅེས་ཞུས་པར།
རྗེ་དགེ་འདུན་གྲུབ་པས། ང་དག་ཞིང་དུ་སྐྱེས་ན་བསམས་པའི་བསམ་པ་མེད། གནས་གང་དུ་སེམས་ཅན་མགོན་མེད་སྐྱབས་མེད་ཉམ་ཐག་པ་གང་དུ་ཡོད་ས་ཞིག་ཏུ་སྐྱེས་ན་བསམས་པ་འདུག ཅེས་གསུངས་འདུག ༸རྒྱལ་བ་དགེ་འདུན་གྲུབ་པའི་རྣམ་ཐར་ནང་དུ་གསལ་བའི་ཚིག་འདི་མཐོང་ནས་ངོས་རང་ཧ་ཅང་སེམས་ཤུགས་སྐྱེས་བྱུང་།
དེར་བརྟེན་སྐྱེ་བ་ལེན་དགོས་སྟབས་སྐྱེ་བ་ལེན་པ་དེ་ཉིད་ཕན་ཐོགས་ཡོད་ས་ཞིག་ལ་སྐྱེས་ཤིང་། སྐྱེས་ནས་འཚོ་བ་དང་། འཚོ་ནས་རིང་དུ་གནས་པ་བྱུང་ན་ཁ་ཡོད་ལག་ཡོད་ཀྱིས་ཕན་གྱི་ཡོད། བསྟན་པའི་ཞབས་འདེགས་གང་ཙམ་སྒྲུབ་ཀྱི་ཡོད་ལ། མི་ལ་ཡང་ཕྲན་བུ་ཕན་གྱི་ཡོད། དེ་ཡང་བསྐལ་པ་ཁྲི་ཕྲག་ནས་ཁྲི་ཕྲག་ཅེས་པ་ནི་བརྟན་བཞུགས་འབུལ་མཁན་གྱི་བསམ་བློའི་ནང་མེད་ལ། བསྐལ་པ་ཁྲི་ཕྲག་ནས་ཁྲི་ཕྲག་ཅེས་པ་ནི་འཛམ་གླིང་སྟོང་ནས་ངོས་རང་གཅིག་པུ་བསྡད་ན་དགོས་པ་ཡང་མེད། བསྐལ་པ་ཁྲི་ཕྲག་ནས་ཁྲི་ཕྲག་ཅེས་པ་ཡོང་ཐབས་མེད།
གང་ལྟར་ངོས་རང་ལོ་བརྒྱ་སྐོར་ཞིག་ཕལ་ཆེར་སྡོད་ཐུབ་པ་ཞིག་སྔོན་མ་ངོས་ཀྱི་རྨི་ལམ་དང་ཕྱིས་སུ་ལུང་བསྟན་ཁ་ཤས་མཐོང་བྱུང་། དེ་དག་ལ་བལྟས་ན་ཚེ་ཚད་ལོ་ ༡༡༣ འདུག དེ་ཙམ་འཚོ་ཐུབ་མིན་བཤད་ཐུབ་མ་སོང་། འོན་ཀྱང་ལོ་བརྒྱ་སྐོར་སྡོད་རྒྱུ་ཕལ་ཆེར་ཐག་ཆོད་ཀྱི་རེད། དེར་བརྟེན་ཁྱེད་རང་ཚོ་བློ་བདེ་པོ་བྱོས། ཞེས་བཀའ་སློབ་སྩལ་ཡོད། །
