༢༠༡༦ ཟླ་ ༡༢ ཚེས་ ༡ རེས་གཟའ་ཕུར་བུ།
༄༅། །སྦར་སེལ་སྐུ་ཚབ་དོན་གཅོད་བཀྲ་ཤིས་ཕུན་ཚོགས་ལགས་ཀྱིས་ཡུ་རོབ་མཐུན་ཚོགས་ཀྱི་རིག་གཞུང་དང་ཤེས་ཡོན་འགན་འཛིན་ལྕམ་སྐུ་མར་ཊིན་རེ་ཆ་ཌི་ Ms Martine Reicharts མཆོག་དང་། ཡུ་རོབ་མཐུན་ཚོགས་ཀྱི་དཔལ་འབྱོར་དང་སྤྱི་ཚོགས་ཡར་རྒྱས་ཚན་པའི་ཚོགས་གཙོ་ཟུར་པ་སྐུ་ཞབས་ཧེན་རི་མ་ལོ་སེ་ Mr Henri Malosse མཆོག་དང་མཇལ་འཕྲད་གནང་འདུག དེ་ཡང་མཇལ་འཕྲད་ཆུ་ཚོད་གཅིག་ལྷག་ཙམ་རིང་སྐུ་ཚབ་དོན་གཅོད་ནས་འགན་འཛིན་མཆོག་ལ་བོད་མིའི་སྒྲིག་འཛུགས་བཀའ་ཤག་སྐབས་ ༡༥ པའི་ཤེས་ཡོན་ཐོག་འཛིན་བཞིན་པའི་སྲིད་བྱུས་ལངས་ཕྱོགས་ངོ་སྤྲོད་ཞུས་པ་དང་སྦྲགས། ད་ལྟའི་བཀའ་ཤག་གིས་ཤེས་ཡོན་གལ་ཆེ་ཤོས་སུ་ངོས་འཛིན་གནང་ནས་བོད་ཕྲུག་ན་གཞོན་ ཚོའི་ཤེས་ཡོན་གོང་མཐོར་གཏོང་ཐབས་སླད་སློབ་ཡོན་གྲངས་ཚད་སྤར་བ་མ་ཟད། སློབ་ཡོན་ཡང་སྔར་ལས་མང་དུ་བཏང་བ་དང་། ལྷག་པར་རིག་གཅིག་རྐང་འཛིན་དང་ཁྱད་ལས་མི་སྣ་གང་མང་གསོ་སྐྱོང་ཡོང་སླད་ཐབས་ཤེས་འདྲ་མིན་ཐོག་འབད་བརྩོན་གནང་མུས་ཡིན་སྐོར་གསལ་བཤད་ཞུས་འདུག
སྐབས་དེར་འགན་འཛིན་མཆོག་ནས་ཁོ་མོ་རང་ཉིད་བོད་ཀྱི་གནད་དོན་ལ་དོ་སྣང་གནང་མཁན་ཞིག་ཡིན་ཞིང་། ༸གོང་ས་༸སྐྱབས་མགོན་ཆེན་པོ་མཆོག་ལ་གུས་བཀུར་རྒྱ་ཆེ་ཞུ་མཁན་ཞིག་ཡིན་སྐོར་གསུངས་པ་དང་སྦྲགས། ཡུ་རོབ་མཐུན་ཚོགས་ངོས་ནས་ཤེས་ཡོན་གནས་ཚད་མཐོ་རུ་གཏོང་ཐབས་ཆེད་རྒྱ་གར་རྒྱལ་ས་ལྡི་ལིར་རྟེན་གཞི་བྱས་པའི་ཇེ་ཨེན་ཡུ་ JNU དང་ལྷོ་ཕྱོགས་ཀེ་ར་ལ་མངའ་སྡེའི་གྲོང་ཁྱེར་ཀོལ་ལམ་ Kollam སོགས་ནང་རོགས་རམ་གྱི་ལས་འགུལ་སྤེལ་བཞིན་ཡོད་སྟབས། བོད་མི་ཚོས་ཀྱང་ཤེས་ཡོན་བསྟི་གནས་ཁང་དེ་དག་ནང་མཉམ་ཞུགས་གནང་ཐབས་ཆེ་གལ་སྐོར་གསུངས།
དེ་རྗེས་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་གི་ཚ་མོ་ཉི་མ་ལྷ་མོ་ལགས་ཀྱང་མཉམ་ཞུགས་གནང་སྟེ་ཚོགས་གཙོ་དང་འགན་འཛིན་རྣམ་གཉིས་ལ་ཁོ་མོའི་ལོ་རྒྱུས་ཞིབ་ཕྲ་གསལ་བཤད་ཞུ་སྐབས། འགན་འཛིན་ཁོང་རྣམ་པས་སྐབས་དེར་ཉི་མ་ལྷ་མོ་ལགས་ཀྱི་ནང་མི་དང་ཕྲུ་གུའི་གནས་སྟངས། མ་འོངས་མི་ཚེའི་མདུན་ལམ་སོགས་ཀྱི་སྐོར་འདྲི་རྩད་གནང་བ་མ་ཟད། འགན་འཛིན་ལྕམ་སྐུ་མར་ཊིན་རེ་ཆ་ཌི་མཆོག་གིས་ཉི་མ་ལྷ་མོ་ལགས་ལ་གདུང་སེམས་མཉམ་སྐྱེའི་རྒྱབ་སྐྱོར་གྱིས་སྙིང་སྟོབས་ནམ་ཡང་ཞུམ་རྒྱུ་མེད་པའི་ལམ་སྟོན་བསླབ་བྱ་གནང་འདུག
སྤྱིར་དེ་ཉིན་དང་ཐོག་ཉི་མ་ལྷ་མོ་ལགས་དང་ཕྱི་དྲིལ་ལས་ཁུངས་ཀྱི་འགྲོ་བ་མིའི་ཐོབ་ཐང་ཚན་པའི་ལས་བྱེད་བསྟན་འཛིན་བསོད་ནམས་ལགས། སྦར་སེལ་དོན་ཁང་གི་བོད་དོན་རྒྱབ་སྐྱོར་ཞུ་གཏུག་ཚན་པའི་ལས་བྱེད་རིག་འཛིན་ཆོས་སྒྲོན་ལགས་བཅས་ཀྱིས་ཡུ་རོབ་མཐུན་ཚོགས་ཀྱི་ལོ་འཁོར་འགྲོ་བ་མིའི་ཐོབ་ཐང་སྲུང་སྐྱོབ་ཚོགས་ཆེན་ཐོག་མཉམ་ཞུགས་གནང་སྟེ་ཡུ་རོབ་མཐུན་ཚོགས་ཀྱི་འགྲོ་བ་མིའི་ཐོབ་ཐང་སྲུང་སྐྱོབ་ཚན་པའི་འབྲེལ་ཡོད་ལས་བྱེད་རྣམས་དང་། གཞུང་འབྲེལ་མིན་པའི་འགྲོ་བ་མིའི་ཐོབ་ཐང་སྲུང་སྐྱོབ་ཚོགས་པ། དེ་བཞིན་ཡུ་རོབ་མཐུན་ཚོགས་ཀྱི་ལས་ཁུངས་ཁག་གི་འབྲེལ་ཡོད་ལས་བྱེད་རྣམས་དང་ཐུག་འཕྲད་གནང་འདུག
གཞན་ཡང་གོང་བརྗོད་རང་རིགས་བུད་མེད་གསུམ་གྱིས་རྒྱལ་སྤྱིའི་བོད་དོན་ལས་འགུལ་ཁང་གི་ཡན་ལག་ལས་ཁུངས་སུ། གཞུང་འབྲེལ་མིན་པའི་ཐོབ་ཐང་སྲུང་སྐྱོབ་ཚན་པ་ Protection International དང་ UNPO སོགས་ཀྱི་སྐུ་ཚབ་དང་ཐུག་འཕྲད་ཀྱིས་ཉི་མ་ལྷ་མོ་ལགས་ཀྱི་གསལ་བཤད་ལ་ཁོང་རྣམ་པས་ཞིབ་ཕྲ་གསན་འཇོག་གནང་བ་མ་ཟད། གདུང་སེམས་མཉམ་སྐྱེ་ཤུགས་ཆེ་གནང་འདུག ཐེངས་འདིར་ཡུ་རོབ་མཐུན་ཚོགས་ནང་བོད་དོན་ཞུ་གཏུག་གི་ལས་འགུལ་གོ་སྒྲིག་གནང་མཁན་སྦར་སེལ་སྐུ་ཚབ་དོན་ཁང་དང་། ཡུ་རོབ་ཏུ་རྟེན་གཞི་བྱས་པའི་རྒྱལ་སྤྱིའི་བོད་དོན་ལས་འགུལ་ཁང་གི་ཡན་ལག་ལས་ཁུངས་གཉིས་ཡིན་འདུག།
