༢༠༡༦ ཟླ་ ༡༢ ཚེས་ ༥ རེས་གཟའ་ཟླ་བ།
༄༅། །ཨ་རིའི་སྐུ་ཚབ་དོན་ཁང་ནས་བཏང་གནས་ནང་འཁོད་དོན། ཕྱི་ལོ་ ༢༠༡༦ ཟླ་ ༡༢ ཚེས་ ༢ ཉིན་ཨ་རི་སྐུ་ཚབ་དོན་གཅོད་སྤེན་པ་ཚེ་རིང་མཆོག་དང་། རྒྱ་རིགས་འབྲེལ་མཐུད་པ་དྲུང་འཕར་ཀུན་དགའ་བཀྲ་ཤིས་ལགས་གཉིས་ནས་ཨ་རིའི་རྒྱལ་ས་ཝ་ཤིང་ཀྲོན་ཏུ་རྟེན་གཞི་བྱས་པའི་སྤྱི་མང་སྟོབས་ཤུགས་ཚོགས་པའི་ཚོགས་གཙོ་རྒྱ་རིགས་ཡང་ཅན་ལི་ Dr. Yang Jianli སོགས་ཚོགས་པ་དེའི་ཚོགས་མི་ཁག་ཅིག་དང་མཇལ་འཕྲད་གནང་སྟེ་བོད་དོན་སྐོར་འགྲེལ་བརྗོད་གནང་ཡོད།
དེ་ཡང་རྒྱ་རིགས་དེ་དག་ཁོངས་སུ་ཕྱི་རྒྱལ་བོད་དོན་རྒྱབ་སྐྱོར་བ་དང་། རྒྱ་རིགས་ནང་པ། སློབ་ཕྲུག ཁྲིམས་རྩོད་པ། གསར་འགོད་པ་བཅས་ཡོད་འདུག་ཅིང་། ཁ་ཤས་རྒྱ་ནག་ནས་ཨ་རིར་སླེབས་ཏེ་ཟླ་བ་ཁ་ཤས་ལས་མ་སོང་བ་དེ་འདྲང་འདུག སྐབས་དེར་སྐུ་ཚབ་དོན་གཅོད་མཆོག་ནས་ཁོང་རྣམ་པར་རྒྱ་ནག་གཞུང་གིས་བོད་ནང་ཡོད་པའི་སེར་རྟ་ལྔ་རིག་ནང་བསྟན་སློབ་གླིང་གི་གྲྭ་བཙུན་རྣམས་ལ་དཀའ་ངལ་ཆེན་པོ་འཕྲད་བཞིན་པའི་གནས་སྟངས་ལས་འཕྲོས་ཏེ་བོད་ནང་གི་བོད་མི་ཚོའི་དངོས་ཡོད་གནས་སྟངས་དང་། དོན་ཁང་གིས་ཨ་རི་སྲིད་གཞུང་དང་། གྲོས་ཚོགས་ལ་འབྲེལ་བ་བྱེད་སྟངས་ཀྱིས་མཚོན་པའི་སྐུ་ཚབ་དོན་གཅོད་ཁང་གི་ལས་དོན་གནང་ཕྱོགས། བྱང་ཨ་རིའི་བོད་མིའི་སྤྱི་ཚོགས་ཀྱི་གནས་སྟངས་བཅས་ངོ་སྤྲོད་དང་། ཁོང་ཚོའི་དྲི་བར་ལན་འདེབས་གནང་ཡོད།
དེ་རྗེས་སྤྱི་མང་སྟོབས་ཤུགས་ཚོགས་པའི་ Initiative for China ཚོགས་གཙོ་ཡང་ཅན་ལི་དང་མཉམ་དུ་མ་འོངས་པར་ཐུན་མོང་ཐོག་རྒྱ་རིགས་ཀྱི་སྤྱི་ཚོགས་ནང་བོད་ཀྱི་རིག་གཞུང་འཁྲབ་སྟོན་བྱེད་ཕྱོགས་སྐོར་བཀའ་བསྡུར་ཡང་གནང་ཡོད། ཡང་ཅན་ལིས་སྤྱི་མང་སྟོབས་ཤུགས་ཚོགས་པའི་ངོས་ནས་དུས་རྟག་ཏུ་བོད་དོན་ཐོག་རྒྱབ་སྐྱོར་གནང་རྒྱུར་གྲ་སྒྲིག་ཨང་གསར་ཡིན་སྟབས་དགོས་མཁོ་ནམ་བྱུང་ཚེ་འཛེམས་ཟོན་མེད་པར་ལམ་སེང་འབྲེལ་བ་གནང་རོགས་ཞེས་གསུངས།
སྐུ་ཞབས་ཡང་ཅན་ལི་ནི་བོད་དོན་ལ་ཁ་ཞེ་གཉིས་མེད་ཀྱིས་རྒྱབ་སྐྱོར་གནང་མཁན་ཞིག་ཡིན་པ་དང་། བོད་དོན་དང་འབྲེལ་བའི་ཚོགས་འདུ་འདྲ་མིན་ལ་མཉམ་ཞུགས་གནང་མྱོང་ཡོད་པ་མ་ཟད། རྒྱ་སྐད་ཀྱི་རླུང་འཕྲིན་དང་། བརྙན་འཕྲིན་ནང་རྒྱུན་དུ་ནས་བོད་དོན་སྐོར་དཔྱད་པ་གནང་མཁན་རྒྱ་རིགས་ཤེས་ཡོན་ཅན་ཞིག་ཡིན་པ་རེད། ཕྱི་ཟླ་ ༡༢ ཚེས་ ༧ ཉིན་ཁོང་ཨ་རིའི་གྲོས་ཚོགས་ནང་ཉན་ཞིབ་ཏུ་ཕེབས་ཀྱི་ཡོད་པ་དང་། དེ་ཉིན་སྐུ་ཚབ་དོན་གཅོད་སྤེན་པ་ཚེ་རིང་མཆོག་ཀྱང་གྲོས་ཚོགས་སུ་ཉན་ཞིབ་ཏུ་ཕེབས་ནས་ཁག་སོ་སོས་རྒྱ་ནག་དང་། བོད་སྐོར་གླེང་སློང་གནང་རྒྱུ་ཡིན་པ་བཅས།།
