༢༠༡༦ ཟླ་ ༡༢ ཚེས་ ༡༥ རེས་གཟའ་ཕུར་བུ།
༄༅། །བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་ཕྱི་ལོ་ ༢༠༡༦ ཟླ་ ༡༢ ཚེས་ ༡༣ ཉིན་གྱི་ཕྱེད་ཡོལ་གནས་མཆོག་རྡོ་རྗེ་གདན་དུ་དཔལ་དུས་ཀྱི་འཁོར་ལོའི་དབང་ཆེན་ ཐེངས་ ༣༤ གོ་སྒྲིག་དང་འབྲེལ་བའི་ལས་དོན་ཆེད་ཕྱོགས་ཕེབས་ལྟར། དེ་ཉིན་ཁུལ་དེར་དུས་དབང་གོ་སྒྲིག་དང་འབྲེལ་བའི་ལས་གཞི་སྣ་མང་ཐོག་གཟིགས་ཞིབ་ གནང་བ་མ་ཟད།
གྷ་ ཡ་རྫོང་དཔོན་དང་ཉེན་རྟོག་འགོ་གཙོ་སོགས་དང་མཇལ་འཕྲད་གནང་ནས་ས་གནས་རྫོང་ལས་ ཁུངས་ལ་དུས་དབང་གོ་སྒྲིག་ཚོགས་ཆུང་གིས་རེ་འདུན་བཏོན་པ་རྣམས་མཇུག་སྐྱོང་དང་ འབྲེལ་བའི་གནད་དོན་སོགས་གོ་བསྡུར་ལྷུག་པོ་གནང་འདུག སྐབས་དེར་ས་གནས་དཔོན་རིགས་རྣམ་པས་གོ་སྒྲིག་ཚོགས་ཆུང་གིས་དེ་སྔ་༸རྒྱལ་བའི་སྐུ་ཕྱྭ་དང་། མང་ཚོགས་ཀྱི་ཆུ་དང་གློག དེ་བཞིན་སྤྱི་སྤྱོད་རླངས་འཁོར་སོགས་ཀྱི་གནས་སྟངས་ཐད་གོ་བསྡུར་གནང་འདུག
དེ་ ཡང་གོང་ཚེས་ཉིན་དཔལ་ལྡན་སྲིད་སྐྱོང་མཆོག་གྷ་ཡ་གནམ་ཐང་ཐོག་ཕེབས་འབྱོར་སྐབས་ དུས་དབང་གོ་སྒྲིག་ཚོགས་ཆུང་གི་ཚོགས་མི་རྣམས་དང་། མ་ཧཱ་བྷོ་དི་ཚོགས་པའི་དྲུང་ཆེ་རྒྱ་གར་གཞུང་གི་ལས་བྱེད་ཟུར་པ་སྐུ་ཞབས་རྣམ་ སྲས་རྡོ་རྗེ་ལགས་བཅས་ཀྱིས་ཕེབས་བསུའི་སྣེ་ལེན་གཟབ་རྒྱས་ཞུས་འདུག
དེ་ རྗེས་དཔལ་ལྡན་སྲིད་སྐྱོང་མཆོག་གིས་ཐོག་མར་༸རྒྱལ་བའི་ཕོ་བྲང་དུ་ཕེབས་ནས་ཕོ་བྲང་གི་ཕྱི་ནང་བཀོད་པ་རྣམས་ཚགས་ཚུད་ཡོད་མེད་ཞིབ་ཚགས་ཐོག་གཟིགས་ཞིབ་གནང་ རྗེས། ཆོས་ཞུ་བ་དེབ་འགོད་བྱེད་ཡུལ་དང་། གསུང་ཆོས་རྭ་བའི་ནང་ཆོས་ཞུ་བའི་སྡོད་གུར་དང་མི་མང་གི་གསང་སྤྱོད། ཐབ་ཚང་སོགས་ཀྱི་གནས་སྟངས་ཐད་གོ་སྒྲིག་ཚོགས་ཆུང་གི་ཚོགས་མི་རྣམས་དང་ལྷན་ འདྲི་རྩད་གནང་འདུག
དེ་ རྗེས་ཕྱི་ཚེས་ ༡༧ ཉིན་དཔལ་ལྡན་སྲིད་སྐྱོང་མཆོག་རྒྱལ་ས་ལྡི་ལིར་ཕྱི་དྲིལ་ལས་ཁུངས་ཀྱིས་གོ་ སྒྲིག་གནང་བའི་བགྲོ་གླེང་ཚོགས་འདུར་དབུ་བཞུགས་གནང་རྒྱུ་མ་ཟད། དེ་རྗེས་མོན་གྷོར་སེམས་དང་སྲོག་གི་བགྲོ་གླེང་ལྷན་ཚོགས་སུ་མཉམ་ཞུགས་གནང་རྒྱུ་དང་།
ཆོ་ཞུ་བ་ཐོ་འགོད་བྱེད་ས།
ཕྱི་ཚེས་ ༢༡ ཉིན་རྒྱ་གར་ལྷོ་ཕྱོགས་སུ་རྟེན་གཞི་བྱས་པའི་བྱེས་ཀྱི་གདན་ས་ཆེན་པོ་དཔལ་ལྡན་ འབྲས་སྤུངས་ཕྱག་བཏབ་ནས་ལོ་ ༦༠༠ འཁོར་བའི་རྗེས་དྲན་གྱི་མཛད་སྒོར་བཅར་རྒྱུ་མ་ཟད། ཕྱི་ཚེས་ ༢༢ ཉིན་དཔལ་ལྡན་འབྲས་སྤུངས་སུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ ནང་པའི་གཞུང་ཆེན་བཀའ་པོད་ལྔར་སློབ་གཉེར་མཐར་སོན་བྱུང་བའི་བཙུན་མ་ ༢༠ ལ་དགེ་བཤེས་མའི་ཕྱག་འཁྱེར་གསོལ་བསྩལ་མཛད་རྒྱུའི་མཛད་སྒོར་མཉམ་ཞུགས་གནང་ རྗེས། དེ་ཉིན་གྱི་ཕྱེད་ཡོལ་མོན་གྷོ་གཏན་སློབ་དབུ་བརྙེས་ནས་ལོ་ ༥༠ འཁོར་བའི་དུས་སྟོན་སྲུང་བརྩིའི་མཛད་སྒོར་མཉམ་ཞུགས་གནང་རྒྱུ་ཡིན་འདུག་པ་བཅས།།
