༢༠༡༦ ཟླ་ ༡༢ ཚེས་ ༡༤ རེས་གཟའ་ལྷག་པ།

༄༅། །ཕྱི་ལོ་ ༢༠༡༦ ཟླ་ ༡༢ ཚེས་ ༡༤ ཉིན་ཕྱི་དྲིལ་འགྲེམས་སྟོན་ཚན་པའི་གོ་སྒྲིག་འོག་རྡ་ས་མེ་གྷན་དུ་རྟེན་གཞི་བྱས་པའི་བོད་ཀྱི་འགྲེམས་སྟོན་ཁང་དུ་རྩ་ཐང་ཞེས་པའི་བརྗོད་གཞིའི་ཐོག་པར་རིས་འགྲེམས་སྟོན་དབུ་འབྱེད་མཛད་སྒོ་ཚོགས་ཡོད། དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༡༠།༡༥ ཐོག་སྐུ་མགྲོན་གཙོ་བོ་དཔལ་རྒྱལ་བ་ཀརྨ་པ་ཨོ་རྒྱན་ཕྲིན་ལས་རྡོ་རྗེ་རིན་པོ་ཆེ་མཆོག་དང་།  ཕྱི་འབྲེལ་དྲུང་ཆེ་དྭགས་པོ་བསོད་ནམས་ནོར་བུ་ལགས། དྲིལ་བསྒྲགས་དྲུང་ཆེ་ཤར་གླིང་བསྟན་འཛིན་ཟླ་སྒྲོན་ལགས། ཕྱི་དྲིལ་བོད་ཀྱི་འགྲེམས་སྟོན་ཚན་པའི་འགན་འཛིན་གྱིས་གཙོས་འབྲེལ་ཡོད་ལས་བྱེད་རྣམ་པ། ཕྱི་ནང་གི་གསར་འགོད་པ། དེ་བཞིན་རང་རིགས་དང་ཕྱི་གླིང་གི་སྐུ་མགྲོན་སོགས་འདུ་འཛོམས་ཀྱིས་ཐོག་མར་སྐུ་མགྲོན་གཙོ་བོ་དཔལ་རྒྱལ་བ་ཀརྨ་པ་ཨོ་རྒྱན་ཕྲིན་ལས་རྡོ་རྗེ་རིན་པོ་ཆེ་མཆོག་གིས་སྣང་གསལ་ཞལ་ཕྱེ་དང་འབྲེལ་དུས་ཐུང་འགྲེམས་སྟོན་དབུ་འབྱེད་གནང་གྲུབ་མཚམས། ཕྱི་དྲིལ་འགྲེམས་སྟོན་ཚན་པའི་འགན་འཛིན་བཀྲ་ཤིས་ཕུན་ཚོགས་ལགས་ནས་ཐེངས་བོད་ཀྱི་འགྲེམས་སྟོན་ཁང་གི་ངོ་བོ་དང་དམིགས་ཡུལ་ངོ་སྤྲོད་ཞུས་བསྟུན།   རྩ་ཐང་ཞེས་པའི་དུས་ཐུང་འགྲེམས་སྟོན་བཀོད་བསྒྲིགས་གནང་མཁན་པར་པ་དཀོན་མཆོག་རྒྱལ་མཚན་ལགས་ནས་འགྲེམས་སྟོན་གྱི་བརྗོད་གཞིའི་སྐོར་ངོ་སྤྲོད་གནང་།

དེ་རྗེས་ཕྱི་དྲིལ་དྲུང་ཆེ་དྭགས་པོ་བསོད་ནམས་ནོར་བུ་ལགས་ནས་གསུང་བཤད་གནང་གྲུབ་བསྟུན། སྐུ་མགྲོན་གཙོ་བོ་དཔལ་རྒྱལ་བ་ཀརྨ་པ་ཨོ་རྒྱན་ཕྲིན་ལས་རྡོ་རྗེ་རིན་པོ་ཆེ་མཆོག་ནས་བཀའ་སློབ་གནང་དོན།   དེ་རིང་རྡ་ས་འགྲེམས་སྟོན་ཁང་ལ་རྩ་ཐང་ཞེས་པའི་བརྗོད་གཞིའི་ཐོག་དུས་ཐུང་འགྲེམས་སྟོན་ལ་བཅར་རྒྱུའི་གོ་སྐབས་བྱུང་བར་ཧ་ཅང་དགའ་པོ་བྱུང་། དེ་དང་སྟབས་བསྟུན་ནས་རྩ་ཐང་འགྲེམས་སྟོན་འདིའི་ཐོག་གོ་སྒྲིག་གནང་མཁན་དང་པར་པ་དཀོན་མཆོག་རྒྱལ་མཚན་ལགས་ཀྱི་ནང་མི་ཡོངས་ལ་འཚམས་འདྲི་ཞུ་རྒྱུ་དང་། འགྲེམས་སྟོན་འདིའི་ཐོག་རྒྱབ་སྐྱོར་གནང་མཁན་རྡ་ས་བོད་ཀྱི་འགྲེམས་སྟོན་ཁང་གི་ཕྱག་ལས་གནང་མཁན་ཡོངས་ལ་ཐུགས་རྗེ་ཆེ་ཞུ་རྒྱུ་ཡིན། ཕྱི་དྲིལ་དྲུང་ཆེ་རྣམ་གཉིས་དང་དེ་བཞིན་གསར་འགོད་པ་རྣམས་ལ་འཚམས་འདྲི་ཞུ་རྒྱུ་ཡིན། 

སྤྱིར་བཏང་ང་རང་བོད་ལ་སྐྱེས་ནས་བོད་ལ་འཚར་ལོངས་བྱུང་བ་རེད།   དེའི་ཁོངས་ནས་འབྲོག་པའི་ནང་ལ་འཚོ་བ་སྐྱེལ་ནས་གང་ལྟར་བོད་ཀྱི་རང་འབྱུང་གི་ཁོར་ཡུག་ལ་ཐག་ཉེ་པོའི་ཐོག་ནས་ཆུང་ངུའི་དུས་ཚོད་མང་པོ་ཞིག་བསྐྱལ་བ་རེད། དེར་བརྟེན་དཀོན་མཆོག་རྒྱལ་མཚན་ལགས་ཀྱིས་བསྐྱོན་པའི་པར་མང་པོ་ཞིག་མཐོང་དུས་ང་རང་ཆུང་དུས་ཀྱི་འཚོ་བ་ཕྱིར་དྲན་གསོས་བྱུང་། དེ་བཞིན་བོད་ཀྱི་རང་བྱུང་ཁམས་རྣམས་དྲན་གསོ་གཏང་རྒྱུ་ལྟ་བུ་ཡོང་བཞིན་འདུག དེ་འདྲ་ཡིན་དུས་དཀོན་མཆོག་རྒྱལ་མཚན་ལགས་ལྟ་བུ་བོད་པ་བཙན་བྱོལ་བ་མི་སྒེར་གཅིག་གི་ངོས་ནས་བོད་སྤྱིའི་དོན་དུ་རང་ནུས་གང་ཡོད་ཀྱིས་ལྷག་བསམ་རྣམ་དག་ཐོག་ཞབས་འདེགས་ཞུ་ཐུབ་པར་ང་ཚོ་ཚང་མའི་མིག་དཔེར་འོས་པ་ཞིག་དང་རྗེས་སུ་ཡི་རང་བྱེད་དགོས་པ་རེད་བསམ་པ་དྲན་གྱི་འདུག

སྤྱིར་བཏང་ད་ལྟ་གོང་དུ་ཕྱི་འབྲེལ་དྲུང་ཆེ་ཐོག་ནས་གསུང་བཤད་གནང་བ་བཞིན་ང་རང་ཚོའི་བོད་ཀྱི་གནད་དོན་འདི་ཆབ་སྲིད་རྐྱང་པའི་གནས་ཚུལ་གང་ཡང་ཆགས་ཀྱི་མི་འདུག ཕྱོགས་གཅིག་ནས་དེང་སང་ང་ཚོའི་བོད་ཀྱི་གནད་དོན་ལ་གྲུབ་འབྲས་ཡག་པོ་ཞིག་སོན་རྒྱུར་དཀའ་ངལ་ཆེན་པོ་འཕྲད་བཞིན་ཡོད།   འོན་ཀྱང་བོད་ཀྱི་གནད་དོན་བཤད་ཡོང་དུས་མི་མང་པོ་ཞིག་གི་ཀླད་པའི་ནང་ལ་ཆབ་སྲིད་ཀྱི་གནད་དོན་ཡིན་པ་གཅིག་དང་། གནད་དོན་འདི་རྙོག་རྫིང་ཆེན་པོ་ལྟ་བུ་ཞིག་ལ་བསམ་བློ་འཁོར་བཞིན་ཡོད། འོན་ཀྱང་ཕྱོགས་གཅིག་ནས་བསམ་བློ་གཏང་བ་ཡིན་ན།  ང་ཚོའི་གནད་དོན་ཟེར་དུས་བོད་ཀྱི་ཆོས་དང་རིག་གཞུང་། བོད་ཀྱི་སྲོལ་རྒྱུན་གྱི་འཚོ་བ་དང་། དེ་བཞིན་བོད་ཀྱི་རང་བྱུང་ཁོར་ཡུག་བཅས་ཚང་མ་ཚུད་ཡོད་པ་རེད། དེའི་ནང་ནས་བོད་ཀྱི་ཁོར་ཡུག་གནས་སྟངས་ཡང་བོད་པ་གཅིག་པོའི་སྐྱིད་སྡུག་ལྟ་བུ་མ་ཡིན་པར་བོད་ཀྱི་ཁྱིམ་མཚེས་རྒྱལ་ཁབ། དེ་བཞིན་ཨེ་ཤི་ཡ་ཁྱོན་ཡོངས་དང་། འཛམ་གླིང་ཁྱོན་ཡོངས་ལ་འབྲེལ་བ་ཆགས་པའི་གནས་ཚུལ་ཞིག་ཆགས་བཞིན་ཡོད། དེར་བརྟེན་ཁྱིམ་མཚེས་རྒྱལ་ཁབ་ཚོ་ཡིན་ནའང་བོད་ཀྱི་ཁོར་ཡུག་ཐོག་ལ་དོ་སྣང་བྱེད་རྒྱུ་དང་། དེའི་ཐོག་ལ་སྐད་ཆ་བཤད་རྒྱུའི་ཐོབ་ཐང་ཟེར་ནའང་འདྲ། འོས་བབ་ཡོད་རེད་བསམ་པ་དྲན་བཞིན་ཡོད།  གང་ལ་ཞེ་ན། དེས་བོད་ཀྱི་ཁོར་ཡུག་གི་ཤུགས་རྐྱེན་འཛམ་གླིང་ཡོངས་ལ་ཐེབས་བཞིན་ཡོད།  དེའི་ཐོག་ནས་རང་བཞིན་གྱིས་སྐད་ཆ་བཤད་རྒྱུའི་ཐོབ་ཐང་དང་འོས་བབ་གཅིག་ཡོང་བཞིན་ཡོད་རེད། དེའི་ནང་ནས་གལ་ཆེ་ཤོས་ནི་ང་ཚོ་བོད་རིགས་ནང་ཁུལ་ལ་ཁོར་ཡུག་སྲུང་སྐྱོབ་ཀྱི་གོ་རྟོགས་ཡག་པོ་དགོས་རྒྱུ་གལ་ཆེན་པོ་རེད། སྲོལ་རྒྱུན་གྱི་འཚོ་བའི་ནང་ལ་སྲོལ་རྒྱུན་གྱི་ཁོར་ཡུག་སྲུང་སྐྱོབ་ཀྱི་གོ་རྟོགས་ལྟ་བུ་ཡོད།

དཀོན་མཆོག་རྒྱལ་མཚན་ལགས།

དེ་བཞིན་སྲོལ་རྒྱུན་གྱི་འཚོ་བའི་གནས་སྟངས་དང་དེང་དུས་ཀྱི་འཚོ་བའི་གནས་སྟངས་ཐ་དད་ཆགས་བཞིན་ཡོད། ང་ཚོ་ཆུང་ཆུང་སྐབས་སུ་དེང་སང་གི་འགྱིག་དང་འགྱིག་ཤོག་གི་གད་སྙིགས་ལྟ་བུ་མཐོང་རྒྱུ་མེད། ཕལ་ཆེར་ངས་བསམ་བློ་གཏོང་དུས་བོད་པ་ཚོས་ནམ་རྒྱུན་གྱི་གད་སྙིགས་འགྱིག་དང་འགྱིག་ཤོག་གཡུག་དུས་འགྲིག་འགྲོ་གྱི་རེད་བསམས་པ་མ་གཏོགས་དེའི་ཐོག་ལ་དམིགས་བསལ་གྱི་གོ་རྟོགས་ལྟ་བུ་དང་།  དེས་གནོད་སྐྱོན་གང་འདྲ་ཡོང་མིན། དེ་བཞིན་འགྱིག་རིགས་ཀྱི་གད་སྙིགས་དེ་ཚོ་ཁོར་ཡུག་ནང་ལས་སླ་པོ་རྩ་མེད་འགྲོ་མ་ཐུབ་པའི་གནས་ཚུལ་ཡག་པོ་ཤེས་ཀྱི་མེད་ངེས་རེད། དེའི་རྒྱུ་མཚན་ལ་བརྟེན་ནས་ཁོར་ཡུག་གི་གོ་རྟོགས་སྤེལ་དགོས་རྒྱུ་ཧ་ཅང་གལ་ཆེན་པོ་མཐོང་བཞིན་ཡོད། གང་ལ་ཞེ་ན། སོ་སོའི་གཅེས་པར་འོས་པའི་ཕ་ཡུལ་འདི་སོ་སོས་སྲུང་སྐྱོབ་བྱེད་རྒྱུ་དང་། དེ་བཞིན་བོད་ཀྱི་ཁོར་ཡུག་སྲུང་སྐྱོབ་ཡིན་ན་བོད་པས་འགོ་འཁྲིད་ནས་འགྲོ་དགོས་རྒྱུའི་གནས་སྟངས་ཆགས་ཡོད། དེར་བརྟེན་བོད་པ་ནང་ཁུལ་ཁོར་ཡུག་སྲུང་སྐྱོབ་ཀྱི་གོ་རྟོགས་སྤེལ་དགོས་རྒྱུ་ཧ་ཅང་གལ་ཆེན་པོ་ཆགས་ཀྱི་འདུག ད་རེས་ཀྱི་འགྲེམས་སྟོན་ལ་ཆ་མཚོན་ན། ཕྱོགས་གཅིག་ནས་དངོས་གནས་ང་ཚོ་བཙན་བྱོལ་ལ་ཡོད་པའི་བོད་རིགས་མང་པོ་ཞིག་ལ་བོད་ཀྱི་རང་བྱུང་ཁོར་ཡུག་དང་བོད་ཀྱི་འབྲོག་པའི་འཚོ་བ་ལ་སོགས་པའི་གནས་སྟངས་གང་འདྲ་ཡོད་མེད་གཟིགས་འབུལ་ཞུ་ཐུབ་རྒྱུ་དང་། དེ་བརྒྱུད་ནས་ང་ཚོའི་བོད་ཀྱི་རང་བྱུང་ཁོར་ཡུག་ལ་གཅེས་སྤྲས་དང་དོ་སྣང་ཆེ་རུ་འགྲོ་རྒྱུ་དང་། དེ་བཞིན་བོད་ལ་ཡོད་པའི་བོད་རིགས་སྤུན་ཟླ་ཚོའི་གནས་སྟངས་ཟེར་ནའང་འདྲ། དེ་བཞིན་ཁོང་ཚོ་དང་ང་ཚོའི་དབར་འབྲེལ་བ་ཐག་ཉེ་རུ་འགྲོ་རྒྱུ་ཡོང་གི་རེད་བསམ་དྲན་གྱི་འདུག

ཕྱི་དྲིལ་འགྲེམས་སྟོན་ཚན་པའི་ལས་བྱེད་རྣམས་ལ་མཇལ་ཁ་གནང་བ།

དེ་བཞིན་དེ་རིང་གོ་སྐབས་འདི་བརྒྱུད་ནས་པར་པ་དཀོན་མཆོག་རྒྱལ་མཚན་དང་ནང་མི་ལྷན་རྒྱས་ཚང་མར་སྙིང་ཐག་པ་ནས་ཐུགས་རྗེ་ཆེ་ཞུ་རྒྱུ་དང་། ད་ལྟ་གོང་དུ་ཞུས་པ་བཞིན་ང་ཚོ་བཙན་བྱོལ་ལ་ཡོད་པའི་བོད་རིགས་དང་ལྷག་པར་ཕྱི་རྒྱལ་ཁག་ལ་ཡོད་པའི་བོད་རིགས་རྣམས་བོད་ལ་གཉེན་འཕྲད་ལ་འགྲོ་རྒྱུའི་གོ་སྐབས་སོགས་གང་ལྟར་གནས་སྟངས་ལྟ་བུ་ཏོག་ཙམ་མང་བ་ཡོང་བཞིན་ཡོད། དེར་བརྟེན་ངེས་པར་དུ་བོད་ལ་ཕར་ཕྱིན་ནས་བོད་ཀྱི་རང་བྱུང་ཁོར་ཡུག་གི་མཛེས་སྡུག་ལ་མིག་གིས་དངོས་སུ་བལྟས། ལག་པས་དངོས་སུ་རེག་པའི་ཐོག་ནས་བོད་ཀྱི་ཆོས་དང་རིག་གཞུང་ལ་བརྩེ་བ་དང་གདུང་བ་སྐྱེ་ཐུབ་རྒྱུ་དང་། ཚོར་སྣང་གསར་པ་ཞིག་སྦྱིན་ཐུབ་ཀྱི་རེད་བསམ་པ་དྲན་གྱི་འདུག དེ་བཞིན་དཀོན་མཆོག་རྒྱལ་མཚན་ལྟར་བོད་མི་སྒེར་གཅིག་གི་ངོས་ནས་བོད་སྤྱི་པའི་དོན་དུ་ཞབས་ཞུ་གང་སྒྲུབ་རྒྱུ་ཡོད་པ་དེ་དག་སོ་སོས་བརྟག་དཔྱད་བྱས་པའི་ཐོག་ལུས་ངག་ཡིད་གསུམ་གྱི་ཐོག་ནས་འཇོན་ཚོད་དཔག་ཚོད་ཐོག་ནས་ཞབས་ཞུ་སྒྲུབ་ཐུབ་པ་བྱུང་ན་ཧ་ཅང་ཡག་པོ་ཡོང་རྒྱུ་རེད། མཐའ་དོན་སྔོན་མ་ཐེངས་གཅིག་འགྲེམས་སྟོན་ཁང་འདིར་ཡོང་རྒྱུའི་གོ་སྐབས་བྱུང་བ་རེད། ད་རེས་ཐེངས་གཉིས་པ་ལྟ་བུ་ཆགས་བཞིན་འདུག   འགྲེམས་སྟོན་ཁང་འགན་འཛིན་རྣམ་པ་དང་ལས་བྱེད་རྣམ་པ་ཚོའི་ངོས་ནས་སྣེ་ལེན་གནང་བར་ཐུགས་རྗེ་ཆེ་ཞུ་རྒྱུ་ཡིན། ཞེས་སོགས་ཀྱི་གསུང་བཤད་གནང་རྗེས་བོད་ཀྱི་འགྲེམས་སྟོན་ཁང་གི་དོ་དམ་པ་ལྷ་མོ་ཚེ་རིང་ལགས་ཀྱིས་ཐུགས་རྗེ་ཆེ་ཞུའི་གསུང་བཤད་གནང་རྗེས་མཛད་སྒོ་རྒྱལ་ཁའི་ངང་གྲུབ་ཡོད་པ་བཅས།།