༢༠༡༦ ཟླ་ ༡༢ ཚེས་ ༢༧ རེས་གཟའ་མིག་དམར།
༄༅། །བོད་མི་མང་སྤྱི་འཐུས་གྲོས་ཚོགས་སྔ་རྗེས་ནང་གཞིས་ཆགས་ཐོབ་སྐལ་སྐོར་བགྲོ་གླེང་རིམ་བྱུང་དགོངས་དོན་གཞིར་བཞག་དང༌། སྐབས་ ༡༦ པའི་བོད་མི་མང་སྤྱི་འཐུས་གྲོས་ཚོགས་ཚོགས་དུས་གཉིས་པའི་སྐབས་སྐར་རྟགས་ཅན་གྱི་དྲི་བ་ཕེབས་པའི་བཀའ་ལན་དུ་བཀའ་ཤག་སྐབས་ ༡༤ པས་བོད་ནས་གསར་དུ་འབྱོར་བ་རྣམས་ཀྱི་བདེ་སྡུག་ལ་གཟིགས་ཞིབ་གནང་རྒྱུ་གལ་ཆེ་བརྩི་སྟེ་ཁོང་རྣམས་ལ་སྣེ་ལེན་མཐུན་རྐྱེན་སྦྱོར་ཕྱོགས་སྐོར་བསྐྱར་ཞིབ་ཚོགས་ཆུང་ཆེད་འཛུགས་གནང་ལུགས་སྐོར་སྙན་སྒྲོན་ཞུས་པ་ལྟར། ད་བར་བོད་མི་ཁག་ཅིག་ལ་སྡོད་ཁང་མཐུན་རྐྱེན་སྦྱར་ཐུབ་པ་བྱུང་ཡོད་ནའང༌། བོད་ནས་ཕྱིས་སུ་སྐྱབས་བཅོལ་འབྱོར་ཁག་གཅིག་པུ་མ་ཡིན་པ་ཕྱི་ལོ་ ༡༩༥༩ ལོ་ནས་འབྱོར་བའི་བོད་མི་ཁ་འཐོར་གནས་སྡོད་གཞིས་སྐལ་ཐོབ་ཐང་མེད་པའི་དཀའ་ངལ་ཞུ་མཁན་མང་དག་ཅིག་ཡོད་པ་ཚང་མའི་དཀའ་ངལ་གཅིག་མཚུངས་ངོས་འཛིན་བྱེད་ཀྱི་ཡོད།
མཁྱེན་ཆུབ་ལྟར་གཞིས་ཁང་གསར་རྒྱག་གིས་མཐུན་རྐྱེན་སྦྱར་རྒྱུའི་ལས་གཞི་དེ་བཞིན་གཞི་རྒྱ་ཆེ་ཁར་འགྲོ་གྲོན་གཞན་དབང་སྟབས་བསྟུན་དགོས་པར་ལོ་ཤས་ནང་གྲུབ་རྒྱུ་ཧ་ཅང་དཀའ་བའི་རང་བཞིན་ལས་མ་འདས་ཤིང༌། དཔེར་ན་ཨུཏྟར་ཁཎྜ་བདེ་སྐྱིད་གླིང་ཁྱབ་ཁོངས་ཁ་འཐོར་དུད་ཚང་ ༡༡༦ བརྒལ་བ་ཞིག་ནས་འདས་པའི་ལོ་ ༣༥ ཙམ་སྔོན་ནས་སྡོད་ཁང་མེད་པའི་དཀའ་ངལ་ཞུས་པ་རྣམས་དུས་ད་ལྟའང་སེལ་མ་ཐུབ་པའི་གནས་སྟངས་ནས་རྟོགས་ཐུབ་དགོས་པ་དང༌། དེའི་སྟེང་ད་ལྟའི་ཆར་ནང་སྲིད་ལས་ཁུངས་སུ་སྡོད་ཁྱིམ་མེད་པའི་བདེ་སྡུག་དཀའ་ངལ་ཞུ་མཁན་ཁྱོན་བསྡོམས་དུད་ཚང་གྲངས་ ༡༥༤༦ འབྱོར་ཡོད། གསར་འབྱོར་ཡིན་མིན་ལ་མ་ལྟོས་པར་གཞིས་སྐལ་ཐོབ་ཐང་མེད་པ་དང་ཁང་གླ་སྤྲོད་དགོས་སོགས་ཀྱི་དཀའ་ངལ་སེལ་ཐབས་སུ་གཞིས་ཆགས་ཁག་ཏུ་གཞིས་ཁང་དང་ཞིང་ས་སྟོང་པ་ཇི་ཡོད་གྲངས་ཐོ་བསྡུ་རུབ་ཞུས་པའི་རེའུ་མིག་གཤམ་གསལ།
ཨང༌། ས་གནས། སྡོད་ཁང་སྟོང་པ་གྲངས། ཞིང་ས་སྟོང་པ་ཨེ་ཀར་གྲངས།
༡ ཧོན་སུར་རབ་རྒྱས་གླིང༌། ༣༣ ༩༦་༣༦
༢ ཨོ་ཌི་ཤ་ཕུན་ཚོགས་གླིང༌། ༦༤ ༥༦༤
༣ མན་སྤར་ཕན་བདེ་གླིང༌། མེད། ༤༥
༤ སྦན་ད་ར་ནོར་རྒྱས་གླིང༌། ༩ མེད།
༥ ཏི་ཛུ་དར་རྒྱས་གླིང༌། ༥ ༣༥
བསྡོམས། ༡༡༡ ༧༤༠་༣༦
གོང་གསལ་ས་གནས་ཁག་ནང་ཁང་སྟོང་དང་ཞིང་ས་སྟོང་པ་ཡོད་ཁོངས་ནས་དཀའ་སེལ་གཞིས་སྐལ་ཐོབ་ཐང་འབུལ་རྒྱུ་ཡིན་ན་ཛ་དྲག་དཀའ་ངལ་ཅན་རྣམས་ནས་དོ་བདག་སོ་སོའི་ས་གནས་འགོ་འཛིན་བརྒྱུད་འབྲེལ་གཏུགས་ཀྱིས་ཕྱི་ལོ་ ༢༠༡༧ ཟླ་ ༣ ཚེས་ ༡༥ ནང་ཚུད་ལན་གསལ་འབུལ་དགོས་པར་མ་བྱུང་ཚེ་ཛ་དྲག་དགོས་གལ་མེད་པར་ངོས་འཛིན་བྱ་རྒྱུ་ཡིན་པ་དེ་དོན་དགོངས་འཇགས་ཞུ། བོད་མིའི་སྒྲིག་འཛུགས་ཀྱི་ནང་སྲིད་ལས་ཁུངས་ནས་ཕྱི་ལོ་ ༢༠༡༦ ཟླ་ ༡༢ ཚེས་ ༢༢ ལ།།
