༄༅།།འདི་གའི་ཆེད་གཉེར་གསར་འགོད་པ་ཡེ་ཤེས་ཀུན་གྲགས་ལགས་ཀྱིས་བཏང་གནས་ནང་འཁོད་དོན། ཕྱི་ལོ་ ༢༠༡༦ ཟླ་ ༡༢ ཚེས་ ༡༥ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རྒྱ་གར་ལྷོ་ཕྱོགས་ཀར་ཎ་ཊ་ཀ་མངའ་སྡེའི་རྒྱལ་ས་སྦེང་ལོར་ནང་ཡོད་པའི་རྒྱ་གར་གྱི་ཁྲིམས་ལུགས་མཐོ་སློབ་ National Law School of India University,Bengaluru ཏུ་ཆིབས་སྒྱུར་བསྐྱངས་ཏེ་བཀའ་སློབ་སྩལ་ཡོད། དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༩།༣༠ ཙམ་གྱི་ཐོག་༸གོང་ས་མཆོག་སློབ་གཉེར་ཁང་དེར་༸ཞབས་སོར་བདེ་བར་འཁོད་སྐབས་ཉེ་བའི་རིགས་བདག་ཝེན་ཀཊ་རའོ་ Prof.Dr.R.Venkata Rao ལགས་དང་།རིགས་དྲུང་སློབ་དཔོན་ནྣདི་མད་Prof.Dr.O.V.Nandimath ལགས་སོགས་ཀྱིས་ཕེབས་བསུ་གཟབ་རྒྱས་ཞུས་ཡོད།
དེ་རྗེས་ཐོག་མར་ཉེ་བའི་རིགས་བདག་གིས་ཕེབས་བསུའི་གསུང་བཤད་དང་། སློབ་དཔོན་ཝི་ཇེ་ཀུ་མཱར་ Prof.Dr.V.Vijayakumar,Prof of Law ལགས་ཀྱིས་༧གོང་ས་མཆོག་གི་མཛད་རྣམ་སྙིང་བསྡུས་ཤིག་ངོ་སྤྲོད་ཞུས་གྲུབ་མཚམས། ཉེ་བའི་རིགས་བདག་གིས་མགོན་པོ་གང་ཉིད་མཆོག་ལ་རྒྱ་གར་གནའ་བོའི་སྲོལ་རྒྱུན་ལྟར་ཆེ་བསྟོད་ཀྱི་གོས་གཟན་(Shawl) འབུལ་ལམ་ཞུས་རྗེས་༧གོང་ས་མཆོག་གིས་བཀའ་སློབ་སྩལ་དོན། དུས་རྒྱུན་ངོས་ཀྱིས་མི་གཞན་དང་ཐུག་འཕྲད་བྱེད་སྐབས་ང་ཚོ་ཚང་མ་འགྲོ་བ་མིའི་རིགས་གཅིག་གྱུར་ཡིན་པའི་འདུ་ཤེས་འཛིན་གྱི་ཡོད། ང་ཚོ་ཐོག་མར་མ་ནས་སྐྱེ་སྟངས་དང་མཐར་འཆི་སྟངས་སོགས་གཅིག་མཚུངས་ཆགས་ཡོད།
ང་ཚོ་ཚང་མ་སྤུན་ཟླ་ཕོ་མོ་ཆགས་ཡོད། དེང་སྐབས་ང་ཚོར་འཕྲད་བཞིན་པའི་དཀའ་ངལ་མང་དག་ཅིག་ནི་ང་ཚོས་ཕན་ཚུན་གཅིག་གྱུར་གྱི་འདུ་ཤེས་དེ་དོར་ཏེ། རིམ་པ་གཉིས་པའི་ཐོག་ནས་མི་ཕན་ཚུན་མི་འདྲ་བའི་ཁྱད་པར་ཡོད་པ་དེ་དག་ལ་གཙིགས་ཆེར་འཛིན་པར་བརྟེན་དཀའ་ངལ་དེ་དག་འབྱུང་བཞིན་ཡོད། ང་ཚོས་ངའི་རྒྱལ་ཁབ་དང་ཁོ་པ་ཚོའི་རྒྱལ་ཁབ། ང་ཚོ་དང་ཁོ་པ་ཚོ། ཞེས་པའི་འཐེན་ཁྱེར་གྱི་བསམ་བློ་ཤུགས་ཆེ་དྲགས་པའི་རྐྱེན་གྱིས་དུས་རབས་ ༢༠ ནང་རྩོད་རྙོག་དང་དྲག་སྤྱོད་སོགས་བྱུང་བ་རེད།
སྐབས་རེ་མི་ཁག་གཅིག་གིས་བྱམས་བརྩེ་ཉམས་ལེན་བྱེད་རྒྱུ་དེ་ཞན་ཆ་ཞིག་ཏུ་ངོས་འཛིན་བྱེད་བཞིན་པ་དེ་ནོར་འཁྲུལ་རེད། དེ་ལས་ལྡོག་ཏེ་བརྩེ་བ་ནི་ནུས་སྟོབས་ཀྱི་མཚོན་རྟགས་ཤིག་ཡིན་པ་དང་ཁོང་ཁྲོ་དེ་ཞན་ཆ་ཞིག་ཡིན། དེ་བཞིན་མི་འགས་བྱམས་བརྩེ་བྱེད་རྒྱུ་ནི་མི་གཞན་ཁོ་ནར་ཕན་ཐོགས་ཡོད་པར་ངོས་འཛིན་བྱེད་རྒྱུ་དེ་ཡང་ནོར་བ་རེད། དེང་དུས་ཀྱི་ཤེས་ཡོན་ལམ་ལུགས་ནང་ཕྱི་དངོས་པོའི་འཛུགས་སྐྲུན་ཡར་རྒྱས་གཙོ་བཟུང་བྱས་པ་ལས་ནང་བསམ་བློའི་རིན་ཐང་ཐོག་དོ་སྣང་བྱེད་ཀྱི་མེད་པར་བརྟེན། དེང་དུས་ཀྱི་ཤེས་ཡོན་དེ་ནང་སེམས་ཀྱི་རིན་ཐང་གོང་མཐོར་གཏོང་རྒྱུའི་སློབ་གསོ་འདང་ངེས་ཤིག་མེད། གལ་ཏེ་ང་ཚོས་མིའི་རྣམ་དཔྱོད་དེ་ཉིད་བེད་སྤྱོད་བྱས་ཚེ་ནང་བསམ་བློའི་རིན་ཐང་གི་ནུས་པ་གོང་མཐོར་གཏང་ཐུབ། དེར་བརྟེན་འགྲོ་བ་མིའི་རྒྱུད་ལ་ཡོད་པའི་བཟང་པོའི་ཡོན་ཏན་གོང་འཐོར་གཏོང་སྟེ་འགྲོ་བ་མིའི་རིགས་ལ་བདེ་སྐྱིད་བསྐྲུན་ཐབས་བྱ་རྒྱུ་ནི་ངོས་ཀྱི་འགན་འཁུར་དང་པོ་དེ་ཡིན།
ངོས་རང་ནང་པའི་དགེ་སློང་དང་དཔལ་ནཱ་ལེནྡྲའི་ཆོས་བརྒྱུད་འཛིན་མཁན་གྱི་སློབ་ཕྲུག་ཅིག་ཡིན་པའི་ཆ་ནས་ཆོས་ལུགས་ཕན་ཚུན་དབར་མཐུན་སྒྲིལ་གོང་སྤེལ་གཏོང་ཐབས་བྱ་རྒྱུ་ནི་ངོས་ཀྱི་འགན་འཁུར་གཉིས་པ་དེ་ཡིན། རྒྱ་གར་ནང་འདས་པའི་ལོ་ངོ་སྟོང་ཕྲག་རིང་ནས་ཆོས་ལུགས་གཙོ་ཆེ་འདྲ་མིན་འཆམ་མཐུན་ངང་འཚོ་གནས་བྱེད་བཞིན་ཡོད་པ་ནི་ཆོས་ལུགས་འདྲ་མིན་ཞི་མཐུན་ངང་གནས་ཐབས་ཡོད་པའི་མིག་དཔེ་ལྟ་བུ་ཡིན་པ་དང་། འཛམ་གླིང་འདིའི་སྟེང་ཆོས་ལུགས་ཕན་ཚུན་མཐུན་འབྲེལ་ཡོང་ཐབས་ཐད་རྒྱ་གར་གྱི་རམས་འདེགས་ཆེན་པོ་ཞུ་ཐུབ་རྒྱུ་རེད། ངོས་ཀྱི་འགན་འཁུར་གསུམ་པ་ནི་ངོས་རང་བོད་མི་ཞིག་ཡིན་པའི་ཆ་ནས་དང་ལྷག་པར་བོད་ཕྱི་ནང་གཉིས་སུ་གནས་པའི་བོད་མི་སེར་སྐྱ་ཡོངས་ཀྱིས་ངོས་ལ་ཡིད་ཆེས་བློ་གཏད་ཆེན་པོ་བྱེད་བཞིན་ཡོད་སྟབས། བོད་དོན་ཐོག་དམིགས་བསལ་འགན་འཁུར་ཡོད།
བཀའ་སློབ་མཐའ་མར་དུས་རབས་ཉི་ཤུ་དེ་དྲགས་སྤྱོད་ཅན་གྱི་དུས་རབས་ཤིག་ཏུ་ཆགས་ཡོད་པ་དང་དུས་རབས་ཉི་ཤུ་རྩ་གཅིག་དེ་བྱམས་བརྩེ་ལྡན་པ་དང་ཕན་ཚུན་གྲོས་མོལ་དང་བསམ་ཤེས་ཡོད་པའི་དུས་རབས་ཤིག་བསྒྱུར་དགོས་པ་དང་དེ་ལྟར་ཡོང་བར་སློབ་ཕྲུག་གཞོན་སྐྱེས་ཕོ་མོ་ཚང་མས་འགན་འཁུར་བླང་དགོས་པའི་བཀའ་སློབ་སྩལ་རྗེས་མང་ཚོགས་ཀྱི་དྲི་བར་བཀའ་ལན་སྩལ་ཡོད།