༢༠༡༦ ཟླ་ ༡༢ ཚེས་ ༢༨ རེས་གཟའ་ལྷག་པ།
༄༅། །ཕྱི་ལོ་ ༢༠༡༦ ཟླ་ ༡༢ ཚེས་ ༢༨ ཉིན་གྱི་སྔ་དྲོ་ཆུ་ཚོད་ ༡༡ ཙམ་ལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་རྒྱ་གར་གྱི་རྒྱལ་ས་ལྡི་ལི་ནས་མཁའ་ལམ་བརྒྱུད་རྒྱ་གར་བྱང་ཕྱོགས་བྷི་ཧར་མངའ་སྡེའི་རྒྱལ་ས་པ་ཊི་ནཱར་༸ཞབས་སོར་བདེ་བར་འཁོད་སྐབས་གནམ་ཐང་དུ་མངའ་སྡེའི་སྤྱི་ཁྱབ་བློན་ཆེན་སྐུ་ཞབས་ནི་ཏིཤ་ཀུ་མཱར་ Nitish Kumar མཆོག་གིས་འཚམས་འདྲིའི་ཕེབས་བསུ་ཞུས་ཡོད།
དེ་རྗེས་མགོན་པོ་གང་ཉིད་མཆོག་སྤྱི་ཁྱབ་བློན་ཆེན་མཆོག་དང་ལྷན་ཁུལ་དེར་ཡོད་པའི་སྟོན་པ་རྗེས་དྲན་གྱི་སྐྱེད་མོས་ཚལ་དུ་ཆིབས་སྒྱུར་བསྐྱངས། སྐབས་དེར་ཐོག་མར་༸གོང་ས་མཆོག་དང་སྤྱི་ཁྱབ་བློན་ཆེན་རྣམ་གཉིས་ཀྱིས་སྟོན་པ་རྗེས་དྲན་གྱི་སྐྱེད་མོས་ཚལ་དུ་ཡོད་པའི་ Karuna Stupa ཞེས་པའི་མཆོད་རྟེན་གྱི་མདུན་དུ་སྣང་གསལ་ཞལ་ཕྱེ་མཛད། སྐབས་དེར་ནང་པའི་དགེ་འདུན་པ་ཁག་གཅིག་གིས་པཱ་ལིའི་སྐད་ཐོག་སྨོན་ལམ་གསུང་འདོན་གནང་བསྟུན།
རྣམ་རྒྱལ་གྲྭ་ཚང་གི་དགེ་འདུན་པ་རྣམས་ཀྱིས་བོད་སྐད་དང་། དེ་རྗེས་ཉི་ཧོང་གི་སྐད་ཐོག་སྨོན་ལམ་གསུང་འདོན་གནང་།
དེ་རྗེས་མགོན་པོ་གང་ཉིད་མཆོག་ལ་སྤྱི་ཁྱབ་བློན་ཆེན་མཆོག་གིས་བཞུགས་གནས་སུ་གདན་ཞུས་ཀྱིས་ཉིན་གུང་ལྗགས་སྨིན་འདེགས་འབུལ་དང་སྦྲགས་ཆུ་ཚོད་ཕྱེད་ཀ་ལྷག་ཙམ་རིང་བཀའ་མོལ་མཛད། སྐབས་དེར་མངའ་སྡེའི་སྤྱི་ཁྱབ་བློན་ཆེན་གཞོན་པ་དང་གནད་ཡོད་མི་སྣ་ཁག་གཅིག་ཀྱང་ཕེབས་ཡོད། དེ་ནས་སྤྱི་ཁྱབ་བློན་ཆེན་མཆོག་གིས་༸གོང་ས་མཆོག་པ་ཊི་ནཱ་གནམ་ཐང་དུ་ཕེབས་སྐྱེལ་ཞུས།
གྷ་ཡ་གནམ་ཐང་དུ་༸ཞབས་སོར་འཁོད་སྐབས།
དེ་ཡང་གོང་ཚེས་ཉིན་གྱི་ཕྱེད་ཡོལ་ཆུ་ཚོད་ ༣ ཙམ་ལ་༸སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གྷ་ཡ་གནམ་ཐང་དུ་༸ཞབས་སོར་འཁོད་སྐབས་ས་གནས་རྫོང་དཔོན་དང་ཉེན་རྟོག་འགོ་དཔོན། རྒྱ་གར་གྱི་གནད་ཡོད་མི་སྣ་ཁག་གཅིག དུས་འཁོར་དབང་ཆེན་གོ་སྒྲིག་ཚོགས་ཆུང་གི་ཚོགས་གཙོ་ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་མཆོག་དང་།
ཚོགས་གཞོན་འཕྲོད་བསྟེན་བཀའ་བློན་ཆོས་སྐྱོང་དབང་ཕྱུག་མཆོག་བཅས་ཀྱིས་ཕེབས་བསུའི་སྣེ་ལེན་ཞུས།
གནས་མཆོག་རྡོ་རྗེ་གདན་དུ་༸ཞབས་སོར་འཁོད་སྐབས།
དེ་ནས་མགོན་པོ་གང་ཉིད་མཆོག་གནས་མཆོག་རྡོ་རྗེ་གདན་གྱི་བཞུགས་གནས་ཕོ་བྲང་བོད་དགོན་དགའ་ལྡན་འཕེལ་རྒྱས་གླིང་རྣམ་རྒྱལ་གྲ་ཚང་ཕོ་བྲང་དུ་༸ཞབས་སོར་འཁོད་སྐབས་ཕེབས་ལམ་གཡས་གཡོན་དུ་དད་ལྡན་སེར་སྐྱ་མང་ཚོགས་ཀྱིས་ལག་ཏུ་དཀར་གཙང་མཇལ་དར་དང་མཆོད་རྫས་སྣ་ཚོགས་ཐོགས་ཏེ་རུ་སྟར་བསྒྲིགས་ནས་སྤྲོ་སེམས་རབ་ཏུ་འཁོལ་བ་དང་འབྲེལ་སྐུའི་བྱམས་བརྩེའི་མཐོང་གྲོལ་གྱི་དཀྱིལ་འཁོར་མཇལ་ཁ་ཞུས་པ་དང་ལྷན་ཕེབས་བསུ་གཟབ་རྒྱས་ཞུས་ཡོད།
