༢༠༡༦ ཟླ་ ༡༢ ཚེས་ ༩ རེས་གཟའ་པ་སངས།
༄༅། །ཕྱི་ལོ་ ༢༠༡༦ ཟླ་ ༡༢ ཚེས་ ༩ ཉིན་གྱི་སྔ་དྲོ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཐོག་མར་ཨེམ་བྷེ་དི་ཀར་མཐོ་སློབ་ཏུ་བསླབ་པ་མཐར་སོན་གྱི་དགའ་སྟོན་མཛད་སྒོ་ཐེངས་ ༥ ཐོག་མགྲོན་གྱི་གཙོ་བོར་ཆིབས་སྒྱུར་བསྐྱངས་ཏེ་དགེ་ལས་སློབ་ཕྲུག་རྣམས་ལ་བཀའ་སློབ་སྩལ་རྗེས་ཉིན་གུང་ལྗགས་སྨིན་བཞེས་གྲུབ་བསྟུན། ལྡི་ལི་བོད་ཁང་དང་བོད་ཀྱི་སྨན་རྩིས་ཁང་ཐུན་མོང་ཐོག་གོ་སྒྲིག་ཞུས་པའི་བོད་ཀྱི་དུས་སྟོན་མཛད་སྒོར་ཇི་ལྟར་གདན་ཞུའི་གསོལ་འདེབས་ཞུས་དོན་ལྟར་ཆིབས་སྒྱུར་བསྐྱངས་ནས་བཀའ་སློབ་སྩལ་འདུག
དེ་ཡང་ལྡི་ལི་བོད་ཁང་དབུ་བརྙེས་ནས་མི་ལོ་ ༥༠ འཁོར་བ་དང་བོད་ཀྱི་སྨན་རྩིས་ཁང་དབུ་བརྙེས་ནས་མི་ལོ་ ༡༠༠ འཁོར་བའི་དུས་ཆེན་གཉིས་འཛོམས་ཐོག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཏྱགཱ་རཱ་ཇ་རྩེད་ཐང་ Thyagaraj Stadium ཆེན་མོའི་ནང་མང་ཚོགས་སྟོང་ཕྲག་མང་པོར་མི་ཚེའི་དོན་སྙིང་དང་། བཟང་སྤྱོད་སྐོར་བཀའ་སློབ་སྩལ། མཛད་སྒོའི་ཐོག་མར་རྒྱུད་སྨད་གྲྭ་ཚང་གི་དགེ་འདུན་པ་བཞིས་བཤིས་བརྗོད་གསུང་འདོན་གནང་། དེ་ནས་གོ་སྒྲིག་ཚོགས་ཆུང་གིས་སྟོན་པའི་སྐུ་བརྙན་ཞིག་༸གོང་ས་མཆོག་དང་སྐུ་མགྲོན་གཞན་ལྡི་ལིའི་མངའ་གཞུང་གི་གཙོ་སྐྱོང་བ་སྐུ་ཞབས་ན་ཇིབ་ཇངྒ་ Najeeb Jung མཆོག རྒྱ་གར་དབུས་གཞུང་གི་ནང་སྲིད་བཀའ་བློན་གཞོན་པ་སྐུ་ཞབས་ཀི་རེན་རི་ཇི་ཇུ་ Kiren Rijiju མཆོག ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་མཆོག རྒྱ་གར་ཨིན་ད་ར་གཱན་དྷི་རྒྱལ་ཡོངས་སྒྱུ་རྩལ་བསྟི་གནས་ཁང་གི་འགན་འཛིན་ཟུར་པ་དང་། རྒྱ་གར་གྱི་སྒྱུ་རྩལ་རིག་གནས་ཀྱི་མཁས་པ་སློབ་དཔོན་ཆེན་མོ་འབུམ་རམས་པ་ལྕམ་སྐུ་ཀ་པིལཱ་ཝཏསྱཱ་ཡན་ Dr Kapila Vatsyayan མཆོག་བཅས་ལ་འབུལ་ལམ་ཞུས།
དེ་རྗེས་ཨ་སམ་མངའ་སྡེའི་བྷ་རུ་ཝ་གདོད་མའི་མི་རིགས་ཀྱིས་བཤིས་བརྗོད་གསུང་འདོན་གནང་བསྟུན། བོད་ཀྱི་སྨན་རྩིས་ཁང་གིས་ཆོལ་གསུམ་གཞས་སྣ་འཁྲབ་སྟོན་གཟིགས་འབུལ་ཞུས། དེ་རྗེས་ལྡི་ལི་བོད་ཁང་གི་འགན་འཛིན་རྡོ་རྗེ་དགྲ་འདུལ་ལགས་ཀྱིས་ངོ་སྤྲོད་གསུང་བཤད་གནང་བ་མ་ཟད། བོད་ཁང་གིས་ནང་པའི་གཞུང་ལུགས་རྣམས་སློབ་ཚན་གྱི་ངོ་བོར་དོན་གཉེར་བ་ཕྱི་རྒྱལ་མི་རིགས་འདྲ་མིན་རྣམས་ལ་སློབ་ཁྲིད་གནང་བཞིན་པའི་སློབ་ཚན་ཁག་༸གོང་ས་མཆོག་ལ་སྤྱན་བསྟར་ཞུས། དེ་ནས་སྨན་རྩིས་ཁང་གི་འགན་འཛིན་བཀྲ་ཤིས་ཚེ་རིང་ལགས་ཀྱིས་ངོ་སྤྲོད་གསུང་བཤད་གནང་།
དེ་ནས་ལྡི་ལི་མངའ་གཞུང་གི་གཙོ་སྐྱོང་བ་སྐུ་ཞབས་ན་ཇིབ་ཇངྒ་མཆོག་གིས་རྒྱ་གར་ནི་འཛམ་གླིང་ནང་བཟང་སྤྱོད་ཀྱི་སྟོབས་ཤུགས་བསྐྲུན་མཁན་བསྟི་གནས་གཙོ་བོ་ཡིན་ཞིང་། ཚོགས་བཅར་བ་ཚང་མས་༸གོང་ས་མཆོག་གིས་ལམ་སྟོན་མཛད་པའི་བྱམས་བརྩེ་དང་བཟོད་བསྲན། འཆམ་མཐུན། ཆོག་ཤེས་སོགས་རང་གི་མི་ཚེའི་ནང་ཉིན་རེ་བཞིན་ལག་བསྟར་དོན་འཁྱོལ་ཡོང་ཐབས་གནང་དགོས་པའི་འབོད་སྐུལ་ཞུས་འདུག
ཕྱོགས་མཚུངས་རྒྱ་གར་ནང་སྲིད་བློན་ཆེན་གཞོན་པ་སྐུ་ཞབས་ཀི་རེན་རི་ཇི་ཇུ་ Kiren Rijiju མཆོག་གིས་གསུང་བཤད་གནང་སྐབས། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་སློབ་ལམ་སྟོན་དེ་དག་འབྱུང་འགྱུར་མི་རབས་ཚོར་ལམ་སྟོན་ཞིག་ཆགས་རྒྱུ་ཡིན་སྐོར་སོགས་གསུངས།
དེ་ནས་༸གོང་ས་མཆོག་གིས་བཀའ་སློབ་སྩོལ་སྐབས་མཛད་སྒོ་གོ་སྒྲིག་གནང་མཁན་ལྡི་ལི་བོད་ཁང་དང་སྨན་རྩིས་ཁང་གཉིས་ལ་ཐུགས་རྗེ་ཆེ་ཞུ་གནང་མཛད་པ་མ་ཟད། བོད་མི་རྣམས་བཙན་བྱོལ་དུ་འབྱོར་མཚམས་ཤེས་ཡོན་སྤྱི་དང་ལྷག་པར་དེང་དུས་ཤེས་ཡོན་ལ་ཤུགས་བརྒྱབ་པའི་གྲུབ་འབྲས་ལ་བརྟེན་ད་ཆ་བཙན་བྱོལ་བོད་མིའི་སྤྱི་ཚོགས་ཁྲོད་ཕན་ཐོགས་ཧ་ཅང་བྱུང་ཡོད་སྐོར་དང་། སྟོན་པ་བཅོམ་ལྡན་འདས་ནི་ཚན་རིག་པ་ཞིག་ལ་ངོས་འཛིན་ཞུ་བཞིན་ཡོད་པ་དང་། མགོན་པོ་གང་ཉིད་མཆོག་ཀྱང་ཕྱེད་ཀ་ནང་པ་དང་ཕྱེད་ཀ་ཚན་རིག་པ་ཞིག་ཡིན་སྐོར། དབང་ཤེས་ལ་བརྟེན་པའི་འདོད་ཡོན་ལོངས་སུ་སྤྱོད་རྒྱུའི་ཚོར་བ་དེ་ཙམ་གྱིས་ཡིད་བློར་ཕུགས་ཀྱི་བདེ་བ་ཞིག་སྦྱིན་མ་ཐུབ་པ་དང་། དབང་ཤེས་ཀྱི་ཚོར་བ་བདེ་བ་ལས་ཡིད་བློའི་བདེ་བ་དེ་བརྟན་པ་ཡོད་ཅིང་། ཡིད་བློའི་སྟེང་བདེ་བ་ཡོང་བར་བློ་དང་ཐད་ཀར་འབྲེལ་བ་ཡོད་སྟབས་བློའི་རྣམ་གཞག་དང་བྱེད་ལས། དེ་བཞིན་བློའི་རིགས་འདྲ་མིན་ཡོད་པ་དེ་དག་རྣམ་རྟོག་དང་འབྲེལ་ནས་ལས་བཟང་ངན་གསོག་རྒྱུ་བཅས་ཀྱི་སྐོར་རྒྱ་གར་གནའ་རབས་ཀྱི་རིག་གཞུང་ནང་ཞིབ་ཚགས་པོའི་ཐོག་ནས་གསུངས་ཡོད་སྐོར་དང་། ང་ཚོར་ལུས་པོའི་འཕྲོད་བསྟེན་དགོས་པ་ལྟར་བསམ་བློའི་འཕྲོད་བསྟེན་ཡང་དགོས་རྒྱུ་ཧ་ཅང་གལ་ཆེ་ཡིན་སྐོར་དང་།
དེང་སྐབས་བཀའ་འགྱུར་བསྟན་འགྱུར་པོ་ཏི་གསུམ་བརྒྱ་ཙམ་ཡོད་པ་དེ་དག་ལས་ནང་པའི་ཚན་རིག་དང་ལྟ་གྲུབ་རྣམ་གཞག དེ་བཞིན་ཉམས་ལེན་གྱི་ཆ་བཅས་སོ་སོར་དབྱེ་བ་ཕྱེ་ནས་སྡེ་ཚན་སོ་སོའི་ནང་སློབ་གཉེར་ཇི་ལྟར་བྱེད་དགོས་མིན་ཐད་ལས་གཞི་རྩོམ་བཞིན་ཡོད་སྐོར་དང་། ནང་ཆོས་ནས་གསུང་པའི་ཚན་རིག་དང་ལྟ་གྲུབ་རྣམ་གཞག་དེ་དག་ལ་སློབ་སྦྱོང་བྱེད་པར་ངེས་པར་དུ་ནང་པ་ཡིན་མི་དགོས་པ་མ་ཟད། སློབ་ཚན་དེ་དག་དེང་དུས་ཤེས་ཡོན་ལམ་ལུགས་ནང་དུའང་ཕན་ཐོགས་ཡོད་སྐོར་དང་། དེ་སྔ་རྒྱ་གར་རྡུལ་ཕྲན་དངོས་ཁམས་རིག་པའི་ཚན་རིག་པ་རཱ་ཇ་ར་མནནཱ་ Raja Ramana ཞུ་བ་ཁོང་གིས་མགོན་པོ་ཀླུ་སྒྲུབ་ཀྱིས་ཆོས་རྣམས་རང་བཞིན་གྱི་གྲུབ་པས་སྟོང་པ་ཡིན་ཚུལ་གསུང་པ་དེར་བསྔགས་བརྗོད་རྒྱ་ཆེ་ཞུས་པ་དང་སྦྲགས། ལྟ་གྲུབ་འདི་དེང་སྐབས་ཚད་རྡུལ་དངོས་ཁམས་རིག་པའི་ནང་གི་ལྟ་ཚུལ་དང་ཧ་ཅང་མཚུངས་པོ་ཡོད་ཚུལ་དང་། དེ་བཞིན་སེམས་ཁམས་རིག་པ་བ་སྐུ་ཞབས་ཨེ་རོན་བྷེག་ Aaron Beck ཁོང་གིས་ཆགས་སྡང་གི་བློ་སྐྱེ་སྐབས་བརྒྱ་ཆ་ ༩༠ ཚུལ་མིན་ཡིད་བྱེད་རྣམ་རྟོག་གིས་སྒྲོ་བཏགས་པ་ལས་བྱུང་བ་ཞིག་ཡིན་སྐོར་གསུང་པ་དེ་དཔལ་མགོན་འཕགས་པ་ཀླུ་སྒྲུབ་ཀྱིས་གསུངས་པ་དེ་དག་ཧ་ཅང་འདྲ་མཚུངས་ཡིན་ཚུལ་སོགས་ཀྱི་སྐོར་བཀའ་སློབ་སྩལ་བསྟུན་མང་ཚོགས་ཀྱི་དྲི་བ་རྣམས་ལ་བཀའ་ལན་སྩལ་བ་སོགས་མཛད་འཕྲིན་ཁག་ལེགས་པར་གྲུབ་རྗེས་བཞུགས་གནས་གསོལ་མགྲོན་ཁང་དུ་ཆིབས་༸ཞལ་བསྒྱུར།།
