༢༠༡༦ ཟླ་ ༡༢ ཚེས་ ༡༥་རེས་གཟའ་ཕུར་བུ།
༄༅།།འདི་གའི་ཆེད་གཉེར་གསར་འགོད་པ་ཡེ་ཤེས་ཀུན་གྲགས་ལགས་ཀྱིས་ས་གནས་ནས་བཏང་འབྱོར་ནང་འཁོད་དོན། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་རྒྱ་གར་ལྷོ་ཕྱོགས་ཀར་ཎ་ཊ་ཀ་མངའ་སྡེའི་རྒྱལ་ས་སྦེང་ལོར་ནས་རྒྱང་ཐག་སྤྱི་ལེ་ ༢༣ ཙམ་གྱི་སར་ཡོད་པའི་ཏཱ་ལའི་བླ་མ་མཐོ་རིམ་སློབ་གཉེར་ཁང་དང་བོད་ཀྱི་སྨན་རྩིས་ཁང་ནས་ཇི་ལྟར་སྔོན་ནས་གདན་ཞུའི་གསོལ་འདེབས་ཞུས་དོན་ལྟར་བཀའ་བཞེས་བཟང་པོ་སྨིན་སྩལ་གྱིས། ཕྱི་ལོ་ ༢༠༡༦ ཟླ་ ༡༢ ཚེས་ ༡༤ ཉིན་གྱི་སྔ་དྲོ་མེ་སོར་ནས་ཆིབས་འགྲོ་བརྒྱུད་ཕེབས་ཐོན་གྱིས་ཆུ་ཚོད་ བཅུ་པ་ཙམ་ལ་ཏཱ་ལའི་བླ་མ་མཐོ་རིམ་སློབ་གཉེར་ཁང་དུ་༸ཞབས་སོར་བདེ་བར་འཁོད།
སྐབས་དེར་སློབ་གཉེར་ཁང་གི་སློབ་སྤྱིས་གཙོས་པའི་དགེ་ལས་སློབ་ཕྲུག་ཡོངས་དང་། སྦེང་ལོར་ཁུལ་དུ་སློབ་གཉེར་གནང་བཞིན་པའི་བོད་རིགས་སློབ་ཕྲུག ཉེ་ཆར་བོད་ནས་གསར་དུ་ཕེབས་པའི་བོད་མི་ཁག་གཅིག དེ་བཞིན་རྒྱ་གར་ལྷོ་ཕྱོགས་ཁུལ་གནས་སྡོད་བོད་རིགས་ཁག་གཅིག་བཅས་མི་གྲངས་སྟོང་ཕྲག་ཁ་ཤས་ཀྱིས་གཟབ་མཆོར་སྤྲས་ཏེ་ཕེབས་ལམ་གཡས་གཡོན་དུ་གུས་སྟར་བསྒྲིགས་ནས་སྣེ་ལེན་ཕེབས་བསུ་གཟབ་རྒྱས་ཞུས། དེ་ནས་ཆུ་ཚོད་གཅིག་ཙམ་གྱི་རིང་སྐུ་ངལ་གསོ་རྗེས་ཆུ་ཚོད་ ༡༡ ཐོག་མགོན་པོ་གང་ཉིད་མཆོག་གིས་སློབ་གཉེར་ཁང་དབུ་འབྱེད་མཛད་ཡོད།
དེ་ཡང་མཛད་སྒོའི་ཐོག་མར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དབུས་པའི་སྐུ་མགྲོན་གཙོ་བོ་ཀར་ཎ་ཊ་ཀ་མངའ་སྡེའི་ནང་སྲིད་བློན་ཆེན་སྐུ་ཞབས་པྲ་མེཤ་ཝ་ར་ Dr. G.Parameshwara མཆོག་དང་། ཆེ་བསྟོད་སྐུ་མགྲོན་བོད་མིའི་སྒྲིག་འཛུགས་ཀྱི་ཤེས་རིག་བཀའ་བློན་དངོས་གྲུབ་ཚེ་རིང་མཆོག མེ་སོར་གཙུག་ལག་སློབ་གཉེར་ཁང་གི་ཉེ་བའི་རིགས་བདག་སློབ་དཔོན་ཀེ་ཨེས་རངྒ་པ་ལགས། བཀའ་ཟུར་རྗེ་བཙུན་པདྨ་མཆོག ཕྱོགས་བཞུགས་སྤྱི་འཐུས་ཁག་གཅིག ལྷོ་སྤྱི་དང་རྒྱ་གར་ལྷོ་ཕྱོགས་བོད་མིའི་གཞིས་ཆགས་ཁག་ལྔའི་ས་གནས་འགོ་འཛིན་རྣམ་པ། མཐོ་རིམ་སློབ་གཉེར་ཁང་གི་སློབ་སྤྱིས་གཙོས་པའི་དགེ་ལས་སློབ་ཕྲུག་རྣམ་པ། དབུས་བོད་ཀྱི་སྨན་རྩིས་ཁང་གི་འགན་འཛིན། གཞན་ཡང་གཞུང་དང་གཞུང་འབྲེལ་མིན་པའི་ཚོགས་སྡེ་ཁག་གི་སྐུ་ཚབ་རྣམ་པ་དང་སེར་སྐྱ་མི་མང་བཅས་ཚང་འཛོམས་ཐོག་ཚང་མ་སྐུ་བཞེངས་ཐོག་འཕགས་བོད་གཉིས་ཀྱི་རྒྱལ་གླུ་བཏང་གྲུབ་མཚམས།
སློབ་སྤྱི་བུ་མོ་ཚེ་རིང་ལགས་ཀྱིས་སློབ་གཉེར་ཁང་གི་ལས་བསྡོམས་དང་ལས་འཆར་སྙིང་ལྷ་སྙན་སྒྲོན་འབུལ་ཞུས་བསྟུན། སྐུ་མགྲོན་གཙོ་བོ་མཆོག་དང་ཆེ་བསྟོད་སྐུ་མགྲོན་བཅས་ནས་གསུང་བཤད་གནང་རྗེས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་སློབ་སྩལ་་རྗེས་བོད་ནས་གསར་དུ་ཕེབས་པའི་བོད་མི་ཁག་གཅིག་ལ་མཇལ་ཁ་སྩལ།
ཉིན་གུང་ལྗགས་སྨིན་གྲུབ་མཚམས་ཏཱ་ལའི་བླ་མ་མཐོ་རིམ་སློབ་གཉེར་ཁང་གི་ར་བའི་ནང་དབུས་བོད་ཀྱི་སྨན་རྩིས་ཁང་ནས་བོད་ཀྱི་སྨན་རྩིས་མཐོ་སློབ་གསར་པར་བྱིན་འབེབས་ཐུགས་སྨོན་མཛད་དེ་བཀའ་སློབ་སྩལ་དོན།
སངས་རྒྱས་བསྟན་པ་རྒྱས་པར་ཤོག ཅེས་སྨོན་ལམ་བརྒྱ་ཕྲག་སྟོང་ཕྲག་རྒྱག་པ་ཡིན་ནའང་ལག་ལེན་ངོ་མའི་ཐོག་ནས་སྤྱིར་སངས་རྒྱས་ཀྱི་བསྟན་པར་སོ་སོས་ལག་ལེན་ཐོག་མ་འགེལ་ནས་ཡག་པོ་ཞིག་མ་བྱུང་ན་བསྟན་པ་རྒྱས་པར་ཤོག་ཟེར་རྒྱུ་ནི་ཚིག་ཙམ་རེད། དེ་བཞིན་གསོ་བ་རིག་པའི་བསྟན་པ་རྒྱས་རྒྱུ་གཙོ་བོ་ཁྱེད་རང་ཚོ་འབྲེལ་ཡོད་དགེ་རྒན་དང་སློབ་ཕྲུག་ཚང་མས་གསོ་བ་རིག་པ་ཉམས་པ་སོར་ཆུད་དང་མི་ཉམས་གོང་འཕེལ་ཡོང་རྒྱུར་ཚང་མས་སེམས་ཤུགས་སྐྱེ། གཙོ་བོ་སེམས་པ་བཟང་པོ་དགོས་རྒྱུ་ཧ་ཅང་གལ་ཆེན་པོ་རེད་འདུག
ནམ་རྒྱུན་ངོས་ཀྱིས་འདི་བཤད་ཀྱི་ཡོད། དེ་སྔ་བོད་ལ་བཤད་སྲོལ་ཡོད། སྨན་པ་བྱེ་བྲག་པ་ཞིག་གི་སྨན་དེ་ཙམ་ཕན་པོ་ཡོད་མ་རེད། གང་ཡིན་ཟེར་ན་ཐུགས་སེམས་དེ་དེ་འདྲ་ཞིག་ཡོད་རེད། སྨན་པ་བྱེ་བྲག་པ་ཞིག་མཁས་པའི་ཡོན་ཏན་དེ་ཙམ་མེད་ནའང་སྨན་ཧ་ཅང་ཕན་པོ་ཡོད། གང་ཡིན་ཞེ་ན། ཐུགས་སེམས་ཧ་ཅང་བཟང་པོ་ཡོད་རེད། ཅེས་དེ་འདྲ་བཤད་སྲོལ་ཡོད། སེམས་པ་བཟང་པོ་ཟེར་རྒྱུ་ནི་དུད་འགྲོ་ཡིན་ནའང་སེམས་པ་བཟང་པོ་ཡོད་ན་དགའ་པོ་བྱེད་ཀྱི་འདུག མི་ནི་ལྟ་ཅི་སྨོས། དེར་བརྟེན་སེམས་པ་བཟང་པོ་ཡོད་ན། སེམས་པ་བཟང་པོའི་བདེན་པའི་ནུས་པ་ཞིག་ཡོང་གི་རེད། བོད་པའི་སྨན་གཞུང་དངོས་གནས་དུས་རབས་བརྒྱད་པའི་ནང་ཆོས་རྒྱལ་ཁྲི་སྲོང་ལྡེ་བཙན་གྱི་དུས་སྐབས་ཤིག་ལ་ Semi International medical conference ཚོགས་པ་རེད་ཅེས་དེ་འདྲ་བཤད་རྒྱུ་འདུག དེ་དུས་མཐུན་རྐྱེན་འཛོམས་ཁག་པོ་ཧ་ཅང་རེད། འགྲིམ་འགྲུལ་ཧ་ཅང་ཁག་པོ་རེད།
དེང་སྐབས་མཐུན་རྐྱེན་དང་འགྲིམ་འགྲུལ་དེ་དག་སྟབས་བདེ་པོ་ཆགས་ནས་ཡོད་དུས་དེ་དུས་ཆོས་རྒྱལ་ཚོས་དབུ་ཁྲིད་ནས་དེ་ཙམ་གནང་གི་ཡོད། ད་ཆ་ང་ཚོ་འདིར་མཐུན་རྐྱེན་འཛོམས་པོ་དང་གོ་སྐབས་བཟང་པོ་ཡོད་སྟབས་རིག་པ་སྒྲིམ་དགོས་པ་དུས་རྟག་ཏུ་བསམ་བློ་འཁོར་གྱི་འདུག
ང་ཚོར་གཞི་མ་ཡོད་པ་འདི་ད་དུང་མུ་མཐུད་ནས་ཡར་རྒྱས་གཏང་རྒྱུ་དང་། ལག་པས་སྨན་བརྡུང་རྒྱུ་བཟོ་འདྲ་བོ་དེ་ཚོའི་གྲས་ནི་སྔ་མོ་ཡར་རྒྱས་མེད་པའི་སྐབས་རེད། དེང་སྐབས་བོད་སྨན་འགྲོ་དོན་ཡག་པོ་བྱུང་བ་ཡིན་ན། འཛམ་གླིང་འདིའི་སྟེང་མི་ས་ཡ་མང་པོས་བེད་སྤྱོད་བྱེད་རྒྱུ་ཞིག་ཡོང་སྲིད་ཀྱི་རེད། དུས་དུས་ལ་གསོ་བ་རིག་པའི་སྐོར་ཚོགས་འདུ་འཚོགས་ཏེ་ཡུལ་འདྲ་མིན་ནས་བོད་པའི་གསོ་བ་རིག་པའི་ཐོག་དོ་སྣང་ཡོད་མཁན་དེ་འདྲ་གདན་འདྲེན་ཞུ་རྒྱུ་སོགས་མང་ཙམ་བྱེད་ཐུབ་ན་ཤུགས་མ་ཐུབ་ཀྱི་དྲིལ་བསྒྲགས་དང་དོ་སྣང་ཡོང་གི་རེད།
ཤོག་བུའི་ཐོག་བྲིས་པ་ཙམ་གྱི་དེ་འདྲ་ཙམ་རེད། ལྡི་ལི་ All India Medical Institute གི་སྨན་པ་ཆེ་བ་དེ་འདྲས་སྔོན་མ་བསྟན་འཛིན་ཆོས་གྲགས་དང་ཁོང་ཆོ་ཡོད་དུས་ཁོང་ཚོའི་སར་སྨན་པ་བསྟེན་ནས་སྨན་བཟའ་རྒྱུ་དེ་འདྲ་བྱུང་བ་རེད། ངོས་ཀྱི་ཉམས་མྱོང་ཐོག་ནས་བོད་པའི་སྨན་གྱི་ཐོག་ནས་ན་ཚའི་རྒྱུན་ཆད་རྒྱུ་འདྲ་བོ་ངོས་རང་ཆུང་དུས་སྐབས་ཁ་ལག་ཞག་ཚི་ཆེན་པོ་དེ་འདྲ་ཟ་བ་ཡིན་ན་སང་ཉིན་དེར་ན་བ་དེ་འདྲ་ཡོང་གི་ཡོད། ལོ་ཡར་རྒས་ཡོང་དུས་དེ་འདྲ་ཁྱོན་ནས་ཡོང་གི་མི་འདུག ངོས་ཀྱི་ཕོ་བའི་སྨན་རྟག་པར་ཟ་བཞིན་ཡོད། ཧ་ཅང་ཕན་གྱི་འདུག དེར་བརྟེན་བོད་སྨན་ལ་དངོས་འབྲེལ་གཞི་རྩ་ཡོད་པ་ཞིག་རེད་འདུག ད་དུང་འདིའི་སྟེང་ཡར་རྒྱས་གཏང་རྒྱུ་གང་འདུག་དེའི་ཐོག་བསམ་བློ་གཏང་རྒྱུ་གལ་ཆེན་པོ་རེད། ཅེས་སོགས་ཀྱི་བཀའ་སློབ་སྩལ།།
