༢༠༡༦ ཟླ་ ༡༢ ཚེས་ ༡༠ རེས་གཟའ་སྤེན་པ།

༄༅། །ཕྱི་ལོ་ ༢༠༡༦ ཟླ་ ༡༢ ཚེས་ ༡༠ ཉིན་བཀའ་སྤྱི་མཐུན་མོང་ནས་བོད་སྤྱི་ཡོངས་ཀྱི་གནས་སྟངས་དང་ལྷག་པར་གསེར་རྟ་བླ་རུང་ནང་བསྟན་སློབ་གླིང་གཏོར་བཤིག་གཏོང་བཞིན་པར་གདུང་སེམས་མཉམ་སྐྱེའི་མཆོད་འབུལ་སྨོན་ལམ་སྐབས་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་གསུང་བཤད་གནང་དོན། དེ་རིང་ང་ཚོ་འདིར་འཛོམས་དགོས་དོན་ནི་བླ་རུང་སྒར་དང་ཡ་ཆེན་སྒར། དེ་བཞིན་ཉེ་ཆར་བཀྲ་ཤིས་རབ་བརྟན་ལགས་ཀྱིས་རང་ལུས་མེར་སྲེག་བཏང་བར་བརྟེན་གདུང་སེམས་མཉམ་སྐྱེའི་མཆོད་འབུལ་སྨོན་ལམ་ཆེད་འདིར་འཛོམས་པ་རེད། ད་བར་བོད་ཀྱི་དོན་གྱི་བདག་པོ་རྒྱལ་གཅེས་དཔའ་བོ་དཔའ་མོ་མང་པོ་ཞིག་གིས་བོད་ཀྱི་རྩ་དོན་ཆེན་རང་གི་ལུས་སྲོག་ལོངས་སྤྱོད་བློས་གཏོང་གནང་མཁན་ཡོངས་དང་།

ལྷག་པར་རང་ལུས་མེར་སྲེག་གནང་མཁན་རྒྱལ་གཅེས་པ་ ༡༤༥ བྱུང་ཡོད་པ་དང་། དེའི་ཁོངས་ནས་ ༡༢༦ འདས་གྲོངས་སུ་ཕྱིན་ཡོད་སྟབས། རྒྱལ་གཅེས་པ་འདས་གསོན་ཕོ་མོ་ཡོངས་ཀྱི་ཆེད་ཐུགས་སྨོན་གནང་རོགས་ཞེས་ཞུ་རྒྱུ་ཡིན།  དམིགས་བསལ་བླ་རུང་སྒར་ལྟ་བུ་མཚོན་ན། ཉེ་ཆར་རྒྱ་ནག་གཞུང་ནས་བླ་རུང་སྒར་གཏོར་བཤིག་བཏང་སྟེ་དེ་སྔ་གྲྭ་བཙུན་ཁྲི་གཅིག་ལྷག་ཙམ་ཡོད་པ་དེ་སྟོང་ཕྲག་ལྔ་ཉུང་འཕྲི་བྱེད་རྒྱུའི་འཆར་གཞི་གནག་པོ་ཞིག་བཏིང་ནས་ལག་བསྟར་བྱས་དང་བྱེད་མུས་རེད། ཡ་ཆེན་སྒར་ལྟ་བུ་ཡིན་ན། གོ་ཐོས་ལ་བཙུན་མ་ཁྲི་ཚོགས་ཡོད་པའི་ཁོངས་ནས་བཙུན་མ་ཆིག་སྟོང་ཕྱིར་འབུད་བཏང་ཟིན་འདུག དེ་ཙམ་མ་ཟད་བླ་རུང་སྒར་དང་ཡ་ཆེན་སྒར་ནས་ཕྱིར་འབུད་བཏང་བའི་གྲྭ་བཙུན་རྣམས་སོ་སོའི་ས་གནས་ས་ཐོག་ཏུ་འབྱོར་སྐབས་དགོན་སྡེ་ཁག་གི་ནང་འཛུལ་ཞུགས་དང་ཆ་ཤས་ལེན་མི་ཆོག་པ་མ་ཟད། བླ་རུང་སྒར་ནས་ཕྱིར་འབུད་བཏང་བའི་གྲྭ་བཙུན་རྣམས་སླར་ཡང་བླ་རུང་སྒར་དུ་ཕྱིར་ལོག་མི་བྱེད་པའི་གྱན་རྒྱ་བཙན་དབང་ཐོག་བཞག་བཅུག་ཡོད་པའི་གནས་ཚུལ་གོ་སྐབས། ང་ཚོ་བཙན་བྱོལ་ནང་ཡོད་པའི་བོད་མི་ཚོས་བོད་ནང་གི་བོད་མི་ཚོའི་མགྲིན་ཚབ་པ་བྱེད་དགོས་པའི་འགན་འཁྲི་ཡོད་པར་བརྟེན། བཀའ་སྤྱི་ཐོན་མོང་གིས་གདུང་སེམས་མཉམ་སྐྱེའི་མཆོད་འབུལ་སྨོན་ལམ་ཚོགས་གཏན་འཁེལ་ཏེ་དེ་རིང་འདིར་འཛོམས་པ་རེད།

དེ་སྔ་ང་ཚོའི་ལོ་རྒྱུས་ནང་བོད་བཙན་བཟུང་བྱས་རྗེས་རྒྱ་ནག་གཞུང་གིས་ཐོག་མར་དགོན་སྡེ་ཁག་རྩ་མེད་གཏོང་རྒྱུ་འགོ་བཙུགས་པ་རེད། ཀུན་གཟིགས་པཎ་ཆེན་རིན་པོ་ཆེའི་ཡིག་འབྲུ་ཁྲི་བདུན་ནང་ཕྱི་ལོ་ ༡༩༦༢ བར་བོད་ནང་གི་དགོན་སྡེ་ཁག་བརྒྱ་ཆ་ ༩༨ གཏོར་བཤིག་བཏང་ཟིན་པ་འཁོད་ཡོད། ཕྱི་ལོ་ ༡༩༦༢ ལོ་ཚིགས་འདི་ཧ་ཅང་གལ་ཆེན་པོ་རེད། གཞི་རྩའི་རྒྱལ་སྤྱི་དང་དེ་བཞིན་རྒྱ་ནག་གི་ནང་རིག་གནས་གསར་བརྗེ་སྐབས་བོད་ནང་དགོན་སྡེ་གཏོར་བཤིག་བཏང་བ་བཤད་སྲོལ་ཡོད། རིག་གནས་གསར་བརྗེ་མ་བྱུང་བའི་ལོ་གསུམ་གོང་ནས་བོད་ནང་དགོན་སྡེ་གཏོར་བཤིག་བཏང་ཟིན་པ་དེ་ག་རེ་མཚོན་བཞིན་ཡོད་ཅེ་ན། ང་ཚོ་བོད་མི་རིགས་ཀྱི་དཔལ་ཡོན་དེ་ནང་ཆོས་ཆགས་ཡོད། བོད་མི་རིགས་ཀྱི་རིག་གཞུང་དེ་ཡང་ནང་ཆོས་ལ་རྟེན་བསྡད་པ་ཞིག་ཆགས་ཡོད། བོད་ཀྱི་ནང་ཆོས་རྩ་མེད་གཏང་ཐུབ་ན་བོད་ཀྱི་དཔལ་ཡོན་གཏོར་བཤིག་གཏང་ཐུབ་ཀྱི་ཡོད་པ་དང་། བོད་ཀྱི་རིག་གནས་གཏོར་བཤིག་གཏང་ཐུབ་ཚེ་བོད་དེ་རྒྱ་སྡེར་བསྒྱུར་རྒྱུ་དང་བོད་རིགས་རྣམས་རྒྱ་རིགས་ལ་བསྒྱུར་རྒྱུའི་འཆར་གཞི་གནག་པོ་བཏིང་སྟེ་མུ་མཐུད་འབད་བརྩོན་བྱས་དང་བྱེད་བཞིན་ཡོད། གཞི་རྩའི་བོད་ནང་ཆོས་བརྒྱུད་ཁག་ཡོངས་ཀྱི་གདན་ས་དེ་དག་གཏོར་བཤིག་བཏང་བ་རེད།

གདན་ས་ཆེན་པོ་གསུམ་གྱི་ནང་དེ་སྔ་དགེ་འདུན་པའི་ཞལ་གྲངས་སྟོང་ཕྲག་མང་པོ་ཡོད་པ་དེ་ད་ཆ་བརྒྱ་ཕྲག་ཁ་ཤས་ལས་མེད་པའི་གནས་སྟངས་ཆགས་ཡོད། རིག་གནས་གསར་བརྗེ་སྐབས་དགོན་པ་གཏོར་བཤིག་དང་གྲྭ་བཙུན་ཕྱིར་འབུད་གཏོང་རྒྱུ། བཙོན་འཇུག་དང་ཉེས་རྡུང་བཏང་བ་སོགས་བྱུང་བ་རེད། ཉེ་ཆར་ཐོན་པའི་བརྙན་འཕྲིན་ནང་བཙུན་མ་ཁག་གཅིག་ལ་དམག་ཆས་གཡོགས་ཏེ་གུང་ཁྲན་ཏང་ལ་བསྟོད་གླུ་བཏང་བཅུག་པ་དང་། དེ་བཞིན་བཙུན་མ་ཁག་གཅིག་ལ་སྡིངས་ཆའི་ཐོག་གཞས་སྣ་འཁྲབ་སྟོན་བྱེད་བཅུག་འདུག སྐབས་དེར་ལྟད་མོ་ལྟ་མཁན་མི་སྐྱ་དེ་དག་ཕལ་ཆེར་གུང་ཁྲན་ཏང་གི་ཏང་མི་ཚོ་རེད། འདི་ལྟ་བུ་བྱེད་བཅུག་པ་དེས་བོད་ནང་འགྲོ་བ་མིའི་ཐོབ་ཐང་དང་། གཏམ་བརྗོད་རང་དབང་མེད་པ། ཆོས་དད་རང་དབང་མེད་པ་ཧ་ཅང་གསལ་པོ་རེད། དེ་སྔ་རིག་གནས་གསར་བརྗེ་སྐབས་ཀྱི་བྱེད་སྟངས་བྱེད་ལུགས་དེ་བསྐྱར་གསོ་བྱེད་བཞིན་ཡོད་པའི་རྣམ་པ་མངོན་ཐུབ། དེར་བརྟེན་བོད་མིའི་སྒྲིག་འཛུགས་ཀྱི་ངོས་ནས་དེར་སེམས་འཚབ་ཆེན་པོ་ཡོད་པ་མ་ཟད། རིག་གནས་གསར་བརྗེ་ལྟ་བུའི་སྲིད་བྱུས་ལག་བསྟར་བྱས་པ་དེར་ཐ་གཅིག་ཏུ་ངོ་རྒོལ་ཡོད་ཅེས་ཞུ་རྒྱུ་ཡིན།

དེ་བཞིན་རྒྱ་ནག་གཞུང་ནས་ཆོས་དད་དང་འབྲེལ་བའི་ཐོག་སྲིད་བྱུས་གསར་པ་ཞིག་འཐོན་བཞིན་ཡོད། ང་ཚོས་ཆོས་དད་དང་འབྲེལ་བའི་ཟིན་བྲིས་དེ་མཐོང་ཡོད། དེའི་ནང་དགོན་སྡེ་ཁག་ལ་དམ་བསྒྲགས་བྱེད་རྒྱུ་དང་། གྲྭ་བཙུན་གྱི་ཞལ་གྲངས་ཉུང་དུ་གཏོང་རྒྱུ། དེ་དང་དེ་ལྟ་བུའི་དམ་བསྒྲགས་ཅན་གྱི་སྲིད་བྱུས་དེ་དག་གསལ་བསྒྲགས་བྱེད་རྒྱུ་དང་དེ་ནས་ལག་བསྟར་བྱེད་རྒྱུའི་སྲིད་བྱུས་ཤིག་མཐོང་སྐབས། བླ་རུང་སྒར་གཏོར་བཤིག་དང་ཡ་ཆེན་སྒར་ནང་བཙུན་མའི་ཞལ་གྲངས་ཉུང་འཁྲི་བྱེད་རྒྱུ། དེ་བཞིན་བཙུན་པ་རྣམས་ལ་མནར་གཅོད་བཏང་སྟེ་གཞས་སྣ་འཁྲབ་སྟོན་དང་གུང་ཁྲན་ཏང་ལ་བསྟོད་གླུ་བཏང་བཅུག་པ་སོགས་རིག་གནས་གསར་བརྗེ་བསྐྱར་གསོ་བྱེད་པའི་རྣམ་པ་མཐོང་སྐབས་ཧ་ཅང་སེམས་འཚབ་ཡོང་བཞིན་འདུག གོ་ཐོས་ལ་བླ་རུང་སྒར་དང་ཡ་ཆེན་སྒར་ནང་རྒྱ་རིགས་མང་པོ་ཞིག་ཡོད་པ་ཧ་ཅང་གསལ་པོ་རེད་འདུག རྒྱ་རིགས་དེ་དག་གི་ཆོས་དད་རང་དབང་ལའང་དོ་ཕོག་འགྲོ་བཞིན་ཡོད་སྟབས། རྒྱ་ནག་ནང་དང་ཕྱི་རྒྱལ་ཡུལ་གྲུ་ཁག་གི་ནང་ཡོད་པའི་རྒྱ་རིགས་ཡོངས་ནས་བླ་རུང་སྒར་གཏོར་བཤིག་གཏོང་རྒྱུ་དེ་འགྲིག་གི་མེད་པ་དང་། ཡ་ཆེན་སྒར་ནས་བཙུན་མའི་ཞལ་གྲངས་ཉུང་འཕྲི་བྱེད་རྒྱུ་དེ་འགྲིག་གི་མི་འདུག་ཅེས་ང་ཚོས་མཉམ་རུབ་ཀྱིས་འབོད་སྒྲ་གཅིག་གྲགས་ཐོག་བོད་ནང་གི་བོད་མི་ཚོར་ཆོས་དད་རང་དབང་དགོས་པའི་རྒྱ་ནག་གཞུང་ལ་འབོད་སྐུལ་ཞུ་དགོས།

དེ་བཞིན་ཉེ་ཆར་མཉམ་འབྲེལ་རྒྱལ་ཚོགས་ཀྱི་དྲུང་ཆེ་གསར་པ་རྒྱ་ནག་ནང་ཕེབས་སྐབས་འགྲོ་བ་མིའི་ཐོབ་ཐང་དང་འབྲེལ་བའི་ཐོག་ནས་གསུང་བཤད་གནང་འདུག རྒྱ་ནག་གི་རྒྱལ་ས་པེ་ཅིང་ནང་འགྲོ་བ་མིའི་ཐོབ་ཐང་དང་འབྲེལ་བའི་གསུང་བཤད་གནང་མཁན་ཧ་ཅང་དཀོན་པོ་རེད། ཁོང་ལ་བསྔགས་བརྗོད་ཞུས་པ་དང་སྦྲགས་ཁོང་ནས་མཉམ་འབྲེལ་རྒྱལ་ཚོགས་ཀྱི་སྤྱི་ཁྱབ་དྲུང་ཆེའི་འགན་དབང་ཆ་ཚང་བཞེས་གྲུབ་རྗེས་བོད་དོན་དེ་གལ་ཆེན་པོ་རྩིས་ཏེ་བོད་ནང་འགྲོ་བ་མིའི་ཐོབ་ཐང་ལོངས་སུ་སྤྱོད་ཐུབ་ཐབས་སུ་འབད་བརྩོན་གནང་རོགས་ཞེས་འབོད་སྐུལ་ཞུ་རྒྱུ་ཡིན།

དེ་དང་ཆབས་ཅིག་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་བསྟི་གནས་ཁང་གི་འགན་འཛིན་པི་རིན་སི་ཛེད་མཆོག་ད་ལྟའི་ལས་གནས་ཐོག་བསྐོ་གཞག་གནང་སྐབས། ཁོང་གིས་བོད་ནང་ཕེབས་འདོད་ཡོད་ཅེས་གསུངས་པ་ལྟར་འཕྲལ་དུ་ཕེབས་རོགས་གནང་ཞེས་ཞུ་རྒྱུ་ཡིན། ཁོང་ཉིད་ལ་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་འགན་ཡོད་པར་བརྟེན། བོད་ནང་སྤྱི་ཡོངས་ཀྱི་འགྲོ་བ་མིའི་ཐོབ་ཐང་གི་གནས་སྟངས་གང་འདྲ་ཡིན་མིན་སྤྱི་དང་། ལྷག་པར་བླ་རུང་སྒར་དང་ཡ་ཆེན་སྒར་གྱི་དངོས་ཡོད་གནས་སྟངས་ཇི་ཡིན་ཐོག་རྟོག་ཞིབ་གནང་རོགས་ཞེས་འབོད་སྐུལ་ཞུ་རྒྱུ་དང་། དེ་བཞིན་ཕྱི་ཟླ་ ༣ ནང་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་ཚོགས་འདུའི་དབུ་འབྱེད་གསུང་བཤད་ནང་བོད་དང་བོད་མིའི་འགྲོ་བ་མིའི་ཐོབ་ཐང་སྐོར་གསུང་བཤད་གནང་རོགས་ཞེས་རེ་འདུན་ཞུ་རྒྱུ་ཡིན། མཐའ་དོན་རྒྱལ་གཅེས་པ་བཀྲ་ཤིས་རབ་བརྟན་ལགས་ཀྱིས་གཙོས་བོད་བསྟན་སྲིད་མི་རིགས་ཀྱི་དོན་དུ་རང་ལུས་མེར་སྲེག་གནང་མཁན་རྒྱལ་གཅེས་པ་འདས་གསོན་ཡོངས་དང་། དེ་བཞིན་བླ་རུང་སྒར་གྱི་བཙུན་མ་གསུམ་གྱིས་རང་སྲོག་བཅད་ཡོད་སྟབས། ཁོང་རྣམ་པའི་ཆེད་ཚང་མས་ཐུགས་སྨོན་གནང་རོགས་ཞེས་རེ་འདུན་ཞུ་རྒྱུ་གཙོ་བོ་འདི་ཡིན། ཞེས་གསུང་བཤད་གནང་ཡོད།།