༢༠༡༦ ཟླ་ ༡༢ ཚེས་ ༦ རེས་གཟའ་མིག་དམར།
༄༅། །ཞིང་གཤེགས་དམ་པ་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་གི་ཚ་མོ་ཉི་མ་ལྷ་མོ་ལགས་དེང་སྐབས་ཡུ་རོབ་གྲོས་ཚོགས་ཀྱིས་གཙོས་ཡུ་རོབ་མཐུན་ཚོགས་སོགས་སུ་ཞུ་གཏུག་གི་ལས་འགུལ་སྤེལ་མུས་ལྟར། སྦར་སེལ་སྐུ་ཚབ་དོན་གཅོད་བཀྲ་ཤིས་ཕུན་ཚོགས་ལགས་ཀྱིས་སྦར་སེལ་དུ་ཡུ་རོབ་མཐུན་ཚོགས་ཀྱི་འགྲོ་བ་མིའི་ཐོབ་ཐང་ཐོག་ཕྱག་ལས་གནང་མཁན་ཚོགས་པའི་ཚོགས་གཙོ་ལྕམ་ཨོ་བྷ་ར་ཡེན་ O’Brian ལགས་དང་། ཡུ་རོབ་མཐུན་ཚོགས་ཀྱི་ Working Group on Asia and Oceania (COASI) ཞེས་པའི་ཚོགས་གཙོ་སྐུ་ཞབས་ Grzegorzewski ལགས་དང་ལྷན་མཇལ་འཕྲད་གནང་འདུག སྐབས་དེར་སྦར་སེལ་དོན་ཁང་གི་བོད་དོན་རྒྱབ་སྐྱོར་ཞུ་གཏུག་ཚན་པའི་ལས་བྱེད་རིག་འཛིན་ཆོས་སྒྲོན་ལགས་དང་། ཉི་མ་ལྷ་མོ་ལགས། ཕྱི་དྲིལ་ལས་ཁུངས་ཀྱི་འགྲོ་བ་མིའི་ཐོབ་ཐང་ཚན་པའི་ལས་བྱེད་བསྟན་འཛིན་བསོད་ནམས་ལགས་བཅས་ལྷན་བཅར་ཞུས་འདུག
མཇལ་འཕྲད་སྐབས་སྐུ་ཚབ་དོན་གཅོད་ཀྱིས་ཡུ་རོབ་མཐུན་ཚོགས་ཀྱི་འབྲེལ་ཡོད་འགན་འཛིན་རྣམ་པར་༸གོང་ས་མཆོག་ཡུ་རོབ་ཁུལ་དུ་ཆིབས་སྒྱུར་སྐོར་དང་། བོད་ནང་གི་ཛ་དྲག་གནས་སྟངས་སྤྱི་དང་། ལྷག་པར་གསེར་རྟ་བླ་རུང་སྒར་གཏོར་བཤིག་གཏོང་བཞིན་པའི་ཛ་དྲག་གནས་སྟངས། དེ་བཞིན་རིང་མིན་ཡུ་རོབ་མཐུན་ཚོགས་དང་རྒྱ་ནག་དབར་འགྲོ་བ་མིའི་ཐོབ་ཐང་ཐོག་གྲོས་མོལ་གནང་རྒྱུ་བཅས་ངོ་སྤྲོད་ཞུས་འདུག
སྐབས་དེར་ཡུ་རོབ་མཐུན་ཚོགས་ཀྱི་འབྲེལ་ཡོད་འགན་འཛིན་རྣམ་པས་བོད་ཀྱི་གནད་དོན་ཐོག་མུ་མཐུད་སེམས་འཚབ་གནང་བཞིན་ཡོད་པ་མ་ཟད། ལྷག་པར་བོད་རྒྱ་འབྲེལ་མོལ་མཚམས་ཆད་པ་དེར་བློ་འཚབ་ཧ་ཅང་གནང་བཞིན་ཡོད་སྐོར་གསུངས་པ་དང་སྦྲགས། ཡུ་རོབ་མཐུན་ཚོགས་དང་རྒྱ་ནག་དབར་འགྲོ་བ་མིའི་ཐོབ་ཐང་ཐོག་གནས་སྟངས་བརྗེ་ལེན་བྱ་རྒྱུའི་ལྷན་ཚོགས་དེ་ཡང་འཚོགས་ཐུབ་མིན་ངེས་གཏན་མེད་པའི་གནས་སུ་ལྷུང་ཡོད་སྐོར་གསུངས།
དེ་རྗེས་ཉི་མ་ལྷ་མོ་ལགས་ཀྱིས་ཞིང་གཤེགས་དམ་པ་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་གི་གནད་དོན་དང་འབྲེལ་བའི་སྐོར་ངོ་སྤྲོད་གནང་བ་དང་ཆབས་ཅིག རིན་པོ་ཆེ་དམ་པ་ཁོང་བཙོན་ཁང་དུ་དོགས་གཞི་ཧ་ཅང་ཆེ་བའི་གནས་སྟངས་འོག་སྐུ་གྲོངས་བར་བརྟེན། སྐུ་གྲོངས་རྐྱེན་ངོ་མ་གང་ཡིན་ཐད་རང་དབང་ཅན་གྱི་སྡེ་ཚན་ཞིག་ནས་ཕྱོགས་ལྷུང་སྤངས་པའི་ཞིབ་འཇུག་གནང་སྐྱོང་ཡོང་བའི་འབོད་སྐུལ་ཡང་ཞུས་འདུག སྐབས་དེར་འགན་འཛིན་རྣམ་པས་ཉི་མ་ལྷ་མོ་ལགས་ལ་སེམས་གསོ་གནང་བ་དང་འབྲེལ་ཁོང་གི་བདེ་འཇགས་དང་ཁོང་གི་ནང་མིའི་མ་འོངས་མདུན་ལམ་ཐོག་བློ་འཚབ་ཡོད་སྐོར་གསུངས་འདུག
ཕྱོགས་མཚུངས་བོད་མིའི་སྐུ་ཚབ་རྣམས་ཀྱིས་བྷེལ་འཇམ་གྲོས་ཚོགས་ཀྱི་ Christian Democratic and Flemish (CD&V) party ཞེས་པའི་ཆབ་སྲིད་ཚོགས་པའི་འཐུས་མི་ལྕམ་ Ms Sabine de Bethune ལགས་དང་། New Flemish Alliance (N-VA) party ཞེས་པའི་ཆབ་སྲིད་ཚོགས་པའི་འཐུས་མི་ལྕམ་ An Capoen ལགས་བཅས་དང་ལྷན་མཇལ་འཕྲད་གནང་འདུག
སྐབས་དེར་སྦར་སེལ་སྐུ་ཚབ་དོན་ཁང་གི་དྲུང་ཆེ་མཐུ་སྟོབས་རྣམས་རྒྱལ་ལགས་ཀྱང་ལྷན་བཅར་ཞུས་འདུག ཁོང་རྣམ་པས་བོད་དོན་ཞུ་གཏུག་གནང་གྲུབ་བསྟུན་གྲོས་ཚོགས་འཐུས་མི་རྣམ་པས་གྲོས་ཚོགས་ནང་བོད་དོན་སྐོར་གླེང་སློང་ཤུགས་ཆེ་ཙམ་གནང་རྒྱུའི་ཁས་ལེན་གནང་ཡོད་པ་མ་ཟད། བྷེལ་འཇམ་གཞུང་ལ་བོད་དོན་ཐོག་དྲི་བ་གཏོང་རྒྱུ་མ་ཟད། བོད་དོན་གྲོས་ཆོད་ཀྱང་འཇོག་ཐབས་གནང་རྒྱུ་ཡིན་སྐོར་གསུངས་འདུག
༸གོང་ས་༸སྐྱབས་མགོན་ཆེན་པོ་མཆོག་ལ་ནོ་བེལ་ཞི་བདེའི་གཟེངས་རྟགས་འབུལ་ལམ་ཞུས་ཏེ་མི་ལོ་ ༢༧ འཁོར་བའི་དུས་དྲན་སྲུང་བརྩིའི་མཛད་སྒོ་ཕྱི་ཚེས་ ༣ ཉིན་གྱི་ཕྱི་དྲོ་ཚོགས་པ་དེར་སྦར་སེལ་སྐུ་ཚབ་དོན་གཅོད་དང་། འབྲེལ་ཡོད་ལས་བྱེད། དེ་བཞིན་ཉི་མ་ལྷ་མོ་ལགས་དང་། བསྟན་འཛིན་བསོད་ནམས་ལགས་བཅས་མཉམ་ཞུགས་གནང་འདུག
དེ་ཡང་དུས་དྲན་སྲུང་བརྩིའི་མཛད་སྒོར་བོད་མི་ ༢༥༠ ཙམ་འདུ་འཛོམས་ཐོག་བྷེལ་འཇམ་བོད་རིགས་ཚོགས་པའི་ཚོགས་གཙོ་ཀརྨ་ཚེ་རིང་ལགས་ཀྱིས་དུས་དྲན་ངོ་སྤྲོད་ཀྱི་གསུང་བཤད་གནང་ཡོད་པ་དང་། སྐབས་དེར་སྐུ་ཚབ་དོན་གཅོད་བཀྲ་ཤིས་ཕུན་ཚོགས་ལགས་ཀྱིས་བོད་མིའི་འཐབ་རྩོད་སྐོར་ངོ་སྤྲོད་སྙིང་བསྡུས་གནང་མཐར། ཕྱི་ལོ་ ༡༩༨༩ ལོར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ནོ་བེལ་ཞི་བདེའི་གཟེངས་རྟགས་འབུལ་ལམ་ཞུས་པར་བརྟེན་དུས་ཚིགས་དེ་ནི་བོད་རྣམས་ཀྱིས་དགའ་སྤོབས་བྱེད་འོས་པའི་ཉིན་མོ་ཞིག་ཡིན་སྐོར་དང་། དེ་བཞིན་ཕྱི་ཟླ་ ༡༢ ཚེས་ ༡༠ ཉིན་ནི་རྒྱལ་སྤྱིའི་འགྲོ་བ་མིའི་ཐོབ་ཐང་ཉིན་མོ་ཡང་ཡིན་སྟབས། ང་ཚོས་བོད་ནང་གི་ཛ་དྲག་གནས་སྟངས་དྲན་གསོ་ཞུ་ཐོག་བོད་ནང་གི་འགྲོ་བ་མིའི་ཐོབ་ཐང་ལ་རྒྱ་ནག་གཞུང་གིས་ངེས་པར་དུ་བརྩི་བཀུར་དང་ལེན་ཞུ་རྒྱུའི་ཆེད་ལས་འགུལ་སྤེལ་དགོས་སྐོར་སོགས་ཀྱི་གསུང་བཤད་གནང་ཡོད། །
