༢༠༡༦ ཟླ་ ༡༢ ཚེས་ ༡༩ རེས་གཟའ་ཟླ་བ།
༄༅། །ཕྱི་ལོ་ ༢༠༡༦ ཟླ་ ༡༢ ཚེས་ ༡༨ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་དང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་རྒྱ་གར་ལྷོ་ཕྱོགས་ཀར་ན་ཊ་ཀ་མངའ་སྡེའི་ཀར་ཝར་རྫོང་དཔོན་སྐུ་ཞབས་ནུ་ཀུལ་ S S Nukul མཆོག་དང་། སྤྱི་ཁྱབ་འཛིན་སྐྱོང་འགན་འཛིན་ CEO སྐུ་ཞབས་ཅནྡྲ་ཤེ་ཁར་ནེག་Mr Chandrasekhar Naik མཆོག་རྣམ་གཉིས་དང་ལྷན་རྫོང་དཔོན་ལས་ཁུངས་སུ་མཇལ་འཕྲད་ཞུས་ནས་སྐར་མ་ ༣༠ རིང་བཙན་བྱོལ་བོད་མིའི་གནས་སྟངས་སྤྱི་དང་། ལྷག་པར་རྒྱ་གར་དབུས་གཞུང་གིས་གཏན་འབེབས་གནང་བའི་བཙན་བྱོལ་བོད་མིར་མཐུན་རྐྱེན་སྦྱོར་སྤྲོད་བྱེད་ཕྱོགས་ཀྱི་སྲིད་བྱུས། ཕྱི་ལོ་ ༢༠༡༤ ཞེས་པའི་ཆ་རྐྱེན་འོག་བོད་མི་བཙན་བྱོལ་བ་རྣམས་ལ་ས་ཞིང་བོགས་གཏོང་གི་སྲིད་བྱུས་འཛིན་སྟངས་སྐོར་སོགས་གོ་བསྡུར་གནང་འདུག སྐབས་དེར་ལྷོ་སྤྱི་ཆོས་འཕེལ་ཐུབ་བསྟན་ལགས་དང་བདེ་སླར་ས་གནས་འགོ་འཛིན་ལྷག་པ་ཚེ་རིང་ལགས་ལྷན་བཅར་ཞུས་འདུག
དེ་ཡང་ཕྱི་ལོ་ ༢༠༡༦ ཟླ་ ༡༢ ཚེས་ ༢༡ ཉིན་རྒྱ་གར་གཞུང་གི་བཙན་བྱོལ་བོད་མིར་མཐུན་རྐྱེན་སྦྱོར་སྤྲོད་བྱེད་ཕྱོགས་ཀྱི་སྲིད་བྱུས་ཕྱི་ལོ་ ༢༠༡༤ ཞེས་པའི་ཆ་རྐྱེན་འོག་བཙན་བྱོལ་བོད་མི་རྣམས་ལ་ས་ཞིང་བོགས་གཏོང་གི་ཁྲིམས་ལུགས་དོན་ཚན་དང་འབྲེལ་ནས་རྒྱ་གར་དབུས་གཞུང་དང་དབུས་བོད་མིའི་ངལ་སེལ་ཚོགས་པ་གཉིས་དབར་གན་རྒྱའི་སྟེང་མཚན་རྟགས་འགོད་རྒྱུ་ཡིན་འདུག ཐེངས་འདིར་གན་རྒྱའི་ཐོག་མཚན་རྟགས་བཀོད་མཚམས་བཙན་བྱོལ་བོད་མིར་ས་ཞིང་བོགས་གཏོང་དང་འབྲེལ་བའི་གན་རྒྱར་མཚན་རྟགས་བཀོད་པ་ཐོག་མ་ཆགས་རྒྱུ་ཡིན་འདུག
ས་གནས་འགོ་འཛིན་རྣམ་པས་དབུས་བོད་མིའི་ངལ་སེལ་ཚོགས་པར་གན་རྒྱའི་གནད་དོན་སྐོར་གསལ་བཤད་ཞུ་རྒྱུ་དང་། རྫོང་དཔོན་མཆོག་ནས་དེའི་སྐོར་རྒྱ་གར་དབུས་གཞུང་ལ་སྙན་སེང་ཞུ་རྒྱུ་ཡིན་འདུག མཇལ་འཕྲད་སྐབས་རྒྱ་གར་རྫོང་དཔོན་སོགས་ནས་བོད་མིའི་དབུ་ཁྲིད་རྣམས་ལ་མོན་གྷོ་ས་གནས་སོགས་ནང་རྒྱལ་སྤྱིའི་རྣམ་པ་ལྡན་པའི་དུས་སྟོན་དང་མཛད་སྒོ་སོགས་གོ་སྒྲིག་གང་མང་གནང་ཐབས་གནང་རྒྱུའི་འབོད་སྐུལ་ཞུས་པར་བོད་མིའི་དབུ་ཁྲིད་རྣམ་པས་མོས་མཐུན་གནང་འདུག
མཇལ་འཕྲད་གྲུབ་བསྟུན་དཔལ་ལྡན་སྲིད་སྐྱོང་མཆོག་གི་ས་གནས་བརྙན་འཕྲིན་གསར་འགྱུར་ཚན་པ་སན་ཇི་ཝ་ནི་ Sanjivani TV དང་། ཊི་ཝི་ TV 9 སོགས་ཀྱི་བཅར་འདྲིར་དང་ལེན་གནང་ཡོད་པ་བཅས།།
