༢༠༡༦ ཟླ་ ༡༢ ཚེས་ ༡༩ རེས་གཟའ་ཟླ་བ།
༄༅། །དཔལ་ལྡན་སྲིད་སྐྱོང་བློ་བཟང་སེངྒེ་མཆོག་དང་ལྡི་ལི་སྐུ་ཚབ་དོན་གཅོད་བཀའ་ཟུར་འབྲོང་ཆུང་དངོས་གྲུབ་མཆོག་སོགས་ཀྱིས་རྒྱ་གར་གཞུང་གི་དཔལ་འབྱོར་བློན་ཆེན་ལས་ཁུངས་ཀྱི་ཟུང་དྲུང་སུ་རབ་གྷག་ Dr Saurabh Garg མཆོག་མཇལ་འཕྲད་ཞུས་ནས་དུས་དབང་ཐེངས་ ༣༤ སྐབས་མཐུན་འགྱུར་རོགས་རམ་གནང་ཐབས་ཡོང་བའི་འབོད་སྐུལ་ཞུས་འདུག སྐབས་དེར་ཟུང་དྲུང་མཆོག་གིས་དུས་དབང་སྐབས་གནས་མཆོག་རྡོ་རྗེ་གདན་ས་གནས་སོགས་སུ་དངུལ་སྒོར་ལེན་བདེའི་སྒམ་ཆུང་ ATM machines གང་མང་འཛུགས་རྒྱུ་དང་། དངུལ་སྒོར་དཀོན་པོའི་དཀའ་ངལ་སེལ་ཐབས་གནང་རྒྱུའི་ཞལ་བཞེས་གནང་འདུག་པ་མ་ཟད། ཕྱི་རྒྱལ་ཡུལ་གྲུ་འདྲ་མིན་ནས་དད་ལྡན་ཆོས་ཞུ་བ་རྣམས་ཀྱི་དངུལ་ལོར་རྒྱ་གར་དངུལ་སྒོར་དུ་བརྗེ་སྒྱུར་གྱི་དཀའ་ངལ་དེ་ཡང་གང་ཐུབ་སེལ་ཐབས་གནང་རྒྱུའི་ཁས་ལེན་གནང་འདུག
སྤྱིར་ཟུང་དྲུང་ཁོང་ནི་ཉེ་ལམ་རྒྱ་གར་གཞུང་གིས་དངུལ་ལོར་ ༡༠༠༠ དང་ ༥༠༠ རྙིང་པ་ཕྱིར་བསྡུའི་ཁྲིམས་ལུགས་ལག་བསྟར་གྱི་བྱུས་འགོད་པའི་ཚོགས་མིའི་ཁོངས་སུ་ཡོད་འདུག དེ་ཡང་དུས་དབང་གོ་སྒྲིག་ཚོགས་ཆུང་གི་ཚོགས་གཞོན་འཕྲོད་བསྟེན་བཀའ་བློན་ཆོས་སྐྱོང་དབང་ཕྱུག་མཆོག་གིས་གཙོས་ཚོགས་མི་རྣམས་ཕྱི་ལོ་ ༢༠༡༦ ཟླ་ ༡༢ ཚེས་ ༢༡ ཉིན་གནས་མཆོག་རྡོ་རྗེ་གདན་དུ་ཕེབས་འབྱོར་གནང་རྒྱུ་ཡིན་པ་མ་ཟད། དུས་དབང་གོ་སྒྲིག་ཚོགས་ཆུང་གི་ཚོགས་གཙོ་ཆོས་རིག་བཀའ་བློན་མཆོག་དང་བདེ་སྲུང་བཀའ་བློན་འཕགས་པ་ཚེ་རིང་མཆོག་ཕྱི་ཚེས་ ༢༤ ཉིན་གནས་མཆོག་རྡོ་རྗེ་གདན་དུ་ཕེབས་འབྱོར་གནང་རྒྱུ་ཡིན་འདུག
ལྷག་པར་བྷི་ཧཱར་མངའ་སྡེའི་སྤྱི་ཁྱབ་བློན་ཆེན་སྐུ་ཞབས་ནི་ཏི་ཤི་ཀུ་མཱར་ Shri Nitish Kumar མཆོག་ཕྱི་ཚེས་ ༢༣ ཉིན་གནས་མཆོག་རྡོ་རྗེ་གདན་དུ་ཆེད་ཕེབས་གནང་ནས་དུས་དབང་གོ་སྒྲིག་ལ་གཟིགས་ཞིབ་གནང་རྒྱུ་ཡིན་འདུག་པ་བཅས།།
