༢༠༡༦ ཟླ་ ༡༢ ཚེས་ ༣༠ རེས་གཟའ་པ་སངས།
༄༅། །འདི་གའི་ཆེད་གཉེར་གསར་འགོད་པ་བསོད་ནམས་མཚོ་མོ་ལགས་ཀྱིས་ས་གནས་ནས་བཏང་གནས་ནང་འཁོད་དོན། ཕྱི་ལོ་ ༢༠༡༦ ཟླ་ ༡༢ ཚེས་ ༢༩ ཉིན་དུས་འཁོར་དབང་ཆེན་གོ་སྒྲིག་ཚོགས་ཆུང་གི་ཚོགས་གཙོ་བོད་མིའི་སྒྲིག་འཛུགས་ཀྱི་ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་མཆོག་ལ་འདི་གའི་གསར་འགོད་པས་དུས་དབང་སྤྱི་ཡོངས་གོ་སྒྲིག་གང་འདྲ་བྱུང་ཡོད་མེད་དང་ཆོས་ཞུ་བར་གལ་ཆེའི་འབོད་སྐུལ་ཇི་ཡོད་སོགས་བཅར་འདྲི་ཞུས་པ་གཤམ་གསལ།
དྲི་བ། ད་ལྟའི་འཆར་དཔལ་དུས་ཀྱི་འཁོར་ལོའི་དབང་ཆེན་གྱི་སྤྱི་ཡོངས་ཀྱི་གྲ་སྒྲིག་གང་འདྲ་བྱུང་ཡོད་དམ།
ལན། ད་ལྟ་བར་འཆར་གཞི་ལྟར་དཀའ་ངལ་ཆེན་པོ་གང་ཡང་མེད་པའི་ཐོག་ནས་གྲ་སྒྲིག་ཡག་ཐག་ཆོད་འགྲོ་བཞིན་ཡོད། གལ་ཆེ་ཤོས་གཞི་རིམ་གྱི་གྲ་སྒྲིག་ཆ་ཚང་ཚར་རྗེས་སྐུ་མདུན་༸ཞབས་སོར་བདེ་བར་འཁོད་ཡོད། དེ་ནས་མི་མང་ཚོས་མཁྱེན་རྟོགས་སླད་གནད་དོན་གལ་ཆེ་ཤོས་ཤིག་ཞུ་རྒྱུ་ཡོད་པ་ནི། བླ་མ་དང་སློབ་མའི་དབར་དམ་ཚིག་གི་འབྲེལ་བ་དེ་རེད། ད་ལྟ་བླ་སློབ་དབར་གྱི་དམ་ཚིག་གི་འབྲེལ་བ་གང་འདྲ་ཡོད་རེད་ཅེས་ཞུས་ན། བླ་མ་སྤྱི་ནོར་༸གོང་ས་༸སྐྱབས་མགོན་ཡིད་བཞིན་ནོར་བུ་མཆོག་གིས་ཐག་རིང་ནས་ཕེབས་པའི་ཆོས་ཞུ་བ་རྣམས་ཀྱི་སྡོད་གནས་དང་ཞལ་ལག མཐའ་ན་གསང་སྤྱོད་སོགས་མཐུན་རྐྱེན་ཇི་འདྲ་ཡོད་མེད་ཐོག་ཐུགས་བརྩེ་ཆེན་པོས་བཀའ་རྩད་མཛད་བཞིན་ཡོད་པ་མ་ཟད། དད་ལྡན་མང་ཚོགས་རྣམས་ཀྱི་མཐུན་རྐྱེན་ཐོག་དཀའ་ངལ་མེད་པ་ཞིག་དགོས་ཀྱི་རེད། ཅེས་བཀའ་སློབ་རིམ་པ་མང་པོ་ཕེབས་ཡོད་པར་བརྟེན། ང་ཚོས་མི་མང་གི་སྡོད་གུར་གྱིས་མཚོན་ཆུ་དང་གློག གསང་སྤྱོད་སོགས་གང་ས་ཅི་ཐད་ནས་གང་གཟབ་བྱེད་བཞིན་ཡོད་པ་མ་ཟད། སྐུ་མདུན་གྱིས་ཆོས་ཞུ་བའི་ཐོག་ཐུགས་འཚབ་ཧ་ཅང་མཛད་བཞིན་ཡོད། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་མི་མང་ཚོ་ཞོགས་པ་སྔ་པོ་གསུང་ཆོས་ཞུ་བར་ཡོང་དགོས་སྟབས་ཁོང་ཚོར་ཞོགས་ཇ་ཚ་པོ་སྤྲོད་ཐུབ་ཀྱི་ཡོད་མེད་ལྟོས། ཞེས་བཀའ་ཕེབས་པ་ལྟར་ང་ཚོས་གྲ་སྒྲིག་བྱས་ཡོད། བོད་ནས་ཕེབས་མཁན་ཚོར་སྣེ་ལེན་ཁང་དུ་ཟུར་དུ་གྲ་སྒྲིག་བྱས་ཡོད། མི་མང་སྡོད་གུར་ནང་སྡོད་མཁན་ཚོར་བསྙེན་བཀུར་ཞུ་མཁན་གྱི་སྤྱི་ཐབ་ལ་འགན་སྤྲད་ཡོད། ཞོགས་པ་སྔ་པོ་གསོལ་ཇ་འགྲེམ་རྒྱུ་ནི་བོད་ཀྱི་གཞོན་ནུ་ལྷན་ཚོགས་ཀྱི་དང་བླངས་རུ་ཁག་གིས་བྱེད་རྒྱུ་རེད། འདི་ལོར་སྤྱིར་བཏང་གི་མཐུན་རྐྱེན་དེ་དག་འགྲིག་ངེས་ཡོང་རྒྱུའི་རེ་བ་བྱེད་བཞིན་ཡོད།
དྲི་བ། ༸རྒྱལ་བའི་སྐུ་ཕྱྭ་དང་མི་མང་གི་བདེ་འཇགས་ལས་དོན་ཐོག་གྲ་སྒྲིག་གང་འདྲ་འགྲོ་བཞིན་ཡོད་དམ།
ལན། ༸རྒྱལ་བའི་སྐུ་ཕྱྭ་དང་མི་མང་བདེ་འཇགས་ཀྱི་ལས་དོན་ཐོག་རྒྱ་གར་འབྲེལ་ཡོད་ཚོ་དང་མཉམ་དུ་ཚོགས་འདུ་རིམ་པ་མང་པོ་ཞིག་ཚོགས་ཡོད། སྐབས་དེར་གནད་དོན་འདི་གལ་ཆེ་དོན་ཆེར་རྩིས་ནས་འབོད་སྐུལ་རིམ་པ་ཞིག་ཞུས་པ་བཞིན། ཁོང་རྣམ་པའི་ངོས་ནས་གྲ་སྒྲིག་གང་ལེགས་གནང་ཡོད། ད་ལྟ་ཡིན་ན་ཡང་༸རྒྱལ་བའི་སྐུ་ཕྱྭ་དང་མི་མང་གི་བདེ་འཇགས་ཐོག་གང་ཐུབ་ཀྱིས་འབྲེལ་ཡོད་རྒྱ་གར་དང་བོད་མིའི་སྒྲིག་འཛུགས་བདེ་སྲུང་ལས་ཁུངས་བཅས་ཚང་མས་སྔར་དང་མི་འདྲ་བར་སྲུང་སྐྱོབ་རིམ་པ་མང་པོ་ཞིག་གོ་སྒྲིག་ཞུས་ཡོད། དཔེར་ན། ས་ཕྱོགས་གང་སར་པར་ཆས་ CCTV བཙུགས་པ་དང་མེ་གསོད་འཕྲུལ་ཆས་ཆེད་བཙུགས་ཡོད། རྒྱ་གར་དཔོན་རིགས་མཐོ་གྲས་ཚོས་ཀྱང་གསུང་རྭའི་ནང་གི་བདེ་འཇགས་སོགས་ཀྱི་ཐོག་ཧ་ཅང་དོ་སྣང་གནང་བཞིན་འདུག གང་ལྟར་གང་ཅིའི་ཐད་ནས་སྔར་དང་མི་འདྲ་བར་འབྲེལ་ཡོད་རྣམ་པས་དོ་སྣང་དང་གྲ་སྒྲིག་ལས་དོན་གང་ལེགས་འགྲོ་བཞིན་ཡོད།
དྲི་བ། དེང་སྐབས་རྒྱ་གར་རྒྱལ་ཡོངས་ནང་དངུལ་རྐྱང་ཐོབ་རྒྱུར་དཀའ་ངལ་འཕྲད་བཞིན་ཡོད་སྟབས། ཆོས་ཞུ་བ་ཚོའི་དཀའ་ངལ་འདི་སེལ་ཐབས་གང་འདྲ་གནང་བཞིན་ཡོད་དམ།
ལན། ད་ལན་ཁ་ཐུག་གནས་ཚུལ་དེ་འདྲ་བྱུང་བ་རེད། གཅིག་བྱས་ན་དཀའ་ངལ་དེ་ཚོ་ཆོས་ཞུ་བ་དང་གོ་སྒྲིག་བྱེད་མཁན་ཚང་མས་དེ་དང་དུ་བླངས་ཏེ་དཀའ་ངལ་དེ་གདོང་ལེན་བྱས་ནས་རིག་པ་གཙོ་བོ་ཆོས་ཀྱི་ཐོག་སྒྲིམ་པ་ཡིན་ན། རྐྱེན་ངན་གྲོགས་ཤར་ཡོང་མ་སྲིད་པ་མེད་པ་ལྟ་བུ་ཞིག་མཐོང་གི་འདུག འོན་ཀྱང་གནད་དོན་དེ་རྐྱེན་ངན་གྲོགས་ཤར་དང་དཀའ་ངལ་ཁྱད་དུ་བསད་དགོས་རེད་ཅེས་བརྗོད་དེ་འབད་བརྩོན་མ་བྱེད་ན་སྒྲིག་གི་མེད། དེར་བརྟེན་དཀའ་ངལ་འདིའི་ཐོག་ལ་ང་ཚོས་འབད་བརྩོན་རིམ་པ་ཞུས་ཡོད།
མདོར་ན་དཔལ་ལྡན་སྲིད་སྐྱོང་མཆོག་ཀྱང་རྒྱ་གར་དཔོན་རིགས་ཚོ་མཇལ་འཕྲད་ལ་ཆེད་ཕེབས་གནང་བ་དང་། དེ་བཞིན་དཔལ་འབྱོར་ལས་ཁུངས་དང་སྔོན་རྩིས་ཚོགས་ཆུང་། ཆོས་རིག་ལས་ཁུངས་བཅས་ཚང་མས་འདིའི་ཐོག་གང་ཐུབ་བྱས་ཡོད། སྤྱིར་ཕར་བལྟས་ཡོང་དུས་ད་ལྟ་འདིར་དངུལ་རྐྱང་འདོན་སའི་འཕྲུལ་ཆས་ཁང་ATM ལ་དངུལ་འདོན་མཁན་གྱི་བང་རིང་པོ་དེ་ཙམ་མིན་འདུག ང་ཚོས་འབོད་སྐུལ་ཞུས་པ་བཞིན་ཕྱི་ཚེས་ ༡ ཙམ་ནས་དངུལ་རྐྱང་འདོན་སའི་འཕྲུལ་ཆས་ཁང་ ATM བཅོ་ལྔ་ནས་ཉི་ཤུ་ཙམ་བར་འཛུགས་རྒྱུ་རེད། ཡིན་ནའང་མི་རེར་དངུལ་འདོན་རྒྱུའི་སྤྱིའི་ཚད་གཞི་དེ་མ་གཏོགས་མང་རུ་གཏོང་རྒྱུར་འབྲེལ་ཡོད་ནས་ངོས་བཞེས་གནང་གི་མིན་འདུག
གནད་དོན་འདིའི་ཆེད་དུས་དབང་གོ་སྒྲིག་ཚོགས་ཆུང་གི་ཚོགས་གཞོན་འཕྲོད་བསྟེན་བཀའ་བློན་ཆོས་སྐྱོང་དབང་ཕྱུག་མཆོག་གིས་སྣེ་ཁྲིད་པའི་ཚོགས་ཆུང་ཞིག་མངའ་སྡེའི་རྒྱལ་ས་པ་ཊི་ནའི་ནང་ཕེབས་ཡོད། སྐབས་དེར་འབྲེལ་ཡོད་ཚོས་དངུལ་རྐྱང་འདོན་སའི་འཕྲུལ་ཆས་ཁང་ ATM ཕྱི་ཚེས་ ༡ གོང་ལ་བཙུགས་པ་ཡིན་ན། ཆོས་ཞུ་བ་མིན་པར་མི་གཞན་པ་ཚོས་དངུལ་མར་འདོན་ནས་བེད་སྤྱོད་གཏོང་གི་རེད། དེ་ལས་ཕྱི་ཚེས་ ༡ ནས་བཟུང་འཕྲུལ་ཆས་དེ་འཛུགས་ཚེ་ཆོས་ཞུ་བ་རྣམས་ལ་ཕན་ཐོགས་ཡོང་རྒྱུ་རེད་ཅེས་ཀྱང་གསུངས་ཡོད།
དྲི་བ། ད་ལྟའི་ཆར་ས་ཕྱོགས་ཁག་འདྲ་མིན་ནས་དད་ལྡན་ཆོས་ཞུ་བ་མང་དག་ཅིག་དོན་གཉེར་ཆེན་པོའི་ཐོག་འབྱོར་དང་འབྱོར་མུས་ཡིན་པས་ཁོང་ཚོར་གོ་སྒྲིག་ཚོགས་ཆུང་ནས་སློབ་གསོ་ལམ་སྟོན་གང་ཡོད་དམ།
ལན། དང་པོ་དེ་རྩ་བའི་དུས་འཁོར་དབང་ཆེན། ཞེས་བརྗོད་སྐབས་ཆོས་ཕྱོགས་ཀྱི་བྱེད་སྒོ་ཆེན་པོ་ཞིག་ལས་དེང་སྐབས་ཨིན་སྐད་དང་རྒྱ་གར་སྐད་དུ་ Mela ཞེས་རྣམ་གཡེང་འདུ་འཛོམས་བྱེད་ས་དང་ Festival ཞེས་དུས་སྟོན་ལྟ་བུ་ཞིག་རྩ་བ་ནས་མ་རེད། མི་འདུ་འཛོམས་ཆེན་པོ་ཞིག་ཡོང་དུས་མང་པོ་ཞིག་ཆོས་དོན་དུ་གཉེར་ནས་ཡོང་བ་ཞིག་མིན་པར། དེའི་སྐབས་ཚོང་ལས་གཉེར་རྒྱུ་སོགས་མང་པོ་ཞིག་ཡོང་བཞིན་ཡོད། དེ་ལྟ་བུ་གང་སར་དེ་འདྲ་ཡོང་གི་ཡོད་སྟབས་ཧ་ལས་རྒྱུ་གང་ཡང་མེད། འོན་ཀྱང་ཆེད་དུ་གཉེར་ནས་དུས་འཁོར་དབང་ཆེན་དུ་ཆོས་ཞུ་བར་ཡོང་མཁན་ཚོས་སྤྱིར་བཏང་ནས་གནས་དང་བླ་མ། ཆོས་གསུམ་གྱི་ཆ་ནས་ཕུན་སུམ་ཚོགས་པ་དང་། འཛོམས་དཀའ་བ་ཞིག་འཛོམས་ཡོད་སྟབས། སོ་སོས་དཀའ་ལས་མང་པོ་ཞིག་བརྒྱབ་ནས་ཆོས་ཞུ་རུ་ཡོང་བར་བརྟེན་སོ་སོའི་རིག་པ་དེའི་ཐོག་སྒྲིམ་རྒྱུ་དང་། དེའི་ཆེད་དཀའ་ངལ་ཆུང་ཆུང་དེ་དག་ཁྱད་དུ་གསད་དགོས་བྱུང་ཚེ་ཁྱད་དུ་བསད་པ་ཡིན་ན། ཆོས་ཀྱི་དོན་དུ་དཀའ་བ་སྤྱད་པ་ཡིན། དེར་བརྟེན་དེ་འདྲའི་དགོངས་པ་བཞེས་རྒྱུ་གལ་ཆེན་པོ་ཆགས་ཡོད།
དེ་ལས་གལ་ཆེ་བ་ཞིག་དུས་འཁོར་དབང་ཆེན་ནི་རྩ་ཆེན་པོ་དང་སྐད་གྲགས་ཆེན་པོ་ཡིན་ཁར། ༸གོང་ས་མཆོག་གི་སྐུ་དྲུང་ནས་དུས་འཁོར་དབང་ཆེན་ཐོབ་ཆེད་མི་མང་པོ་ཞིག་རང་བཞིན་གྱིས་འཛོམས་བཞིན་ཡོད། སྐུ་མདུན་གྱི་གོ་སྐབས་འདི་བཟུང་སྟེ་གཙོ་བོ་གཞི་རིམ་ནང་ཆོས་ཀྱི་བསླབ་བྱ་དེ་དག་ངོ་སྤྲོད་མཛད་རྒྱུའི་གོ་སྐབས་འཛིན་བཞིན་ཡོད། ཅེས་དེ་སྔ་ཚར་ཁ་ཤས་བཀའ་སློབ་སྩལ་ཡོད། དུས་འཁོར་དབང་ཆེན་ནི་རྩ་ཆེན་པོ་དང་གནས་ཚད་མཐོ་པོ་ཞིག་ཡིན་སྟབས། མི་མང་གིས་བྱིན་རླབས་ཙམ་ལས་གོ་ཐུབ་རྒྱུ་དང་ཐོབ་ཐུབ་རྒྱུ་ཁག་པོ་ཆགས་ཡོད།
དུས་དབང་སྐབས་མི་མང་པོ་ཞིག་འདུས་ཡོང་སྐབས་ཕུགས་སུ་ཕན་ཐོགས་ཡོང་ཆེད་ནང་ཆོས་ཀྱི་གཞི་རིམ་བསླབ་བྱ་དེ་དག་ངོ་སྤྲོད་མཛད་པ་དེར་རིག་པ་སྒྲིམ་དགོས་སྐོར་བཀའ་ཕེབས་ཡོད། དེར་བརྟེན་མི་མང་ཚོས་སྔོན་འགྲོའི་གསུང་ཆོས་སྐབས་ཡིད་གཟབ་བྱས་ཏེ་ཉམས་ལེན་ཐུབ་པ་དེ་དག་ཉམས་ལེན་བྱེད་རྒྱུ་དང་། ཤེས་རྟོགས་ཐུབ་པ་དེ་དག་ཤེས་པ་བྱེད་རྒྱུ་སོགས་གནང་རྒྱུ་གལ་ཆེན་པོ་རེད།
ལྷག་པར་ཐོག་མའི་འཆར་གཞི་ལྟར་ན། སྔོན་འགྲོའི་གསུང་ཆོས་དེ་ཉིན་གསུམ་ཡིན། ད་ཆ་དེར་འགྱུར་བ་ཕྱིན་ཏེ་ཉིན་བཞི་ཆགས་ཡོད་སྟབས་བཀའ་ཆོས་ཞུ་རྒྱུའི་གོ་སྐབས་མང་དུ་ཕྱིན་ཡོད། སྔོན་འགྲོའི་གསུང་ཆོས་སྐབས་སྤྱོད་འཇུག་དང་སྒོམ་རིམ་བར་པ་བསྩལ་རྒྱུ་ཡིན་པ་དང་། སྐུ་མདུན་གྱིས་སྤྱོད་འཇུག་ནི་ཧ་ཅང་གི་རྩ་ཆེན་པོ་ཡིན་པ་ཐེངས་མང་བཀའ་སྩལ་ཡོད།
གཙོ་བོ་གསུང་ཆོས་སྩོལ་སྐབས་དོ་སྣང་གནང་ཐོག་སོ་སོས་སློབ་སྦྱོང་གནང་བ་སོགས་དེ་ལྟ་བུའི་བག་ཆགས་བཟང་པོ་ཞིག་གི་སྒོ་ནས་དུས་འཁོར་དབང་ཆེན་ཞུ་ན་རིམ་པས་དོན་དང་ལྡན་པ་ཞིག་ཡོང་གི་རེད། འདིར་ཚོང་ལས་གཉེར་རྒྱུ་དང་ལྟད་མོ་བལྟ་ཆེད་ཡོང་བ་ལྟར་མིན་པར་དོན་དང་ལྡན་པ་ཞིག་ཡོང་ཐབས་བྱེད་རྒྱུ་གལ་ཆེན་པོ་རེད།
འབོད་སྐུལ་གཉིས་པ་ནི། འདིར་ལས་དོན་གལ་ཆེན་པོ་དང་ཆོས་ཕྱོགས་ཀྱི་བྱེད་སྒོའི་སྐབས། ཆོས་གཟབ་སར་བདུད་གཟབ། ཅེས་བརྗོད་སྲོལ་ཡོད་པ་ལྟར། འགེག་རྐྱེན་བར་ཆད་མང་པོ་ཞིག་ཡོང་སྲིད་སྟབས། ང་ཚོས་ཕྱིའི་ཐབས་ཤེས་དེ་རྒྱ་གར་དང་ང་རང་ཚོའི་ངོས་ནས་སྲུང་སྐྱོབ་གྲ་སྒྲིག་གང་ཡོད་པ་དེ་དག་བྱས་ཡོད། དེའི་ཐོག་ཆོས་ཞུ་བ་མི་མང་རྣམ་པའི་ངོས་ནས་ཀྱང་སྤྱི་པའི་སྐོར་སྲུང་བ་ལྟ་བུ་ཡིན་པའི་འགན་འཁྱེར་ཏེ། གང་སར་དོ་སྣང་བྱེད་རྒྱུ་སོགས་བྱས་ན་ཧ་ཅང་ཐུགས་ཕན་གསོ་ངེས་རེད། འདིར་དོན་མེད་ཀྱི་གནོད་སྐྱེལ་མཁན་ཚོགས་སྒེར་ཆེ་ཆུང་འདྲ་མིན་ཡོང་སྲིད་པ་རེད། ཆེད་དུ་གཉེར་ནས་ང་ཚོར་དམིགས་པ་མིན་པར་སྤྱིར་བཏང་དྲག་སྤྱོད་པ་ལྟ་བུ་བྱེད་མཁན་ཡོང་བཞིན་ཡོད། དེར་བརྟེན་ཚང་མས་འགན་འཁྱེར་བ་ཡིན་ན་ཚང་མར་ཕན་ཐོགས་ཡོད་པས་དེ་ལྟར་གནང་རོགས་ཞེས་འབོད་སྐུལ་ཞུ་རྒྱུ་ཡིན།
གསུམ་པ་ནི། དུས་འཁོར་དབང་ཆེན་གྱི་རིང་སྐུ་མདུན་གྱི་སྐུ་ཚེ་ཚེ་སྒྲུབ་ལྟ་བུར་དམིགས་ཏེ་སོ་སོའི་ངོས་ནས་དཀར་སྐྱོང་བྱེད་རྒྱུ་དང་། ཆེད་དུ་གཉེར་ནས་ཟ་ཁང་གཉེར་ཆེད་ཡོང་མཁན་ཡིན་ནའང་དཀར་ཟས་ཀྱི་ཐོག་ནས་ཟ་ཁང་གཉེར་རྒྱུ་བྱུང་ན་མིག་ལྟོས་ཡག་པོ་ཡོང་གི་རེད། ཅེས་གསུངས།།
