༢༠༡༦ ཟླ་ ༡༢ ཚེས་ ༢༣ རེས་གཟའ་པ་སངས།

༄༅། །༸གོང་ས་མཆོག་དང་ཐུགས་འདྲིས་ཧ་ཅང་ཆེ་བ་དང་བོད་མིར་ཁ་ཞེ་གཉིས་མེད་ཀྱིས་རྒྱབ་སྐྱོར་གནང་མཁན་ཨ་རིའི་གྲོས་ཚོགས་འཐུས་མི་ཟུར་པ་དགུང་ལོ་ ༩༤ ཡིན་པ་སྐུ་ཞབས་བྷེན་ཇ་མིན་གྷིལ་མེན་ Benjamin Gilman མཆོག་ཕྱི་ལོ་ ༢༠༡༦ ཟླ་ ༡༢ ཚེས་ ༡༧ ཉིན་སྐུ་ཚེའི་འཕེན་པ་རྫོགས་པའི་ཡིད་སྐྱོའི་གནས་ཚུལ་ཐོན་པར་བརྟེན། བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེངྒེ་མཆོག་གིས་དམ་པ་ཁོང་གི་རྗེས་ཤུལ་སྐུ་ཟླ་ལྕམ་སྐུ་ཇོར་ཇི་ཡ་གྷིལ་མེན་ Georgia Gilman ལགས་ལ་ཐུགས་གསོའི་འཕྲིན་ཡིག་ཅིག་ཕུལ་བའི་ནང་འཁོད་དོན།

ཡུན་རིང་ནས་བོད་མི་དང་བོད་དོན་ལ་སེམས་ཐག་ཉེ་པོའི་རྒྱབ་སྐྱོར་གནང་མཁན་ཨ་རིའི་གྲོས་ཚོགས་འཐུས་མི་ཟུར་པ་སྐུ་ཞབས་བྷེན་ཇ་མིན་གྷིལ་མེན་མཆོག་འདས་གྲོངས་སུ་གྱུར་བའི་ཡིད་སྐྱོའི་གནས་ཚུལ་ཐོན་པར་ངས་བོད་མིའི་སྒྲིག་འཛུགས་ཀྱི་ཚབ་ཞུས་ནས་སྐུ་ཉིད་མཆོག་ལ་སྙིང་ཐག་པ་ནས་མྱ་ངན་གུས་འདུད་དང་སྦྲགས་གདུང་སེམས་མཉམ་སྐྱེའི་སེམས་གསོ་ཞུ་རྒྱུ་ཡིན།  དམ་པ་ཁོང་ཨ་རིའི་གྲོས་ཚོགས་ཀྱི་རྒྱལ་སྤྱིའི་འབྲེལ་ལམ་ཚན་པའི་འགན་འཛིན་ཐོག་བོད་དོན་དང་འབྲེལ་བའི་སྲིད་བྱུས་ཡང་ཡང་གླེང་སློང་གནང་རྒྱུར་མཐུན་འགྱུར་རོགས་རམ་གནང་མྱོང་ཡོད་པ་མ་ཟད། བོད་དོན་གྱི་སྲིད་བྱུས་གལ་ཆེ་ཁག་གཅིག་གཏན་འབེབས་གནང་ཐུབ་པར་མཐུན་འགྱུར་རོགས་རམ་རྒྱ་ཆེ་གནང་མྱོང་ཡོད། ལྷག་པར་ཕྱི་ལོ་ ༡༩༩༧ ཕྱི་ཟླ་ ༤ ནང་རྒྱལ་ས་ཝ་ཤིང་ཊོན་དུ་རྒྱལ་སྤྱིའི་གྲོས་ཚོགས་བོད་དོན་རྒྱབ་སྐྱོར་ལྷན་ཚོགས་ཐེངས་གསུམ་པ་གོ་སྒྲིག་གནང་མཁན་གྲས་ཤིག་ཡིན་པ་དང་། བོད་ནང་གི་གནས་སྟངས་རྒྱུས་ལོན་ཆེད་ཁོང་གིས་གོ་སྐབས་ནམ་བྱུང་སྐབས་༸གོང་ས་མཆོག་དང་མཇལ་འཕྲད་ཡང་ཡང་ཞུ་མྱོང་ཡོད་པ་ཙམ་དུ་མ་ཟད།  བོད་མིའི་སྒྲིག་འཛུགས་ཀྱི་འགོ་ཁྲིད་རྣམ་པ་ཚོ་ལའང་མཇལ་འཕྲད་གནང་མྱོང་ཡོད་འདུག

དམ་པ་ཁོང་གིས་བོད་མིའི་ལས་འགུལ་ལ་བྱས་རྗེས་བཞག་གནང་བ་དེར་ངོས་འཛིན་ཞུ་ཆེད་ཕྱི་ལོ་ ༢༠༠༣ ལོར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཞིང་གཤེགས་དམ་པ་ཁོང་ལ་བདེན་པའི་འོད་སྣང་གི་གཟེངས་རྟགས་Light of Truth Award ཞེས་པ་གསོལ་སྩལ་མཛད་ཡོད། གཟེངས་རྟགས་དེ་ནི་རྒྱལ་སྤྱིའི་བོད་དོན་ལས་འགུལ་ཁང་གིས་གོ་སྒྲིག་གནང་བཞིན་ཡོད།  ང་ཚོ་བོད་མི་རྣམས་ཀྱིས་དུས་རྟག་ཏུ་དམ་པ་ཁོང་གིས་བོད་མི་དང་བོད་དོན་ཐོག་རྒྱབ་སྐྱོར་དང་གདུང་སེམས་མཉམ་སྐྱེ་གནང་བར་བཀའ་དྲིན་རྗེས་དྲན་ཞུ་རྒྱུ་ཡིན། ཞེས་འཁོད་ཡོད།