༢༠༡༦ ཟླ་ ༡༢ ཚེས་ ༡༢ རེས་གཟའ་ཟླ་བ།
༄༅། །ནིའུ་ཛི་ལེན་ཌིའི་སྲིད་བློན་སྐུ་ཞབས་ཇོན་ཀི་མཆོག་གིས་རྩ་དགོངས་ཞུས་པར་བརྟེན་ཕྱི་ལོ་ ༢༠༡༦ ཟླ་ ༡༢ ཚེས་ ༡༢ ཉིན་སྐུ་ཞབས་བྷིལ་ཨིངྒ་ལིཤ་ Bill English མཆོག་གིས་སྲིད་བློན་གྱི་ལས་ཁུར་དམ་འབུལ་ཞུས་པར་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་འཚམས་འཕྲིན་ཞིག་ཕུལ་བའི་ནང་འཁོད་དོན།
ངས་སྐུ་ཞབས་བྷིལ་ཨིངྒ་ལིཤ་མཆོག་ནིའུ་ཛི་ལེན་ཌིའི་སྲིད་བློན་གསར་པར་འོས་འདེམས་བྱུང་བར་སྙིང་ཐག་པ་ནས་འཚམས་འདྲི་ཞུ་རྒྱུ་ཡིན། སྤྱིར་ནིའུ་ཛི་ལེན་ཌི་རྒྱལ་ཁབ་ནི་རྒྱལ་ཁབ་ཆུང་གྲས་ཤིག་ཡིན་ནའང་། གྲོས་མོལ་དང་དྲང་བདེན་གྱི་ལངས་ཕྱོགས་རྒྱུན་སྐྱོང་གནང་མཁན་ཞིག་ཡིན་པ་ནི་དཔེར་ན། ཕྱི་ལོ་ ༢༠༡༣ ཟླ་ ༡༠ ནང་འཛམ་གླིང་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་སྐབས་རྒྱ་ནག་གཞུང་གིས་བོད་ནང་འགྲོ་བ་མིའི་ཐོབ་ཐང་ལ་རྩིས་མེད་རྡོག་རོལ་གཏོང་བཞིན་པ་དེར་ཐད་ཀར་སྐྱོན་བརྗོད་དང་སྦྲགས་གདོང་ལེན་གནང་ཡོད།
ནིའུ་ཛི་ལེན་ཌི་ཡུལ་དུ་དེང་སྐབས་བོད་མི་ཉུང་ཤས་ལས་མེད་ཀྱང་གལ་གནད་ཆེ་བའི་བོད་རིགས་ཚོགས་པ་དེ་མུ་མཐུད་འཕེལ་རྒྱས་འགྲོ་བཞིན་པ་དང་ཆབས་ཅིག བོད་དོན་རྒྱབ་སྐྱོར་གྱི་ལས་གཞི་དེ་ཡང་ཤུགས་ཆེ་རུ་འགྲོ་མུས་ཡིན།
ཡུལ་དེར་ཕྱི་ལོ་ ༡༩༩༢ དང་། ༡༩༩༦། ༢༠༠༢ བཅས་སོ་སོར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཆིབས་སྒྱུར་བསྐྱངས་ཐུབ་པར་བརྟེན་བོད་མི་རྣམས་ཀྱིས་ཡུལ་དེའི་སྲིད་གཞུང་ལ་དུས་རྟག་ཏུ་བཀའ་དྲིན་རྗེས་དྲན་ཞུ་བཞིན་ཡོད། ཆིབས་སྒྱུར་དེ་དག་གི་རིང་༸གོང་ས་མཆོག་གིས་གཞུང་འབྲེལ་དབུ་ཁྲིད་རྣམས་དང་ལྷན་མཇལ་འཕྲད་མཛད་ཡོད་པ་མ་ཟད། ཁོང་རྣམ་པས་བོད་དོན་ཐོག་རྒྱབ་སྐྱོར་གྱི་རྣམ་པ་ཤུགས་ཆེ་བསྟན་ཡོད།
ནིའི་ཛི་ལེན་ཌི་དང་བོད་མིའི་དབར་ཐུན་མིན་གྱི་འབྲེལ་བ་དེ་རྨང་གཞིར་བཟུང་ནས་འབྱུང་འགྱུར་སྐུ་ཉིད་མཆོག་གིས་དྲང་བདེན་ལ་རྒྱབ་སྐྱོར་གནང་རྒྱུའི་གཞི་རྩའི་ལྟ་གྲུབ་རྒྱུན་སྐྱོང་ཐོག རྒྱ་ནག་གཞུང་གིས་དབུ་མའི་ལམ་གྱི་སྲིད་བྱུས་འོག་གྲོས་མོལ་བརྒྱུད་བོད་ཀྱི་གནད་དོན་གསལ་ཐབས་གནང་དགོས་པའི་རེ་འདུན་ཞུ་རྒྱུ་ཡིན་པ་ངས་རེ་བ་ཞུ་བཞིན་ཡོད། ཅེས་འཁོད་ཡོད།།
འཕྲིན་ཡིག་ངོ་མ་ཨིན་ཡིག་ཐོག་ཡོད་པས་དེར་རྩ་འཛིན་ཡོང་བ་ཞུ།
