༢༠༡༦ ཟླ་ ༡༢ ཚེས་ ༢༣ རེས་གཟའ་པ་སངས།
༄༅། །སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་རྒྱ་གར་མི་སེར་གྱི་གཟེངས་རྟགས་མཐོ་ཤོས་རྒྱ་གར་གྱི་རིན་པོ་ཆེ། Bharat Ratna ཞེས་པ་དེ་འབུལ་ལམ་ཞུ་དགོས་པའི་གྲོས་ཆོད་སྤྱི་མོས་ཐོག་གཏན་འབེབས་གནང་འདུག
ཕྱི་ལོ་ ༢༠༡༦ ཟླ་ ༡༢ ཚེས་ ༢༡ ཉིན་ལ་དྭགས་རང་སྐྱོང་རི་ལྗོངས་ཡར་རྒྱས་ལྷན་ཚོགས་Council of Ladakh Autonomous Hill Development Council ཀྱིས་སྤྱི་མོས་ཐོག་ནས་བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་རྒྱ་གར་དབུས་གཞུང་གིས་རྒྱ་གར་མི་སེར་གྱི་གཟེངས་རྟགས་མཐོ་ཤོས་དེ་མགྱོགས་མྱུར་འབུལ་ལམ་ཞུ་དགོས་པའི་གྲོས་ཆོད་སྤྱི་མོས་ཐོག་ནས་གཏན་འབེབས་གནང་བ་དང་སྦྲགས། གྲོས་ཆོད་ནང་རྒྱ་གར་གཞུང་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་སྐུ་ཚེ་ཧྲིལ་པོའི་རིང་འཛམ་གླིང་ཁྱོན་དུ་འཚེ་མེད་ཞི་བ་གོང་སྤེལ་གཏོང་གནང་མཛད་པའི་རླབས་ཆེན་གྱི་མཛད་བྱས་ལ་ངོས་འཛིན་ཞུས་པའི་ཐོག་ནས་མགོན་པོ་གང་ཉིད་མཆོག་ལ་རྒྱ་གར་གྱི་རིན་པོ་ཆེ། ཞེས་པའི་ཆེ་བསྟོད་མི་སེར་གྱི་གཟེངས་རྟགས་དེ་མགྱོགས་མྱུར་འབུལ་ལམ་ཞུ་དགོས་སྐོར་འཁོད་འདུག
སྤྱིར་གྲོས་ཆོད་དེ་ནི་ཉིན་གཉིས་རིང་ཚོགས་པའི་ལྷན་ཚོགས་སྐབས་ཐག་གཅོད་གཏན་འབེབས་བྱུང་བ་ཞིག་ཡིན་འདུག དེ་ཡང་གྲོས་ཆོད་འདོན་གནང་མཁན་འཇམ་དབྱངས་ཚེ་རིང་རྣམ་རྒྱལ་ལགས་དང་དེར་རྒྱབ་སྐྱོར་ཞུ་མཁན་ཚེ་རིང་དབང་ཕྱུག་ལགས་ཡིན་འདུག
