༢༠༡༦ ཟླ་ ༡༡ ཚེས་ ༢༨ རེས་གཟའ་ཟླ་བ།
༄༅། །ཕྱི་ལོ་ ༢༠༡༦ ཟླ་ ༡༡ ཚེས་ ༢༤ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་ནིའུ་ཡོག་དང་ནིའུ་འཇར་སི་ཁུལ་གནས་སྡོད་བོད་རིགས་ལ་རྣམས་ལ་གསུང་བཤད་གནང་དོན། དེ་རིང་འདིར་བྱང་ཨ་རི་དོན་གཅོད། སྤྱི་ཟུར། དེ་ནས་ས་གནས་སྤྱི་མཐུན་ཚོགས་པའི་ཚོགས་གཙོ་ཟུར་པ་རྣམ་པ། འཐུས་མི་རྣམ་པ། དེ་བཞིན་སྐྱབས་གནས་དགེ་འདུན་གྱི་སྡེ། དེ་ནས་གཞོན་ནུ་དང་བུད་མེད། སློབ་ཕྲུག་ཚོགས་པ། མི་མང་། བརྩེ་བའི་སློབ་ཕྲུག་ཚང་མར་ཐོག་མར་ངས་བཀའ་ཤག་གི་ཚབ་ཞུས་ཏེ་ཐུགས་རྗེ་ཆེའི་ཉིན་མོར་སྙིང་ཐག་པ་ནས་འཚམས་འདྲིའི་བཀྲ་ཤིས་བདེ་ལེགས་ཞུ་རྒྱུ་ཡིན།
མི་ཐོག་རྒན་པས་སྐུ་ལས་བསྐྱོན་ནས་གྲུབ་འབྲས་སྨིན་པ་འདི་གང་རེད་བརྗོད་ན་ལོ་ལྔ་བཅུའི་རྗེས་སུ་ཡིན་ཡང་ང་ཚོ་བོད་མི་ཡིན། ཞེས་ང་ཚོར་ཆོས་ཡོད། རིག་གཞུང་ཡོད། སྐད་ཡིག་ཡོད་ཅེས་འཛམ་གླིང་སྤྱི་ཡོངས་ལ་ངོམས་སུ་ཆོག་པ་ཆགས་ཐུབ་པ་འདི་མི་ཐོག་རྒན་པས་སྐུ་ལས་བསྐྱོན་ནས་གྲུབ་འབྲས་སྨིན་པའི་བཀའ་དྲིན་ལས་བྱུང་བ་རེད། འདི་མཇུག་སྐྱོང་ནས་མུ་མཐུད་དེ་གནས་དགོས་རྒྱུ་ཤིན་ཏུ་གལ་ཆེན་པོ་ཡིན་སྟབས། ཕྲུ་གུའི་ཕ་མ་དང་། སྤྱི་མཐུན་ཚོགས་པའི་འཐུས་མི། དགེ་རྒན་བཅས་ལ་བསྔགས་བརྗོད་ཞུ་རྒྱུ་ཡིན།
ནིའུ་ཡོག་དང་ནིའུ་འཇར་སི་བོད་རིགས་སྤྱི་མཐུན་ཚོགས་པའི་སྤྱི་ཁང་གསར་རྒྱག་གི་ལས་གཞིར་གཟིགས་སྐོར་གནང་བཞིན་པ།
རྒྱ་ནག་གཞུང་གི་འཕྲལ་ཕུགས་རྒྱང་གསུམ་གྱི་དམིགས་ཡུལ་འདི་བོད་འདི་རྒྱ་ཡུལ་བཟོ་རྒྱུ། བོད་པ་རྣམས་རྒྱ་མི་བཟོ་རྒྱུ་སོགས་ཀྱི་སྲིད་བྱུས་འདིང་བཞིན་ཡོད་སྟབས། བོད་ནང་ལ་བོད་པ་འགའ་ཤས་ཀྱི་བོད་སྐད་མ་བརྒྱབ་པར་རྒྱ་སྐད་བརྒྱབ་ཡོང་དུས་སེམས་ནང་ལ་ན་ཚ་ཧ་ཅང་གཏོང་བཞིན་འདུག འོན་ཀྱང་འདིར་རང་དབང་ལུང་པར་སོ་སོས་བོད་སྐད་མ་ཤེས་པར་ཨིན་ཇིའི་སྐད་བརྒྱབ་ཡོང་དུས་ཨིན་སྐད་ག་ཚོད་ཡག་པོ་ཡོད་ནའང་མཐའ་མ་དེར་བོད་སྐད་ཧ་ཅང་གལ་ཆེན་པོ་རེད་བཅས་སོགས་ཀྱི་གསུང་བཤད་གནང་། སྐབས་དེར་བྱང་ཨ་རིའི་སྐུ་ཚབ་དོན་གཅོད་སྤེན་པ་ཚེ་རིང་མཆོག་དང་དོན་ཁང་གི་འབྲེལ་ཡོད་ལས་བྱེད་སོགས་ཕེབས་ཡོད། ཕྱོགས་མཚུངས་དེ་ཉིན་གྱི་སྔ་དྲོ་སྲིད་སྐྱོང་མཆོག་གིས་ནིའུ་ཡོག་དང་ནིའུ་འཇར་སིའི་སྤྱི་ཁང་གསར་རྒྱག་གི་ལས་གཞིར་གཟིགས་སྐོར་དུ་ཕེབས་ཡོད། །
