༢༠༡༦ ཟླ་ ༡༡ ཚེས་ ༢༥ རེས་གཟའ་པ་སངས།

༄༅། །ཕྱི་ལོ་ ༢༠༡༦ ཟླ་ ༡༡ ཚེས་ ༢༡ ཉིན་སུད་སི་སྐུ་ཚབ་དོན་གཅོད་དངོས་གྲུབ་རྡོ་རྗེ་ལགས་ཀྱིས་མཉམ་འབྲེལ་རྒྱལ་ཚོགས་ནང་སྦེལ་འཇམ་གྱི་གཏན་འཇགས་སྐུ་ཚབ་གསར་པ་སྐུ་ཞབས་ Geert Muylle མཆོག་གི་ལས་ཁུངས་ནང་ཁོང་དང་། ཅེག་སྤྱི་མཐུན་རྒྱལ་ཁབ་ཀྱི་གཏན་འཇགས་སྐུ་ཚབ་གཞོན་པ་ Karl Dhaene མཆོག དེ་བཞིན་ཇི་ནི་ཝའི་ནང་རྟེན་གཞི་བྱས་པའི་རྒྱལ་སྤྱིའི་ཚོགས་པ་ཁག་གི་སྐུ་ཚབ་བཅས་དང་ལྷན་མཇལ་འཕྲད་ཞུས་འདུག

སྐབས་དེར་སྐུ་ཚབ་དོན་གཅོད་དངོས་གྲུབ་རྡོ་རྗེ་ལགས་ཀྱིས་བོད་མིའི་སྒྲིག་འཛུགས་དང་སྐུ་ཚབ་དོན་ཁང་གི་ཚབ་ཞུས་ནས་སྦེལ་འཇམ་གྱི་གཏན་འཇགས་སྐུ་ཚབ་གསར་པ་མཆོག་དང་གཏན་འཇགས་སྐུ་ཚབ་གཞོན་པར་འཚམས་འདྲི་ཞུས་པ་དང་སྦྲགས།   བོད་མིའི་སྒྲིག་འཛུགས་དང་དོན་ཁང་སྐོར་ངོ་སྤྲོད་ཞུས་པ་དང་འབྲེལ། ད་ལྟའི་བོད་ནང་གི་ཛ་དྲག་གནས་སྟངས་སྐོར་དང་། འདས་པའི་ལོ་ངོ་ ༥༠ ལྷག་རིང་རྒྱལ་སྤྱིའི་སྤྱི་ཚོགས་ཀྱིས་བོད་དོན་ཐོག་རྒྱབ་སྐྱོར་ཤུགས་ཆེ་གནང་བར་བརྟེན་བོད་ཀྱི་གནད་དོན་དེ་ད་བར་མུ་མཐུད་གནས་ཡོད་སྐོར་སོགས་ཞུ་སྐབས།  གཏན་འཇགས་སྐུ་ཚབ་གསར་པ་མཆོག་གིས་སྐབས་དེར་བོད་དོན་ལ་གདུང་སེམས་མཉམ་སྐྱེ་གནང་བཞིན་ཡོད་སྐོར་གསུངས་པ་དང་སྦྲགས།

བོད་ཀྱི་གནད་དོན་དེ་འགྲོ་བ་མིའི་ཐོབ་ཐང་གི་གནད་དོན་ཙམ་མ་ཡིན་པར།  བོད་ཀྱི་ཁོར་ཡུག་གི་གནས་སྟངས་དེ་ཡང་བློ་འཚབ་བྱེད་དགོས་པའི་གནད་དོན་ཞིག་ཆགས་ཡོད་སྐོར་སོགས་གསུངས་གྲུབ་བསྟུན། སྐུ་ཚབ་དོན་གཅོད་ཀྱིས་ཕྱི་ལོ་ ༢༠༡༦ ལོའི་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་སྐོར་དང་། དེ་བཞིན་བོད་དོན་དང་འབྲེལ་བའི་ཡིག་ཆ་ཁག་གཅིག་འབུལ་ལམ་ཞུས་པར་ཁོང་གིས་ཡིག་ཆ་དེ་དག་སྦེལ་ཇམ་གཞུང་ལ་འབུལ་རྒྱུའི་ཁས་ལེན་ཡང་གནང་འདུག

ཕྱི་ཚེས་ ༢༢ ཉིན་སྐུ་ཚབ་དོན་གཅོད་དངོས་གྲུབ་རྡོ་རྗེ་ལགས་ཀྱིས་ཅེག་སྤྱི་མཐུན་རྒྱལ་ཁབ་ཀྱི་གཏན་འཇགས་སྐུ་ཚབ་གཞོན་པ་སྐུ་ཞབས་ཌེ་ནི་ཡལ་ Daniel Mic  མཆོག་དང་མཇལ་འཕྲད་ཀྱིས་༸གོང་ས་༸སྐྱབས་མགོན་ཆེན་པོ་མཆོག་དང་བོད་མིའི་སྒྲིག་འཛུགས་ཀྱི་ཚབ་ཞུས་ཏེ་འཚམས་འདྲིའི་མཇལ་དར་ཕུལ་བ་དང་སྦྲགས། ཅེག་སྤྱི་མཐུན་རྒྱལ་ཁབ་ཀྱི་གཞུང་མང་གཉིས་ཀྱིས་འདི་ལོའི་ཕྱི་ཟླ་ ༡༠ ནང་སྤྱི་ནོར་༸གོང་ས་༸སྐྱབས་མགོན ཆེན་པོ་མཆོག་ཡུལ་དེར་ཆིབས་སྒྱུར་སྐབས་རྒྱབ་སྐྱོར་གྱི་རྣམ་པ་ཤུགས་ཆེ་བཏོན་པར་ཐུགས་རྗེ་ཆེ་ཞུས་ཡོད་པ་མ་ཟད། ༸གོང་ས་མཆོག་ཅེག་གི་རྒྱལ་ས་པ་རག་ནང་གི་མཛད་འཆར་སྐོར་དང་། ཅེག་གི་རིག་གཞུང་བློན་ཆེན་མཆོག་དང་། གྲོས་ཚོགས་འཐུས་མི་རྣམ་པས་གཞུང་འབྲེལ་ཐོག་ནས་༸གོང་ས་མཆོག་ལ་ཕེབས་བསུའི་སྣེ་ལེན་གཟབ་རྒྱས་ཞུས་པ་སོགས་ཁུལ་དེར་མཛད་འཆར་བསྐྱངས་པ་ཁག་གཅིག་ཐོག་གོ་བསྡུར་གནང་འདུག

སྐབས་དེར་སྐུ་ཞབས་ཌེ་ནི་ཡལ་མཆོག་གིས་བོད་དོན་ཐོག་བློ་འཚབ་ཡོད་པ་མ་ཟད། ཁོང་གི་ལས་ཁུངས་ནས་བོད་ནང་གི་ཛ་དྲག་གནས་སྟངས་སྐོར་ཤེས་རྟོགས་ཡོད་སྐོར། དེ་བཞིན་རྒྱ་ནག་གི་སྲིད་འཛིན་ཅེག་ཁུལ་དུ་སླེབ་སྐབས་བོད་མི་དང་བོད་དོན་རྒྱབ་སྐྱོར་བ་ཚོས་ངོ་རྒོལ་བྱས་པའི་གནས་ཚུལ་སྐོར་གསུངས་པ་མ་ཟད། ཁོང་གི་ལས་ཁུངས་ལ་མཁྱེན་རྟོགས་གང་ཡང་མེད་པའི་ཐོག་ནས་ཕྱི་ལོ་ ༢༠༡༦ ཟླ་ ༩ ཚེས་ ༡༦ ཉིན་དེ་སྔའི་ཅེག་སྤྱི་མཐུན་རྒྱལ་ཁབ་ཀྱི་ཁོར་ཡུག་བློན་ཆེན་དང་སྲིད་བློན་སྐུ་ཞབས་ Martin Bursik མཆོག་གིས་ཇི་ནི་ཝར་Palais des Nations ཞེས་པའི་མདུན་དུ་བོད་དོན་གདུང་སེམས་མཉམ་སྐྱེའི་གོམ་བགྲོད་ Tibet Solidarity Rally སྐབས་བསྒྲགས་གཏམ་སྒྲོགས་སྦྱང་གནང་བ་དེར་ཡ་མཚན་སྐྱེས་ཡོད་སྐོར་གསུངས་འདུག

མཐར་སྐུ་ཚབ་དོན་གཅོད་ཀྱིས་ཁོང་ལ་ཕྱི་ལོ་ ༢༠༡༦ ལོའི་བོད་ནང་འགྲོ་བ་མིའི་ཐོབ་ཐང་གི་གནས་སྟངས་སྐོར་དང་། དེ་བཞིན་བོད་དོན་དང་འབྲེལ་བའི་ཡིག་ཆ་ཁག་གཅིག་འབུལ་ལམ་ཞུས་པ་དང་སྦྲགས། བོད་མིའི་སྒྲིག་འཛུགས་ཀྱི་ངོས་ནས་རྒྱ་ནག་དང་ཁ་བྲལ་གྱི་རང་བཙན་མ་རྩོད་པར་མིང་དོན་མཚུངས་པའི་རང་སྐྱོང་ཐོབ་ཐབས་སུ་བོད་རྒྱ་གཉིས་སྨན་གྱི་སྲིད་བྱུས་དབུ་མའི་ལམ་གྱིཐབས་ལམ་རྒྱུན་སྐྱོང་བྱེད་བཞིན་པ་མ་ཟད། རྒྱ་ནག་གཞུང་དང་མཉམ་གྲོས་མོལ་བསྐྱར་གསོ་ཡོང་ཐབས་གནང་བཞིན་ཡོད་སྐོར་སོགས་ངོ་སྤྲོད་ཞུས་ཡོད། སྐབས་དེར་སྐུ་ཞབས་ཌེ་ནི་ཡལ་མཆོག་གིས་བོད་དོན་དང་འབྲེལ་བའི་ཡིག་ཆ་ཁག་ལ་གཟིགས་ཞིབ་གནང་རྒྱུ་མ་ཟད་བོད་དོན་ཐོག་རྒྱབ་སྐྱོར་གནང་རྒྱུའི་ཁས་ལེན་ཡང་གནང་འདུག

ཕྱོགས་མཚུངས་ཕྱི་ཟླ་ ༡༡ ཚེས་ ༡༤ ཉིན་སྐུ་ཚབ་དོན་གཅོད་ཀྱིས་སུད་སིའི་གྲོང་ཁྱེར་བྷན་ནང་ཨེ་ཤི་ཡ་དང་ཞི་བདེ་རྒྱ་མཚོའི་མངའ་ཁོངས་ཀྱི་ཕྱི་འབྲེལ་ལས་དོན་ལྷན་ཁང་གི་སྐུ་ཚབ་སྐུ་ཞབས་ Johannes Matyassy མཆོག་དང་ལྷན་མཇལ་འཕྲད་གནང་སྟེ། ཉེ་ལམ་༸གོང་ས་མཆོག་ཡུ་རོབ་རྒྱལ་ཁབ་ཁག་ལྔའི་ནང་ཆིབས་སྒྱུར་ལེགས་གྲུབ་བྱུང་ཡོད་སྐོར་ཞུས་པ་དང་ཆབས་ཅིག  ༸གོང་ས་༸སྐྱབས་མགོན་ཆེན་པོ་མཆོག་དང་བོད་མིའི་སྒྲིག་འཛུགས་ཀྱི་ཚབ་ཞུས་ཏེ་སུད་སི་དབུས་སའི་གཞུང་སོ་སོར་མགོན་པོ་གང་ཉིད་མཆོག་ཁུལ་དེར་ཆིབས་སྒྱུར་སྐབས་སྐུ་ཕྱྭའི་བདེ་འཇགས་སོགས་ཀྱི་ཐད་མཐུན་འགྱུར་རོགས་རམ་རྒྱ་ཆེ་ཞུས་པར་ཐུགས་རྗེ་ཆེ་ཞུས་འདུག