༢༠༡༦ ཟླ་ ༡༡ ཚེས་ ༡༧ རེས་གཟའ་ཕུར་བུ།
༄༅། །ཕྱི་ལོ་ ༢༠༡༦ ཟླ་ ༡༡ ཚེས་ ༡༦ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་སྔ་དྲོ་ཐོག་མར་ཉི་ཧོང་གྱི་རྒྱལ་ས་ཊོག་ཡོའི་ནང་སེ་ཏ་ག་ཡ་གེ་ཀུན་འབྲིང་རིམ་སློབ་གྲྭར་Setagaya Gakuen ༸ཞབས་སོར་འཁོད་སྐབས། སློབ་གྲྭའི་རྒྱལ་སྒོའི་སྟེང་འཕྲེད་དར་ཐོག་ཨིན་ཡིག་ནང་། ༸གོང་ས་ཏཱ་ལའི་བླ་མ་སྐུ་ཕྲེང་ ༡༤ མཆོག་སེ་ཏ་ག་ཡ་གེ་ཀུན་སློབ་གྲྭར་གདན་ཞུ་ཐོབ་པ་ནི་ང་ཚོའི་ཆེས་མཐོང་ཞིག་ཡིན། ཞེས་འཁོད་ཡོད་པ་མ་ཟད། སློབ་གྲྭའི་ཕྱོགས་གང་སར་བོད་ཀྱི་རྒྱལ་དར་སྒྲེང་འཛུགས་གནང་བའི་ཁྲོད་དགེ་ལས་སློབ་ཕྲུག་རྣམས་ཀྱིས་ཕེབས་བསུའི་སྣེ་ལེན་གཟབ་རྒྱས་ཞུས་ཡོད།
དེ་ཡང་༸གོང་ས་མཆོག་གིས་ཐོག་མར་སློབ་མ་རྣམས་ཀྱི་དྲི་བར་བཀའ་ལན་སྩལ་བསྟུན། དུས་རབས་ ༢༡ ནང་འཛམ་གླིང་ཞི་བདེ་ལྡན་པ་ཞིག་བཟོ་རྒྱུར་གཞོན་སྐྱེས་རྣམས་ལ་འགན་ཡོད་པ་དང་། ཨིན་སྐད་ནི་རྒྱལ་སྤྱིའི་སྐད་ཡིག་ཅིག་ཡིན་སྟབས། དེའི་ཐོག་ནས་ཕྱི་ནང་གང་སར་འབྲེལ་བ་བྱ་རྒྱུ་ཧ་ཅང་ཕན་ཐོགས་ཡོད་པར་བརྟེན། ཉི་ཧོང་བ་ཚོས་ཨིན་སྐད་ལ་དོ་སྣང་བྱེད་དགོས་པ་གལ་ཆེ་ཡིན་སྐོར། དེ་བཞིན་དུས་རབས་ ༢༠ སྐབས་འཛམ་གླིང་དམག་ཆེན་དང་གཉིས་བརྒྱབ་པར་བརྟེན་མི་གྲངས་ས་ཡ་མང་པོ་དམར་གསོད་བཏང་ཡོད་སྐོར་དང་། ད་ཆ་གོ་ལ་གཅིག་གྱུར་གྱི་གནས་སྟངས་འོག་ང་ཚོ་དང་ཁོ་པ་ཚོ་ཞེས་དཀའ་ངལ་འཕྲད་སྐབས་ལམ་སེང་འཚེ་བའི་སྟོབས་ཤུགས་ལ་བརྟེན་ནས་དཀའ་ངལ་སེལ་ཐབས་བྱ་རྒྱུའི་དེ་སྔའི་ལམ་སྲོལ་རྙིང་པའི་ལྟ་ཚུལ་དེ་དུས་ཚོད་ཡོལ་ཟིན་ཡང་། ད་དུང་ང་ཚོས་བསམ་བློའི་འདུ་ཤེས་དེ་མུ་མཐུད་ནས་རྒྱུན་འཛིན་བྱེད་བཞིན་པ་ལས་དོན་དངོས་ཀྱི་འཛམ་གླིང་གནས་སྟངས་ནི། ཁོར་ཡུག་དང་དཔལ་འབྱོར་སོགས་གནས་སྟངས་གང་གི་ཆ་ནས་ང་ཚོ་ཚང་མ་འགྲོ་བ་མི་རིགས་གཅིག་གྱུར་གྱི་འདུ་ཤེས་འཛིན་ནས་གཅིག་ལ་གཅིག་བརྟེན་དགོས་པའི་གནས་སྟངས་ཆགས་ཟིན་པ་དང་། འཚེ་བའི་ལམ་ནས་རང་རྒྱལ་གཞན་ཕམ་ཞིག་ཡོང་བའི་དབང་དུ་བཏང་བ་ཡིན་ནའང་རྒྱལ་ཁ་ཐོབ་མཁན་དེར་ངོ་གདོང་ལ་ལྟ་སྐབས་འདོད་བློ་ཚིམས་པ་ལྟ་བུ་སྣང་སྲིད་ཀྱང་བསམ་བློའི་ཞེ་ཕུག་དེར་བློ་བདེ་བག་ཕེབས་གང་ཡང་མེད། ཅེས་སོགས་ཀྱི་བཀའ་སློབ་སྩལ། དེ་རྗེས་སླར་ཡང་སློབ་ཕྲུག་རྣམས་ཀྱི་དྲི་བར་བཀའ་ལན་སྩལ་བ་སོགས་ཁྱོན་སློབ་གྲྭ་དེར་ཆུ་ཚོད་གཉིས་ཙམ་བཀའ་སློབ་སྩལ་རྗེས་ཉིན་གུང་ལྗགས་སྨིན་དགྱེས་བཞེས་མཛད། དེ་རྗེས་༸གོང་ས་མཆོག་ཉི་ཧོང་གི་གྲོས་ཚོགས་ནང་ཆིབས་སྒྱུར་བསྐྱངས་ཡོད་པ་བཅས། །
