དེ་སྔ་ངོས་རང་ཐེ་ལེན་དུ་ཐོག་མར་བསྐྱོད་སྐབས་ཁུལ་དེར་སངྒ་ར་ཇ། ཞེས་པའི་ནང་པའི་བླ་མ་ཁོང་དང་མཇལ་སྐབས་ཡེ་ཤུའི་ཆོས་པ་ཚོས་སྤྱི་ཚོགས་ཁྲོད་མང་ཚོགས་རྣམས་ལ་ཁ་ཡོད་ལག་ཡོད་ཀྱི་ཞབས་ཞུའི་ལས་རིམ་འདྲ་མིན་སྤེལ་བཞིན་ཡོད་པ་ལྟར་ང་ཚོ་ནང་པའི་དགེ་འདུན་པ་ཚོས་ཀྱང་དེ་མཚུངས་གནང་ཐུབ་ན་དགེ་མཚན་ཆེ་སྐོར་ཞུས་པ་ཡིན། སྐབས་དེར་ཁོང་གིས་ནང་པའི་དགེ་འདུན་པ་ཚོ་གནས་དབེན་པར་བསམ་གཏན་ལ་བརྩོན་དགོས་སྐོར་གསུངས་བྱུང་། སྤྱིར་ཁོང་གི་བཀའ་མོལ་དེར་ངོས་རང་མོས་མཐུན་ཡོད། འོན་ཀྱང་སྤྱི་ཚོགས་ནང་མར་ཐོན་ནས་མང་ཚོགས་ལ་ཞབས་ཞུ་བསྒྲུབ་ཐུབ་པ་བྱུང་ན་གཉིས་ཕན་ཡོང་རྒྱུ་རེད། དེར་བརྟེན་ཕན་ཐོགས་ཧ་ཅང་ཡོད་པ་ཞིག་རེད། ད་ཆ་རྗེ་བཙུན་དམ་པ་ཚོགས་པ་འདི་ནང་ཆོས་སློབ་གཉེར་བྱེད་ཡུལ་ཙམ་མིན་པར་སྤྱིར་ནང་པའི་ལྟ་གྲུབ་དང་ཚད་མ་རིག་པའི་རྣམ་གཞག་སོགས་ཐུན་མོང་གི་ཤེས་ཡོན་སློབ་སྦྱོང་བྱེད་ཡུལ་བསྟི་གནས་ཁང་ཞིག་བཟོ་དགོས་སྐོར་སོགས་བཀའ་སློབ་སྩལ་རྗེས།
བགྲོ་གླེང་གོ་སྒྲིག་ཞུ་མཁན་དགའ་ལྡན་དགོན་པ་དང་། Tritiya Dharma Chakra ཐེབས་རྩ། སོག་ཡུལ་རྒྱལ་ཡོངས་གཙུག་ལག་སློབ་གཉེར་ཁང་། ཚན་རིག་དང་འཕྲུལ་ལས་ཀྱི་གཙུག་ལག་སློབ་གཉེར་ཁང་བཅས་ཚོགས་པ་བཞི་ཡིན་འདུག་པ་བཅས།།
