༢༠༡༦ ཟླ་ ༡༡ ཚེས་ ༧ རེས་གཟའ་ཟླ་བ།
༄༅། །ཕྱི་ལོ་ ༢༠༡༦ ཟླ་ ༡༡ ཚེས་ ༧ ཉིན་བཞུགས་སྒར་གྱི་ཉེ་འཁྲིས་སུ་ཆགས་པའི་དབུས་སྣེ་ལེན་འབྲེལ་མཐུད་ཁང་གི་ཚོགས་ཁང་དུ་བོད་མིའི་སྒྲིག་འཛུགས་ཀྱི་ཕྱོགས་མཐའ་ས་གནས་འགོ་འཛིན་ལས་ཁུངས་ཀྱི་སྲི་ཞུའི་ལས་བྱེད་ཁག་གཅིག་ལ་ཉིན་བཅུའི་རིང་འཛིན་སྐྱོང་དང་འབྲེལ་བའི་ཟབ་སྦྱོང་དབུ་འཛུགས་གནང་ཡོད།
དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༡༠།༣༠ ཐོག་ཟབ་སྦྱོང་དབུ་འབྱེད་ཀྱི་མཛད་སྒོའི་སྐུ་མགྲོན་གཙོ་བོ་སྲིད་ཚབ་དཔལ་འབྱོར་བཀའ་བློན་བཀའ་བློན་སྐོུ་ཀརྨ་ཡེ་ཤེས་མཆོག་དང་། ལས་བྱེད་འདེམས་ལྷན་གྱི་ཚོགས་གཙོ་ཤོ་ཟུར་བསོད་ནམས་ཆོས་འཕེལ་མཆོག ལས་བྱེད་འདེམས་ལྷན་གྱི་དྲུང་ཚབ་འཇིགས་མེད་ཚེ་རིང་ལགས། སྣེ་ལེན་ཁང་གི་འགན་འཛིན་དཔལ་ལྡན་དོན་གྲུབ་ལགས། ཕྱོགས་མཐའ་ཁག་ནས་ཟབ་སྦྱོང་ཐོག་བཅར་བའི་སྲི་ཞུའི་ལས་བྱེད་བཅས་ཚང་འཛོམས་ཐོག་དཔལ་འབྱོར་བཀའ་བློན་མཆོག་ནས་ཟབ་སྦྱོང་དབུ་འབྱེད་ཀྱི་སྣང་གསལ་ཞལ་ཕྱེ་གནང༌རྗེས་རྟེན་འབྱུང་གསོལ་ཇ་འབྲས་སིལ་འདེགས་འབུལ་ཞུས། 
དེ་ནས་འདེམས་ལྷན་ཚོགས་གཙོ་མཆོག་ནས་ཟབ་སྦྱོང་གི་དགོས་དམིགས་ངོ་སྤྲོད་གསུང་བཤད་གནང༌གྲུབ་བསྟུན། འདེམས་ལྷན་དྲུང་ཆེས་ཟབ་ཁྲིད་པ་རྣམས་ཀྱི་ངོ་སྤྲོད་དང༌སློབ་ཚན་སྐོར་འགྲེལ་བརྗོད་གནང༌། དེ་རྗེས་དཔལ་འབྱོར་བཀའ་བློན་མཆོག་ནས་ཟབ་སྦྱོང་བ་རྣམས་ལ་བོད་མི་ཞིག་ཡིན་པ་ཆ་ནས་ྋགོང་ས་མཆོག་གི་བཀའ་དྲིན་ནམ་ཡང་བརྗེད་རྒྱུ་མེད་པ་མ་ཟད། མགོན་པོ་གང་ཉིད་མཆོག་གི་བཀའ་སློབ་ལམ་སྟོན་ལྟར་ཕེབས་དགོས་པ། ཟབ་སྦྱོང་བ་རྣམས་སྲི་ཞུའི་ལས་བྱེད་ཞིག་ཡིན་སྟབས་ལྷག་བསམ་རྣམ་དག དྲང་བདེན། བོད་མིའི་སྒྲིག་འཛུགས་ཀྱི་སྒྲིག་གཞི་དང་མ་འགལ་བའི་ཐོག་ཕྱག་ལས་གནང་དགོས་པ། ཕྱོགས་མཐའི་ལས་བྱེད་རྣམས་དུས་རྟག་ཏུ་མི་མང་མཉམ་འབྲེལ་ལམ་ཞུ་སྐབས་སྣེ་ལེན་ཡག་པོ་ཞུ་དགོས་པ་དང་བཀའ་མོལ་ཡག་པོ་གནང་དགོས་པ། ཟབ་སྦྱོང་འདི་བཞིན་ཨ་རིའི་རོགས་ཚོགས་ USAID རོགས་དངུལ་འོག་གི་ལས་གཞི་ཞིག་ཡིན་པ་དང༌། ལས་གཞི་ཚགས་ཚུད་གང་ལེགས་ཡོང་བར་ཚང་མའི་ཕྱར་གྲུ་མཉམ་འདེགས་དགོས་པ། ཉིན་བཅུའི་ཟབ་སྦྱོང་འདི་ཉིད་དོན་དང་ལྡན་པ་ཞིག་ཡོང་བ་ཞིག་བྱེད་དགོས་སྐོར་སོགས་ཀྱི་གསུང་བཤད་གནང་།
དེ་རྗེས་འདེམས་ལྷན་དྲུང་གཞོན་ཚེ་རིང་ལྷ་མོ་ལགས་ཀྱིས་ཐུགས་རྗེ་ཆེ་ཞུའི་གསུང་བཤད་གནང་སྟེ་མཛད་སྒོ་ལེགས་པར་མཇུག་སྒྲིལ་ཡོད། སྤྱིར་ཐེངས་འདིའི་ཟབ་སྦྱོང་ནང་ཕྱོགས་མཐའི་སྲི་ཞུའི་ལས་བྱེད་ཟབ་སྦྱོང་གི་གོ་སྐབས་མ་ཐོབ་བ་གྲངས་ ༢༦ ཡོད༌འདུག་པ་བཅས།།
