༢༠༡༦ ཟླ་ ༡༡ ཚེས་ ༡༡ རེས་གཟའ་པ་སངས།
Photo courtesy /Masaya Noda
༄༅། །ཕྱི་ལོ་ ༢༠༡༦ ཟླ་ ༡༡ ཚེས་ ༡༠ ཉིན་༸གོང་ས་མཆོག་གིས་ཉི་ཧོང་གི་གྲོང་ཁྱེར་ཨོ་ས་ཀའི་ Osaka སེ་ཕུ་སློབ་གྲྭ་ཆེ་བའི་ Seifu High School ནང་སློབ་མ་གྲངས་ ༣༠༠༠ བརྒལ་བར་དུས་རབས་ ༢༡ ནང་པ་ཞེས་པའི་བརྗོད་གཞིའི་ཐོག་བཀའ་སློབ་སྩལ་རྗེས་སློབ་ཕྲུག་རྣམས་ཀྱི་དྲི་བ་ཁག་གཅིག་ལ་བཀའ་ལན་སྩལ།
དེ་ཡང་སློབ་ཕྲུག་གཅིག་གིས། ཆབ་སྲིད་པ་ཚོར་ཚང་དགོས་པའི་ཁྱད་ཆོས་གཙོ་བོ་གང་ཡིན། ཞེས་པའི་དྲི་བར་༸གོང་ས་མཆོག་གིས། སྤྱིར་ཆབ་སྲིད་པ་ཚོའང་གྲོ་བ་མི་ཞིག་ཡིན། འོན་ཀྱང་དྲང་བདེན་དང་ཕྱི་གསལ་ནང་གསལ་དགོས་རྒྱུ་ཧ་ཅང་གལ་ཆེན་པོ་རེད། དེ་བྱུང་ན་གཞན་གྱིས་རང་ལ་ཡིད་ཆེས་བློ་གཏད་བྱེད་ཐུབ་པ་དང་། རང་ངོས་ནས་ཀྱང་སྤྱི་ཚོགས་དང་མང་ཚོགས་ལ་དོན་དམ་གྱི་སེམས་ཁུར་ལྡན་པའི་ཐོག་ནས་ཞབས་འདེགས་བསྒྲུབ་དགོས། དེ་ཡང་གཙོ་བོ་གཞན་གྱི་བདེ་སྡུག་ལ་བྱམས་བརྩེའི་བསམ་བློའི་ཐོག་ནས་ལས་ཀ་བྱས་པ་ཡིན་ན་འགོ་ཁྲིད་ནུས་པ་དེའི་ཐོག་ནས་ཐོན་རྒྱུ་རེད། ཅེས་བཀའ་ལན་སྩལ།
Photo courtesy /Masaya Noda
ཡང་སློབ་མ་གཞན་ཞིག་གིས། རྡུལ་ཕྲན་མཚོན་ཆའི་སྐོར་གྱི་དྲི་བར་༸གོང་ས་མཆོག་གིས། དུས་རབས་ ༢༠ འགོ་སྟོད་དུ་མི་རྣམས་ཀྱིས་རྩོད་རྙོག་རྣམས་འཚེ་བའི་སྟོབས་ཤུགས་ཁོ་ནས་སེལ་ཐུབ་རྒྱུར་ངོས་འཛིན་བྱས་ནས་ཕྱིན་པ་རེད། འོན་ཀྱང་དུས་རབས་དེའི་མཇུག་ཙམ་ནས་མི་མང་པོས་ཐབས་ལམ་གཞན་ཞིག་འཚོལ་ཐབས་བྱས་ནས་ད་ཆ་འཛམ་གླིང་ཞི་བདེའི་ཐོག་བསམ་བློ་གཏོང་མཁན་དང་དེའི་ཐོག་ལས་འགུལ་སྤེལ་ཤུགས་ཆེ་རུ་འགྲོ་བཞིན་ཡོད། ལྷག་པར་དུ་ཁྱེད་ཚོ་ཉི་ཧོང་པ་རྣམས་རྡུལ་ཕྲན་མཚོན་ཆའི་གནོད་འཚེ་ཐེངས་གཉིས་ཕོག་ཡོད་སྟབས་འཛམ་གླིང་ཞི་བདེའི་ལས་འགུལ་སྤེལ་རྒྱུའི་ཐོག་དམིགས་བསལ་འགན་ཞིག་ཡོད། དེར་བརྟེན་ཁྱེད་ཚོས་ཞི་བདེའི་ལས་འགུལ་གྱི་སྣེ་ཁྲིད་ནས་རིམ་བཞིན་རྡུལ་ཕྲན་མཚོན་ཆ་ཇེ་ཉུང་དུ་གཏོང་ཐབས་ཙམ་མ་ཟད། མཐར་འཛམ་གླིང་ནང་རྡུལ་ཕྲན་མཚོན་ཆ་རྩ་མེད་བཟོ་ཐབས་བྱེད་དགོས། ཞེས་བཀའ་ལན་སྩལ། གཞན་ཡང་༸གོང་ས་མཆོག་ཨིན་སྐད་དེ་རྒྱལ་སྤྱིའི་སྐད་ཡིག་ཅིག་ལ་ངོས་འཛིན་མཛད་བཞིན་ཡོད་པ་དང་། མགོན་པོ་གང་ཉིད་མཆོག་ཨིན་སྐད་ཀྱི་གནས་ཚད་ཧ་ཅང་སྐྱོ་པོ་ཞིག་ལས་མེད་ཀྱང་དེ་ཙམ་མཁྱེན་པ་དེས་ས་གནས་གང་དུ་ཆིབས་སྒྱུར་བསྐྱངས་གནང་མཛད་ཀྱང་གཞན་དང་འབྲེལ་ལམ་མཛད་རྒྱུར་ཧ་ཅང་ཕན་ཐོགས་ཡོད་སྟབས། ལོ་མང་རིང་ནས་༸གོང་ས་མཆོག་གིས་ཉི་ཧོང་པ་གཞོན་སྐྱེས་ཚོར་ཨིན་སྐད་ཐོག་དོ་སྣང་ཏོག་ཙམ་སྤྲོད་དགོས་པའི་ལམ་སྟོན་མཛད་ཡོད་པ་དང་། ཨིན་སྐད་ཤེས་པ་ཡིན་ན་འཛམ་གླིང་གཞན་དང་འབྲེལ་ལམ་ཡག་པ་བྱེད་ཐུབ་རྒྱུ་ཡིན་སྐོར་བཀའ་ལན་སྩལ།
ཉིན་གུང་ལྗགས་སྨིན་གྲུབ་རྗེས་༸གོང་ས་མཆོག་གིས་ཉི་ཧོང་གི་གསར་འགྱུར་བརྙན་འཕྲིན་ཚན་པའི་གསར་འགོད་པ་ལྕམ་ཏོ་མོ་ཀོ་ན་ག་ནོ་ Ms. Tomoko Nagano ལགས་ཀྱི་བཅར་འདྲི་དང་ལེན་མཛད། སྐབས་དེར་གསར་འགོད་པས་༸གོང་ས་མཆོག་ཡུལ་དེར་ཆིབས་སྒྱུར་ལན་མང་མཛད་དགོས་དོན་གང་ཡིན་གྱི་དྲི་བར་བཀའ་ལན་སྩལ་དོན། དང་ཐོག་དེར་ངོས་རང་འདིར་མགྲོན་འབོད་བྱས་པར་བརྟེན་དེར་ངོས་ལེན་མ་བྱས་ན་གླེན་རྟགས་རེད། དེ་བས་གལ་ཆེ་བ་ནི་ངོས་རང་འཛམ་གླིང་མི་འབོར་ཐེར་འབུམ་བདུན་ཡོད་ཁོངས་ནས་མི་གཅིག་ཆགས་ཡོད། ང་ཚོ་ཚང་མས་འགྲོ་བ་མི་རིགས་སྤྱིའི་བདེ་དོན་ལ་བསམ་བློ་གཏོང་། འདི་ནི་ང་ཚོ་ཐུན་མོང་གི་ལས་འགན་ཞིག་ཡིན་པར་ངོས་ལ་ངེས་ཤེས་རྙེད་བྱུང་། དེར་བརྟེན་ངོས་ལ་གོ་སྐབས་ནམ་བྱུང་སྐབས་འགྲོ་བ་མི་རིགས་གཅིག་གྱུར་གྱི་འདུ་ཤེས་འཛིན་རྒྱུ་གལ་ཆེ་ཡིན་སྐོར་རང་གི་བསམ་ཚུལ་རྣམས་ཤོད་བཞིན་ཡོད། ཅེས་བཀའ་ལན་སྩལ།
ཡང་གསར་འགོད་པས་ཉེ་ལམ་ཨ་རིའི་རྒྱལ་ཡོངས་འོས་བསྡུ་ཆེན་མོའི་སྐོར་དང་། སྐུ་ཞབས་ཌོ་ནལ་ཊམ་ Trump མཆོག་ཨ་རིའི་སྲིད་འཛིན་གསར་པར་འོས་འདེམས་རྗེས་ཁོང་དང་འབྱུང་འགྱུར་མཇལ་འཕྲད་ཞུ་གནང་མཛད་ཐུབ་པའི་ཐུགས་རེ་མཛད་བཞིན་ཡོད་མེད་ཀྱི་དྲི་བར་བཀའ་ལན་སྩལ་དོན། གུ་ཡངས་དང་མང་གཙོའི་རིང་ལུགས་གཏིང་ཚུགས་པའི་ཨ་རི་ནི་རང་དབང་ལྡན་པའི་རྒྱལ་ཁབ་ཀྱི་སྣེ་ཁྲིད་མཁན་གཙོ་བོ་ཡིན་པར་ངོས་ཀྱིས་ངོས་འཛིན་ཞུ་བཞིན་ཡོད། ཉེ་ལམ་འོས་བསྡུ་ཆེན་མོའི་གྲུབ་འབྲས་དེས་ཨ་རིའི་མི་མང་གི་མངོན་འདོད་གང་ཡིན་པ་གསལ་འདོན་བྱས་ཡོད། ངོས་ཀྱིས་བསམ་པར་ད་ལྟའི་གནས་སྟངས་ལ་ཧ་ལས་པའི་འགྱུར་བ་ཞིག་འགྲོ་རྒྱུ་མ་རེད། འོན་ཀྱང་ང་ཚོས་སྒུག་ནས་བལྟ་རྒྱུ་རེད། ངོས་ཀྱིས་དེ་སྔའི་ཨ་རིའི་སྲིད་འཛིན་དང་གྲོས་ཚོགས་གོང་འོག་གི་དབུ་ཁྲིད་རྣམས་དང་མཇལ་འཕྲད་བྱུང་བ་ལྟར། འབྱུང་འགྱུར་ཡང་ངོས་ཀྱིས་སྲིད་འཛིན་གསར་འདེམས་སྐུ་ཞབས་ཊོམ་མཆོག་དང་མཇལ་ཐུབ་རྒྱུ་རེད། བསམ་པའི་རེ་བ་ཏན་ཏན་རྒྱག་བཞིན་ཡོད། ཅེས་བཀའ་ལན་སྩལ།།
