༢༠༡༦ ཟླ་ ༡༡ ཚེས་ ༡༧ རེས་གཟའ་ཕུར་བུ།
ཉི་ཧོང་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་མི་རྣམས་ལ་བཀའ་སློབ་སྩོལ་བཞིན་པ།
༄༅། །ཕྱི་ལོ་ ༢༠༡༦ ཟླ་ ༡༡ ཚེས་ ༡༦ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་སྔ་དྲོ་ཐོག་མར་ཉི་ཧོང་གྱི་རྒྱལ་ས་ཊོག་ཡོའི་ནང་སེ་ཏ་ག་ཡ་འབྲིང་རིམ་སློབ་གྲྭར་བཀའ་སློབ་སོགས་སྩལ་རྗེས་ཉིན་གུང་ལྗགས་སྨིན་དགྱེས་བཞེས་མཛད།
དེ་རྗེས་༸གོང་ས་མཆོག་ཉི་ཧོང་གི་གྲོས་ཚོགས་སུ་ཇི་ལྟར་གདན་ཞུའི་གསོལ་འདེབས་ཞུ་དོན་ལྟར་ཆིབས་སྒྱུར་བཀའ་དྲིན་བསྐྱངས་གནང་མཛད། དེ་ཡང་མགོན་པོ་གང་ཉིད་མཆོག་ཉི་ཧོང་གི་གྲོས་ཚོགས་འོག་མའི་ནང་༸ཞབས་སོར་འཁོད་མཚམས་གྲོས་ཚོགས་ཀྱི་ཆབ་སྲིད་ཚོགས་པ་ལྔའི་འཐུས་མི་རྣམས་ཀྱིས་ཕེབས་བསུའི་སྣེ་ལེན་གཟབ་རྒྱས་ཞུས། དེ་ནས་གྲོས་ཚོགས་འོག་མའི་ཚོགས་ཁང་དུ་ཉི་ཧོང་གྲོས་ཚོགས་བོད་དོན་རྒྱབ་སྐྱོར་ཚོགས་པའི་གྲོས་ཚོགས་འཐུས་མི་སོགས་ཁྱོན་གྲོས་ཚོགས་འཐུས་མི་ ༢༢༩ དགའ་བསུ་རྒྱ་ཆེ་ཞུས་འདུག
སྐབས་དེར་ཐོག་མར་རྡ་སར་བཅར་ནས་༸གོང་ས་མཆོག་མཇལ་འཕྲད་ཞུ་མྱོང་མཁན་གྱི་གྲོས་ཚོགས་འཐུས་མི་ཁག་གཅིག་གིས་རང་ཉིད་རྡ་རམ་ས་ལར་༸གོང་ས་མཆོག་དང་མཇལ་འཕྲད་རྗེས་སེམས་འགུལ་ཇི་ལྟར་ཐེབས་མིན་སྐོར་ངོ་སྤྲོད་ཞུས་པ་དང་སྦྲགས། ཐེངས་འདིར་༸གོང་ས་མཆོག་ཉི་ཧོང་གྲོས་ཚོགས་ནང་ཆིབས་སྒྱུར་བསྐྱངས་ཐེངས་གསུམ་པ་ཆགས་ཡོད་སྐོར་དང་། མགོན་པོ་གང་ཉིད་མཆོག་ཉི་ཧོང་གྲོས་ཚོགས་ནང་ཇི་ཙམ་ཆིབས་སྒྱུར་བསྐྱངས་གནང་མཛད་ཀྱང་བཀའ་སློབ་གསན་མཁན་ཇེ་མང་དུ་འགྲོ་བཞིན་ཡོད་སྐོར་སྙན་སེང་ཞུས།
གྲོས་ཚོགས་འོག་མའི་ཚོགས་ཁང་ནང་དུ་༸གོང་ས་མཆོག་ལ་དྲི་བ་ཞུ་བཞིན་པ།
དེ་རྗེས་༸གོང་ས་མཆོག་གིས་བཀའ་སློབ་སྩལ་བའི་སྙིང་དོན། མགོན་པོ་གང་ཉིད་མཆོག་འགྲོ་བ་མི་ཞིག་ཡིན་པའི་ཆ་ནས་འཛམ་གླིང་མི་འབོར་ཐེར་འབུམ་བདུན་ཡོད་པ་རྣམས་མི་གཅིག་གྱུར་ཡིན་བསམས་པ་དང་། ནང་པའི་དགེ་སློང་ཞིག་ཡིན་པའི་ངོས་ནས་བྱམས་བརྩེ་དང་བཟོད་བསྲན། ཆོག་ཤེས་སོགས་བསླབ་བྱ་དེ་དག་གོང་མཐོར་གཏོང་ཐབས་དང་ཆོས་ལུགས་མཐུན་སྒྲིལ་གོང་སྤེལ་ཐོག་ཐུགས་བརྩོན་མཛད་བཞིན་པ་དང་། བོད་མི་ཞིག་ཡིན་པའི་ཆ་ནས་སྤྱིར་བོད་མིའི་ཆབ་སྲིད་ཀྱི་ལས་འགན་ནས་ད་ཆ་རྒས་ཡོལ་ཆ་ཚང་ཞུས་ཟིན་ཡང་། འཛམ་གླིང་གནའ་རབས་ཀྱི་རིག་གཞུང་ཧ་ཅང་ཕྱུག་པའི་བོད་ཀྱི་ཐུན་མིན་རིག་གནས་སྲུང་སྐྱོབ་མཛད་རྒྱུའི་ཐོག་ཐུགས་བརྩོན་མཛད་བཞིན་ཡོད་པ་མ་ཟད། བོད་མཐོ་སྒང་གི་རང་བྱུང་ཁོར་ཡུག་དེ་བོད་ཙམ་མ་ཟད། འཛམ་གླིང་ཡུལ་གྲུ་མང་པོ་ཞིག་གི་བདེ་སྡུག་དང་འབྲེལ་བ་ཡོད་སྟབས་ཧ་ཅང་གལ་ཆེན་པོ་ཆགས་ཡོད་སྐོར་བཀའ་སློབ་སྩལ། དེ་བཞིན་༸གོང་ས་མཆོག་གིས། ཆབ་སྲིད་ཐོག་ནས་བརྗོད་པ་ཡིན་ན་ང་ཚོས་བོད་རང་བཙན་རྩོད་ཀྱི་མེད། དཔལ་འབྱོར་སོགས་ཀྱི་གནས་སྟངས་མང་པོ་ཞིག་ཐོག་ནས་བོད་མི་ཚོས་རྒྱ་ནག་མི་མང་སྤྱི་མཐུན་རྒྱལ་ཁབ་དང་ལྷན་མཉམ་སྡོད་བྱ་རྒྱུའི་ཐོག་བསམ་བློ་གཏོང་བཞིན་ཡོད། འོན་ཀྱང་བོད་མིའི་གནད་དོན་དེ་ནི་ཆབ་སྲིད་རྐྱང་པའི་གནད་དོན་ཞིག་རྩ་བ་ནས་མ་རེད། དེ་ནི་བོད་ཀྱི་ཐུན་མིན་ཆོས་དང་རིག་གཞུང་། སྐད་ཡིག ཁོར་ཡུག་སོགས་གཅེས་སྲུང་བྱ་རྒྱུ་འདི་ང་ཚོའི་ལས་འགན་ཆགས་ཡོད། ཅེས་བཀའ་སློབ་སྩལ་བསྟུན་དྲི་བ་རྣམས་ལ་བཀའ་ལན་སྩལ། སྐབས་དེར་གྲོས་ཚོགས་འཐུས་མི་ཞིག་གི་དྲི་བར་བཀའ་ལན་སྩལ་དོན། རྒྱ་མི་རིགས་ལ་མཚོན་ན་དངོས་ནས་བརྩི་བཀུར་ཞུ་འོས་པ་རེད། ཁོང་ཚོར་ལོ་ངོ་སྟོང་ཕྲག་ལྔའི་ལོ་རྒྱུས་དང་སྤྱི་ཚོགས་ཀྱི་དཔལ་ཡོན་ཧ་ཅང་ཕྱུག་པོ་ཡོད་པའི་མི་རིགས་ཤིག་ཡིན། དངོས་ནས་ལས་ལ་བརྩོན་པའི་མི་རིགས་ཡིན། ཞེས་སོགས་ཀྱི་བཀའ་ལན་སྩལ།
མཐར་༸གོང་ས་མཆོག་གིས་ཉི་ཧོང་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ནང་འཐུས་མི་མང་དུ་འགྲོ་བཞིན་ཡོད་པ་དེ་ནི་བོད་དོན་ལ་རྒྱབ་སྐྱོར་གནང་བ་ཙམ་ཞིག་མིན་པར་བདེན་པ་དང་དྲང་བདེན་ལ་རྒྱབ་སྐྱོར་གནང་བ་ཞིག་མཚོན་བཞིན་ཡོད་སྐོར་བཀའ་སློབ་སྩལ། ལྷན་ཚོགས་གྲོལ་རྗེས་གྲོས་ཚོགས་འཐུས་མི་རྣམས་ཀྱིས་ཚང་ཁ་ཤིག་ཤིག་ཐོག་ནས་༸གོང་ས་མཆོག་ལ་མཇལ་ཁ་ཞུ་བ་དང་སྐུ་པར་ལྷན་སྒྲོན་སོགས་༸གོང་ས་མཆོག་ལ་རྒྱབ་སྐྱོར་གྱི་རྣམ་པ་ཧ་ཅང་མངོན་གསལ་དོད་པོ་བྱུང་འདུག་པ་བཅས།།
